Jeremaia 13 - Nobonob Baibel

Matagiɗ linenppa haknu, doɗ gaɗa wain inaknu elenu nai

¹ Amu Yawe Nug da Jeremaia, Nug da amelppa aum. “Na ahan gona, matagiɗ linenppa heppig ele daden mena, na imuanppa tagakkut, amge na leppu qemanu na dabmena autna awe!” awa aum.

² Yawe Nug anam da amelppa aum amunu, da matagiɗ, Nug aum bia, da daden mewoya, da imualppa takkami.

³ Aria, amu dimppa amu, Yawe Nug nuhig nai imu da, Jeremaia, Nug da meɗom.

⁴ “Na ahan, matagiɗ na daden mena, imuanppa takkan oittem ele, na matagiɗ amu aon, Perat gona, appa na matagiɗ amu men oɗe nakok ooppa lokkume!” awa aum.

⁵ Nug anam a amu, da matagiɗ awe, Perat ukke, appa Yawe aum bia lokkummi.

⁶ Da anam hei, deɗ kuɗum ukke, Yawe Nug da amelppa aum. “Na Perat gona, matagiɗ da appa lokkumkkutnu ami amu, na matagiɗ amu eɗun awe!” awa aum.

⁷ Nug a amu, da Perat ukken, matagiɗ lokkummippanu buuen aomi, amge matagiɗ am nauha auta autanab awom; uɗat laa medakkulnu elele iitta.

⁸ Da amu hei, dimppa Yawe Nug nuhig nai imu da, Jeremaia, Nug da meɗom.

⁹ “Da, Yawe, da inam attem. ‘Danab ah Jerusalem daatteb, ag am dada danab ah nau, amu Juda danab ah laa oh ele, ag ele am dada danab ah. Ag anam daatteb amu, matagiɗ nauhom, amubia da heppi, dada hak kobol ahilag am nauhkku.

¹⁰ Jerusalem danab ah, Juda danab ah laa oh ele, ag nau hetteb, da ag nau aomnanu dabmettak nai mattami, amge ag dahil nai dooglagnu uutteb. Ag da oɗel dim lamidmananu dabmak ahilag ɠagattag eppe, ag akka ag ahilag dabmak eheɗ haknu dim lamidnana, ag kayak hambuppuak waappa daan, ag noobppa dup nona binag metteb. Ag anam henan daatteb amunu, matagiɗ imu nauhak daatte, laa nug uɗat aɗi laa medakkunu elele iitta bia, ag anambia aakku daaglag.

¹¹ Danab nug matagiɗ awa, imuagppa taietta qagatte, amubia da Israel danab ah oh, Juda danab ah oh ele dahilad daaglagnu, ag da gukkuiɗak dahilppa daaglagnu qakkaladmi. Da amu heminu diig am, ag da dim lamiɗppeppeg, wanppan wan laala ohppan danab ah ag anadna, ag da dooiɗna, ag da onil, da binal ele humaglag, amge Israel danab ah, Juda danab ah ele ag nai dahil amu doon, dim lamidkkulagnu uuppig. Ag amu hak uuppig.’ ” Yawe Nug anam aum.

¹² Amu Yawe Nug tuɗitta aum. “Juda aɗi ag dahil nai ii dim lamidppig amunu, Jeremaia, na ag amelagppa inam appe doyeg! ‘Yawe, Israel dilag Kayak, Nug inam atte. “Doɗ gaɗa wain inaknu oh am wain ele ambak dayeb, amuam kobol ena,” aon a! Na anam appe ag inam akkulagtai. “Doɗ gaɗa wain inaknu oh wain ambak daakku am ena iite doottem?” ’ Ag anam aon akkulagtai.

¹³ Ag anam akkulag dayeb amu, na ag amelagppa appe doyeg! ‘Yawe Nug inam atte. “Da heppi, Juda danab ah oh ag danab nug wain huana la, kaaka qette, ag amubia daaglag. Juda danab ah Jerusalem daatteb, Juda danab ah laa oh Juda wanppa daatteb, ahilag king, Dawitnu sia kingppa daatte, ahilkad mana mettak danab, amu ahilkad propet ele, ag ohnab anamib daaglag.

¹⁴ Danab ag le ɠagattag huan laeg, kaaka aqe oinna, nug qak henana, guittak aotteb, amubia da heppi, ag oh bu aon, guittak aoglag. Mameg guittak aokku, bekka ele anamib. Da ahilagnu ool gai-iitta doyen, ool matten, iinab ehanadpa. Da ag nauhmananu ehanadppi, guittak ii aomnanu iinab hepa.” ’ ” Yawe Nug anam awa atte.

Kekeɗ ag Juda danab ah diin, wan laappa goppeg, diia ukka laih me dayak danab ah daaglag

¹⁵ Juda danab ah, Yawe Nug aum amunu, ag daulag human, nai doyeg! Ag beɗuppa tak aib heppig!

¹⁶ Ag Yawe, ahilag Kayak, danab ah oh ag Nug binag amahlak oppiaawak ele mekkulagnu daatteb amu, ag Nug binag amu meig! Nug heeb, uug naunab bekkun daatte, amu haen imuppa, haen gamag imu, uug amu ii beum, haen imuppa ag anam heig! Ao, ag danab qaukoppa oiyaya, aam aam eeɗe, gatatu neene, na qette, ag amubia nena qemananu, ag uug amu ii beum haen gamag imuppa ag Kayak binag anam meig! Ag haen ena, amahlak bia, ag amu anidkkulagnu dabmetteb, amge Yawe Nug heeb, haen amu eɗua, haen nau, gatatu bia daamanu, ag uug amu ii beum haen gamag imuppa ag Nug binag meig!

¹⁷ Amge ag nuhig nai dooglagnu uun, ii dim lamidkkulag dayeb amu, ahilag dada hak, diig amunu, da dakka piɗe dayeye gaakkul. Ge, ag Yawenu danab ah, ag nai dooglagnu uun, ii dim lamidkkulag dayeb amu, ahilag hak nau, diig amunu kekeɗ ag uɗin, eɗadna, aɗualadna diin goppeg, ag wan laappa diia ukka laih me dayak danab ah daaglag amunu, da eheɗ gaappi, da amel leb huanak nekku.

¹⁸ Amu Yawe Nug da, Jeremaia, Nug da Juda dilag king, amu nug anig ele amelahppa inam appi dooglahnu aum. “Aa sia king ahilah uuya, honap neiɗ! Aɗinu? Aa tuɗidya, Juda dilag okkai ii daamya.

¹⁹ Juda wan maha laa onig Negeb, appa amu, kekeɗ ag aab amu taliliadna daappeg, auntai laa aab amuppan danab ah ehanadkkunu ii daama. Kekeɗ ag Juda eɗadna, ag Juda danab ah diin goppeg, ag wan laappa diia ukka laih me dayak danab ah daaglag.” Yawe Nug da anam awe akkulnu aum.

²⁰ Amu ag Juda danab okkai, Jerusalem daatteb, ag amelag human, neegppeg ukkeb, aun aɗi yawalti uɗitteppanu uɗitteb anatteg! Ag danab okkai, ag sipsip gumak danab sipsip nuhig gumadtte bia ag Juda danab ah gumadkkulagnu tituanak daatteb, amge ag Juda dilag okkai, ag ahilkad danab ah gemu adeppa daatteb? Ao, ag akka ag dada nai mattinna, “Ihinkad danab ah am kuɗumnab, ɠagattag ele,” appig, amge gemu danab ah amu ag adeppa daatteb?

²¹ Laa yawalti uɗitteppanu uɗitteb amu, tatam ag Juda okkai, ag ag ele nug tituana nai qakkakppa daaglagnu wagai men heppig, amge Yawe heeb, amu dilag ag okkai ahilkad daappeg, ag ag waalagppa daaglag amunu, haen amuppa ag aɗi nai mattiglag? Iitta. Ag uug okkai, ah nid aokkunu guittak dootte, ag amubia dooglag.

²² Amu uug okkai amu beeb, haen amuppa ag akka akka ag, “Aɗinu nau imu ihinigppa beum?” ag oɗmak amu hekkulag dayeb amu, ag oɗmak amunu nob am iikkude doyeg! Ag hipunin huanak heppig amunu, laa ag ah gamu uuitta, laa ele oittep, ag nuhig lamen pattiɗna aoeg, beɗu miag daatte, ag beɗulagppa kobol amubia ahilagppa beum.

²³ Kus danab nug nukka nug heeb, nug gaɗa eɗua, laa daakkunu elelete? Doɗ lepad, gaɗa otultul ele, nug nukka nug heeb, otultul amu eɗua, laa daakkute? Amubia ag eheɗ tuɗidib hetteb ele, ag akka ag hena, ag ena hekkulagte?

²⁴ Yawe Nug atte. “Da heppi, atu taɗakppan ulah ee aeg dappunkkeg iwale gotte, amubia ag, Juda danab ah, ag matatun gona daaglag.

²⁵ Anamib ahilagppa ana bekku. Da amu bekkunu aakku ain malami. Ag dahilnu daulag atie, ag kayak hambuppuak dilag oolagppa genab dootteb

²⁶ amunu, laa ag ah eheɗ heum ele uɗa nak dookkunu ag nuhig lamen aɗaeg te, beɗu miag daatte, da laa ag Juda ag eheɗ heppignu miag anidkkulagnu, da ag uɗa nak madakkul.

²⁷ Ag Juda ⌊ag kayak hambuppuak dim lamadnana, ag noolagppa dup nona binalag meegeg uɗie, gemu ele hetteb amu, haen ag amu henana, kayak hambuppuak amu dilag kobolppa ag⌋ danab ah ewau matulak ii awak ele, ag laa ele mauhnoak niiglagnu duttunak eheɗ doon, hos hetteb bia uɗa nak iitta ele henana, ag ib baag ah hetteb bia aakku heegeg uɗie, gemu ele hetteb. Ag amu heegeg, uɗie gemu ele hetteb amunu, da heppi, laa ag amu anidna dooppeg, ag Juda, ag uɗalag eheɗ nekku. Laa ag haen amuppa anadkkulag, amge da ahilag eheɗ hak nau, da hak amunu oolppa uuaknab doottem, da hak ahilag amu aakku antten malami. Ag qauko nakok igippa, dadppa ele ⌊kayak hambuppuak noolagppa dup nona binalag menana,⌋ eheɗ hak amu oh heppig, gemu ele hetteb. O gadon, Juda danab ah, ahilagnu gadonnab gadon. Ag heegeg, oolagppa dubuttid daatte; amu haen gane laa ele ukkeb, ag anamib daaglagnu uuglag.” Yawe Nug anam atte.