Jeremaia 10 - Nobonob Baibel

Yawe Nug kayak hambuppuak dottolagnu maditte

¹ O Israel danab ah, ag Yawe Nug ag amelagppa aɗi atte doyeg!

² Yawe Nug inam awa atte. “Ag wan laala dilag kobol aib anidna dim lamidppig. At habppa beegeg, wan laappan danab ah ag anidna, eheɗ nau baɗatteb amu, ag Israel, ag amubia aib heppig.

³ Aɗinu? Wanppan danab ag ahilag kobol am meu iitta; ii ehanadtte. Ag atuppan ad laa oeg qiie, ag aon gona, danab uɗat amu haknu doyak okkai ele laa mettan heeg, nug ad amu awa, kayak hambuppuak dottog hoitte.

⁴ Laa uɗat amu hetteb ele ag hoin malona, ag silwa, gol ele aon, bala medatteb. Ag amu henana, ag dottog amu uɗalmanu ag ad laa bitob ma daakkunu aon, dottog amuppa tutuippa qataqetteb.

⁵ Danab nug ai ag melen uɗiɗidppeg nauhmanu nug danab dottog babaitta, lamen tagitta, melen eppomppa qappe daatte; kayak hambuppuak dottolkad ag amubia daatteb. Dottolkad amu ag nai mattiglagnu elele iitta. Ag baelagppa oiglagnu elele iitta amunu, danab ag adeppa daaglagnu dabmetteb amu, ag maon, appa gotteb. Ag Israel, ag dottolkad amu aib baɗadppig. Aɗinu? Ag ahilagnu aɗi eheɗ laa hattaglagnu elele iitta. Ag ehanadppeg, ag aɗitai laa ena aoglagnu ele, elele iitta.” Yawe Nug anam atte.

⁶ O Yawe, laa nug na bia laa iitta. Na onin ɠagattag ele daattem. Na ebehinnab ele daattem.

⁷ Na wan atu oh dilag King daattem; danab ah ohnab ag nahipnu ebehilag oh bodoetta le mekkunu daatteb. Aɗinu? Ig danab ah oh anam hekkunig am kobol pehettak, kobol tutukku ele. Laa ele, wanppan wan ohppa danab ag doyak dabmak ena ele daatteb, amge ag oolagppa, aria, ɗo maɗoɗ oh oolagppa ele, laa nug na bia laal ii daatte.

⁸ Amu oh ag kayak hambuppuak dottolkad adppa hak, ag amuppa ippunittak aotteb amunu, ag am kaaka. Ag dabmak tutukku iitta ele.

⁹ Danab ag kayak hambuppuak dottog hoiyak uɗat haknu doyak okkai ele, ag hoiyadtteb. Danab nug ad hoiyak kobol amu dootte, nug ad awa, dottog hoitte. Nug hoiya male, keeke golppa hak danab nug gol Upasnu, o silwa Tarsisnu awa, hamappa qeeqe, dottog amu tonatte. Nug amu ha male, ag lamen enanag, kala ed, perpel ele aon takkidtteb.

¹⁰ Danab ag kayak hambuppuak anam bappaidtteb, amge Yawe, Nug Kayak genab. Nug hanhan bau daatte. Nug king hanhan daatte. Nug oo nauhe, wan uɗaltte. Wanppan wan anen anen oh ag nuhig oppoɗi bak waappa daatteb ele amu, ag ena ii daamna. Iitta. Ag nauhkkulag.

¹¹ Ag Israel danab ah, ag wanppan wan anen anen ohppan danab ah inam appeg dooglag. “Kayak hambuppuak ag bappaladtteb, ag hab, wan ele ii heppig. Ag ii heppig, amu ag wanppanu qettoɗkkulag.”

¹² Amge Kayak Nug nuhig ɠagattagppa wan heum. Nug doyak dabmak ena ele nuhigppa wan ha, abenppa meum. Ao, Nug diignu doyak tutukku nuhigppa ele ha, hab nuhig abenppa meum.

¹³ Kayak Nug a, lombig hinqaknab ahaeg, hakkaɗ qette. Nug he, lombig amu wan atu ohppa ahatteb. Nug he, amemɗi awewe, gu ele ne, ulah ele Kayak meumppanu uɗitte.

¹⁴ Danab ah oh ag kayak hambuppuak dottolkad noolagppa dup nona binalag metteb ele ag doyak dabmak ena ele iitta. Ao, keeke golppa hak danab ag kayak hambuppuak dottolkad bappaidtteb ele, ag uɗalag nekku. Aɗinu? Dottolkad ag hetteb ele, amuam keeke hamu. Ag kayak genab laa iitta. Dottolkad amu ag ulah eeɗnan, bau ii daatteb. Iitta.

¹⁵ Ag am keeke diig iitta, keeke hamu. Danab aon aon aqaglagnu keeke. Ahilag bu awak haenppa, Yawe Nug kayak hambuppuak dottolkad amu hettoɗiatteb, ag oh padal mekkulag.

¹⁶ Amge laa, Jakop buɗub dilag Kayak daatte, Nug amubia iitta. Iitta! Aɗinu? Nug keeke oh heum. Ge, Nug keeke oh, Israel ele hattom. Israel ag am nuhikkudnab danab ah. Nug onig am Yawe Nukka Ɠagattag Oh Ele.

Juda ag padal mekkulag

¹⁷ Yawe Nug atte. “O Juda danab ah, kekeɗ ag uɗin taliliadna daaglagnu haen miag doum daatte amunu, ag wan imu uun, laih gokkulagnu ahilag keeke qagmaatteg!

¹⁸ Aɗinu? Keeke amu bekkunu haen uɗieb, da pahanab heppi, kekeɗ ag uɗin, ag wan imuppa daatteb ele, ahilagnu heppeg, danab nug men ketapolppa e gotte, amubia Israel danab ah, ag wan imu uun gokkulag. Da heppi, uug nau ahilagppa beeb, ag eheɗ dooglag,” awa atte.

¹⁹ ⌊Amu Jerusalem danab ah ag oɗelag oohona, inam akkulag.⌋ O gadonnab gadon, da guittak aomi daattem. Da guittak aoi, ihil mettom ele amu, laa nug heeb, ihil amu qaɗaiedakkunu elele iitta. Anam, amge da dagakka, da amelppa ami. “Imuam dahil oɗe. Da maokkulnu daattem.

²⁰ Peh lag dahil am laa heeg, nauhak daatte. Muɗi taiettaknu oh am pakkuakib daatteb. Da bekkalad da ele ii daattem. Ag gemu ii daatteb. Gemu laa nug ehaniɗa, peh lag dahil qabakkunu laa ii daatte. Laa nug peh dahil bappaidkkunu laa ii daatte,” aon akkulag.

²¹ ⌊Jerusalem danab ah ag oɗelag oohob, anam akkulag amunu, da, Jeremaia, da inam ami.⌋ “Aɗinu laa anam ii daama? Sipsip gumak danab nug dabmak pehettak ii aotte, sipsip mauhnoak gumadtte, sipsip ag matatun gona oitteb, amubia Juda dilag gumak danab ag dabmak iitta. Ag Yawe Nug ulum nai madakkunu oɗ ii medatteb amunu, ag ena ii heegeg, Juda danab ah ag eheɗ daatteb.

²² Ag daulag human doyeg! Oqotti okkai wan laa yawalti uɗitteppanu daatte, appanu uɗitte! Amuam kekeɗ huanak ag appanu uɗiegeg, oqotti otte. Ag uɗin heppeg, Juda dilag aabppa danab ah qainqainib daappeg, aab am nauhakib daaglag. Ao, doɗ jakal, ag aguppa daaglag.” Da anam ami.

Jeremaia nug unuqittom

²³ O Yawe, da doottem, ig danab ig ikka, ig ihinig oiyaknu ulumnab ii aɗattem. Ao, ig aɗi aɗi ihinigppa bekku amu, ig amu ii gumattem.

²⁴ O Yawe, na dahil eheɗ hak anidna, da padal mepanu na nai doya mala hettoɗia epeɗia elele mettak kobol aakkuib dim lamidna, bu meɗakkutnu oɗ medattem. Na oot nauheb, bu meɗamnanu unuqidttem.

²⁵ Wan laalappan danab ah, ag na am Kayak dabmekkulagnu uun, ag na waatppa ele daaglagnu uutteb amu, ag ig Jakop buɗub heikkeg nauhmut. Ag ig heikkeg, ig padal meta autta aomut. Ag ihinig wan ele heeg nauhom. Anam amunu, na amu dilagnu oppoɗin beeb, ag bu madakkutnu ool daatte.