Jeremaia 1 - Nobonob Baibel

Propet Jeremaianu nai

¹ Buk imuppa propet Jeremaia nug nai laala aum amu, nai amuam buk imuppa yaak daatte. Jeremaia nug mana mettak danab laa. Nug mameg onig am Hilkaia. Hilkaia, mana mettak danab laala ele, ag appalag diig onig am Anatot. Anatot am Benyamin wanppa daatte.

² Amu Juda dilag king onig Amon, Nug bekka Josaia, nug mameg abenab awa, Juda dilag king abenab awa, nuhig king dayaknu maɗ 13ppa, Yawe Nug digma, Nug nuhig nai Jeremaia mettom.

³ Yawe Nug Jeremaia amegppa nai anam digma mattiaya, Nug anam heehe ukke, Josaia bekka Jehoiakim, nug Juda dilag king ba dayom amu, nug king dayom haenppa ele Yawe Nug Jeremaia amegppa nai laala aawo, ukke ukke, Josaia bekka laa Sedekaia, nug ele Juda dilag king ba dayom, nuhig haenppa ele Yawe Nug Jeremaia amegppa nai laala mattiom. Nug anam he, Sedekaia king daye ukke, nuhig king dayomnu maɗ 11, kalam tanig ele, haen amuppa Nebukatnesar nug uɗia Juda eɗatta he, ag diia ukka laih me dayak danab ah Babilon wanppa daappig, haen amu batak Yawe Nug Jeremaia keeke laalanu mattie doyom.

Yawe Nug Jeremai tituanom

⁴ Amu Yawe, Nug da, Jeremaia, Nug nuhig nai imu da meɗom.

⁵ “Jeremaia, da na anin ooppa heidmi, amge haen da na ii heidmi, haen amuppa da na tituanidmi. Ao, na anin nug na ii menuittom, haen amuppa da na uɗat laa hekkutnu otidmi. Da na otidmi, na propet daanna, dahil nai wan atu ohppa mehuqkkutnu na oninppa emi,” awa aum.

⁶ Nug anam a, da ami. “O Naɗi Yawe, da am nid nakok aakkuib amunu, da nai anam madikkulnu elele ii doottem,” awe ami.

⁷ Da anam ami, amge Yawe Nug da amelppa aum. “Na, ‘Da am nid nakokib,’ aib ame. Da na adeppa gokkutnu appi amu, na appa gokkutoitte. Da na amenppa aɗi nai madikkutnunab ippunidppi, na amu madikkutoitte. Aib na ii heme!

⁸ Da na ele daaɗa ehanidppi, na padal ii memana amunu, na danab ah dilagnu aib baɗame,” awa aum.

⁹ Yawe Nug anam awowa, Nug eppeg bahia, da oɗel lauɗitta, Nug da amelppa aum. “Da dahil nai na oɗenppa aakku memi.

¹⁰ Antte! Gemu da na ehah laa medattem. Na wanppan wan laalappan danab ah, amu ɗo maɗoɗ laalappanu danab ah ele amelagppa nai madikkutnu elele daattem. Na laala amelagppa, danab laa nug uud keeke hiɗe bunaɗtteb, o lag keeke loppaɗtte, amubia da wan laa, o ɗo maɗoɗ laa amu, da ahilagppa heppi, ag nauhkkulag akkut. O na laala amelagppa danab laa nug keeke he nauhtte, o laa abenlagppanu lamatta, ahilag aben aotte, amubia da wan, o ɗo maɗoɗ laa amu heppi, ag padal mekkulag akkut. O na laala amelagppa danab nug lag bau he bette, o nug keeke eppe ena bette, amubia da wan o ɗo maɗoɗ amu heppi, ag ena daaglagnu akkut.” Yawe Nug anam awa, da amelppa aum.

Tulegleg aɗit Jeremaia anttom

¹¹ Amu Yawe Nug anam awowa, Nug nuhig nai imu da meɗom. “Jeremaia, na aɗi anidttem?” awa oɗ meɗom. Oɗ meɗe amu, da ami. “Da ad almon, da ad amunu eppeg laa anidttem,” awe ami.

¹² Da ai, Yawe Nug aum. “Na genab anidna ame. Amunu, amubia da genab dahil nai meu okkunu heppi bekkunu neegkkul,” awa aum.

¹³ Yawe Nug anam ana, Nug nuhig nai laa da meɗom. “Gemu na aɗi anidttem?” awa oɗ meɗom. Oɗ meɗe, da ami. “Da waa, amuppa le hipaɗ qette ele anidttem. Waa amuam ihinigppanu yawalti uɗitteppanu daatte. Am waa amuam tutukku ii daatte. Iitta. Waa amu leloɗia, kaɗehɗeh dayeye, le hipaɗ qak ele gokkaɗa, ig eigkkunu hette anidttem,” awe ami.

¹⁴ Da anam ai, Yawe Nug aum. “Yawalti uɗitteppanu amu, da appanu danab heppi, ag uɗin, ag danab ah Juda wanppa daatteb hadappeg, padal mekkulag.

¹⁵ Aɗinu? Da Yawe, da attem. Da wan laalappan huu Yawalti uɗitteppanu daatteb amu, da ag onilagppa ekkul. Da heppi, ahilkad king, daup ele ag uɗin, ag Jerusalem, Juda dilag aab laala ele ban henan, ag eɗadkkulag. Ag eɗadna malona, ahilkad king ag Jerusalemnu aɗ odppa ahilkad sia king qappaladna, ag aguppa daaglag.

¹⁶ Ge, dahilad danab ah ag da dimeɗana, ag kalu danab ile muttuɗig enanag bette manan, kayak hambuppuak mattanna, ag akka eppelagppa dottolkad hadappig ele, ag dottolkad amu noolagppa dup nona binalag mena, kobol nau amu oh aakku heegeg uɗie, gemu ele hetteb amunu, da bu okkai ag madakkul.

¹⁷ Amunu, Jeremaia, na meut oh dahil uɗat hekkutnu babaitte! Da na aɗi ag amelagppa appenab dooglagnu ippunadppi, na amu aakku a! Na ahilagnu aib eheɗ nau baɗame. Na amu dilag eheɗ nau baɗakkut dayeb amu, da heppi, na ag noolagppa daanna, na eheɗ nau baɗakkut.

¹⁸ Da ɠagattag medappi, na ɠagattag, aab okkai ɠagattag aɗ ele, o aen biidod, o gilil brasppa hak, anambia na ɠagattag daakkut. Anam bia daakkut amunu, na Juda danab ah ag tuɗidna, hipunin hemananu, na ahilag ib amu hekkulagnu keldokkutnu henana, na ɠagattag daakkut. Juda dilag king, nuhig ehanittak anuqak danab, mana mettak danab, amu aabppan danab ah ele ag hipunin hekkulagnu hekkulag, amge na ag amu hemananu akkutnu, na ɠagattag anam daakkut.

¹⁹ Ag na ele ban hekkulag, amge ag na ii eɗidmana. Aɗinu? Da na ele daattep. Da ehanidppi, na padal ii menana.” Yawe Nug anam awa aum.