Jeremaia 22 - Nobonob Baibel

Yawe Nug Juda dilag king bu medakku

¹ Amu Yawe Nug da Jeremaia, Nug da amelppa inam aum. “Na ahan, Juda dilag kingnu lag enanagnab, na appa nona, nai imu appe doyeg!

² ‘O na Juda dilag king, na Dawitnu sia kingppa daattem amu, na, amu nahipad ehanittak anuqak danab, amu nahipad danab ah ele ag oh ag aab imunu aɗnu odppa uɗin, aab ooppa gotteb ele amu, ag Yawenu nai imu doyeg!

³ Yawe Nug inam atte. Ag nai doya mala hettoɗia epeɗia elele mettak kobol, kobol genab tutukku ele dim lamitteg! Ag nai doya mala hettoɗia epeɗia elele mettak kobol henana, aun aɗi ag gai-iitta daan, danab ɠagattag eppelagppa daaeg, eheɗ hattana, ahilag keeke yab aotteb amu, ag danab amu, danab nau amu eppelagppanu eɗun diieg! Ag wan laihnu danab ah, nid ag mamelkad mauhppig ele, ah qab ele dilagppa kobol eheɗ aib heppig; guittak ele aib madappig. Laa eheɗ laa ii heppig ele ippa aib aqappeg mauhppig.

⁴ Aɗinu? Ag haknunab nai oh da ag madattem hekkulag dayeb amu, king ag Dawitnu sia kingppa daaglag; ag kingnu lag enanagnab imunu aɗnu odppa oiyaknu karisppa, hos attan ele uɗiglag. Ag, ahilkad ehanittak anuqak danab, amu ahilkad danab ah ele anam hekkulag,’ ” awa atte.

⁵ Amu Yawe Nug imu ele atte, “Amge ag haknunab nai da ag madattem dim ii lamidkkulag dayeb, da dakka da onilppa da dahil nai ɠagattag qetten, da heppi, lag enanagnab imuam nauhaknab aakkuib daakku attem,” awa atte.

⁶ Am diig amunu amu, Yawe Nug Juda dilag kingnu lag enanagnabnu inam atte. “Da ag Juda dilag king, da lag ahilagnu enanag doottem; da qauko Lebanon ikkinu doottem, o Gileat wannu doottem amubia. Da amubia doottem, amge da genab heppi, ahilag lag am atu taɗak, danab ah appa ii daatteb ele, anambia daakku. Ag laulag am aab danab ah ii daatteb, hamu daatte, am anamib daakku.

⁷ Da heppi, kekeɗ ag anen anen bannu keeke eppelagppa aɗan, ag uɗin, ag Juda dilag king laulag heppeg nauhkku. Ag laulagnu ad sidanu plang ena ena daatteb amu, ag mauhnoak oppatppeg neeb, ag amu akkan, aab aɗuppa mawadppeg teppeg aab eweb, iitta mekkulag.

⁸ Da amu heppi beeb, amu dimppa wan laalappan danab ag oinna, ag aab okkai imu nauhak daatte anidna, ag oɗ mekkulag. ‘Diig aɗinu Yawe Nug he, aab okkai naɗi imu aakku inam nauhom daatte?’ Ag anam oɗ mekkulag.

⁹ Ag anam oɗ meppeg amu, laa ag nob mena akkulag. ‘Yawe, Juda dilag Kayak, Nug he, Nug Juda ele ag nug tituanna nai qakkak heppig, amge Juda ag nai qakkak amu tippalna, kayak laala noolagppa dup nona binalag mena, amu waalagppa daan, ag oɗelag dim lamidppig amunu, Yawe Nug he, aab imu inam nauhom daatte,’ aon akkulag,” awa atte.

Jeremaia nug Juda dilag king Jehoahasnu nai mattiom

¹⁰ Ag King Josaia mauhom amu, ag nuhignu aib gaappig, aib mahippig. Ag amu ii hemana, amge ag Jehoahasnu, kekeɗ ag uɗin aon ukkaeg, nug wan laappa diia ukka laih me dayak danab daatte, ag nuhignu huan gayeg! Aɗinu? Nug eɗua iinab uɗima. Nug baula nuhig wan ii anidma.

¹¹ Amu bekkunu diig am, Yawe Nug Josaia bekka Jehoahas, nug mameg king daya mauhe, abenabppa bekka ta Juda dilag king dayeye, kekeɗ diin goppig ele amu, Yawe Nug nuhignu inam atte. “Nug eɗua ii uɗima.

¹² Kekeɗ ag nug aɗan aon gona, wan laappa goppig amu, nug appa mauhkku. Nug baula wan imu iinab anidma,” awa atte.

Juda dilag king Jehoiakimnu nai

¹³ King auntai laa nug genab tutukku hak kobol ii dim lamitta, danab ah gumattette, ag nuhig uɗat hetteb, amge nug ag ahilag uɗatnu nob ii madatta, nug nuhig lag enanagnab hette amu, nuhignu gadonnab gadon. Ao, king auntai laa nug nai doya mala hettoɗia epeɗia elele mettak kobol ii dim lamittatta he, danab ah gumadtte ele, ag nuhig uɗat hamu, nob iitta heegeg, nug lag enanagnab nuhig hette amu, nuhignu gadonnab gadon.

¹⁴ King amu nug atte. “Da dahil lag enanagnab hekkul. Da lag oo okkai kuɗum attan enanag hekkul,” awa atte. Nug anam anana, nug he, ag lag henana, ag gililppa ulah ippu okkai ena bappaidna, ag ad sida aona, gililppa qataqena, ag gau kokoɗppa bala medatteb.

¹⁵ Amu Yawe Nug atte. “⌊Jehoiakim,⌋ na ad sida kuɗum na lautppa meme daatte amunu, na ad amuam king daakkutnu ehah medatte doottemte? Na mamen nug amu ii heum. Iitta. Nug ee, le ele elele aɗa lana dayaya, elele doya, nug kobol tutukku, amu nai doya mala hettoɗia epeɗia elele mettak kobol ele dim lamittom amunu, keeke oh nuhignu elele ukkom.

¹⁶ Nug daɗek danab eheɗ ii heppig, nug hettoɗiak haenppa ehanatte, ag eheɗ ii aoppig amunu, keeke oh nuhignu elele ukkom. Danab nug kobol amu hette amu, nug da dooiɗtte. Laa nug kobol amu ii hette amu, nug da ii dooiɗtte,” awa atte.

¹⁷ Amu Yawe Nug imu ele atte. “Anam, amge ⌊Jehoiakim,⌋ na nakka, na en okkainab aokkutnu oot heehe, na amu dabmena autna aottem. Ib enappa, o ib nauppa aokkut, nahip dabmakppa amuam keeke hamu; aokkutnuib dabmettem. Aokkutnu amu, na danab eheɗ laa ii heppig ele aqe mauhtteb. Aokkutnu amu, na danab ah ag nahip uɗat hamu, nob iitta hekkulagnu duttunadttem. Aokkutnu amu, na laa eheɗ hattana, na keeke lokkumakppa awaknu duttuna hak kobol dim lamidttem.” Yawe Nug anam atte.

¹⁸ Josaia bekka Jehoiakim, Juda dilag king nug anam hette amunu, Yawe Nug nuhignu inam atte. “Danab ah ag nuhignu ii mahimna. Ag akka akka inam ii amana. ‘O da awal, gadonnab gadon. O da appinal, gadonnab gadon.’ Ag nuhignu ii mahimna. Ag akka akka inam ii amana. ‘O dahil okkai, gadonnab gadon. Nug danab ɠagattag okkai naɗi ele daye, dahil okkai daya, mauhom. O gadonnab gadon.’ Ag anam ii amana.

¹⁹ Danab ag doɗ donki ii boumtteb, amubia danab ag Jehoiakim ii boummana. Iitta. Ag nug gaɗa eeɗna, aab Jerusalem dimittim buɗippeg gokku.

²⁰ ⌊Juda danab ah⌋ ag ahan, Lebanon gona gayeg! Ag gaanna daappeg, Basan danab ah ag ag baalag doyeg! Ag Abarim appa gona daanna gayeg! Aɗinu? Kekeɗ ag ahilkad ehanittak oh heeg, padal meppig.

²¹ Haen ag, ‘Ig eleleib daattem; uug laa ihinigppa ii bema,’ dabmenan oippig, da, Yawe, da ag nau aomnanu dabmettak nai mattami. Da nai amu ag mattami, amge ag, ‘Ig nahip nai ii doomta!’ aon appig. Ag nid bauppa digmena, da oɗel nakok laa ii dim lamitteg uɗie, gemu ele anamib hetteb.

²² ⌊Ahilag eheɗ hak am anam amunu,⌋ ulah keeke uug iitta iwale gotte, amubia kekeɗ ag ahilkad danab okkai heppeg laih gokkulag. Ao, kekeɗ ag heppeg, ahilkad ehanittak laa ag diia ukka laih me dayak danab ah daaglag. Amu oh beeb, ag uɗa nak nau guittak ele dooglag. Amu oh ahilagppa bekkunu diig am, nau hak ahilag aakku.

²³ Lag ahilagppa ad sida Lebanonnu kuɗum daatte; ag amuppa enanag daatteb, amge gadon, uug amu ahilagppa beeb, ag aiqakkak nau, ah nid aokkunu hette, ag amubia hekkulag.” Yawe Nug da amelppa Juda danab ah dilagnu anam aum.

Yawe Nug Jehoiakin bu medakku

²⁴ Amu Yawe Nug atte. “Jehoiakim bekka Jehoiakin, na Juda dilag king, da Yawe, da na amenppa attem. Da genab bau daattem, genab amubia na dahil doyaknu at ringppa daatte da eppelppa daalom amu, da ring amu uɗidlom. Na am tuɗidna ii daalom.

²⁵ Laa ag nidappeg mauhkkutnu hetteb, na ag baɗadttem ele amu, da na ag eppelagppa meidkkul. Ge, da Babilon dilag King Nebukatnesar, nuhikkud daup ele eppelagppa meidkkul.

²⁶ Na anin nug wan imuppa doum. Wan imuppa ele na anin nug na menuittom, amge da heppi, danab ag men keeke buɗieg gotte, amubia kekeɗ ag na, na anin ele diiatna goppeg, wan laappa daaglah. Aa oh wan amuppa ii dopiɗ, amu aa aguppa daaya, mauhkkulah.

²⁷ Aa appa daayya, aa eɗuya ahilah wanppa uɗiglahnu oolah huan hekku, amge aa eɗuya iinab uɗimya,” awa atte.

²⁸ ⌊Yawe Nug anam awa atte, amu laa atteb.⌋ “O gadon, Jehoiakin nug am waa laa aoɗak daatte, danab laa nug waa amunu ena iinab dootte, nug amubia daattete? Ao, Jehoiakin nug laa waanu, ‘Waa amuam enanag, da aokkulnu ool okkai daatte,’ iinab atte amu, Jehoiakin nug amubia daattete? Aɗinu Yawe Nug heeb, danab nug men buɗie, laih gotte, amubia kekeɗ ag heppeg, Jehoiakin, bekkod ele ag amubia laih gokkulag? Ao, aɗinu Yawe Nug heeb, kekeɗ heppeg, Jehoiakin, bekkod ele ag wan imuppanu ahan gona, wan laappa, ag wan amu ii dootteb ele, ag aguppa daaglag?” aon atteb.

²⁹ O Juda danab ah. O Juda danab ah. O Juda danab ah, ag Yawenu nai doyeg!

³⁰ Yawe Nug inam atte. “Jehoiakin ⌊nug hipunin tuɗitta hette amunu,⌋ nug nid ele, amge nug bekkod oolagppa laa king ii daama. Jehoiakin nug bau dayaya, nug aɗi keeke ena heeb belo am heeb ii bema. Aɗinu? Nug buɗub laa nug Dawitnu sia kingppa ta, king ii daama. Laa amu nug Juda dilag king ii daama,” awa atte.