Jeremaia 12 - Nobonob Baibel

Jeremaia nug Yawenu hak diig ii doyomnu Yawe amegppa aum

¹ ⌊Da Jeremaia, da Yawe inam unuqidmi.⌋ “O Yawe, haen oh da nai laa, na nai amunu diig appe dookkulnu na amenppa attem amu, na kobol tutukkuppaib mehuqe doottem, amge gemu da na nai doya mala hettoɗia epeɗia elele mettak kobol nahipnu oɗ medakkulnu hettem. Am inam. Nau hak danab ag ena daanna, enub kuɗum aotteb. Da amunu diig ii doottem. Ge, danab ag nahipnu oolagppa genab ii dootteb, na ii dim lamidtteb ele, ag uug laa ii doon, elelenab daatteb. Da amunu diig ii doottem.

² Ag am ad na eppalatte, ag diɗilkad wan ooppanab noppig bia daatteb. Ag ena bena, meu otteb. Ag nahipnu hanhan oɗelagppa maditteb, amge ag oolag am na ele laippu iinab daatteb.

³ Anam, amge O Yawe, na da dooiɗttem. Da nahipnu attem attem dabmettem amu, na doon, epeɗidttem. Anam amu, na eheɗ hak danab amu, danab nug sipsip aqadkkunu mauhnoaknab diiadtte, amubia na amu eheɗ hadakkutnu ool daatte. Ge, na tituanadna heppe, danab ah huanak aqe mauhak deɗppa laa ag danab eheɗ hetteb ele huanak aqappeg mauhkkulagnu oɗ medattem.

⁴ O Yawe, wan gemu qaɗaietta, nauha auta awom daatte; amu haen gane laa ele ukkeb, uug amuam iitta mekku? Ao, gemu dad okkai ohppa gikkiɗah bunaɗom daatte; amu haen gane laa ele ukkeb, uug amuam iitta mekku? Nau hak danab ag wan imuppa daatteb, ag hipunin henana, ag, ‘Yawe Nug eheɗ hak ihinig ii anidtte,’ aon atteb amunu, uug nau amu be, doɗ ai ele ag aakku mauhppig.” ⌊Jeremaia nug anam unuqittom.⌋

Yawe Nug Jeremaianu oɗmak nob meum

⁵ Jeremaia nug Yawe amegppa anam a, Yawe Nug nob ma, inam aum. “Na danab ele baelagppa nug eɗidkkulagnu hee, ag na eɗidppig dayeb amu, na attem hena, hos ele nug eɗittak hekkut? Na wan ena, uɗem ele, na wan amuppa oinna, baen keeke laa ye, nena qeme dayeb amu, na Jodan le daugppa, muɗi keeke huanak daattebppa, na attem hena, appa oikkut?

⁶ Na ele tiig laippu, awanad, amapad, appinamad aɗi, ag ele na dimettan, eheɗ heidkkulag. Ag laa na eheɗ heidkkulagnu hekkulag amu, ag ag oolagppa daanna, ag ele anamib hekkulag amunu, ag nahipnu deɗ laala ena mattiglag dayeb amu, na ahilagnu ootppa genab aib doome.

⁷ Gadon, da dahilad danab ah, ag da eppel ooppa daatteb amu, da ag dimatten uuadkkul. Da ahilagnu ool mauhtte, amge da uuadppi, ag kekeɗ eppelagppa daaglag.

⁸ Dahilad danab ah ag laion atuppa oitte bia bena daan, dahilnu kekeɗ dootteb. Laion kekeɗ antta, eheɗ gaatte, ag amubia dahilnu hetteb amunu, da ag uuadkkul.

⁹ Ai laa doɗ qe mauhe latte, o doɗ laa onig haaina, nug ele anamib hette amu, dahilad danab ah ag amubia daanna, eheɗ heiɗtteb, amge wan kuɗum, ag ai nau bia, ag ag taliliadna daatteb amunu, wan laappan danab ag ⌊ai amu, o⌋ doɗ dakkuɗ qagmena, ahan uɗin, dahilad danab ah ele ban hena eɗadna heppeg, padal meig!

¹⁰ Danab okkai kuɗum ag uɗin, grep dad dahil tappan heppeg, dad amu nauhkku. Ao, ag uɗin, dad okkai dahil heppeg nauhkku. Ag wan ena dahil heppeg, am eɗua, hele-ettak, wan meu waknu nakokib elele, am anam daakku.

¹¹ Danab amu ag heppeg, dahil wan oh am wan meu waknu nakokib elele, am anam daakku. Wan amuam da noolppa wan qaɗaiettaknab, wan hele-ettak daakku. Appa danab wan atognokkunu ii daama amunu, wan oh am nauhahkib daakku.

¹² Kekeɗ huanaknab ag atu taɗak oppatna uɗiglag. Aɗinu? Ag da, Yawe, ag dahil qep elab daanna, ag dahil wan ohppa danab ah aqappeg mauhkkulag. Laippu laa nug maɗoɗ ele ii daama.

¹³ Danab ah ag wit aeg eppaglag, amge uud keeke qaun ele bekkulag. Ag uɗat huanak hekkulag, amge meu ena nakok laa ii aomna. Da, Yawe, da ool huana nauhtte, diig amunu Juda ag ee meu ena ii aomna.” Yawe Nug anam awa atte.

Yawe Nug wanppan wan laala Juda talilidna daatteb, Nug ag bu mattowa, eɗua ehanadkku

¹⁴ Yawe Nug atte. “Da wan laa dahilad danab ah, Israel, ag aulag daakkunu da ag mattami, amge danab laa ag kekeɗ meɗappig, wan amu talilidna daatteb ele amu, ag uɗin, Israel ele ban henana, Israel dilag keeke aon goppig. Ag anam heppig amunu, danab uud hiɗa buɗie gotte, amubia da heppi, laa da kekeɗ meɗappig amu, ahilag kekeɗ ag uɗin, ag diin goppeg, laa da kekeɗ meɗappig ele ag wan laappa diia ukka laih me dayak danab ah daaglag. Amu da Juda danab ah ehanadppi, ag ag eppelagppa baula ii daamna.

¹⁵ Da laa kekeɗ meɗappig dilagppa anam hekkul, amge da ag anam ahilag wanppanu hiɗadppi goppeg, dimppa da ahilagnu oo gai-iitta doye ool matten ehanadppi, ag anen anen eɗun, ahilag wanppa, ag ahilkad aug wanppa daaglag.

¹⁶ Ag anam daana, ag anukka ag kayak hambuppuak Bal dim lamidna, dahilad danab ah ahilag nai Bal onigppa ɠagattag qettaglagnu ippunadppig, ag butti aɗi haen amuppa amubia ag dahilad danab ah dilagppanu ippunittak ena aon autna aonna, ag da dim lamiɗna, ag da onilppa ahilag nai ɠagattag qettaglagnu, ag, ‘Yawe genab bau daatte, genab amu bia,’ akkulag dayeb amu, danab ah amu ag ele dahilad danab ah daaglag.

¹⁷ Amge wan laa atten, wan amuppan danab ah ag dahil nai dooglagnu uun, ii dooglag dayeb amu, da danab uud hiɗa, buɗie ukka bunaɗa nauhtte, da ahilagnu anam heppi, ag iitta mekkulag.” Yawe Nug anam awa atte.