Jeremaia 2 - Nobonob Baibel

Juda ag Kayak dimettan, kayak hambuppuak noolagppa dup nona binalag meppig

¹ Deɗ laa Yawe Nug nuhig nai imu da, Jeremaia, Nug da meɗom.

² “Na ahan, Juda danab ah oh ag nai dahil imu dooglagnu appe doyeg! ‘Ag Israel, ag dahil ah bia daatteb. Amu da Yawe, da anukka ag dahilnu oo mauhaknab dooppig daulppa dotte. Ag ah bau nug gamunu oo mauhtte, amubia ag dahilnu oo mauhak dooppig. Ag anam doon, ag atu taɗak, appa ag dim lamiɗna uɗippig. Ao, wan danab ah keeke ii ebattebppa, appa ag da dim lamiɗppig.

³ Ag Israel ag dahilnu tituanak daappig. Ag ee tatam oɗutte dahilnab daatte, ag amubia daappig. Laa mana mettak danab iitta, nug baekkudppa ele iitta, nug ee bau dahilnab amu latte dayeb, nug beɗuppa aab ele daatte, amubia aun nug Israel eheɗ hattom, nug beɗuppa aab ele dayeye, uug naunab nuhigppa te, padal meum.’ Da Yawe, da anam aakku attem,” awa aum.

⁴ Anam amunu, O Jakop buɗub, ag Yawenu nai imu doyeg! Ao, ag Israel buɗub oh, ag ahilag aab ikki atten attenppa daatteb, ag nuhig nai imu doyeg!

⁵ Yawe Nug inam atte. “Ag mamelkad aɗi ag da Yawe, ag dahilnu eheɗ aɗi laa anidppig amunu ag da uuiɗna, umanab goppig. Ag kayak hambuppuak, danab ah ehanadkkulagnu elele iitta, ag dottolkad amu dilag dabmena dim lamidnana, ag ele hambuppuak bena, aɗi keeke genab laa hekkulagnu elele iitta daappig.

⁶ Ag inam bia dabmelob. ‘Yawe omaikke, ig Isip wan uut, Nug atu taɗakppa omaikke uɗimut. Atu taɗak amuam atu taɗaknab, am nau. Ee keeke appa ii daatte. Ao, atu amu, appa keeke laa ii daatte, ihiib ameg qagma, gokkaɗa nan daatte. Atu amuam qaɗaiettak, gu ii nette. Ao, danab appa mauhkkunu am miagnab daatte. Atu taɗak amuppa am, danab laa ii daatte. Ge, appa ele danab ah ag ii oitteb.’ Ag dahilnu anam dabmelob, amge iitta. Ag amuam ii dabmeppig.

⁷ Da ag Israel, da ag omalatti, ag uɗin, wan ittag ele imuppa uɗippig. Ag wan imunu ad meu, ee laa oh ele lakkulagnu uɗippig. Ag am anamnu aakku uɗippig, amge ag uɗin, wan da aul ag heeg, dahil neekkakppa dubuttid tak ele daatte. Ao ag heeg, da dahil wan imunu oolppa uuaknab doottem.

⁸ Mana mettak danab ag da Yawe, ag dahilnu ii dabmeppig. Ao, danab ag danab ah laa dahil ɗo ippunadtteb ele, ag da ii dooiɗppig. Ikki danab ag da dimeɗan, dahil nai tappaeg neum. Propet danab ag Bal dabmenan, nug onigppa ahilag nai mehuqppig. Ag Bal, kayak hambuppuak laa ele, amu dottolkad dabmenana, dim lamadppig.

⁹ Ag amu heegeg uɗie, gemu ele hetteb amunu, da, Yawe, da ag naippa yaaladttem. Da amu heinne, da ag bekkalkad, am ag bekkalkad ele naippa yaaladkkul.

¹⁰ Da anam hekkulnu diig am inam. ⌊Ag Juda,⌋ ag ahan Kitim gona, neegna antteg! Ao, ag laa meppeg, Kedar ukka, nug neekka auta autanab awaɗ! Ag anam henana, ag laa ag Israel danab ah heppig bia heppigtai, o iittatai neegna antteg!

¹¹ Ag neegna, ag danab ah laa ag ahilkad kayak uuadnana, kayak laa dim lamadtteb, o iitta antteg! Israel danab ah ag amubianab aakku heppig. Kayak laa oh am kayak genab iitta, amge dahilad danab ah ag da uuiɗna, ag kayak hambuppuak laa, kayak amu ag ag ehanadkkulagnu elele iitta, ag dottolkad amu noolagppa dup nona binalag madatteb.” Yawe Nug anam awa atte.

¹² Amu Yawe Nug atte. “O hab, na danab daalom, na Israel heppig anidna, na ootppa eheɗ nau doolom. Ao, na ameg iɗuak doonna, beɗun hahaɗlo.

¹³ Aɗinu? Danab ah dahilad, ag hipunin ib aɗit iikku heppig. Laa ag da, da am le bauklel diig amu, ag da uuiɗna, piɗe wana oitteb. Aria, laa amu, ag akka ag le aoglagnu wan moɗ buuppig. Ag amuppa le aoglagnu simen aɗappig, amge simen am aoɗom, le moɗ amuppa le daakkunu elele iitta.

¹⁴ O Israel danab ah, ag anilkad mamelkad ele am begbeg maɗi nid iitta amunu, ag gemu daatteb, ag anilkad oolagppanu doppig, haen amuppa ag begbeg maɗi nid ii daappig. Anam amunu, laa ag uɗin, ag eɗadna diin gona heeg, ag maɗi nid maɗi ah ele daatteb amu, amuam diig aɗinu?

¹⁵ Am genab, kekeɗ ag laion gaatte bia hena heeg, ag eheɗ aoppig. Ao, kekeɗ ag laion bau nug liɗimtte bia hena heeg, ag eheɗ daappig. Kekeɗ ag heeg, ag Israel, ag ahilag wan am nauhaknab awom. Ao, kekeɗ ag ahilag aab amoteg ewe, appa danab ah ii daatteb.

¹⁶ Ele amu, danab aab okkai Mempisnu, Tapanesnu ele, ag heeg, ag Israel ag gemu binag amahlak oppiaawak ele nakok laa iitta ele daatteb.

¹⁷ Keeke amu oh ahilagppa beum amu, amunu diig am, ag da, Yawe, ahilag Kayak, da ag omalatti uɗippig amu, ag da uuiɗppig. Ag da uuiɗppig amunu, kobol eheɗ ahilagppa beum ele, amuam ag beɗulagppa iittate?

¹⁸ Ag laa ag Isip appanu ehanittak aoglagnu hetteb, amge aɗinu?. Ag laa ag Asiria appanu ehanittak aoglagnu hetteb, amge aɗinu? Ag wan aɗit amuppanu ehanittak ii aomna.

¹⁹ Ag nau hetteb amunu, nau hak ahilag am ag bu madakku. Ao, ag da dimeɗona kayak hambuppuak laala dim lamattegeg uɗie, gemu ele hetteb amunu, ahilag kobol amu, am ag daulag batakku. Anam amunu, ag da, Yawe, ahilag Kayak, ag da uuiɗna, ib laa oiyegeg, ag ebehilag oh dahilnu bodoetta le ii mette, diig amunu uug okkai ahilagppa anam bette, amu kobol amuppa ag nob eheɗ aona, mua naunab nau dootteb dabmenan oiyeg!” Naɗi, Yawe Nukka Ɠagattag Oh Ele, Nug anam aakku atte.

²⁰ Amu Yawe Nug atte. “Anukkanab ag dahil nai, dahil ɗo ele dimettan autna aoppig; ag makau, o danab, nug muɗi o aɗi keekeppa qakkak daatte ele, nug keeke amu he nauhtte, amubia ag heppig. Ag amu henana, ag da amelppa appig. ‘Ig na waatppa iinab daamta,’ aon appig. Ge, ag amu henana, ag qauko nakok ohppa, ad okkai eppelkad bahia ukkak ele oh waalkadppa ele, ag kobol nau heppig; ag ib baag ah danab eeɗadtte, nug ele niitteb, kobol nuhig amubia ag heppig.

²¹ Israel danab ah, ag am muɗi grep danab eppom, amubia. Muɗi grep amuam enanag, meu okkunu elelenab, oɗe keeke iitta. Nug muɗi grep elele anam eppom, meu enanag aokkun dabmeum, amge muɗi grep ba, okkai ma, meu oum, me meu amuam ena iitta; am meu nau. Muɗi grep amuam eɗua, muɗi grep dakkuɗ, meu ena iitta ele beum. Amu ag Israel danab ah, ag dahilppanu anam bia aakku.

²² Anam amu, da, Naɗi Yawe, da inam iikku attem. ‘Ag Israel ag beɗulagppa aab ele. Danabnu lamen gau laittak daatte, nug sop, blis eleppa huana ihatte, amge gau amu iitta ii mette, amubia ahilag aab iitta ii mette. Da noolppa aakku daatte.

²³ Ag, “Kayaknu neekkakppa ig oonigppa dubuttid ii teum daatte,” atteb, amge attem hena, ag anam atteb? Ag, “Ig kayak hambuppuak Bal iɗu iɗu dim dim ii lamidmut,” atteb, amge attem hena anam maditteb? Amu oh am nai genab iitta. Ag oolnu noak onig Hinom, ag appa kayak hambuppuak noolagppa dup nona binalag iite metteb? Ag hetteb. Ag aɗi aɗi heppig dabmena autna aweg! Ag kamel balat, dawai antteb papalkkunu qaiqaɗ laih gotte laih uɗitte, ag amubia kayak hambuppuak dilag dup nona binalag mekkulagnu hetteb.

²⁴ Ge, ag donki dakkuɗ balat laa atu taɗakppa daatte, nug dawai antteb, papalkkunu nug adeppa daatte hiuɗi dookkunu noob ewa oitte, ag amubia kayak hambuppuak noolagppa dup nona binalag mekkulagnu hetteb. Donki dakkuɗ anam hette amu, aun nug nuhig ib keldokkunu elele? Iitta! Donki dawai attem nug papalkkunu wagai maama, nug dim dim ii lamidma. Iitta. Donki balat miagib uɗieb anidkku.

²⁵ Anam amu da ami. “O ag Israel, ag eheɗ amu hekkulagnu aib qaiettan gonana, ag baalag qaɗaietteb, baelag gaɗa ele nauhom,” ami. Da anam ami, amge ag appig. “Iitta. Ig ib laa iitta. Hakib hekkunig. Ig kayak hambuppuak laihnu awadkkunignu oonig mauhtte amunu, ig ib amuib dim lamidkkunigoitte,” aon appig.

²⁶ Amu Israel oh ag uɗa nak nau guittak eleppa daatteb. Haen polis ag yab danab aɗaeg, uɗa nak nau guittak ele dootte, uɗa nak ahilagppa anamib daatte. Ag, ahilag king, ahilag ehanittak anuqak danab, ahilkad mana mettak danab, amu ahilkad propet danab ele, ag oh anamib.

²⁷ Ag ad aon, kayak hambuppuak dottog hoina, ag, “Na am ig mamenig,” aon atteb. Ao, ag men laa aona, ag, “Na ig menuigme,” ele aon atteb. Ag amu hekkulagnu diig am, ag da dimeɗan, ag da dim lamiɗkkulagnu uuppig. Ag anam hetteb, amge uug bette haenppa ag ahan, da amelppa, “Uɗin ehanigppe, ig padal aib memut!” aon atteb

²⁸ Ag Juda, ag amu hetteb, amge ag dahilppa aib uɗippig! Ag Juda ag aab gane ele daatteb amu, ag kayak hambuppuaknu ebqak anamib ele amunu, uug haenppa, ag gona, kayak dottolkad hoyadppig amu noolagppa ukkeg! Kayak amu ag ahan uɗin ehanadppeppeg, ag aib padal meppig.’ ” Yawe Nug anam atte.

²⁹ Amu Yawe Nug atte. “Aɗinu ag naippa da yaaiɗtteb? Da eheɗ ii hemi. Ag eheɗ hena, ag da dimeɗana, dahil nai tappaeg neum.

³⁰ Da ag Israel ag oolag eɗukkunu bu mattami, amge ag oolag eɗukkunu uuppig. Ag laion doɗ laa aqe mauhtteb, amubia ag qep elabppa dahil propet aqaeg mauhppig.

³¹ Amu ag Israel ag gemu daatteb, ag dahil nai imu doon dabmetteg! Atu taɗakppa, danab nug appa ehanittak keeke nakok laa aokkunu elele iitta, da ahilagnu anam daamite? Ao, atu laa, gatatu manak ele, appa keeke kuɗum danab heppeg nauhkkunu daatteb amu, da ahilagppa anam laa daamite? Da amubia laa ii daami amunu, aɗinu ag, ‘Ig Yawe uut, Nug baula ii dim lamidmata,’ atteb?

³² Ah laa nug nuhig ewau matulak awaknu bala daug ii atitte. Ao, ah nug ewau matulak awak haenppa aɗi bala meum am dabmette, daug ii atitte. Nug anam hette, amge ag Israel ag dahilnu haen elabnab daulag atie, dahilnu nakok laa ii dabmeppig.

³³ Ah laa ag danab ah noolagppa ah ena daatteb, amge lokkumakppa ag danab kuɗum ele niiglagnu kobol kobol henana, danab kuɗum, ib baag ah eɗittak eeɗadtteb, ib baag ah ahilagppa ippunittak aoglagnu elele, ag Israel ag kayak laa dilagnu amubia hetteb.

^34-35 Laa amu, ag Israel ag danab ahilag keeke ii aoppig, ag eheɗ laa ii heppig ele, ag amu aqaeg mauhppig. Ag amu heppig, amge ag, ‘Ig hipunin hemut,’ ii appig. Iitta. Ag, ‘Ig beɗunigppa aab iitta. Yawe Nug ihinignu oo nauhak laa ii dootte,’ atteb. Ag anam atteb, amge iitta! Ag hipunin henana daanna, ‘Ig hipunin ii hemut,’ atteb amunu, da naippa yaalatten, bu madakkul.

³⁶ Ag dabmak digdig dim lamidnana, kobol kaboliak kuɗum hetteb. Tatam ag Asiria ehanadkkulagnu dabmeppig; iitta anidna, ag ahan, Isip ehanadkkulagnu goppig. Amge ag ele ii ehanadmana.

³⁷ Da laa ag Israel, ag ahilagnu ehanittak aoglagnu oolagppa genab dootteb, da laa amu geɗadmi; ag Israel, ag ahilagppa ehanittak ii aomna amunu, ag Isip dilagppa ele oo uugnab, uɗa nak ele doon, ahan Isip uuglag.” Yawe Nug anam atte.