Jeremaia 19 - Nobonob Baibel

Jeremaia waa ele dilah nai

¹ Amu Yawe Nug da, Jeremaia, da amelppa aum. “Jeremaia, na waa keeke hak danab laugppa gona, appa na hinai laa daden mewona, na Israel dilag ikki danab laa, amu mana mettak danab laa ele diin,

² na aɗnu od onig Potsherd wana, ab dimittim gona, na oolnu noak onig Hinom Bekkanu Oolnu Noak, na appa gona, appa da nai ippunidttem amu, na appe doyeg!

³ Na inam akkut. ‘O Juda dilag king, amu Jerusalem danab ah ele ag Yawenu nai doyeg! Yawe Nukka Ɠagattag Oh Ele, Israel dilag Kayak, Nug inam atte. “Doyeg! Da heppi, uug naunab aben imuppa nekku. Danab auntai nug amu nekku dimppa, nug amunu nai dookku amu, nug eheɗ ottaikku.

⁴ Aɗinu da anam hekkul? Juda danab ah ag da dim lamiɗaknu uun, kayak laihnu diiadna uɗin meeg, aben imuam kayak hambuppuak dilag aben aakku daatte. Ag aben imuppa doɗ manan, kayak hambuppuak amu mattegeg uɗie, gemu ele hetteb. Ag, am ag mamelkad aɗi ele ag kayak amu ii dooppig. Juda dilag king tatam daappig, ag ele kayak amu ii dooppig. Juda amu henana, ag laa eheɗ laa ii heppig, beɗulagppa aab iitta ele, ag ag hamu aqaeg mauhegeg uɗie, gemu ele hetteb.

⁵ Ag kayak hambuppuak Balnu mettid lag nakok kuɗum hena, ag appa ag bekkalkad manaknu ofa daaglagnu manadna, nug medatteb. Da ag amu hekkulagnu ɗo laa ii mattami; ag amu hekkulagnu iinab ami. Hak amuam dahil dabmakppa nakok laa ii beum.” ’ ” Yawe Nug anam atte.

⁶ Amu Yawe Nug imu ele atte. “Anam amunu, ag dabmeig! Haen laa uɗitte amu, haen amuppa danab ah ag aben imunu, ‘Topet,’ ii amana. Ag, ‘Hinom Bekkanu Oolnu Noak,’ ele ii amana. Iitta. Ag aben imunu, ‘Danab Ah Eheɗ Aqaeg Mauhppignu Oolnu Noak,’ aon akkulag.

⁷ Juda danab, laa Jerusalemnu, laa Juda wanppa laih laihnu amu, ag aɗi aɗi hekkulagnu, ag attem attem daaglagnu maittak aotteb amu, aben imuppa da heppi, maittak amu iitta mekku. Juda dilag kekeɗ, ag Juda danab aqaglagnu hetteb ele amu, da heppi, ag ag qep elabppa aqappeg mauhkkulag. Da heppi, ag aqappeg mauhppeg, ai hab waappa hagagaɗna oitteb, doɗ wanppa oitteb ele amu, ag gaɗalag lakkulag.

⁸ Da heppi, aab okkai imuam nauhakib dayebeb, danab ah laa ag aab imuppan danab ah dilagnu, ‘Keeke hamunab,’ dooglag. Ge, aun aɗi ag aab imu guguittak oinna, ag aab okkai imu eheɗ nau awom anidna, ag dabmak huanak aona, ag aab imunu danab ah aon aon aqaglag.

⁹ Da heppi, kekeɗ ag Juda danab aqaglagnu hetteb ele, ag uɗin, aab imu oo mattan aqaknu maadna daanna heppeg, ee iittanab meeb, danab ah aab ooppa daatteb ele ag bekkalkad, aɗelkad ele teppulag lanana, ag lailkad teppulag ele lakkulag.” Yawe Nug da amelppa anam aum.

¹⁰ Yawe Nug anam awowa, Nug tuɗitta, da amelppa aum. “Jeremaia, na amu oh mattin malona, Juda dilag ikki danab aɗi na diin gokkut ele anidppeppeg, na hinai amu oppe aoɗaɗ!

¹¹ Na amu hewona, na ag amelagppa inam appe doyeg! ‘Yawe Nukka Ɠagattag Oh Ele, Nug inam atte. “Hinai aoɗak dayeye, laa bappaidkkunu elele iitta, amubia da heppi, Juda wan, Jerusalem ele nauhak daaglah. Ag aben imu onig Topet, ag ippa laa mauhkkulag boumadppeg ukkeb, aben iitta daakku, amge ag boumak uɗat ii malamna,” Yawe Nug anam atte.

^12-13 Amu Yawe Nug inam ele atte. “Oolnu noak imu onig Topet, ippa ag danab gaɗalag huanak boumadkkulag amunu, aben imuam dahil neekkakppa dubuttid tak ele daakku. Amubia da heppi, Jerusalem am aben imu, Topet, amubia daakku. Jerusalem appa ag lag laalappa, king laug ele koɗokko uɗem ukkakppa tena, ag kalu danab ile muttuɗig enanag bette, ag kalu amu hoɗoppai dilagnu manan mattanna, ag kayak hambuppuak laala dilagnu ele wain gokkaɗaknu ofa heegeg uɗie, gemu ele hetteb. Anam amu, da heppi, lag amu oh am dahil neekkakppa dubuttid tak ele daaglag. Dubuttid tak amuam aben imuppa, Topet atteb amu, dubuttid tak aben imuppa daakku, anamib lag amu ohppa ele daakku.” ’ ” Yawe Nug da amelppa anam aum.

¹⁴ Aria Yawe Nug Jeremaia amegppa anam a, Jeremaia nug amu oh ha mala, nug aben onig Topet, Yawe Nug appa ukka, dimppa aɗi bekkunu nai madikkunu me ukkom amu, nug aben amuppanu aha, eɗua Yawenu mettid lagnu haɗap-ppa dayaya, nug danab ah oh amelagppa aum.

¹⁵ “Yawe Nukka Ɠagattag Oh Ele, Israel dilag Kayak, Nug inam atte. ‘Doyeg! Juda danab ah ag da oɗel dim lamidmananu dabmak ahilag ɠagattag eppe, ag dahil nai doyak uun, ii dim lamidtteb amunu, da aɗi uug naunab aab okkai imuppa, aab talilidna daatteb ele dilagppa bekkulagnu ami amu, da heppi, uug amu oh genab anamib bekkulag,’ ” awa atte.