Jems 5 - Nobonob Baibel

Danab enub kuɗum ele dilag nai

¹ Gemu amu, ag danab enulag ele ag doyeg! Ahilagppa uug nau digdig bekkunu daatte amunu, ag dabmena gaanna huana heig!

² Ag enulag oh am beɗatteb. Amu dittuɗ ag ahilkad lamen ele oh am heeg nauhtteb.

³ Gol, silwa ele ahilkad amu ele nauhna, dubuttid taadtteb. Amu dubuttid amu heeb, ahilag hipunin miag atieb, aab bia ag beɗulag eokku. Ag keeke ena ena, men doɗo ele kuɗumnab, gog tak haen imuppa, ag akka ena daaglagnu qagmaadppig.

⁴ Antteg! Uɗat nid ag ahilag uɗat heppig, me ag enub danab ag uɗat nid amu buppualadnana, uɗat heppignu daden nob ii madappig amu, men doɗo amu eɗua danab baag bia, “Ag eheɗ heppig,” awa maditte. Uɗat nid amu dilag ewak, nai amuam Naɗi Ɠagattag Oh Ele, Nug daugppa noum daatte.

⁵ Ag wanppa daanna, ag keeke ena ena oh aon, oolag gamag ahehe daan, ag akka ag keeke kuɗumnab akka ahilagnu aɗappig. Ag akka ag hena, epeɗiak okkai deɗppa ag nob nau okkai aoglag.

⁶ Danab laa ag beɗulagppa aab iitta, ag ahilagppa eheɗ laa ii heppig, amge ag danab amu hettoɗiakppa maadna heeg, epeɗiak danab nug ag eheɗ heppig a, ag aqaeg mauhppig.

Oo ɠagattag qa, uug mawa, Naɗi ameg maknu nai

⁷ O lailad, diig amunu ag oolag bodoettak ele daan, Naɗi eɗua uɗikkunu haen ameg meig! Antteg! Dad mameg nug ee meu ena okkunu ameg ma dayaya, nug oo bodoettak ele gu tatamnu, gu dimnu ele ameg mette.

⁸ Amubia ag ele ag oolag bodoettak ele daanna, ag oolag ɠagattag qettan dayeg! Aɗinu? Naɗi eɗua uɗikkunu miag daatte.

⁹ O lailad, ag lailkad ele aib nug naittuɗ meppig. Ag kobol amu hekkulag amu, Kayak Nug ag epeɗiatta, nob nau madakku. Amu Epeɗiak Danab Nug dokkunu haen miagnab malom daatte.

¹⁰ O lailad, eheɗ hettak doya, oo bodoettak dayaya maokkunu kobol, ag amunu antte oo maittak kobol laa anidkkulagnu anukka propet ag Naɗi onigppa nai mehuqttappig ag daulagppa doaɗ!

¹¹ Ag doyeg! Ig, “Danab ag uug doyaya eɗittaknuib dabmak awak kobol dim lamidppig amu, ig ag itittak ena aoppig daatteb,” aot attem amunu, ag amu anidkkulagnu ag Jobnu kaya dabmekkulag. Ag dootteb. Nug oo ɠagattag qetta, uug oh nuhigppa beppig am mawom. Anam he, dimppa Naɗi nuhignu kobol ena he beum. Aɗinu? Naɗi Nug ihinignu oo gai-iitta doya oo mekka ehanikka auta aotte; Nug ihinignu oo bodoetta le mak ele doya auta aotte.

¹² Amge O lailad, anuqak amu ag inam hekkulag. Ag aib hab onig o iitta wan onig, o iitta keeke laa onig diina, ahilag nai, nai amuppa ɠagattag qedappig. Iitta. Ag “Iitta,” akkulagnu dayeb am, “Iitta,” akkulag. Am aakku elele. Aria ag, “Yo,” akkulagnu dayeb amu, “Yo,” akkulag. Am aakku elele. Am ag keeke laa onig diin, ag ahilag nai ɠagattag qettan akkulag amu, Kayak Nug geha ag epeɗiatta, nob nau madakku.

Danab tutukku, nuhig unuqittak am ɠagattag

¹³ Ag oolagppa laa nug uug dootte dayeb amu, nug unuqittaɗ! O iitta, lainig laa nug oo gamag ahak dootte dayeb amu, nug ahi edatta, Kayak binag maɗ!.

¹⁴ Ag oolagppanu lailag laa nug oɗe ele daatte dayeb amu, nug Kristen tamaniak ikki danab ag Naɗi onigppa goɗen laaidnana, Kayak ehanidkkunu unuqidkkulagnu onilagppa ewaɗ!

¹⁵ Amu ikki danab ag Kayaknu oolagppa genab doona unuqidppeg amu, Naɗi Nug oɗe danab amu heeb, eɗua bau mekku. Aria, oɗe danab amu nug hipunin hattom dayeb amu, Naɗi Nug hipunin nuhig uhuqa medakku.

¹⁶ Amunu ag oɗe aon, eɗun ena daaglagnu amu, aun laa nug layagppa hipunin heum ele, nug layag amu amegppa nug hipunin heum miag atiak ab, ag oh anen anen ag lailkad dilagnu Kayak unuqitteg! Amu genab tutukku hak danab, nuhig unuqittak am ebehi ele amunu, danab ehanitteb ena daakkunu elele.

¹⁷ Elaiya nug am danab ig bianab, amu nug oo unuqagppanu gu ii nemanu Kayak unuqittom amunu, gu maɗ ewam, kalam eblaih laippu ele ii neum.

¹⁸ Nug eɗua unuqitte, gu eɗua ne, wanppan ee oh eɗun bau meu oppig.

¹⁹ O lailad, ag lailag laa ag oolagppanu nug doyak diig genabib dimetta oiyebeb, laa nug eɗua eeɗeb dokku dayeb, ⌊eɗua eeɗeb doaknu kobol, amuam enanag⌋.

²⁰ Amu kobol amunu nai imu ag daulagppa doaɗ! Danab aun nug he, hipunin danab nug eheɗ hak ib dimetta, Kayak toppa eɗua dotte amu, danab ehanittom ele nug aakku he, danab ib eheɗppa oiyom ele am padal ii mema; Kayak Nug nuhig hipunin kuɗum uhuqa medakku.