Jeremaia 17 - Nobonob Baibel

Yawe Nug Juda danab ah bu madakku

¹ Amu Yawe Nug atte. “Danab nug aen maha laa, o men ɠagattag laa awa, amuppa nai laa men laappa otaɗtte, laa nai amu hamu obikkunu elele iitta daatte. Nai anam daatte, amubia Juda dilag hipunin am ag oolagppa yaak daatte. Ao, nai amuam doɗ mana mettaknu qaɗab ahilag anen anen qeqeɗi daug waɗeleppa daatteb, qeqeɗi amuppa yaak daatte.

² Anam daatte amunu, Juda danab ah ag hipunin amu hekkulagnu daulag ii atitte, hakib heegeg, nid ahilkad ele ag amunu dabmakppa daanna, hipunin amu hetteb. Ag kayak hambuppuak dilag qaɗab, amu kayak hambuppuak Aserah dabmekkulagnu biidod ele ad okkai eppelkad bahia ukkak ele guguittak, qauko nakok okkai igippa,

³ qauko okkaippa, amu gikkiɗah dad okkaippa ele meeg daatteb amu, ag amu dabmena, appa ag kayak hambuppuak laala, amu Aserah ele noolagppa dup nona binag metteb amunu, da ahilag en, ahilag keeke ena ena ele laa hamu madakkul. Ag wan ahilagppa aben ohppa kayak hambuppuak noobppa dup nona binag menan hipunin hetteb amunu, da aben amu oh laa hamu madakkul.

⁴ Ag beɗulagppa ag wan ahilag, da wan amu ag aulag daakkunu ag mattami amu, ag beɗulagppa ag wan amuppa ii daamna. Ag hipunin anam heeg, oo nauhak dahil am aab huana ewewe, laa qauhkkunu elele iitta bia daatte amunu, da heppi, ag kekeɗ waalagpa, ahilag begbeg maɗi nid daan, ag wan laappa, ag amu ii dootteb ele, ag aguppa anam daan oiglag,” awa atte.

⁵ Yawe inam atte. “Laa nug danab dilag ooppa genab dootte, nug ɠagattag, danab dilagppa aokkunu dabmette, nug da, Yawe, nug da dimeɗa ii dim lamiɗtte amu, nug aakku eheɗ laa awaknu anak waappa daatte.

⁶ Amu danab laa anam amu, nug am wan meu waknu nakokib elele, appa ad naunau ag ehanittak elele ii aotteb, nug amubia daakku. Danab amu nug nuhigppa keeke ena laa ii bema. Nug geha atu taɗakppa, aben laa qaɗaiettaknabppa daakku. Ao, nug laih wan ittag iitta ele, nug laih laa danab ag ii daatteb, nug appa daakku.

⁷ Danab laa nug laa dilagppa ehanittak aokkunu ooppa genab dootte amu, am anam aakku daakku, amge aun nug Yawenu ooppa genab dootte, nug itittak ena aokku.

⁸ Amu danab nug Yawenu ooppa genab dootte, nug am le daugppa ad laa diɗi le amuppan le aotte, nug amubia daakku. Gakkaɗak haen nau daakku, o iitta, gu nakok laa ii nekku, amge ad amu uɗug ii qaɗaiettamna. Haen amubiappa ele ad nug meu wawaib daatte. Anambiaib, danab laa nug Yawenu ooppa genab dootte, nuhigppa daakku.” Yawe Nug anam awa atte.

⁹ O gadon, danab ah oolag unuqagppa hambuppuak aakkuib daatte. Danab aun laa danab oolagppanu nug amu heeb, babaittak daakkunu laa iitta. Aun nug amu tutukku dookkunu elele iitta.

¹⁰ Anam, amge Yawe Nug atte. “Da Yawe, da danab, nuhig hak aɗi ippuniɗtte amu, da amu dabmein, nob tutukkuib medakkulnu, da nuhig kobol aɗi ippuniɗtte amu, da amu ele dabmein, nob tutukkuib medakkulnu, da danab oolag unuqag andette, da ahilag dabmak ele anidttem.

¹¹ Danab laa nug laa dilagppa kobol eheɗ ha, en okkai aotte, nug am ai patris ai laanu oppa tona makkultte, nug amubia daatte. Nug enub ele haen elab ii daama. Iitta. Ai laan oppa patris makkulom ele, ai amu ag paha patris uuna, hagagaɗna gokkulag, amubia enub amu iitta mekku amunu, danab nug en kobol amuppa awom ele, laa ag nuhignu nug am danab Kayak dab-ii-maama ii dim lamidtte ele dooglag.” Yawe Nug anam awa atte.

Jeremaia nug Yawe unuqittom

¹² Jeremaia nug inam unuqittom. “O Yawe, na digmak haenppa uɗie uɗie, gemu ele na nahip sia king enanagnab, na amuppa dayeye daattem. Na am ihinig padal mak eɗitteb ena dayaknu ehanittak daattem.

¹³ O Yawe, naib ig Israel buɗub ehanigppe, ig ena daagnig. Danab ah oh ag ib apiɗidna, na uuidna oitteb ele, ag uɗa nak aoglag. Laa ag na, Yawe, ag ib apiɗidna, na uuidna, oitteb, ag yaak gappudppa dayaya, paha nauhtte, ag amubia nauhkkulag. Aɗinu ag anam nauhkkulag? Ag na Yawe, na keeke ena ohnu diig daattem amu, ag ib apiɗidna, na uuidna oitteb.

¹⁴ O Yawe, ⌊na da ehaniɗttem amunu,⌋ da naib binan mettem. ⌊Naib ehaniɗttem⌋ amunu, na heppe, da eɗuen, oɗe iitta ele daakkul dayeb amu, da genab oɗe iitta ele daakkul. Ao, na da padal mepanu ehaniɗkkut dayeb amu, da genab padal ii mepa.

¹⁵ Juda danab ah ag da amelppa nai imu anan daatteb. ‘Jeremaia, na, “Da Yawe oɗe awen, ag amelagppa madittem,” attem, amge na keeke bekkunu attem am ii bette. Na genab Yawe oɗe aon madittem dayeb amu, aɗinu nai amunu meu ii bette? Na hambubuttem’ aon atteb.

¹⁶ O Yawe, na nahipad danab ah gumattak uɗat imu da meɗame amu, da uuen oole, uɗat laa ii hemi. Na doottem, da deɗ laa na heppe, Juda danab ah imu ag nauhkkulagnu ool ii dayom. Da aɗi nai madittem amu, da na amenppanab madittem; da na doomnanu lokkumen madikkulnu ii hettem.

¹⁷ Na uuiɗppe, da baɗak eheɗ nau dookkul amunu, na da amu hepanu oɗ medattem. O Yawe, uug naunab bette haenppa amu, na am padal mak eɗitteb ena dayaknu ehanittak dahil daattem.

¹⁸ Na ehaniɗppe, da uɗa nak ii doopa, amge na heppe, laa ag eheɗ heiɗtteb ele ag uɗa nak aoglagnu oɗ medattem. Ao, na ehaniɗppe, da baɗak eheɗ nau ii doopa, amge na heppe, laa ag eheɗ heiɗtteb ag baɗak eheɗ nau dooglagnu oɗ medattem. Na heppe, laa eheɗ heiɗtteb amu, uug naunab ahilagppa bekkunu oɗ medattem. Ge, na heppe, ag padal mena autna autnanab aoglagnu unuqidttem,” awa unuqittom.

Mettidppa hik aoglagnu nai

¹⁹ Amu Yawe Nug da amelppa inam aum. “Aabnu aɗ od onig Danab Ah Dilag Od, danab ah, Juda dilag king ele od amuppa aab ooppa nona, eɗun dimittim gotteb ele amu, na od amuppa, amu Jerusalem aabnu aɗ od laa ohppa ele gona daanna,

²⁰ na Juda aɗi ag amelagppa inam appe doyeg! ‘Ag Juda dilag king, ag Juda danab ah, ag Juda laa Jerusalem daatteb ele, ag aɗnu od imuppa uɗin oitteb ele amu, ag oh Yawenu nai imu doyeg!

²¹ Yawe Nug inam awa atte. “Ag Sabat deɗppa keeke maon, Jerusalem ooppa gokkulagnu uɗin, aɗnu od attenppa tena, aab ooppa gomananu dabmena autna aweg!

²² Amu ele, ag keeke maon, ag laulagppanu dimittim uɗiglagnu, o uɗat laa Sabat deɗppa hekkulagnu aib heppig. Da ag mamelkad aɗi haknunab nai mattami, ag nai amu atte, amubia heppeg, Sabat deɗnu am dahilnu tituanak dayaɗ!

²³ Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

²⁴ Yawe Nug ag memetalkad dilagnu anam atte, amge Nug ahilagnu inam atte. “Ag memetalkad anam heppig, amge ag gemu daatteb, ag da oɗel tutukku dim lamidkkulagnu dabmena autna aon, dim lamidkkulag dayeb, ag Sabat deɗ am dahilnu tituanak daakkunu keeke maon, aab okkai imunu aɗnu od attenppa uɗin, aab ooppa ii gokkulag dayeb, ag uɗat laa ele ii hekkulag dayeb amu,

²⁵ ahilag king ag Dawitnu sia kingppa daatteb, ag am ahilkad anuqak danab ele, ag aab imunu aɗnu odppa gonana, eɗun uɗiglag. King am ahilkad anuqak danab ele ag oiyaknu karisppa, hos attan ele uɗippeppeg, Juda danab laa, danab Jerusalem daatteb ele, ag oh uɗiglag, amu Jerusalem am ii nauhma. Danab ah ippa hanhan daaglag.

²⁶ Anam daakku amunu, danab ag Juda aab laalappanu, aab naunau Jerusalem talilittak daattebppanu, Benyamin wanppanu, wan ooppan qauko qaban uɗitteppanu daatteb, qauko amu diigppa qauko nakok daattebppanu, wan laih qauko qauko daattebppanu, amu Negeb appanu ele uɗin, ag manaknu ofa hekkulagnu doɗ, mana mettak laala ele hekkulagnu doɗ, ee aegnu ofa hekkulagnu ee aeg, muttuɗig enanu ofa hekkulagnu kalu danab ile muttuɗig enanag bette, amu ena heme anaknu ofa hekkulagnu doɗ ele aon, Yawe laugppa uɗiglag.

²⁷ Ag da oɗel dim lamidkkulag dayeb amu, anam daakku, amge ag oɗel ii dim lamidkkulag dayeb, ag Sabat deɗ am dahilnu tituanak daakkunu ii dabmekkulag dayeb, ag Sabat deɗppa keeke maon uɗin, Jerusalem aab aɗnu od laalappa uɗin, aab ooppa gokkulag dayeb, da heppi, aab ewak, laa qauhkkunu elele iitta aɗnu odppa digma ewawa, appanu ewebeb ukkeb, aab oh, nuhig aab aɗ ɠagattagnab ele oh eokku.” ’ ” Yawe Nug anam awa atte.