Jeremaia 16 - Nobonob Baibel

Yawe Nug Jeremaia nug bau dayaya, aɗi aɗi hekkunu oo niiom

¹ Amu Yawe Nug nuhig nai imu da, Jeremaia, Nug da meɗom.

² “Jeremaia, na wanppan wan imuppan ah aon, nid danab, nid ah ele aib menuadme,” awa aum.

³ Aɗinu Yawe Nug anam aum? Nai anak amunu diig am, Nug nid danab, nid ahin ele, ag anilkad mamelkad wan imuppa menuadtteb amu, Nug ag, am ag anilkad mamelkad ele dilagnu inam atte.

⁴ “Ag oɗe naunabppa mauhkkulag. Ag mauhppeg, laa ag ii mahimna, ii boumadmana ele. Ag gaɗalag hamu kinipan bia wanppa niiglag. Ele amu, kekeɗ ag qep elabppa ag aqappeg mauhppeppeg, ag enugppa ele mauhkkulag. Ag mauhna, ag gaɗalag am ai hab waappa hagagaɗna oitteb, doɗ dakkuɗ wanppa oitteb ele dilag ee daaglag,” awa atte.

⁵ Anam amunu, Yawe Nug atte. “Laa mauhkku dayeb amu, laa nug laugppa, laikkud ele daaglagnu aib teum. Appa ee ele aib laum. Nug ukka, aib mahiom; mauhak laikkud ele ɠagattag aqak nai aib mattiom. Aɗinu nug amu oh ii hema? Da, Yawe, da Juda danab ah dilagnu oo mauhaknab tuɗid ele ii doopa; da oo gai-iitta doya oo matta ehanadkkulnu kobol tuɗid ele ii hepa; amu da ele itittak ena tuɗid ele ii madapa.

⁶ Danab onig ele, danab onig iitta ele Juda wan ohppa mauhkkulag. Laa ag danab ah mauhkkulag ii boumadmana, Ag mauhak dilagnu ii mahina, oo doyak kobol laala ele amu dilagnu ii hemana.

⁷ Laa nug mauhppig lailkad oolag mekkunu ee, o le keeke ii mattama. Ge, laa mameg o anig mauheb, laa nug mauhom laikkud anam ii ehanadma,” awa atte.

⁸ Yawe atte. “Amu lag laappa, ag Juda, ag appa hobul hetteb ele amu, ag appa aib teppig; appa tena, heɗep nena daanna, ee, le ele aib lappig,” awa atte.

⁹ Ag amu ii hemananu diig am, Yawe Nukka Ɠagattag Oh Ele, Israel dilag Kayak, Nug amunu inam atte. “Ag Juda gemu daatteb, ag bau daanna, ag noolagppa da heppi, ewau matulak awaknu gamag ahak, gamag ahak laa oh ele Juda wanppa ii daama.

¹⁰ Am na, Jeremaia, na danab ah imu amelagppa anam appe, ag na amenppa inam akkulag. ‘Aɗinu Yawe Nug uug naunab amu ihinigppa heeb bekku? Ig aɗi eheɗ hemut? Ig Yawe, ihinig Kayak, ig nuhigppa aɗi hipunin hemut?’ aon akkulag. Ag anam appeg amu,

¹¹ na ag amelagppa inam appe doyeg! ‘Yawe Nug inam atte. “Diig imunu uug naunab amu bekku. Ag mamelkad aɗi ag da uuiɗna, ag kayak laa waappa daanna, ag oɗelag dim lamidnana, ag ag noolagppa dup nona binalag meppig. Ag da uuiɗna, ag dahil ɗo ele ii dim lamidppig.

¹² Ag mamelkad aɗi ag anam heppig, amge ag daatteb amu, ag nau hak amu eɗidna, naunab heppig, gemu ele hetteb. Ag da oɗel dim lamidlob, amge iitta, ag anen anen ag da oɗel dim lamidmananu dabmak ahilag ɠagattag eppe, ahilag dabmak nau dim lamidkkulagnu dabmenan hetteb.

¹³ Ag amu heppig, gemu ele hetteb amunu, da ag agappi, ag wan imu uun, ag gona wan laappa, ag, amu ag mamelkad aɗi ele ag wan amu ii dootteb ele, ag amuppa daaglag. Ag gona appa daanna, ag kayak laala amun, tuqan ele waalagppa daan, ag oɗelag dim lamidkkulag. Aɗinu? Da ag nakok laa ii ehanadpa,” ’ ” awa atte.

¹⁴ Amu Yawe Nug atte. “Ag anam daaglag, amge haen laa uɗitte, haen amuppa danab ag baula, ‘Yawe Nug Israel danab ah Isipnu omalatte beppig, Nug genab bau daatte, genab amubia nai da attem imuam genab,’ ii amana.

¹⁵ Iitta. Ag, ‘Yawe Nug Israel danab ah wan yawalti uɗitteppanu, amu wan laala, Nug he, ag appa gona, diia ukka laih me dayak danab ah daappig, Nug appanu ele omalatte uɗippig amu, Nug genab bau daatte, genab amubia nai imu da madittem am genab,’ akkulag. Aɗinu ag anam akkulag? Da heppi, ag eɗun, ahilag wan, da wan amu ag mamelkad aɗi mattami amu, ag amuppa daaglag.” Yawe Nug anam awa atte.

¹⁶ Amge gemu Yawe Nug inam atte. “Amuam butti, haen adekkuppa da anam hekkul, amge gemu amu, da kakai eeɗak danab nug kakai eeɗadtte, amubia da heppi, kekeɗ kuɗum ag uɗin, Juda danab ah diippeg, ag eppelagppa daaglag. Amu dimppa hikan danab doɗ mattia antta aotte, amubia da heppi, kekeɗ kuɗum ag uɗin qauko okkai ohppa, qauko nakok ohppa, men oɗeppa ele Juda danab ah mattialadnana anadna diippeg, ag eppelagppa daaglag.

¹⁷ Da ahilag hak oh anidttem; ag heppeg, ahilag hak laa lokkumeb, da ii anidkkulnu am iitta. Ahilag hipunin ele, da oh anidttem, laa lokkumak ii daatte.

¹⁸ Juda ag am kayak hambuppuak huanaknab akkan, dahil wanppa meeg, wan amu dahil neekkakppa dubuttid tak ele daatte. Dottolkad amu, ag bau iitta, ag uɗig wak nau ele. Ao, ag heeg, kayak hambuppuak dottolkad dahil wanppa ambak daatteb. Dottolkad amunu amu, da oolppa uuaknab doottem. Juda danab ah ag anam hetteb amunu, da ahilag hak nau, ahilag hipunin ele, da diig amunu da bu elelenab madakkul.” Yawe Nug anam awa atte.

¹⁹ Amu da, Jeremaia, da Yawe amegppa unuqidmi. “O Yawe, na dahil ɠagattag, aab aɗ ɠagattagnab ele dahil bia ele daattem. Ao, uug nau baknu deɗppa na dahil padal mak eɗitteb ena dayaknu ehanittak daattem. Qinob wan atu ohppan danab ah ag na noomppa uɗin, ag akkulag. ‘Ig mamenkad aɗi ag kayak hambuppuak aakkuib dabmeppig. Ao, ag kayak hambuppuak dottolkad ii ehanadppig ele, ag ahilagnuib dabmeppig,’ aon akkulag.

²⁰ Danab ag ahilag kayak ag eppelagppa hettebte? Ao, ag hetteb, amge ag hetteb ele, amuam kayak genab laa iitta.” Da anam unuqidmi.

²¹ Amu Yawe Nug atte. “Danab ag kayak amu hetteb amunu, da ag ippunittak madakkul. Gemu da dahil ɠagattag, da ebehil ele ippunadkkul. Da anam ippunadppi, ag daib am Yawe, ag amu dooglag,” awa atte.