Jeremaia 14 - Nobonob Baibel

Uug Juda dilagppa bekkunu nai

¹ Yawe Nug Jeremaia gu Juda wanppa ii nemanu nai metta inam aum.

² “⌊Gu ii nekku amunu,⌋ Juda danab ah ag gaaglag. Aabppan danab ag uug naunab dooglag. Ag ahilag wan nauhkku amunu, ag qanak bia hekkulag. Jerusalem appa gayak aakku daakku.

³ Anuqak danab ag heppeg, ahilkad maɗi nid ag le moɗ buuppigppa le itaglagnu gokkulag, amge ag le laa ii anidmana. Ag le ii anidna, ag eɗun, le iitta hamu gonana, ag oolagppa uug nau qak doon, dabmak huanaknab aonna, ikkilag hautkkulag.

⁴ Gu nakok laa ii nema amunu, wan qaɗaietta auta autanab awa, wan aoɗa makkuleb, oɗe elab daaglag. Anam daakku amunu, ee eppak danab oolagppa uug qak doon, ag ikkilag hautkkulag.

⁵ Doɗ dia ag haen oh nalkad atognoadtteb, amge dia anig nug menua, gikkiɗah iitta anamppa nug nag uuitta gokku. Aɗinu? Gikkiɗah lanaknu iitta.

⁶ Donki dakkuɗ ag qauko igippa, appa keeke laa ii daatte, ag aguppa daanna, ag doɗ jakal doɗ laa lamitta, hik huana aotte, ag amubia hik huana aoglag. Ag ee iitta amunu, ag amelag nauhkkulag,” awa atte.

⁷ ⌊Yawe Nug gu ii nekkunu anam mattie, da unuqitte ami.⌋ “O Yawe, ig hipunin hemut, amge na, na oninnu dabmak anuqak aon, na ehanigkkutnu unuqidttem. Ig haen kuɗum na dimedata autta aomut. Ao, ig nahip-ppa hipunin hemut.

⁸ O Yawe, naib ig Israel ehanigkkutnu elele. Uug nau haenppa naib na ihinig Padal ii maknu ehanittak daattem. Anam amunu, na aab diig danab iitta bia daattemnu, o na danab laih gokkunu oiyaya, tuqan laippu ɗo danab wan laappa dayaya, buttua aha gotte, na amubia daattemnu,

⁹ o na danab laa, nug uug laa bekkunu ii dabmette, amge laippun be, aɗittai laa hekkunu elele iitta, na danab amubia daattemnu, o na ban danab laa, nug ɠagattag nuhig oh iitta me, nug laa ehanidkkunu elele iitta, na amubia daattemnu diig appe dookkulnu oɗ medattem. O Yawe, na ig oonigppa daattem. Na onin ihinigppa daatte. Na uuigna gomananu oɗ medattem,” awe unuqidmi.

¹⁰ Da anam unuqidmi, amge Yawe Nug Juda danab ah dilagnu inam atte. “Ag da uuiɗna, laih oiglagnu oolag okkainab daatte. Ao, ag akka ag heppeg, ag eheɗ amu hemananu ib ahilag keldokkunu nakok laa iinab hetteb,” awa atte. Amu Yawe Nug anam dootte amunu, Nug ag Juda danab ah, Nug ahilagnu ena ii dootte. Nug gemu ahilag nau hak dabmekku. Ao, Nug ahilag hipunin ag heegeg uɗie, gemu ele hetteb, Nug diig amunu ag bu madakku.

¹¹ Amu Yawe Nug da amelppa aum. “Na danab ah imu, Juda danab ah, da ehanadppi, ena daaglagnu aib unuqiɗme.

¹² Danab ah imu ag ee ohnu kud mena daaglagtai, amge diig amunuib da ahilag unuqittak ii doopa. Ag manaknu ofa, amu ee aegnu ofa ele hekkulagtai, amge diig amunuib da ahilagnu ena ii doopa. Iitta. Da heppi, ag banppa, enugppa, amu oɗe nau danab kuɗum aqe mauhtteb eleppa ele mauhadna, padal mekkulag,” awa aum.

¹³ Yawe Nug anam a, da Nug amegppa ami. “O Naɗi Yawe, gadon, propet laa ag hanhan danab ah imu amelagppa atteb. ‘⌊Yawe atte,⌋ “Ag ban laa ii anidmana. Enug haen ahilagppa ii bema. Aɗinu? Da heppi, ag hanhan aben imuppa maɗoɗ ele daaglag.” ’ Ag anam aon atteb,” awe ami.

¹⁴ Da ai, Yawe Nug nob ma, da amelppa aum. “Propet amu da onil diin, ag dimppa aɗi bekkunu nai hambuppuak maditteb. Da ii maatti uɗippig. Da ag amelagppa nai laa ii mattimi. Da danab amu propet daaglagnu ii tituanadmi. Propet amu ag tuleglegppa keeke anidna, aeg dootteb, amge keeke ag tuleglegppa anidtteb ele am genab iitta. Ag eman kobol meu iittappa keeke doon, aeg dootteb, amge ag aɗi keeke ib amuppa dootteb am keeke genab iitta. Ag akka, ahilag dabmakppa keeke hambuppuak dabmetteb, amge keeke ag dabmetteb ele am genab iitta,” awa aum.

¹⁵ Amu Yawe Nug propet amu dilagnu inam atte. “Propet laa ag da onil hamu diin, propet nai maditteb amu, da ii maatti goppig. Da maatti ii goppig, amge ag atteb. ‘Ban, o enug haen wan imuppa ii daama,’ aon atteb. Propet ag henan anam atteb amu, ag geha banppa, enugppa ele, ag mauhkkulag.

¹⁶ Ag anam mauhkkulag, amu danab ah laa, propet amu ag ag amelagppa nai ahilag maditteb amu, danab ah amu ele ag anamib mauhkkulag. Ag mauhppeg, laa ag ag gaɗalag agappeg gona, lag dimittim aab Jerusalemnu ibppa hamu anam niiglag. Huanak mauhkkulag amunu, laa ag, ag waalkad, ag bekkalkad, ag aɗelkad ele boumadkkunu ii daama. Danab ah amu ag nai hambuppuak amu doon, dim lamidnana, hipunin huanak hetteb amunu, ag bu nau aoglagnu daanna, da heppi, ag bu anam aakku aoglag.

¹⁷ Anam amunu, Jeremaia, na gona, danab ah imu amelagppa inam appe doyeg! ‘⌊Qinob, uug naunab amu beppeg, da akkul.⌋ O gadon, da amel leb huanaknab naɗ! Ao amun, tuqan ele anamib hanhan naɗ! Aɗinu? Dahilad danab ah, ag da ele tiinig laippu, ag am da aɗel, ah makkun dahil bia daatteb amu, ag makkuɗakppa ihilag nau ele daatteb. Ao ag maduduɗattakppa guittak okkainab aoppig.

¹⁸ Da aab okkai uuen, aab dimittim oiyeye amu, da laa ag qep elabppa mauhppig anadttem. Da aab okkai ooppa oiyeye amu, laa enugppa mauhppig, mauhkkulagnu oitteb ele anadttem. Aɗinu? Propet danab, mana mettak danab ele ag daanna, maɗi ahilag hetteb, amge ag diig doon ii hetteb. Iitta. Ag hamu hetteb,’ ” ⌊awe akkul.⌋

¹⁹ O Yawe, na Juda danab ah geɗadna malamete? Na Sion danab ah dilagnu ena iinab doottemte? Na guittak nau mekke, ig eɗut ena daagnignu ib laa iittanu diig dookkulnu oɗ medattem. Ig maɗoɗ ele daagnignu oonig dayom, amge ena laa ihinigppa ii beum. Ao, ig eɗut ena daagnignu haen daakkunu oonig dayom, amge baɗak eheɗ nau ele aakkuib beum daatte.

²⁰ O Yawe, ig nau hemut, mamenkad aɗi ele heppig amu, ig ii lokkumttem. Iitta. Ig miag mehuqttem. Ig na, Yawe, ig nahip-ppa hipunin hemut.

²¹ ⌊Amge⌋ da na oninnu dabmak anuqak aonna, na ig ii geɗigmananu oɗ medattem. Ao, na ag uuadppe, laa ag uɗin, nahip lag enanagnab, na aguppa daattem amu, ag amu heppeg nauhmanu unuqidttem. Na hee, ig ele nug tituanta nai qakkamut amu, na nai amu dabmenana, ii okkulmananu oɗ medattem.

²² Wan laalappan kayak hambuppuak dottolkad ag heeg, gu nettete? Ge, hab nug nukka he, gu nakok laa nettete? Iitta! Na, Yawe, ihinig Kayak, na hee, gu nette amunu, ig naib neekkidttem. Aɗinu? Naib keeke amu oh hettem amunu, ig naib dabmedattem.