Jeremaia 28 - Nobonob Baibel

Jeremaia nug Hanania, nug propet hambuppuak laa, nug nug amegppa aum

¹ Aakku, maɗ amuppaib, maɗ amuam Sedekaia nug haen elab king ba ii dayom, nug Juda dilag king ba dayaya, nuhig king dayaknu maɗ waɗelenu kalam tanig eleppa Asur bekka propet Hanania, Gibeon ted, aria da, mana mettak danab, amu danab ah ele ig Yawe laugppa daamut. Ig anam appa daatta, Hanania nug mana mettak danab, amu danab ah ele noolagppa da amelppa aum.

² “Yawe Nukka Ɠagattag Oh Ele, Israel dilag Kayak, Nug inam atte. ‘Da heppi, ag Juda ag Babilon dilag king waappa ii daamna, ag tuɗidna nug oɗe ii dim lamidmana; danab nug makau laa doɗnu duugppan tuqai he qiie, makau hamu oitte, amubia da hekkul.

³ Amu da heppi, maɗ aɗit ii uuebeb, keeke oh Babilon dilag king Nebukatnesar nug Yawe laugppanu awa, Babilon ukkom amu, laa ag amu eɗun, aon uɗiglag.

⁴ Da amu hekkul, amge ele da heppi, Jehoiakim bekka Jehoiakin, Juda dilag king, amu Juda danab ah laa oh ele Babilon appa diia ukka laih me dayak danab ah daatteb amu, ag ele eɗun uɗiglag. Amuam genab bekkunu diig am, da heppi, ag Juda, ag Babilon waappa ii daamna.’ Yawe Nug anam awa atte,” awa aum.

⁵ Aria, propet hambuppuak Hanania nug anam a amu, propet Jeremaia nug mana mettak danab oh, amu danab ah oh ele Yawe laug ooppa daappig, nug ag noolagppa, Hananianu nai nob ma aum.

⁶ “Genab, anam dayaɗ! Yawe Nug anam hekkunu da ool anam daatte. Na inam ame. ‘Yawe Nug geha heeb, laa ag Babilon keeke oh Yawenu lag imuppanu akkan goppig ele, ag keeke amu oh eɗun akkan uɗinna, amu danab ah oh diippig ele, ag ag ele diin ippa uɗiglag.’ Na propet nai amu ame amu, Yawe Nug nai nahip amu heeb, meu bekkunu ool daatte.

⁷ Amge na nai da na amenppa, amu danab ah oh ele amelagppa mehuqttem imu doye!

⁸ Anukkanunab haen uɗiak, aria na anin, amu da anil ele ii menuitpiɗ, haen amu ohppa ele propet ag dimppa aɗi bekkunu nai madippig. Ag geha ban daakku, haen naunab daakku, amu oɗe nau danab kuɗum aqe mauhtteb, ag keeke ewam amu oh wan atu kuɗumppa bekkulagnu, amu ɗo maɗoɗ ɠagattag, amuppa ele bekkulagnu madippig.

⁹ Propet ag dimppa aɗi bekkunu nai amu anam madippig amunu, propet laa nug uɗia, ‘Haen ena daakku, ban laa ii daama,’ mattia ab amu, danab ah ag danab amu nug am genab Yawenu propette, o iittate dooglagnu, am ib laa iitta. Am ib laippu aakkuib. Propet amu, nug nai aum bianab beeb amu, danab ah ag, ‘Danab imu nug am propet genabnab,’ dooglag,” awa aum.

¹⁰ Aria, Jeremaia nug anam a, propet Hanania nug doɗnu duugppan tuqai, Jeremaia duugppanu awa, he qiiom.

¹¹ Nug anam ha, nug danab ah daappig oh amelagppa aum. “Yawe Nug inam atte. ‘Danab nug doɗnu duugppan tuqai amu he qiiom, amubia da heppi, maɗ aɗit ii neebeb, wan oh Babilon dilag king Nebukatnesar waappa daan nug oɗe dim lamidtteb ele, ag anam ii daamna. Da danab nug doɗnu duugppan tuqai makau duugppanu loppaɗe, makau hamu oitte, amubia da heppi, ag Nebukatnesar waappa ii daamna,’ awa atte.” Hanania nug anam aum. Nug anam a, propet Jeremaia nug aha ukkom.

¹² Amu propet Hanania nug doɗnu duugppan tuqai amu Jeremaia duugppanu he qiiom, haen nakokib ukke, Yawe Nug nuhig nai imu Jeremaia mettom.

¹³ “Na ahan gona, Hanania amegppa inam appe doyaɗ! ‘Yawe Nug inam atte. Na doɗnu duugppan tuqai adppa hak hee qiiom, amge laa aenppa hak am doɗnu duugppan tuqai amu abenab daakku,’ awa atte.”

¹⁴ Amu bekkunu diig am, Yawe Nukka Ɠagattag Oh Ele, Israel dilag Kayak, Nug inam atte. “Da wanppan wan ohppan danab ah ag Babilon dilag king Nebukatnesar waappa maɗi nid daan, nuhig uɗat hekkulagnu ag duulkadppa doɗnu duugppan tuqai laa aenppa hak meppi, ag nug waappa maɗi nid daan, nuhig uɗat hekkulag. Da amuib ii hepa. Iitta. Da ele heppi, doɗ dakkuɗ ele ag nug oɗe dim lamidkkulag,” awa atte.

¹⁵ Amu propet Jeremaia nug Yawenu nai Hanania amegppa anam ana, nug tuɗitta, propet hambuppuak Hanania amegppa imu ele aum. “Hanania, na nai doye! Yawe Nug na ii meitte uɗime, amge na hee, Juda danab ah ag nai hambuppuak na mattime ele, ag nai amunu oolagppa genab doon oitteb.

¹⁶ Na amu heme amunu, Yawe Nug inam atte. ‘Da heppi, na wanppa bau ii daamna. Na danab ah imu ag da, Yawe, ag dahil nai tabappeg nekkunu nai mehuqna ippunadme amunu, maɗ imu ooppaib na mauhkkut,’ awa atte.” Jeremaia nug Hanania amegppa anam aum.

¹⁷ Jeremaia nug Hanania amegppa anam a, maɗ amuppa kalam eblaih aɗitppa, propet hambuppuak Hanania nug mauhom.