Jeremaia 29 - Nobonob Baibel

Jeremaia nug Juda ag Babilon wanppa diia ukka laih me dayak danab ah dilag pas yom

^1-3 Nebukatnesar nug tatam uɗia, ban ha, Juda eɗatta, nug Juda dilag King Jehoiakin, Jehoiakin anig, Jehoiakinnu ehanittak anuqak danab, Juda dilag ikki danab, laa Jerusalemnu, laa Juda wanppa laih laihnu amu, danab uɗat laala haknu doyak okkai ele diie, aon ukkaeg, Babilon wanppa maatte, ag appa diia ukka laih me dayak danab ah daappig. Nebukatnesar anam he, ag anam appa digmena daappig. Ag Babilon appa digmena daaegeg, haen amu dimppa Jeremaia, nug Jerusalem appa dayaya, nug pas laa Babilon daappig dilagnu ya, me ukkom. Nug danab ah Babilon wanppa diia ukka laih me dayak danab ah daappig oolagppa danab okkai kaino ii mauhppig, mana mettak danab, propet danab, amu danab ah laa oh ele dilagnu yom. Nug ya, Juda dilag king Sedekaia nug Sapan bekka Eleasa, amu Hilkaia bekka Gemaria ele nai laa aoya, Babilon dilag king Nebukatnesar mettaglahnu maate gopiɗ amunu, Jeremaia nug pas nug yom, nug pas amu ele aa eppelahppa meeb, aa aoya goya danab ag appa daappig mattaglahnu aa matom. Pas amuppa amu nai inam dayom.

⁴ Yawe Nukka Ɠagattag Oh Ele, Israel dilag Kayak, Nug danab ah Nug he, ag gemu Jerusalem ii daatteb, ag diia ukka laih me dayak danab ah Babilon wanppa daatteb, Nug ahilagnu, “Da hei, ag Babilon wanppa diia ukka laih me dayak danab ah daatteb,” atte amu, Nug danab ah amu ag nai imu dooglagnu atte.

⁵ “Ag lag buuadna, appa daaglagnu dabmenana, datta ee eppanna, aɗi ee amuppa aotteb ele, ag aon laig!

⁶ Ag amu henan, danab ah ag ewau matulak aonna, ag nid danab, nid ah ele menunna, ag bekkalkad, aɗelkad amu, ag ele nid danab nid ah menuadkkulagnu, ag bekkalkad, aɗelkad dilag danab ah ele mattin anadppeg, ag ewau matulak aweg! Ag kuɗum appatna oiyeg! Agib anam daan, mauhadna laib laib anamib aib daappig.

⁷ Da hei, ag Babilon appa diia ukka laih me dayak danab ah daatteb, amu ag appa aab okkai attenppa daatteb amu, ag aab amu maɗoɗ, keeke kuɗum ele daakkunu uɗat heig! Ag da, Yawe, ag da aab amu ehanidppi, ena daakkunu unuqiɗeg! Aɗinu? Aab amu ena, elele daakku dayeb, ag ele ena, elele daaglag,” awa atte.

⁸ Ao, Yawe Nukka Ɠagattag Oh Ele, Israel dilag Kayak, Nug inam atte. “Ag oolagppan laa ag, ‘Da am Kayaknu propet,’ hambuppuna atteb, o laa ag eman danab daatteb amu, ag ag hambuppualadmananu dabmeig! Ag ahilag nainu oolagppa genab aib dooppig. Amu ag akka, ag tul niitteb amu, ag ahilag tul niiaknu ele aib dabmeppig.

⁹ Aɗinu? Propet amu, eman danab amu ele ag dimppa aɗi bekkunu nai hambuppuak da onilppa ag amelagppa maditteb. Da ag ii maatti goppig.” Yawe Nug anam awa atte.

¹⁰ Amu Yawe Nug inam ele atte. “Babilon nug ɠagattag maɗ 70 dayebeb, nuhig ɠagattag dayak haen amu iitta mekku amunu, haen amuppa da ag Juda, gemu Babilon wanppa diia ukka laih me dayak danab ah daatteb, da ag gumatten ukken heppi, da kobol ena ahilagppa hekkulnu nai ain qakkami am meu ob, ag eɗun ippa uɗiglag.

¹¹ Aɗinu da, Yawe, da anam hekkul? Da ag Juda, da ahilagnu maittak ena laa ele aɗe daattem. Maittak amuam, da heppi, ag maɗoɗ ele daaglag. Da eheɗ hadakkulnu maittak aɗe ii daattem. Da ag, ag ena bena, baɗak iitta daaglagnu dabmak aɗan oiglagnu maittak aɗe daattem.

¹² Da anam ehanadppi, ag eɗun dahilppa uɗin, ag da onil diin, unuqiɗkkulag. Ag unuqiɗppeg, da ahilag unuqittak dookkul.

¹³ Ag da aniɗna dim lamiɗkkulagnu mattiɗkkulag, amu ag meulag ohppa amu henana, ag da aniɗkkulag.

¹⁴ Ge, ag da anam mattiɗnana, ag da aniɗkkulag. Ag da anam aniɗppeg, da omaladppi, ag wan laa, appan danab ag aɗualatteg, ag ag eppelagppa daatteb amu, da appanu omaladppi, ag eɗun uɗin, wan imuppa daaglag. Da ag wanppan wan oh, da hei, ag gona appa daatteb, da appanu qagmaatten omaladppi, ag wan atu oh, da hei, ag gona diia ukka laih me dayak danab ah daatteb amu, ag appanu eɗun uɗin, iguppa daaglag,” awa atte.

¹⁵ Ag Babilon appa diia ukka laih me dayak danab ah daatteb, ag, “Yawe Nug he, propet ig oonigppa daan, ihinignu kobol ena bekkunu atteb amunu anam bekku,” akkulag.

¹⁶ Amge Yawe, Nug king gemu Dawitnu sia kingppa daatte, amu Jerusalem danab ah, ag ag ele tiilag laippu, gemu ippa ina daatteb, Babilon ag ag ele ii diin goppig, ag Babilon appa diia ukka laih me dayak danab ah appa ii daatteb amu, Yawe Nug ahilagnu inam atte.

¹⁷ Ao, Yawe Nukka Ɠagattag Oh Ele, Nug ahilagnu inam atte. “Da heppi, ag qep elabppa, enugppa, amu oɗe nau danab kuɗum aqe mauhtteb ele, ag amuppa mauhkkulag. Da heppi, ag ad fig meu naunab, danab lakkunu elele iitta, ag anamnab aakku daaglag.

¹⁸ Da heppi, kekeɗ ag qep elabppa aqappeg, enug aqeebeb, oɗe nau danab kuɗum aqe mauhtteb ele aqeebeb, wan atu laa ohppan danab ah ag ahilagnu naunab doon, guguattak daaglagnu uun autnanab aoglag. Amu da heppi, gemu Juda daatteb ag wan laalappa diia ukka laih me dayak danab ah daaglag amu, wan amuppan danab ah ag ag eheɗ laa aoglagnu anak waappa daaglagnu anana, ag anadna, amelag iɗuak doon, ag ahilagnu, ‘Keeke hamunab,’ dooglag.

¹⁹ Aɗinu da anam hekkul? Ag Juda danab gemu Jerusalem, amu Juda wan ohppa daatteb ele, ag dahil nai dooglagnu uun, ii dooppig. Da nai amu baubau dahilad maɗi nid, ag propet danab, da ag mattai, ag aon gona appig, amge ag ii dooppig. Ag gemu Juda wanppa daatteb, ag anam heppig, amge ag Juda ag gemu Babilon wanppa diia ukka laih me dayak danab ah daatteb, ag ele dahil nai amu ii dooppig.” Yawe Nug anam awa atte.

²⁰ Anam amunu, ag Juda danab ah, Yawe Nug he, ag ahan gona, gemu Babilon wanppa diia ukka laih me dayak danab ah daatteb, ag Yawenu nai imu doyeg!

²¹ Yawe Nukka Ɠagattag Oh Ele, Israel dilag Kayak, Nug Kolaia bekka Ahap, am Masea bekka Sedekaia ele, aa am ahilti propet aɗit, aa hambuppuya, aa Yawe keeke laa ippuanatom attep, amge Nug ii ippuanatom. Aa dimppa aɗi bekkunu nai hambuppuak amu madittep, amge aa mattieheh, Yawe Nug danab aɗit amu dilahnu aɗi atte amu, ag Babilon appa diia ukka laih me dayak danab ah daatteb, ag doyeg! Nug atte. “Da heppi, aa Babilon dilag king Nebukatnesar eppegppa daapeɗ, ag laa ag neegna daappeppeg, Nebukatnesar nug heeb, aa mauhkkulah.

^22-23 Danab aɗit amu aa Israel oolagppa eheɗ nau hepiɗ, gemu ele hettep amu, da doottem. Da anat-ttem. Aa mudippan lailti dilag ah ele ewau pakkua gappai heya, aa hambuppuak nai da ii matami, da aa mattiglahnu ii ami amu, aa nai amu mattiya, da ippuanatmi attep amunu, aa eheɗ hak ahilah, diig amunu qinob aa nob naunab aopeɗ, Juda danab ah oh ag Babilon wanppa diia ukka laih me dayak danab ah daatteb, ag laanu nug eheɗ laa awaknu anak waappa daakkunu akkulagnu hekkulag amu, ag inam akkulag. ‘Babilon dilag king nug Sedekaia, amu Ahap ele aab aɗuppa manate mauhpiɗ, amubia Yawe Nug heeb, nahip-ppa baɗ!’ aon akkulag.” Yawe Nug anam awa atte.

Yawe Nug Jeremaia, Semaianu nai laa ele mettom

²⁴ Amu Yawe Nug Jeremaia nug nai laa Semaia, nug Nehelam baekkudppan laa amu, nug nug amegppa nai laa ab dookkunu a, ⌊nug nai nuhignu inam me ukkom⌋.

²⁵ “Yawe Nukka Ɠagattag Oh Ele, Israel dilag Kayak, Nug inam atte. ‘Na oninppa na pas laala maatte uɗippig. Pas amuam Juda danab ah oh Jerusalem daatteb, amu Masea bekka Sepanaia, nug mana mettak danab, amu mana mettak danab laa ele dilag. Na amu henana, na Sepanaianu pasppa inam ae doyom.

²⁶ “Yawe Nug na mana mettak danab Jehoiada abenab aona, na Yawe laug gumakkutnu tituanittom amunu, danab auntai nug kaaka danab dayaya, nug ippu haaha, propet danab bia bette amu, na danab amu aon, maniguittak naunab nau, baeg, eppeg ele adppa qakkak, duug am aenppa qakkak amu, na amuppa mekkutoitte.

²⁷ Anam amunu, aɗinu na Anatot ted Jeremaia, nug ag oolagppa, ‘Da propet danab,’ anan oitte amu, aɗinu na nug bu anam ii mettame?

²⁸ Aɗinu? Nug pas laa me, ig Babilon ippa daattem, ihinigppa neum, amu pas amuppa nug yom. ‘Ag paha eɗun ii uɗimna. Iitta. Ag haen elab appa daaglag amunu, ag lag hena, ag appa daaglagnu dabmak aon oinna, ag dad eppona, aɗi ee amuppa aona, amu ag aon laig!’ yom ⌊amunu, aɗinu na bu ii mettame?” ’ Semaia, na pas amuppa Sepanaia dookkunu anam yaame amunu, na bu aokkut.⌋” Yawe Nug Jeremaia amegppa Semaianu anam aum.

²⁹ Amu Semaia nug pas amu me, mana mettak danab Sepanaia nug awom, amge nug pas amu propet Jeremaia amegppa ebqeum.

³⁰ Nug ebqe, Yawe Nug nuhig nai imu Jeremaia mettom.

³¹ “Jeremaia, na nai imu pasppa yaan meppe, Juda danab ah ag Babilon wanppa diia ukka laih me dayak danab ah daatteb amu, ag doyeg! Na inam ye! ‘Yawe Nug Semaia, Nehelam baekkudppa laa amu, nug nuhignu inam atte. “Da Semaia ii mei ahilagppa ukkom; nug nukka dabmaama ahom. Nug amu haaha, nug nai hambuppuak ag amelagppa a, ag aakku oolagppa genab dooppig amunu, Semaia nug dimppa aɗi bekkunu nai hambuppuak amu a dooppig, diig amunu

³² da genabnab genab Nehelam baekkudppan laa, Semaia, amu nug buɗub ele bu madakkul. Nug ag dahil nai tabappeg nekkunu nai mattiom amunu, da heppi, nug, amu nug buɗub oolagppan laa nug dayaya, kobol ena da dahilad danab ah dilagppa hekkul anidkkunu ii daama. Iitta! Ag oh tatam iitta mekkulag.” ’ ” Yawe Nug Semaianu anam awa atte.