Jeremaia 23 - Nobonob Baibel

Yawe Nug heeb, laa genab tutukku hak dim lamidtte ele, nug Juda dilag king daakku

¹ Yawe Nug inam atte. “Danab okkai ag danab ah dahilad eheɗ hadatteb ele, ag am sipsip gumak danab nau, sipsip eheɗ hattaeg nauheg, lamatteg, pitaiettan gotteb, ag amubia hetteb amunu, ag gumak danab amu, ahilagnu am gadonnab gadon,” awa atte.

² Yawe, Nug Israel dilag Kayak, Nug anam atte amunu, Nug gumak danab ag danab ah gumadtteb, Nug ag amelagppa inam atte. “Ag danab ah dahilad tutukku dabmattaglagnu daatteb, amge ag anam ii hetteb. Iitta. Ag dahilad sipsip amu, ag lamatteg, ag pitaiettan laih laih gotteb. Ag gumattak uɗat ena ii hetteb amunu, da Yawe, da ahilag eheɗ hak anidmi. Ag kobol nau heppig amunu, nob mekkulnu amu, da ahilag eheɗ hak amu nob elelenab ag madakkul.

³ Am da hei, danab ah dahilad ag wan laalappa gona, danab ah amu oolagppa oɗo yaak daatteb amu, geha da dakka danab ah dahilad amu ag huu ameg nakok daatteb, da ag qagmaadkkul. Da geha ag diie, omaladppi, ag eɗun wan ahilagppa uɗin daanna, am geha ag kuɗum menuadna, ag appatna, ag kuɗumnab daaglag.

⁴ Amu da Yawe, da geha gumak danab huu bau laa otiadppi, ag geha danab ah dahilad, ag sipsip bia amu, ag ag ena gumadkkulag. Ag ena gumadppeppeg, ag keeke laanu ii baɗamna. Keeke laa heeb, ag baɗak eheɗ nau ii doomna. Am geha ag oolagppa laippu laa ii padal mema; iitta,” awa atte.

⁵ Da Yawe, da inam attem. “Haen laa dimppa amu, da geha heppi, danab laa Dawit buɗubppanu bekku; ad diigppa ita bau bette, amubia bekku. Danab amu nug genab tutukku hak danab, amu nug geha king dayaya, nug geha doyak dabmak ena ele dim lamitta, nai doya mala hettoɗia epeɗia elele mettak kobol, kobol genab tutukku ele dim lamitta, nug danab ah gumadkku.

⁶ Haen nug king dayebeb amu, Juda ag geha padal memananu ehanittak aon daaglag. Ao, Israel danab ah ag baɗak iittappa daaglag. Geha ag king amu onig am inam ataɗkkulag. ‘Yawe Nug Kobol Genab Tutukku, Nug Amunu Diig Daatte.’ ” Yawe Nug anam atte.

⁷ Amu Yawe Nug atte. “Amu haen laa uɗitte, haen amuppa danab ag ahilag nai ɠagattag qa anaknu, ag baula, ‘Yawe Nug genab Israel danab ah Isip wanppanu omalatte beppig, genab amubia nai da akkulnu hettem am genab,’ ii amana.

⁸ Iitta. Ag ahilag nai ɠagattag qa anaknu, ag, ‘Yawe Nug genab Israel buɗub ag wan yawalti uɗitteppanu, amu wan laala, Nug he, ag appa gona, diia ukka laih me dayak danab ah daappig amu, Nug appanu ele omalatte uɗippig, genab amubia nai da akkulnu hettem am genab,’ akkulag. Amu haen amuppa da heppi, ag eɗun, ahilag wanppanab aakku daaglag.” Yawe Nug anam awa atte.

Yawe Nug propet hambuppuak bu madakku

⁹ Propet dilagnu amu, da oolppa uug nau, kahipal aoɗom bia dooiyi, da ebehilad hahaɗtteb. Da danab spak meum bia daattem. Ao, da danab wain huanak lawowa, spak meum bia daattem. Aɗinu? Propet ag Yawenu, nuhig nai oppiaawak elenu hamu bia doon, Yawe noobppa mauhnoak oinna, nuhig nai tappaeg nette.

¹⁰ ⌊Propet ag danab ah ib eheɗ ippunadtteb amunu,⌋ Juda wanppa danab ah huanak ag gappai hetteb. Ag amu hetteb amunu, ag eheɗ laa awaknu anak waappa daaegeg, gu ii neene, wan qaɗaiettaknab dayeye, gikkiɗah ele qaɗaiettom. Propet ag eheɗ henan oinna, ag ehah ahilag ib eheɗppa uɗat mettanna, ag danab ah eheɗ hadatteb.

¹¹ Amu Yawe Nug atte. “Propet danab, mana mettak danab ele ag dahilnu, dahil haknu ele uuak dootteb. Dahil mettid lag, amuppanab da ahilag nau hak ag hetteb anidttem,” awa atte.

¹² Amu Yawe Nug imu ele atte. “Propet, mana mettak danab ele ag amu hetteb amunu, da heppi, ag danab ib aiɗikkakppa oitte bia daaglag. Da heppi, ag gatatu ooppa oinna, nena qekkulag. Aɗinu anam bekku? Ahilag bu awak haenppa amu, da heppi, uug naunab ahilagppa bekku,” awa atte.

¹³ Am Yawe Nug atte. “Anukka, propet Samaria daappig amu, da ahilag hak laa antten, da oolppa uuaknab doomi. Hak ag heppig amu, ag kayak hambuppuak Bal onigppa propet nai mattinna, amuppa ag heeg, Israel danab ag ah ag ib tutukku apiɗidnana, eheɗppa goppig.

¹⁴ Ag anam heeg anidmi, amu propet Jerusalem daatteb, ag ele eheɗ nau heegeg anadttem. Ag ewau pakkuna gappai henana, ag danab ah amelagppa ena hak danab bia daatteb, amge oolagppa, lokkumakppa ele ag danab nau daatteb. Ag danab eheɗ hekkulagnu hetteb ele ehanadtteb amunu, laa nug eheɗ hak nuhig ii dimedatte. Dahil neekkakppa Jerusalem danab ah oh ag Sodomnu danab ah, o Gomora danab ah bia daatteb,” awa atte.

¹⁵ Propet Jerusalem daatteb, ag amu hetteb amunu, Yawe Nukka Ɠagattag Oh Ele, nug propet amu dilag inam atte. “Da heppi, ag danab uud ad tiig mua ele lana, ena ii dootte, ag amubia dooglag. Ao, da heppi, ag danab uud tiig mua nau ele lana eheɗ aotte, amubia ag bu dahil eheɗ aoglag. Aɗinu da amu hekkul? Propet Jerusalem daatteb ag heeg, kobol nau, amuam dahilnu, dahil haknu ele uuak kobol, kobol amuam Juda wan oh tonappig daatte,” awa atte.

¹⁶ Amu Yawe Nukka Ɠagattag Oh Ele, Nug imu Juda danab ah dilagnu atte. “Ag propet ⌊hambuppuak⌋ dilag nai, propet ag nai amu maditteb amu, ag nai amu aib dooppig; aib dabmeppig. Propet amu ag heegeg, ag Juda danab ah ag, ‘Ig aakku ena daagnig,’ anan oitteb, amge iitta. Ag ena ii daamna,” awa atte. Propet amu ag akka ag dabmak ahilagppa keeke henan anidtteb, ag Yawe oɗeppanu nai laa aon, nai amu ii maditteb.

¹⁷ Propet amu ag laa dahilnu ena iinab dootteb ele amelagppa, “Yawe Nug atte, ‘Ag maɗoɗ ele daaglag,’ aon atteb. Ag amu dilagnu anam anana, ag laa ag oɗe dim lamidmananu dabmak ahilag ɠagattag eppe, aɗi hekkulag dabmakppa daatte amu, ag amuib dim lamidtteb, ag amelagppa, ‘Uug laa ahilagppa ii bema,’ ” aon atteb.

¹⁸ Propet amu ag anam atteb, amge ag oolagppa aun nug Yawe noobppa dayaya, Nug aɗi hette andatta, nuhig nai ele doyom? Ag oolagppanu auntai laa nug daug huma, Yawenu nai laa doyom? Laa iitta.

¹⁹ Danab nau hetteb ele amu, Yawe Nug amunu oppoɗi bak doyaya, Nug ulah huanak paha paha uɗitte bia ag bu madakku. Nuhig bu mettak am kilibob itoɗiaya nette, amubia nau hak danab qaɗelagppa daakku.

²⁰ Yawenu oo nauhak am anamib dayebeb ukkeb, Yawe Nug nuhig dabmakppa aɗi aɗi hekkunu dabmette, Nug ooppa aɗi bekkunu maittak awom daatte, keeke amu oh ba maleb, oppoɗi bak amu iitta mekku. ⌊Amu Yawe atte⌋ “Butti haen adekku ag imunu diignu doyak tutukku aɗaglag.

²¹ Da ii propet amu maatti ahappig, amge ag ahilag nai huanak madippig. Da ag amelagppa nai laa ii mattimi, amge ag ahan, dimppa aɗi bekkunu nai hambuppuak madippig.

²² Ag amu heppig, amge ag da noolppa daanna, dahil nai doolob, ag dahil nai danab ah dahilad amelagppa mattilob. Ag anam helob, ag heppeg, danab ah ag eheɗ hemananu ag oolag eɗueb ii helob, amge iitta,” awa atte.

²³ Yawe atte “Da am Kayak ag gukkuatte daattem, amu ele, da am Kayak uma ele daattem.

²⁴ Da aben ohppa daattem amunu, danab laa da nug anidpanu aben lokkumakppa nug nugakka appa lokkumidkkunu elele iitta. Da hab attan, wanppa ele, da appa ana aben ohppa daattem.

²⁵ Propet ag da onilppa propet nai hambuppuak maditteb ele amu, da ahilag nai doomi. Ag atteb. ‘Da tul laa niimi! Da tul laa niimi! ⌊Tul niiak amuppa da Yawenu nai aomi,⌋’ aon atteb.

²⁶ Propet amu ag oolagppa dabmak amu aotteb ele, ag mattiak hambuppuak aona, ag danab ah amelagppa Yawe toppanu nai aoppignu atteb, amge iitta, amuam akka ahilag dabmak hambuppak; amu haen gane laa ele ukkeb, ag kobol amu uuglag?

²⁷ Ag mamelkad aɗi ag kayak hambuppuak Bal dim lamidkkulag hena, da dim lamiɗak uuppig, amubia propet hambuppuak ag tul niiak anidtteb ele, ag amunu mattiegeg, laa dootteb amu, ag ib amuppa dahilad danab ah ag dahilnu daulag atikkunu oolag yaaglagnu hetteb.

²⁸ Propet aun laa nug tul niia, nug tul niiak amuam dahilppanu uɗiom ii dookku dayeb amu, nug, ‘Tul niiak imuam dahil tul niiak,’ aakkuib akkuoitte, amge propet aun laa nug dahil nai doyom dayeb amu, nug tutukku, genabnab mehuqaɗ! Wit gumu am keeke hamu, wit aeg am keeke enanag, amubia.

²⁹ Dahil nai am aab aɗu bia. Yo, dahil nai am hama, danab ag aguppa men oeg aoɗa, huppu huppu nette, dahil nai am amubia daatte.” Yawe Nug anam awa atte.

³⁰ Amu Yawe Nug atte. “Propet hambuppuak ag hambuppunna, anen anen ag, ‘Yawe Nug nai imu da meɗom,’ anan hetteb. Ag amu henana, ag anen anen ag layagnu nai doya, yab awa, ‘Da nai imu Yawe oɗeppa awen, iikku madittem,’ atteb amunu, ag laan nainu, ag yabhok danab daatteb. Propet hambuppuak ag amu hetteb ele, ag hambuppunna, ‘Da nai imu Yawe oɗeppanu aomi,’ atteb amunu, da, Yawe, da ahilag hak amunu eheɗ doyeye ool ii madattem.

³¹ Ge, da, Yawe, da propet ag akka akka ag lemaɗulagppa ahilag nai maditteb, amge ag, ‘Yawe Nug nai imu atte,’ atteb amu, da amu dilag haknu eheɗ doyeye ool ii madattem.

³² Genab, da propet hambuppuak, ag akka tulegleg hambuppuakppa keeke anidna, dimppa aɗi bekkunu nai maditteb, da amu dilag haknu eheɗ doyeye ool ii madattem. Ag tulegleg hambuppuak anidna, danab ah amelagppa mattinna, nai amuppa ag danab ah omalatteg, ib eheɗppa gotteb. Ag hambuppuak nau amu maditteb, amge da maadppi gokkulagnu onilagppa ii emi. Da ag amu hekkulagnu ii tituanadmi. Ag eheɗ heegeg, Juda danab ah ag ehanittak nakok laa iinab aotteb.” Yawe Nug anam awa atte.

Yawe Nug propet hambuppuak dilagnu uug dootte

³³ Amu Yawe Nug da Jeremaia, Nug da amelppa aum. “Danab ah imu, o propet laa, o mana mettak danab laa nug na inam oɗ medakku. ‘Aɗi nai meunab ele Yawe oɗeppanu daatte?’ awa oɗ medakku. Aria, haen laa nug anam oɗ medakku amu, na nob mena, inam akkut. ‘Aɗi nai meunab ele daatte? Am inam. Yawe Nug atte, “Da ag uuadkkul,” awa atte.’ ” Yawe Nug da ag amelagppa anam akkulnu da amelppa aum.

³⁴ Amu Yawe Nug atte. “Propet, o mana mettak danab, o auntai nug aha, ⌊hambuppua,⌋ ‘Nai imu da madittem ele, nai amuam nai meunab ele, Yawe oɗeppanu,’ ab amu, da danab amu bu medappi, nug baekkudppa ele ag uug aoglag.” Yawe Nug anam atte.

³⁵ Ag anen anen ag inam nug oɗ mettan atteb. “Yawe Nug nai imunu nob aɗi meum?” o “Yawe Nug aɗi nai na amenppa mattiom?” aon atteb.

³⁶ Amge ag akka akka ag lailkad ag anam oɗ madatteb amu, ag ⌊hambuppun,⌋ “Nai meunab ele Yawe oɗeppanu am inam,” anana, ag nai amu Yawe oɗeppa ii aoppig amunu, danab anen anen dilag nai am nai meunab ele bia bette. Anam amunu, ag, “Yawenu nai meunab ele,” baula aib appig. Nai amuam genab nai meunab ele iitta amunu, ag heeg, Kayak bauklel daatte, Yawe Nukka Ɠagattag Oh Ele, ihinig Kayak amu, ag nuhig nai heeg, kaboliak daatte.

³⁷ Ag propet ⌊genab⌋ oɗ mettan, “Yawe Nug na nai imunu nob aɗi mettom?” o, “Yawe Nug na amenppa aɗi nai mattiom?” akkulag, ⌊amuam nai iitta,⌋

³⁸ amge ag ⌊laa ag hambuppuna,⌋ “Nai imuam nai meunab ele, Yawe oɗeppanu aomi,” atteb, ahilagnu Yawe Nug inam atte. “Da ag, ‘Nai imuam meunab ele, Yawe oɗeppanu aomi ⌊hambuppun⌋ akkulagnu aib ami,’ amge ag doonna, ‘Nai imuam nai meunab ele, Yawe oɗeppanu aomi,’ atteb

³⁹ amunu, da ahilagnu genab daul atieb, da danab men buɗie gotte, amubia da heppi, ag da ele laippu ii daamta; amu da aab Jerusalem, da aab okkai amu ag mamelkad aɗi mattami amu, da heppi, ag amuppa ele ii daamna.

⁴⁰ Da amu heppi, ag hanhan uɗa nak nau guittak ele dooglag. Ag uɗa nak amu dooppeg, danab ah laa ag amu daulag ii atima,” awa atte.