Jeremaia 15 - Nobonob Baibel

Juda danab ah ag padal mekkulag

¹ Amu dimppa amu Yawe Nug da, Jeremaia, Nug da amelppa aum. “Moses, Samuel ele aa am dahilaɗ danabnab daapiɗ, amge aanab da noolppa daaya, danab ah imu dilag unuqiɗlop amu, da ag ena daaglagnu ii ehanadlom. Heppe, ag da noolppanu ukkeg! Da noolppa daaglagnu aib heme!

² Na amu heppe, ag inamtai oɗ mettaglag. ‘Ig adeppa gokkunig?’ aon oɗ mettaglag. Ag anam oɗ mettaglag dayeb, na inam appe doyeg! ‘Yawe Nug inam atte. “Ag laa ag oɗe nau aon mauhkkulagnu daatteb amu, ag gona, oɗe nauppa mauhkkulag. Laa ag qep elabppa mauhkkulagnu daatteb amu, ag gona, qep elabppa mauhkkulag. Laa ag enugppa mauhkkulagnu daatteb amu, ag gona, enugppa mauhkkulag. Aria, laa ag diia ukka, laih me dayak danab ah wan laappa gona daaglagnu daatteb amu, ag gona anam aakku daaglag,” ’ ” awa atte.

³ Amu Yawe Nug atte. “Da heppi, kekeɗ nau waɗele ag Juda danab ah, ahilagppa bekkulag. Laa am ban haenppa kekeɗ ag qep elabppa aqappeg mauhkkulag. Laa am qai ag laa gaɗalag eeɗadna, laih gokkulag. Laa am ai ag uɗin, gaɗalag lakkulag. Amu laa am doɗ dakkuɗ ag ag gaɗalag qai, ai ele ii lappig ele, ag lakkulag.

⁴ Hesekaia bekka Manase, Juda dilag king, nug Jerusalem dayaya, nug kobol eheɗ nau kuɗum heum amunu, da heppi, wan laa ohppan danab ah ag Juda danab ah dilagnu oolagppa uuaknab dooglag.

⁵ Amu laa nug ag Juda danab ah, nug ahilagnu oo gai-iitta doya oo matta ehanadkkunu ii daama. Laa nug ahilagnu ii gaama. Laa nug ag attem daattebnu oɗ madakkunu ele ii daama,” awa atte.

⁶ Amu Yawe Nug inam ele atte. “Ag da geɗilna, ag hanhan dimeɗan oitteb amunu, da heppi, ag nauhkkulag. Da baula ool gai-iitta doyen, ool matten, ii ehanadpa.

⁷ Danab nug ulah ee aeg dappunkkeg iwale ukkaknu uɗat hette, amubia ikki danab dilag qagmak aben aab okkai odppa daatte, da appa heppi, Juda danab ah ag ahilag wanppa ii daamna; ag umanab gona, diia ukka laih me dayak danab ah daaglag. Ag oolag eɗueb, da oɗel dim lamittaknu uun oitteb amunu, da heppi, ag oolagppa guittak doon, ag ele nauhkkulag.

⁸ Kekeɗ ag danab kuɗum aqadppeg, ah qab huanak, kuɗumnab, abuɗ yu ihippa daatte, amu eɗittak daaglag. Kekeɗ ag danab ah keeke amunu ii dabmetteb haenppa, ag nid bau, ag anilkad ele aqadkkulagnu pahanab ahaglag. Ge, da heppi, baɗak eheɗ nau ele, guittak okkainab ele pahanab nid bau, ag anilkad ele dilagppa uɗiglah.

⁹ Kekeɗ ag ah laa bekkod nid danab eblaih aɗit ele aqappeg mauhppeg, anilag nug gai-iitta ma, hik aokkunu elele iitta daakku. Tatam nug bekkod ele amunu, nug ehanittak, binag ele, amge kekeɗ heppeg, amu oh iitta mekku. Nug uɗa nak nau guittak ele doya, laa noolagppa nau daakku. Da heppi, Juda danab ah laa ag ban haenppanab ii mauhkkulag amu, ban dimppa kekeɗ ag ag aqadppeg mauhkkulag.” Yawe Nug anam awa atte.

¹⁰ O anai, na da ii menuiɗlom am ena. Wan imu ohppan danab ah ag dahilnu ena ii doon, ag dahilnu nai hetteb. Da aɗi keeke, ag amu anidna, dahilnu eheɗ dooglag, da amu laa ii hemi, amge danab ah oh ag da eheɗ laa awaknu anak waappa daakkulnu atteb.

¹¹ Da anam ami, amge Yawe Nug da amelppa aum. “Genab, na ena hekkutnu da ehanidppi, na ena hekkut. Genab, uug nau laa, o uug naunab laa bekkunu haenppa, haen amuppa da heppi, nahipad kekeɗ amu ag na ehanadkkutnu, oo doyakppa unuqidkkulag,” awa aum.

¹² Amu Yawe Nug Juda dilagnu tuɗitta, inam aum. “Danab nug keeke aenppa hak, aen enanag laihnu awa uɗiak, o keeke brasppa hak eppegppa heeb qiikkunu elelete? Iitta. Amubia ag kekeɗ yawalti uɗitteppanu uɗitteb ele, ag amu eɗadkkulagnu elele iitta.

¹³ Ag Juda danab oh ag hipunin hetteb amunu, da ahilag en, ahilkad keeke ena ena ele kekeɗ madappi, ag hamu aon gokkulag.

¹⁴ Ag hipunin hetteb amunu, da ool nauhtte, oo nauhak dahil amuam aab huana ewewe, danab qauhkkunu elele iitta, amubia daatte amunu, da heppi, kekeɗ ag uɗin, diiadna gona heppeg, ag wan laappa, ag wan amu ii dootteb ele, ag wan amuppa ahilkad begbeg maɗi nid daaglag,” awa aum.

¹⁵ Yawe Nug anam a, da ami. “O Yawe, laa ag guittak meɗatteb na doottem amunu, na dahilnu dabmena, atognoiɗkkutnu oɗ medattem. Ao, na heppe, laa guittak meɗatteb, ag nob nau aoglagnu unuqidttem. O Yawe, laa guittak meɗatteb amu, ag amu hebeppeg, na oo maɗoɗ ele dayak kobol dim lamidppeppe ukkeb, ag da iuppeg mauhpanu oɗ medattem. Na da nahipnu anuqak doyen oiiyi, laa guittak meɗatteb amu, na amu dabmekkutnu oɗ medattem.

¹⁶ O Yawe, na Yawe Kayak Nakka Ɠagattag Oh Ele, na onin dahilppa daatte amunu, na ae, nahip nai dahilppa uɗie, da danab ee lanaknu baag enanag lanana, gamag ahak dootte, amubia da nahip nainu enanagnab doomi.

¹⁷ Amu da danab ag oo gamag ahaknu qagmak muttub qak eleppa daatteb amu, da ag ele amuppa ii daamut. Da ag ele daata, ool gamag ii ahom. Na da nahip nai dookkulnu otiɗna hee, danab ah dilag eheɗ haknu oppoɗi bak doomi amunu, da ag uuatten, da dakka daami.

¹⁸ Da anam aakku daami amunu, da tuɗid eleib guittak doyeye oittem, da amunu diig amu, da ool ii maidtte. Ao, laa ag da ihil meɗaeg ii qaɗaiedatteb amu, da amunu diig ele, da ool ii maidtte. Le okkai laala ag qaɗaiettaeg, danab ah appa le ii aotteb. Ao, le qeppuɗia bak laala ag qaɗaiettaeg, danab ah ag le appanu ii aotteb. Am amubia na dahilnu hekkutte?” Da anam ami.

¹⁹ Amu Yawe Nug da, Jeremaia, Nug da amelppa aum. “Na oot eɗueb amu, da heppi, na tuɗidna dahil propet, dagattolppa daakkut. Ao, na nai genab mattinna, nai hambuppuak, meu iitta ele ii madippe amu, da heppi, na da oɗel awa mattiak danab daakkut. Na ag ib ippuanatte! Na ahilag ib aib aon gome.

²⁰ Geha da aab okkainu aɗ ɠagattag, amubia da na meidkkul. Ao, da aɗ ɠagattag, brasppa hak bia meidkkul. Da na anam aakku meidppi, Israel danab ah ag nahip-ppa ban hekkulag, amge ag na ii eɗidmana. Aɗinu? Da na ele daaɗa, ehanitten heppi, laa heeb nauhmananu aakku daattem.

²¹ Da na nau hak danab ah eppelagppanu eɗue awidkkul. Yo, da na danab ah ag laa guittak mettaglagnu uug ii dootteb, da na ag eppelagppa dayaknu qagaiettakppanu eɗua uhuqak amu hein medakkul,” awa aum.