Jeremaia 18 - Nobonob Baibel

Jeremaia nug waa keeke hak danab laugppa ukkom

¹ Deɗ laa Yawe Nug Jeremaia nai laa metta, Nug aum.

² “Jeremaia, na ahan, waa keeke hak danab laugppa goppe, appa da nai dahil laa na medakkul,” awa aum.

³ Nug anam aum amunu, da ahen, waa keeke hak danab laugppa ukken, da nug waa, hinai keeke haknu masinppa, keeke amu haaha dayeye anidmi.

⁴ Nug uɗat anam heum, amge waa nug hekkunu heum ele, waa amu ena ii beum amunu, waa keeke hak danab nug wan amu eɗua awa, waa laa heum. Nug anam haaha, waa amu iɗu atten daakkunu dabmeum amu, nug dabmak amuib dim lamitta babaittom.

⁵ Waa, hinai keeke hak danab nug anam haaha dayeye, Yawe Nug nuhig nai imu da, Jeremaia, Nug da meɗom.

⁶ “O Israel danab ah, da waa keeke hak danab hette bia amu, da ele amubia hekkulnu elele iittate? O Israel buɗub, wan am waa, hinai keeke hak danab eppegppa daatte, amubia ag da eppelppa daatteb.

⁷ Amu deɗ laa da kekeɗ ag wanppan wan laa, o ɗo maɗoɗ laa heppeg, ag nauhna autna aon, nena qena padal mekkulagnu akkul dayeb,

⁸ amu wan amuppan danab ah, da ag amelagppa ag nau aomnanu dabmettak nai mattimi amu, danab ah amu ag oolag eɗueb, eheɗ tuɗidna hemananu dabmekkulag dayeb amu, da uug naunab madakkulnu dabmemi amu, da uuen, ii hepa.

⁹ Anam, amge haen laa da wanppan wan laa, o ɗo maɗoɗ laa ehanadppi, ag ena bena, ɠagattag daaglagnu akkul dayeb,

¹⁰ amge wanppan wan amu, o ɗo maɗoɗ amu, amunu danab ah ag digmena, da oɗel ii dim lamidnana, da noolppa ele eheɗ hekkulag dayeb, da ag ena hadakkulnu dabmak dahil eɗuen, ii ehanadpa.

¹¹ Anam amunu, Jeremaia, na danab ah Jerusalem daatteb, Juda danab ah laa oh ele inam amelagppa appe doyeg! ‘Yawe Nug inam atte. Antteg! Da uug naunab ahilagppa bekkunu babaittette daattem, da ag nau aoglagnu ib aakku ooɗttem amunu, ag anen anen ag nau tuɗidna hemananu ag oolag eɗueb, ag ahilag kobol, ahilag hak ele tutukku dayaɗ!’

¹² Na ag amelagppa anam appe dooglag, amge ag eɗun, na amenppa akkulag. ‘Ig anam helom, amge elele iitta. Ig ikka ig attem dabmettem am hekkunig. Ig anen anen ig oɗe dim lamidmatanu dabmak ihinig ɠagattag eppom daatte. Anam amu, ig aɗi eheɗ hekkunignu onig daatte amu, ig hekkunig,’ aon akkulag.” Yawe Nug anam atte.

¹³ Ag anam akkulag amunu, Yawe Nug imu ele atte. “⌊Laa⌋ ahan gona, wan atu laih ohppa danab ah oɗ mattan doyeg! Appa Israel danab ah hetteb bia heppigte oo iittate? Israel danab ah ag ah makkun kobol nau laa hette, ag amubia heegeg uɗie, gemu ele hetteb.

¹⁴ Sno Lebanon qaukoppa daatte, am alet anamib daatte. Ii iitta mette. Ao, le oug appanu nette amu, le amu ele alet, anamib nette. Ii iitta mette.

¹⁵ Dahilad danab ah ag ele anam bia alet dabmeɗan oilob, amge iitta, ag dahilnu daulag atiom. Ag ahan, kalu danab ile muttuɗig enanag bette manan, kayak hambuppuak madatteb. Kayak hambuppuak amu ag heeg, dahilad danab ah ag nena qena daatteb. Ao, kayak hambuppuak ag heeg, dahilad danab ah ag kobol ena, anukka ippunittak amu aoppig amu, ag ib amuppa elele ii oitteb. Ag heeg, dahilad danab ah ag ib ena apiɗidna oitteb. Ao, ag ib nauppa oinna, ib enappa ii oitteb.

¹⁶ Diig amunu amu, kekeɗ ag heppeg, ag Israel, ag ahilag wan am nauhaknab daakku. Danab laa ag nauhak amu anidna, ag ag Juda, ag ahilagnu, ‘Keeke hamunab,’ dooglag. Aun aɗi ag nauhak amu anidna, ag dabmak huanaknab aonna, ag ikkilag matuɗkkulag.

¹⁷ Kaɗag uɗiaya, gappud keeke ehale gotte, amubia da heppi, kekeɗ ag Juda danab ah lamadppeg, matatun gona daaglag. Uug naunab nekkunu deɗ, deɗ amuppa amu da Juda dimatten, ii ehanadpa.” Yawe Nug anam awa atte.

¹⁸ Amu danab laa ag appig. “⌊Jeremaia atte am genab iitta.⌋ Mana mettak danab ag Yawenu ɗo ippunigtteb amu, kobol amu ii iitta mema. Danab doyak dabmak ena ele ag ulum nai ena megatteb amu, amu ele ii iitta mema. Propet danab ag Yawenu nai mehuqeg doottem amu, kobol amu ele anamib daakku, ii iitta mema amunu, ahappeg, ig hepput, Jeremaia hettoɗiakppa dayaya nauhaɗ! Ig amu hepput, nuhig nai ig daunigppa baula ii daama,” aon appig.

¹⁹ Ag anam aegeg amu, Jeremaia nug Yawe unuqitta aum. “O Yawe, na dahil unuqittak dookkutnu oɗ medattem. Ao, na laa kekeɗ meɗappig umu, ag aɗi aɗi maditteb amu, na daut human, amu dookkutnu unuqidttem.

²⁰ Danab nug layag ehanitteb, layag nug eɗua, nuhigppa eheɗ hekku dayeb, amuam kobol ena iitta, amge danab kekeɗ meɗappig ag anam hetteb. ⌊Da ehanadkkulnu hemi,⌋ amge ag eɗun, danab doɗ aokkunu pelem bappaidtte, ag amubia dahilnu hetteb. Na imu eɗua dautppa dokkunu oɗ medattem. Da ehanadkkulnu heinne, da na noomppa dayeye, naippa ehanatten, na oppoɗin beeb, na ag bu ii madakkutnu oɗ mettami. Da amu hei, gemu ag nau imu hetteb

²¹ amunu, na heppe, nid naunau ahilkad ag enugppa, o qep elabppa mauhppeg, danab amu ag laa eppelagppa guittak aon mauhppeppeg, ahilkad ah ag ah qab, nid iitta daappeg, ag bekkalkad nid bau, ag ele banppa mauhkkulagnu oɗ medattem.

²² Danab amu ag da awiɗkkulagnu pelem heppig. Ao, ag da pelem ahilagppa tekkulnu ag uhui aakku meppig. Anam amunu, na heppe, kekeɗ ag eheɗ hattaglagnu laippun uɗippeg, danab da kekeɗ meɗappig ele ag lakka daanna, gaaglagnu oɗ medattem.

²³ O Yawe, na ahilag maittak, ag heppeg mauhkkulnu dabmetteb ele amu, na amu doottem. Na doottem amunu, na ahilag hipunin ii uhuqna mattamnanu, na ahilag hipunin na noomppa daan, ii iitta memananu da na oɗ medattem. Na ahilag haknu oo nauhak doonna, na heppe, ag nena qena, padal mena autna aoglagnu oɗ medattem,” awa unuqittom.