Jeremaia 26 - Nobonob Baibel

Juda kuɗum ag Jeremaia epeɗiakppa meppig

¹ Amu Josaia bekka Jehoiakim nug Juda dilag king abennab awa dayeye, haen elab ii ukke, Yawe Nug da, Jeremaia, Nug da nai laa meɗe doomi.

² Nug da amelppa inam aum. “Jeremaia, na ahan, da, Yawe, da laulppa Israel danab dilag haɗap-ppa daanna, na danab ah Juda aab anen anennu uɗin, ag da Yawe, ag da laulppa da noolppa dup nona binal mekkulagnu uɗitteb ele amelagppa da na aɗi nai na amenppa akkutnunab attem amu, na amu madippe doyeg! Na nai da ippunidkkul amu, na nai amu huppu nakok laa aibnab tippalme.

³ Na da attem bia hekkut dayeb amu, danab ah anen anen ag oolag eɗueb, eheɗ hak kobol ag hetteb tuɗidna iitai hekkulag. Ag eɗun ii tuɗidkkulag dayeb, da ag hipunin kuɗum henan daaegeg uɗie, gemu ele hetteb, da amunu uug naunab madakkulnu dabmak aomi daatte amu, da dabmak amu uuen ii hepa.

⁴ Amu na ag amelagppa inam akkut. ‘Yawe Nug inam atte. “Ag daulag human dahil nai ii dooglag, ag dahil ɗo da ag mattami ii dim lamidkkulag,

⁵ ag nai dahilad maɗi nid, ag propet, da ag maatti, ahilagppa haen kuɗum uɗin, nai mattieg ag ii dooppig, ag daulag human, amu dilag nai ii dooglag amu,

⁶ da heppi, lag dahil imu nauhakib daakku; anukka da hei, aab Silo nauhom, amubia nauhak daakku. Da amu heppi, wan atu ohppan danab ah ag aab okkai Jerusalem onig aon, eheɗ laa awaknu anak waappa dayaknu nai ahilagppa mekkulag,” awa atte.’ ” Yawe Nug Jeremaia anam akkunu aum.

⁷ Yawe Nug Jeremaia amegppa anam a, Jeremaia nug aha, anam a, mana mettak danab, propet danab, amu danab ah oh ag Jeremaia nug nai amu Yawe laugppan Israel danab dilag haɗap-ppa dayaya mattie dooppig.

⁸ Jeremaia nug keeke oh Yawe nug akkununab aum danab ah oh amelagppa mattia male amu, mana mettak danab, propet, amu danab ah oh ele ag oh dona, nug aɗana, “Na mauhkkutoitte,” aon appig.

⁹ Anam anana, ag nai tuɗidna appig. “Aɗinu na, ‘Yawe Nug dimppa aɗi bekkunu nai imu meɗe madittem,’ anana, nai imu mattime? Na ame. ‘Yawenu lag Jerusalem daatte imu geha aab onig Silo, Nug he nauhom, lag imuam amubia daakku; aab okkai imuam hele-ettak daakku; amu danab ah ippa ii daamna,’ aon ame,” aon appig. Ag anam anana, danab ah oh ag Yawe laug ooppa Jeremaia talilidna daappig.

¹⁰ Anam heeg, haen Juda dilag kingnu ehanittak anuqak danab ag amu doona, ag nug hettoɗiglagnu, ag kingnu lag enanagnab uun ahana, Yawe laugppa goppig. Ag Yawe laugppa tena, lagnu aɗ taliliak, aɗ amunu od laa oɗeppa oo laa dayom amu, ag oo amuppa heɗep nena daappig. Od amunu ag, “Od Bau,” adappig.

¹¹ Daaegeg amu, mana mettak danab, amu propet ele ag Juda dilag kingnu ehanittak anuqak danab, amu danab ah oh ele amelagppa appig. “Danab imu nug nuhignu, ‘Da propet,’ atte amu, nug kekeɗ ag aab okkai imu heppeg nauhkkunu aum amunu, nuhig propet nai amunu ig qepput mauhkku am elele; am ena. Nug nai amu mattieye, ag daulagppa aakku dooppig,” aon appig.

¹² Ag anam mattieg amu, Jeremaia nug kingnu ehanittak anuqak danab, danab ah oh ele amelagppa aum. “Yawe Nug da uug ahilagppa beeb anidkkulagnu propet nai da mattiyi dooppig ele amu, da madikkulnu meiɗe uɗimi. Nug da ag amelagppa, aɗi keeke Nug laug imunu, amu aab okkai imu ele dilahppa bekkunu daatte appi dooglagnu meiɗe uɗimi.

¹³ Amunu ag ahilag oiyak, ahilag hak ele bappaidna, elele mettan dayeg! Ag anam henana, ag Yawe, ahilag Kayak, ag Nug oɗe doon dim lamitteg! Ag anam hekkulag amu, Yawe Nug nuhig dabmak baolia, Nug ag bu madakkunu dabma hekkunu aum bia ii hema.

¹⁴ Amge dahilnu amu, antteg! Da ag eppelagppa iikku daattem. Ag dahilppa aɗi hekkulagnu ena anidtteb, ag dahilppa aɗi hekkulagnu tutukku dootteb amu, ag heig!

¹⁵ Amge ag imu tutukku doon oiyeg! Da keeke laa ag hak amunu iuppeg mauhkkulnu laa ii hemi amunu, ag da iuppeg ii mauhkkuloitte. Ag da iuppeg mauhkkul amu, ag aakku eheɗ heppeg, ag beɗulagppa aab daakku amunu, Yawe Nug ag, aab okkai imu, amu danab ah aab imuppa daatteb ele bu madakku. Amuam genabnab daattenu diig am, Yawe, laa iitta, Nugib keeke imu oh appi dooglagnu meiɗe uɗimi.” Jeremaia nug nai amu ag amelagppa mattiom.

¹⁶ Jeremaia nug ag amelagppa anam a amu, kingnu ehanittak anuqak danab, danab ah oh ele ag mana mettak danab, amu propet danab ele amelagppa appig. “Ig danab imu qepput mauhkkunu keeke laa ii heum. Nug Yawe, ihinig Kayak, nug Nug onigppa ig amenigppa nai mattiom,” aon appig.

¹⁷ Ag anam aeg, Juda wanppan ikki danab laa ag ahan, danab ah oh noolagppa wana daan, ag danab ah oh amelagppa appig.

¹⁸ “Hesekaia nug ig Juda, ihinig king dayeye, propet onig Maika, Moreset ted, nug dimppa aɗi bekkunu nai mattia, nug Juda danab ah amelagppa inam aum. ‘Yawe Nukka Ɠagattag Oh Ele, Nug inam atte. “Kekeɗ ag heppeg, Sion am datta wan buuak bia daakku. Ao, kekeɗ ag heppeg, Jerusalem am kinipan ameg okkai hume tak daakku. Anam amu, dahil mettid lag, nuhig tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.” Yawe Nug anam atte,’ awa aum.

¹⁹ Maika nug anam aɗi dimppa bekkunu nai amu mattie, Juda dilag king Hesekaia nug nug qe mauhomte? Juda oolagppa laa nug nug qe mauhomte? Iitta! Hesekaia nug baɗe, Yawe oo gai-iitta doya oo metta ehanadkkunu unuqittom. Nug anam he, Yawe Nug uug naunab madakkunu uuom amunu, uug naunab ahilagppa bekkunu aum amu, ahilagppa ii beum. ⌊Dabmeig!⌋ Ig hepput, uug naunab ihinigppa bekkunu hetata oittemde!” aon appig.

Jeremaia mauhlo, amge Kayak he, Uraia mauhom bia ii mauhom

²⁰ Amu Semaia bekka Uraia, nug Kiriat Jearim ted, nug ele Yawe oɗeppanu nai awa, dimppa aɗi bekkunu nai mattiom amu, nug Jeremaia uug okkainab Jerusalem, amu Juda wan ohppa ele bekkunu aum bia, nug ele anamib aum.

²¹ Uraia nug Jeremaia aum bia dimppa aɗi bekkunu nai anam mattie, King Jehoiakim, nuhikkud ban danab okkai, nuhikkud ehanittak anuqak danab ele ag nuhig nai doon, king nug qeeb mauhkkunu dabmeum. Nug anam dabmeum, amge laa nug Uraia amegppa dabmak amunu mattie doya, nug baɗa oola, Isip wanppa ukka dayom.

²² Uraia nug Isip appa dayom, amge King Jehoiakim nug he, Akbor bekka Elnatan, amu danab laala ele ag Isip gona,

²³ ag Uraia aɗan, eɗun aon, Isip uun, Juda wanppa uɗina, King Jehoiakim eppegppa meeg, Jehoiakim he, ag nug qep elabppa qeeg mauhom. Ag qeeg mauhe, ag gaɗa aon gona buɗieg, daɗek danab mauheg boumadppigppa ukka niiom.

²⁴ Ag Uraianu anam heppig, amge Sapan bekka Ahikam nug Jeremaia ehanitte, danab ah ag nug qeppeg mauhkkunu heppig ele, amu eppelagppa ii meppig.