Jeremaia 11 - Nobonob Baibel

Israel ag nug tituana nai qakkak ag Kayak ele heppig, ag nai amu tippalppig

¹ Yawe Nug nuhig nai imu Jeremaia metta, Nug inam aum.

² “Nug tituana nai qakkak nai da anukka hei, da Israel memetalkad ele hemut amu, na nai amuppa da aɗi hekkul, ag aɗi aɗi hekkulag daatte amu, na nai amu doon, na danab ah Jerusalem daatteb, Juda danab ah laa oh ele appe doyeg!

³ Na da, Yawe, Israel dilag Kayak, da inam attem appe doyeg! ‘Nug tituana nai qakkak nai daatte. Nai amu daatte, amu aun laa nug nai amuppa nug aɗi aɗi hekkunu daatte, nug nai amu ii dim lamidtte amu, nug eheɗ laa awaknu anak waappa aakku daatte.

⁴ Anukka ag Israel, ag mamelkad aɗi ag Isip wanppa uɗat ɠagattag, eheɗ nau henan daappig. Ag daanna anam heegeg, da ag Isipnu diien, omlatti uɗiegeg, da haknunab nai ag haen amuppa mattami amu, nai amu, nai laa iitta, nai amu aakkuib gemu daatte. Da ami. “Ag da oɗel dim lamidnana, ag dahil haknunab nai oh dim lamidkkulag dayeb amu, ag dahilad danab ah daappeg, da ahilag Kayak daakkul.

⁵ Ag da anam dim lamiɗkkulag dayeb, da ag mamelkad aɗi amelagppa dahil nai ɠagattag qetten, da ag wan laa, wan amuam enanag, wan ittag ele, amuppa ee meu huana otte, da wan amu madakkulnu ami amu, da anamnab hein, wan amu madakkul,” ami. Wan amuam wan ag amuppa gemu aakku daatteb.’ ” Yawe Nug anam aakku a doyen, da ami. “Genab, anam dayaɗ!” awe ami.

⁶ Da anam ai, Yawe Nug da amelppa tuɗitta aum. “Na Jerusalem danab ah amelagppa, Juda danab ah laa oh ele amelagppa nai imu appe doyeg! ‘Ag nug tituana nai qakkak imuppa aɗi aɗi haknu nai daatte, ag nai amu doon, dim lamitteg!

⁷ Aɗinu? Haen da ag, Israel, ag mamelkad aɗi Isipnu omalatti uɗippig, haen amuppa da digmein, nau aomnanu dabmettak nai haen kuɗum ag amelagppa matti uɗie, gemu batak. Da nau aomnanu dabmettak nai mattieye, da, “Ag da oɗel dim lamitteg!” ami.

⁸ Da anam hemi, amge ag dahil nai doyaknu uun, ag dab-ii-medappig. Iitta. Ag da oɗel dim lamidmananu dabmak ahilag ɠagattag eppe, ag aɗi eheɗ hekkulagnu oolag dayom amu, ag heppig. Ag nug tituana nai qakkak amu ii dim lamidppig amunu, nug tituana nai qakkak amu ooppa, nai da ag dim lamidkkulagnab ami amu, laa nug nai amu ii dim lamidkku dayeb, nuhigppa aɗi eheɗ laa awaknu anak daatte amu, da hei, eheɗ amu ahilagppa aakku beum.’ ” Yawe Nug anam atte.

⁹ Amu Yawe Nug anam ana, Nug da, Jeremaia, da amelppa aum. “Jerusalem danab ah, Juda danab ah laa oh ele ag da dimeɗan, ag nau hekkulagnu dabmetteb.

¹⁰ Ag mamelkad aɗi dahil nai dooglagnu uuppig, ag hipunin heppig, gemu danab ah imu ag hipunin amuib hetteb. Ag kayak hambuppuak dim lamadna, ag noolagppa dup nona, ag binalag metteb. Israel danab ah, Juda danab ah ele ag nug tituana nai qakkak nai da hei, da ag mamelkad aɗi ele bappaidta, ag nai amu waappa daan oinna, ag nai amu tippalna, ii dim lamidppig amu, laa gemu daatteb, ag ele anamib.” Yawe Nug anam awa aum.

¹¹ Amu Yawe Nug atte. “Juda ag anam hetteb amunu, da heppi, uug naunab laa, ag eɗidna, ii anidmananu elele iitta, ahilagppa bekku. Uug naunab amu beebeb, ag da ehanadkkulnu da onilppa ekkulag, amge da ahilag ewak da ii doopa.

¹² Danab ah Jerusalem daatteb, Juda danab ah laa oh ele ag gemu kalu danab ile muttuɗig enanag bette ele, ag amu manana, kayak hambuppuak laa madatteb amu, haen uug naunab amu beeb, haen amuppa ag gaanna, kayak amu dilag unuqidkkulag, amge kayak amu ag ii ehanadmana. Iitta.

¹³ O Juda danab ah, ag kayak hambuppuak kuɗumnab noolagppa dup nona binalag metteb. Ag ahilag wanppa aab gane daatteb, ag kayak hambuppuak ebqak amubia noolagppa dup nona binalag metteb. Laa amu, kayak hambuppuak laa onig Bal, kayak amu dim lamattaknu ɗo am uɗa nak ele, ag kayak amu noobppa dup nona binag mekkulagnu ag nuhig qaɗab kuɗum bappaidppig. Jerusalem aabppa ib gane daatte, ebqak amubia ag nuhig qaɗab bappaidppig.” Yawe Nug anam awa atte.

¹⁴ Yawe Nug anam awowa, Nug da amelppa aum. “Jeremaia, na danab ah imu dilagnu aib unuqiɗme. Na da ehanadkkulnu aib oɗ meɗame. Aɗinu? Da nahip nai ii doopa. Ag uug nau anidnana, da unuqiɗppeppeg, da amu ele ii doopa,” awa aum.

¹⁵ Yawe Nug da amelppa anam awowa, Nug da Juda danab ah amelagppa inam akkulnu aum. “Da ag tituanadmi, amge ag dahil mettid lagppa doɗ main, meɗaglagnu daanna, ag kuɗum qagmena, eheɗ hekkulagnu lokkumakppa dabmenana maittak eheɗ aotteb. Aɗinu ag da laulppa anam henan daatteb? Ag doɗ dahilnu tituana meɗak daatteb, ag amu main meɗanna, amuppa ag eheɗ hettebnu bu ib amuppa eɗidkkulagnu elelete? Iitta! Ag ib amuppa bu ii aolob, ag oolag gamag ahalo, amge iitta,” awa aum.

¹⁶ Yawe Nug anukka ag Juda, Nug ahilagnu, “Ag am olip ad enanag, meu ele enanag,” aum, amge Nug heeb, ag bu eheɗ aoglag; bu amuam ulah huana uɗie, gu ele huana ne, amemɗi awa ye, ad amu ewewe, ebekkud ele qiialadtte, amubia.

¹⁷ Yawe Nukka Ɠagattag Oh Ele, Nug danab ad eppe ba daatte, amubia Nug ag ehanatte, ag gemu daatteb, amge Nug uug naunab ahilagppa beeb, padal mekkulagnu ɗo ma malom. Aɗinu? Nug amunu atte. “Ag Israel danab ah, Juda danab ah ele ag eheɗ henana, ag kalu danab ile muttuɗig enanag bette ele aon main, kayak hambuppuak Bal mettaegeg, diig amunu da oppoɗil beum, gemu ele daatte,” awa atte.

Danab laala ag Jeremaia qeppeg mauhkkunu dabmena, nai qagappig

¹⁸ Yawe Nug he, da danab laala ag eheɗ heiɗkkulagnu dabmena, nai qagappig doomi. Nug ippuniɗe, ag aɗi aɗi heppig amu, da aakku doomi.

¹⁹ Da sipsip gaiɗ manan, danab qeeb mauhak abenppa awa gotte, da sipsip amubia daami. Ag da iuppeg mauhkkulnu dabmena, ag, “Danab ad o qiie, ad amu ii daatte, meu ele ii otte, ig amubia Jeremaia, nuhigppa hepput, nug amubia dayaɗ!” anana, ag, “Danab ag Jeremaia onig baula dabmemananu, ig makkuɗpput, nug danab ah bau daatteb ele oolagppa aib dayom!” ele appig amu, da Yawe ii ippuniɗom haenppa amu, da amu ii doomi.

²⁰ Ag anam henan appig amu, da Yawe unuqitte, inam ami. “O Yawe Nakka Ɠagattag Oh Ele, na epeɗiak tutukkuib hettem. Na danab ag oolagppa, ag ahilag dabmak unuqagppa ele, ag diig aɗinu kobol laala hetteb amu, na diig amu doottem. Na amu doyeye, da hak nau ag dahilppa hekkulagnu hetteb ele na eppenppa mettem amunu, na danab ag eheɗ heiɗkkulagnu hetteb ele nob elele madappe anidkkulagnu oɗ medattem,” awe unuqidmi.

²¹ Da Yawe amegppa anam unuqitti, ⌊Nug da amelppa aum⌋. “Anatot danab ag nidappeg mauhkkutnu hetteb, ag na amenppa, ‘Na Yawe onig diin, propet nai baula aib mattime. Na anam hekkut dayeb amu, ig nidapput mauhkkut,’ aon atteb amu,

²² da, Yawe Dakka Ɠagattag Oh Ele da inam attem. ‘Ag atteb, diig amunu da bu madakkul. Danab amu, ag oolagppa nid danab bau daatteb, ag banppa mauhkkulag. Ao, danab amu bekkalkad, aɗelkad ele, ag enugppa mauhkkulag.

²³ Da heppi, bu awak haen ahilagppa uug naunab Anatot danab dilagppa nekku amunu, ag padal mena, danab kobol nau amu hetteb oolagppa laippu laa ii daama, buɗulkad ele laippu laa iinab daama,’ awe attem.” Yawe Nug anam awa atte.