Jeremaia 24 - Nobonob Baibel

Jeremaia nug ad fig meu kaleg aɗitppa daappig tuleglegppa anttom

¹ Babilon dilag king Nebukatnesar nug uɗie, nug Jehoiakim bekka Jehoiakin, Juda dilag king, aria nuhikkud ehanittak anuqak, Judanu danab uɗat laala haknu doyak okkai ele, nug ag ele Jerusalemnu diia ukka he, ag Babilon appa diia ukka laih me dayak danab daappig. Nebukatnesar nug anam heum, dimppa Yawe Nug da Jeremaia, Nug da kaleg aɗit ad fig meu inak ele Yawenu mettid lag noobppa daaeheh ippuniɗom.

² Ad fig meu kaleg laappa daappig am meu enanag, ad fig meu tatam oɗutte bia, amge ad meu kaleg laappa daappig am meu naunab; danab lakkunu elele iitta.

³ Anam daaeh anati, Yawe Nug da oɗ meɗom. “Jeremaia, na aɗi anidttem?” awa oɗ meɗom. Nug oɗ meɗe, da nob mein ami. “Da ad fig meu anidttem. Laa ag am ena, laa ag nau. Meu ena am enanag, amge laa nau amu, ag am naunab. Danab nug lakkunu elele iitta,” awe ami.

⁴ Amu dimppa amu, Yawe Nug nuhig nai imu da, Jeremaia, Nug da meɗom.

⁵ “Da Yawe, da Israel dilag Kayak, da inam attem. ‘Juda danab ah da hei, ag gemu wan imuppa ii daatteb, ag Babilon wanppa diia ukka laih me dayak danab ah daatteb amu, da amu dilagnu ag ad fig meu ena imubia daatteb doottem.

⁶ Da ag atognoatten ehanadppi, ag wan imuppa eɗun uɗiglag. Da ag atognoadppi, elele daaglag. Da eheɗ hadappi ii nauhmana. Da danab keeke eppe, ena bette, da amubia ahilagppa hekkul. Danab nug keeke hiɗe nauhtte, da amubia ahilagnu ii hepa.

⁷ Da heppi, ag da Yawe, ag da dooiɗkkulagnu, ag oolag okkai daakku. Ag oolag eɗueb, ag meulag ohppa dahilnu daaglagnu oolag daakku amunu, ag dahilad danab ah daaglag, da ahilag Kayak daakkul.

⁸ Ag gemu Babilon diia ukka laih me dayak danab ah daatteb, ahilagnu am da anam hekkul, amge Sedekaia, nug Juda dilag king gemu daatte, nuhikkud ehanittak anuqak danab, amu Jerusalem danab ah laa ag ii mauhppig ele, da amu dilagnu ad fig meu naunab, ag amubia daatteb doottem. Ad fig meu amuam naunab, danab lakkunu elele iitta, amu da danab ad fig meu nau amubia attem attem hette, da anamib ahilagppa hekkul. Ag wan imuppa daaglagtai, o iitta ag oolna Isip wanppa gona appa daaglagtai, da anamib aakku hekkul.

⁹ Da heppi, Juda danab ah amu ag adeppa adeppa matatun gona daaglag amu, wan atu laa ohppan danab ah ag ahilagnu uuaknab dooglag. Ag ahilagnu, “Danab ah nau,” anan oiglag. Ag Juda danab ah dilagnu hamu bia doon, ag ahilagnu ag am nau bekkunu at daatteb dabmena, ag aon aon aqanna, ag eheɗ laa awaknu anak waappa daaglagnu akkulag.

¹⁰ Da heppi, kekeɗ ag uɗin, qep elabppa aqappeg, enug haen beeb, oɗe nau danab kuɗum aqe mauhtteb ele beeb, ag mauhna, wan da ag mamelkad aɗi mattami amu, ag amuppa ii daamna.’ ” Yawe Nug anam awa atte.