Jeremaia 25 - Nobonob Baibel

Juda danab ah ag maɗ 70 gona, diia ukka laih me dayak danab ah wan laappa daaglag

¹ Amu Josaia bekka Jehoiakim nug Juda dilag king abenab awa, nuhig king dayaknu maɗ maɗ waɗele ooppa, maɗ amuam Babilon dilag king Nebukatnesar, nuhig king dayaknu maɗ digmak, maɗ amuppa Yawe Nug nuhig nai laa Juda danab ah dilagnu Jeremaia mette doyom.

² Nug Yawe oɗeppanu nai laa amu awom amunu, propet Jeremaia nug danab ah Jerusalem daappig, amu Juda danab ah laa oh ele amelagppa aum.

³ “Anukka Amon bekka Josaia nug Juda dilag king daye, nuhig king dayaknu maɗ 13ppa Yawe Nug digma he, da nuhig nai doomi. Da haen amuppa digmein dooi uɗie, maɗ 22 ukke, gemu am maɗ 23, amu maɗ 23 amu ooppa haen kuɗum Yawe Nug da, Jeremaia, Nug da nai laa meɗe doyeye, da Yawenu nai aɗi doomi amu, da ag amelagppa ami, amge ag daulag ii human dooppig.

⁴ Ag dahil nai aakkuib ii dooppig. Iitta. Yawe Nug nuhikkud maɗi nid, ag propet, Nug ag laa kuɗum ele haen kuɗum maatte uɗin, ag amelagppa nai madippig, amge ag daulag human, ahilag nai ii doon, ahilag nai ele dab-ii-medappig.

⁵ Propet amu ag appig. ‘Ag anen anen ag ahilag eheɗ hak digdig hetteb, ag kobol eheɗ digdig dim lamidtteb ele, ag amu tuɗidna hemananu oolag eɗueb, ag hak amu, kobol amu ele ii hekkulag dayeb amu, ag wan imuppa, Yawe Nug ag, amu ag mamelkad aɗi dilag hanhan daakkunu mattom amu, ag aguppa tuɗidna daaglag.

⁶ Ag kayak laa noolagppa dup nona, aib binalag meppig. Ag aib amu waalagppa daanna, ag oɗelag dim lamidppig. Ag kayak dottolag eppelagppa aib heppeg, da oppoɗil beum. Ag kobol nau amu oh ii hekkulag dayeb amu, da eheɗ laa ii hadapa.’ Yawenu propet ag anam amelagppa appig.

⁷ Yawenu propet laa ag anam aeg, ag Juda, ag ahilag nai ii dooppig, amu gemu Yawe Nug inam atte. ‘Ag Juda, ag dahil nai daulag human ii doyegeg uɗie, gemu ele ii dootteb. Laa amu, ag akka, ag eppelagppa kayak hambuppuak dottolkad hatteg, da oppoɗil be dayeye, ib amuppa ag akka ag heeg, ahilag uug aakku beum daatte,’ awa atte.

⁸ Ag amu heegeg uɗie, gemu ele hetteb amunu, Yawe Nukka Ɠagattag Oh Ele, Nug inam atte. ‘Ag dahil nai daulag human ii dooppig amunu,

⁹ da heppi, Babilon dilag king Nebukatnesar, dahil maɗi nid, nug nuhikkud daup ele, aria, laa oh ag wan imunu laih yawalti uɗitteppanu daatteb ele, ag Nebukatnesar nuhikkud daup ele oh banelag uɗiglag,’ awa atte. Amu Nug atte. ‘Da heppi, ag uɗin, ag wan imu aoglagnu, ag ippan danab ah, wan laala wan imu talilittak daatteb ele amu, ag ele oh ban hekkulag. Da heppi, wan imu, amu wan laala wan imu talilittak daatteb ele, ag dahilnuib, dahil pelemppa daaglag. Ag anam daappeg, wan laappan danab ah ag anidna, ameg iɗuak doon, ahilagnu, “Keeke hamunab,” dooppeg, wan imu, wan amu oh am hanhan padal mak anamib daaglag.

¹⁰ Da anam heppi, Juda wanppa, wan laala amu ohppa ele gamag ahak nakok laa ii daama. Danab ah gamag ahak doon, ewau matulak ii aomna. Ah laa nug bret hekkunu ee aeg keeke menppa ii ganuɗma. Laa lam ele ii amotma. Iitta.

¹¹ Wan imu oh am hele-ettak, wan meu waknu nakokib elele ba dayebeb, wan imuppan danab ah ag Babilon dilag king waappa daan, ag nuhig maɗi nid maɗ 70 daaglag.

¹² Anam, amge maɗ 70 amu gogppa teeb, da Babilon dilag king, nuhikkud danab ah ele, ag Babilon wanppa daatteb amu, ag eheɗ heppignu, da ag bu madakkul. Da heppi, Babilon wan am hele-ettak, anamib daakku,’ awa atte.

¹³ Amu Yawe Nug atte. ‘Da heppi, aɗi nai laa Jeremaia oɗeppa wan amuppa uug bekkunu mattimi, amu wan laalappa ele nug oɗeppa uug bekkunu mattimi, nai amuam meu okku. Propet nai amu oh, Jeremaia mattiom amu, nai amu oh buk imuppa yaak niitte.

¹⁴ Da heppi, wan laala, ahilkad king ebehilkad okkai ele ag gona heppeg, Babilon danab ah ag ahilkad begbeg maɗi nid daaglag. Da heppi, Babilon ag heppig bia, ag eppelagppa aɗi aɗi heppig bia ahilagppa bekku,’ awa atte.” Yawe Nug da Jeremaia, nug da amelppa anam aum.

Kap-ppa wain ambak daatte, amubia Yawenu oo nauhak am ambak daattenu nai dottog

¹⁵ Amu Yawe, Nug Israel dilag Kayak, Nug tulelegppa da, Jeremaia, da amelppa aum. “Jeremaia, kap imu, da eppelppa daatte amu, amuppa dahil oppoɗi bak wain bia daatte amunu, na kap imu da eppelppan aon aɗan, wanppan wan atten atten da ag onilag na amenppa appi, na appa aon gona heppe, ag laig!

¹⁶ Da ag hipunin heegeg, oppoɗil be, bu madakkul maidmi; bu mattak amuam ban. Anam amunu, da heppi, ban ahilagppa beeb, ag nauhkkulag, danab wain huana lawowa, spak ma, taataɗ qettak oiyaya, kaaka ha nauhtte, amubia ag nauhkkulag,” awa aum.

¹⁷ Yawe Nug anam aum amunu, da ⌊tuleglegppa⌋ kap amu nug eppegppanu awoya, wan atten atten lakkulagnu ippuniɗom ele amu, da appa ukken hei, ag lappig.

¹⁸ Da tatam hei, danab ah Juda appa daatteb, Jerusalem ele daatteb, ahilkad king, nuhikkud ehanittak anuqak danab ele ag nauhak daappeg, laa ag anadna, amelag iɗuak doon, ahilagnu, “Keeke hamunab,” doon, ag eheɗ laa awaknu anak waappa daaglagnu akkulagnu lappig. Lanak dimppa anamnab be, aakku daatte.

¹⁹ Juda aɗi dimulagppa am da ⌊tuleglegppa⌋ Isip dilag king, nuhikkud ehanittak amu nuhikkud ehanittak anuqak danab, nuhikkud danab ah oh ele ag lakkulagnu mattami.

²⁰ Da Isip danab ah lakkulagnu anam matte, danab ah atu laihnu uɗin, Isip wanppa daatteb ele, da ag ele lakkulagnu mattami. Amu dimppa da Us dilag king, Pilistia dilag king anen anen ele mattami. Pilistia dilag king amuam Askelonnu, Gasanu, Ekronnu, amu danab ah Asdot appanu ii mauhppig daatteb, amu dilag ele.

²¹ Amu dimppa da ⌊tuleglegppa⌋ Edom danab ah, Moap danab ah, Amon danab ah ele mattami.

²² Aria, da Tair, Saidon dilag king anen anen matten, da wan laala yu hippeg laihppa daatteb ele amu, da ahilkad king ele mattami.

²³ Da ag matte malen, da Dedan, Tema, Bus ele, ag miag iitta amu, da appan danab ah mattami.

²⁴ Da ag matte malen, da Arebia dilag king mattai laeg, danab ah atu taɗakppa daatteb, ahilkad king ele mattami.

²⁵ Amu dimppa amu, da kap amu Simri, Elam, amu Midia dilag king ele mattai laeg,

²⁶ da king kuɗum ag ippanu laih yawalti uɗitteppanu daatteb, laa miag daatteb, laa uma daatteb amu, da ag oh kap amu mattai lappig. Ɗo maɗoɗ ohnab wanppa daatteb amu, da ag mattai lappig. Aria, ⌊tuleglegppa da anam hemi, qinob anam aakku bekku. Beeb⌋ amu dimppa amu Babilon dilag king nug ele lakku.

²⁷ Da kap amu Yawe eppegppanu aomi amu, haen amuppa Nug da kap awen madette, da inam ag amelagppa akkulnu aum. “Yawe Nukka Ɠagattag Oh Ele, Israel dilag Kayak, Nug atte. ‘Ag danab wain lawowa, spak ma, bahaha, na qa nauha auta awa, eɗua ii aha, nauhak daatte, ag amubia daaglag. Aɗinu ag anam daaglag. Da heppi, ban ahilagppa bekku.’ ” Yawe Nug da ag amelagppa anam akkulnu aum.

²⁸ Nug anam awowa, Nug tuɗitta da amelppa aum. “Na kap amu madappe, lanaknu uuglag dayeb amu, na inam appe doyeg! ‘Yawe Nukka Ɠagattag Oh Ele, Nug inam atte. “Ag lakkulagoitte! ⌊Ag bu dahil ii eɗidmana!⌋

²⁹ Antteg! Da aab okkai da onil aguppa daatte, da amuppa digmein, ag bu madattem amunu, ag laa ag bu iite aoglag. Iitta! Ag aoglag. Ag bu ii eɗidmana. Aɗinu? ⌊Wan atu ohppan danab ah ag eheɗ hetteb amunu,⌋ da wan atu ohppan danab ah banppa bu madakkul.” ’ ” Yawe Nukka Ɠagattag Oh Ele, Nug anam aakku atte.

³⁰ Amu Yawe Nug anam awowa, Nug tuɗitta, da amelppa aum. “Na danab oh amelagppa uug ahilagppa beeb anidkkulagnu propet nai imu appe doyeg! ‘Laion ɠagattag nug doɗ laa mattia aokkunu dabma aha, huana gaatte, amubia Yawe Nug nuhikkud danab ah bu madakkunu babaittak anam daatte. Ao, Nug nuhig dayak aben oppiaawak ele, Nug amuppa dayaya, hakkaɗ huana qe, gu nekkunu daatte bia, Nug danab ah nuhikkud bu madakkunu babaittak daatte. Ge, Nug nuhikkud danab ah bu madakkunu laion huanaknab gaatte bia aakku babaittak daatte. Danab ag grep meu leppu aoglagnu tappanna, huana etteb, amubia Nug heeb, ban haknu ewak okkai daakku. Ao, nug wan atu ohppan danab ah bu madatta, anam hekku.

³¹ Yawe Nug wan ohppan danab ah ag nau heppignu naippa yaaladkku amunu, bannu oqotti am wan atu ohppa daakku. Nug danab ah ohnab epeɗiatta, Nug heeb, nau hak danab ag qep elabppa mauhkkulag.’ ” Yawe Nug anam awa atte.

³² Amu Yawe Nukka Ɠagattag Oh Ele, Nug inam atte. “Antteg! Uug naunab wan laappa dayaya, wan laappa ele baabib gotte. Wan atu umanabnu uug naunab nau aakku aha uɗitte,” awa atte.

³³ Haen amu uɗieb, Yawe heeb, ban ahakku, haen amuppa danab ban Yawe he beumppa mauhppig, am wan atu ohppa huanaknab daaglag. Ag huanaknab mauhak anam daappeg, laa ag ahilagnu mahiak ii hemana, laa ag gaɗalkad diin gona, ii boumadmana. Mauhak gaɗa am kinipan wan qaɗeppa anam daaglag.

³⁴ Ag gumak danab, ag danab sipsip gumadtte bia ag gumak danab daanna, danab ah gumadtteb, ag eheɗ gaanna, mahieg! Ao, ag gumak danab, ag danab sipsip gumadtte bia daan, ag danab ah gumadtteb amu, ag gappudppa niin, beɗulag itoɗinna dayeg! Aɗinu? Danab ag doɗ kuɗum aqaeg mauhtteb bia, kekeɗ ag banppa ag aqappeg mauhkkulagnu haen aakku beum daatte. Ao, ag aakku hinai enanag na qa aoɗtte, ag amubia daaglag.

³⁵ Gumak danab ag oolna gona, ena daaglagnu aben laa iitta. Ao, gumak danab ag aben laa, ag appa gona, ena daaglagnu laa iitta.

³⁶ Doyeg! Sipsip gumak danab ag sipsip dilag gikkiɗah dad, laa heeg nauhtte anidna, huana gaatteb, amubia gumak danab ag gaaglag. Ao, doyeg! Sipsip gumak danab ag sipsip dilag gikkiɗah dad, laa heeg nauhtte anidna, mahiak huana hetteb, amubia gumak danab ag mahiglag. Aɗinu ag anam hekkulag? Yawe Nug heeb, ahilag wan aakku nauhkku.

³⁷ Yawe Nug ⌊nau hak huanak antta,⌋ oo huanaknab nauhom amunu, Nug heeb, wan enanag ahilag, appa ag maɗoɗ daappig ele amu, wan amuam nauhakib daakku.

³⁸ Laion bau nug teɗppan aha, doɗ laa heeb nauhkkun oitte, amubia Yawe Nug heeb, ahilag wan am hele-ettak daakku. Yawe Nug ⌊nau hak huanak antta,⌋ Nug oo huanaknab nauhom daatte, amu Nug heeb, wan laappan daup ɠagattag ag ahan, ban ɠagattag hekkulag, diig aɗit amunu uug naunab amu anam aakku bekku.