Jeremaia 20 - Nobonob Baibel

Pasur nug he, ag Jeremaia maniguittakppa meppig

¹ Imer bekka Pasur, nug am mana mettak danab laa, nug laa ag Yawenu mettid lag gumappig ele dilag okkai amu, nug Jeremaia dimppa aɗi bekkunu nai aɗi aɗi aum doya,

² nug he, ag Jeremaia, nug propet amu, ag nug eheɗ makkuɗnana, ag aon gona, Yawenu mettid lagnu aɗnu od laa onig Benyaminnu Od Attan, ag aben amuppa ag nug eppeg, baeg ele ad mahappa qagappig.

³ Pasur nug anam he ukke, wagɗe deɗ amuppa nug he, ag ad maha uhuqeg, Jeremaia nug ii qakkak dayaya, nug Pasur amegppa aum. “Danab ah ag na onin Pasur dootteb, amge Yawe Nug na onin Pasur ii dootte. Iitta. Nuhig neekkakppa na onin am Mago Misabib.

⁴ Aɗinu na onin anam daakku? Yawe Nug amunu inam atte. ‘Da heppi, na eheɗ nau baɗanna oippe, na laipad ele ag eheɗ nau baɗan oiglag. Na amenppanab na laipad ag kekeɗ dilag qep elabppa mauhppeppeg anidkkut. Da Juda danab ah oh Babilon dilag king eppegppa maadppi, nug ag diia, Babilon gokku, o iitta nug qep elabppa aqeb mauhkkulag.

⁵ Amu da heppi, Babilon dilag king nug Jerusalemnu en oh, amuam men doɗo, gol, silwa, stoappan keeke, amu Juda dilag kingnu en oh ele, nug amu oh aokku. Nug awowa, nug awa, Babilon gokku.

⁶ Nug amu hekku, amge Pasur, nahipnu amu, na, amu na lautppa daatteb oh ele, Babilon dilag king nug ag diia ukka, Babilon wanppa maatteb, ag appa diia ukka laih me dayak danab ah daaglag. Na appa daanna mauhppe, ag na appa boumidkkulag. Na, amu na laipad na ag amelagppa propet nai hambuppuak ame amu, na ag ele oh anamib ahilagppa daakku,’ ” awa atte.

Jeremaia uug doyomnu nai

⁷ ⌊Jeremaia nug Yawe amegppa aum.⌋ “O Yawe, da nahip uɗat hekkulnu ɠagattag ame, amu da aakku hemi, gemu ele hettem. Ao, na da nahip uɗat hekkulnu wagai meme, amu da aakku nahip uɗat hemi, gemu ele hettem. Amu gemu danab ag dahilnu hanhan ihaklel doon, imiɗtteb. Ao, danab ah oh ag da aon aon iutteb.

⁸ Aɗinu? Haen da nai attem amu, da nai qale, danab ag laa guittak nau mauhnoak madatteb, amu danab ag laa dilag keeke heeg nauhtteb, da amu dilagnu ai, nai amu ag yaaladtte. Yawe na da nai akkulnu, na amu ippuniɗme amunu, nahipnu nai, nai amu he, danab ah ag hanhan awa awa qettak nai naunab dahilnu anana, da nai madittemnu ele ag dahilnu nau dootteb,” awa aum.

⁹ Ag anam dahilppa hetteb. Amge Yawenu nai amu, da mehuqaknu ii uupa. Haen laala da attem. “Da Yawe, da baula danab ah Nug ii ippunadpa. Da nuhig nai baula ii mehuqpa,” awe attem. Amge da anam attem haenppa amu, nuhig nai da oolppa, o iitta da ebehil ooppa am aab aɗu bia bette. Da nuhig nai ii madipanu wagai mettem, amge elele iitta, da madikkulib.

¹⁰ Danab ah ag dahilnu otiptip-ppa mattiegeg doomi. Ag atteb. “⌊Nug ig padal mekkunignu, nug amuib maditte.⌋ Nug mattieye, nai amu he, danab ah oh ag eheɗ nau baɗatteb amunu, ig okkai danab amelagppa nai nug atte amu amelagppa apput, ag nug aɗaglag,” aon atteb. Ag anam aegeg, da lailad, ⌊ag oɗelagppaib da lailad daatteb amu,⌋ ag ele da nein qekkulnu oolag daatte. Ag anam henana, amu ag atteb. “Aria, ig hepput, nug kobol eheɗ laa heeb, ig nug eɗidta, ⌊nug nai eheɗ atte amu, ig⌋ amunu nob nau laa mettagnig,” aon atteb.

¹¹ Ag anam atteb, amge Yawe Nug da gukkuiɗak daatte. Nug ban danab ɠagattagnab laa bia daatte. Nug amubia daatte amunu, danab ah ag da heiɗppeg nauhkkulnu hetteb, ag geha nena qeppeg, ahilag dabmak am iitta mekku. Geha ag aɗi keeke hekkulagnu dabmetteb amu, ag ii hemana amunu, geha ag uɗa nak nau guittak ele dooglag. Geha danab ah ag uɗa nak ahilagnu iinab daulag atima.

¹² O Yawe Nakka Ɠagattag Oh Ele, na danab ah ag tutukkute, o iittate, na amu epeɗiadnana, na ag oolag, amu dabmak ahilag oh ele doottem. Na anam aakku henana daattem amunu, da eheɗ haknu nob tutukku mattaknu uɗat amu na eppenppa mettem. Uɗat amu na eppenppa mettem amunu, danab ag da eheɗ heiɗkkulagnu hetteb amu, na eheɗ hak ahilag, na amunu nob tutukku madakkutnu oɗ medattem.

¹³ Ag Yawenu ahi ettalatteg! Ag Nug binag humeg! Aɗinu? Nug daɗek danab, ag ɠagattag iitta ele, Nug danab amu ehanatte, ag nau hak danab eppelagppa ii daatteb.

¹⁴ ⌊Yawe Nug enanag anam hette, amge wanppa dayak am uug kuɗum ele amunu, anai ii menuiɗlo am ena.⌋ ⌊Diig amunu amu,⌋ menuak deɗ dahil am eheɗ laa awaknu anak waappa dayaɗ! Ao, laa nug deɗ da anil menuiɗom itittak ena aib mettom.

¹⁵ Danab nug nai awa ukka, da mamel amegppa, “Ah nahip nid menuom. Na aakku bekkat ele!” a, da mamel nug gamag ahak okkai doyom amu, danab amu nug ele eheɗ laa awaknu anak waappa dayaɗ!

¹⁶ Aab laala Yawe Nug amunu oo gai-iitta doya oo matta ehanittak kobol ii haaha he, aab amu ag nauhna autna aoppig amu, danab amu nug anam bia dayaɗ! Danab amu nug buttua qanak heegeg doyaya, belo haenppa nug bannu ewak ele doyaɗ!

¹⁷ Danab amu nug da anai ooppa daaiyi, nug he mauhi, anai nug dahil moɗ dayaya, ii menuiɗa, hanhan anamib oilo am ena, amge danab amu nug anam ii heum amunu, uug digdig amu nuhigppa baɗ!

¹⁸ Da uug digdig hanhan anidttem. Da uugnu oo doyak doyeye oittem. Da uɗa nak doyeye mauhkkulnu oittem. Aɗinu da anai ooppanu dokkulnu dayom?