Jems 4 - Nobonob Baibel

Danab nug wanppan kobolnu oo mauhtte, amu nug Kayaknu kekeɗ daatte

¹ Aɗi keeke nug he, ⌊naippa⌋ ban hak, nug mehqak ele ahilagppa bettep? Keeke amunu amu, ag beɗulagppanu kobol digdig hekkulagnu ɠagattag dabmeegeg he, ag nai hak kobol amu hetteb.

² Ag keeke digdignu oolag hette, amge ag ii aotteb amunu, ag danab duug okkulagnu dabmetteb. Ag keekenu amelag qe aolobnab dabmak eheɗ aotteb, amge ag aoglagnu elele iitta amunu, ag ⌊naippa⌋ ban hena, nug mehqak ele hetteb. Am ag Kayak ii unuqidtteb amunu, ag keeke ii aotteb.

³ Ag keeke aoglagnu Kayak unuqidtteb, amge ag ii aotteb. Aɗinu? Dabmak ahilag am tutukku iitta. Ag keeke ag oolag hettenuib, ag akka aon aɗaglagnu unuqidtteb.

⁴ Ag danab ah naunab. Ag Kayak uuna, kobol laala dim lamadtteb ele. Ag danab nug wan kobolnu oo hette ele, nug aakku Kayaknu kekeɗ daatte iite dootteb? Ge, laa nug wan kobolnu layam daakkunu dabmak awa, dabmak amu dim lamidtte, nug Kayaknu kekeɗ daatte.

⁵ Kayak nai laa amunu ag keeke hamu bia doottebte? Nai amuam inam. “⌊Nuhig⌋ Ouɗi, Kayak Nug ig oonigppa meum daatte ele amu, Nug ihinignu dahil doya laa aomanu doyak aɗa daatte.”

⁶ Anam daatte amunu, Kayak Nug ehanittak okkai hamu mettak, Nug amu megatte. Diig amunu Kayak naippa, nai inam daatte. “Kayak Nug dada danab ippulag oo nette, amge danab ag akka onilag qeeg nette ele, Nug ahilagnu ii helo bia me, Nug ag ehanadtte.”

⁷ Anam amunu, ag Kayak waappa dayeg! Ag Satan nug aɗi eheɗ hekkulagnu hette, ag ii hemananu ag ɠagattag hippaidna daappeg, nug ag uuatta, oola gokku.

⁸ Ag Kayak gumidna wappeg amu, Nug ele ag gumatta dokku. Danab nug eppeg leppa ihe, dubuttid iitta daatte bia amu, ag hipunin danab ag heppeg, ag ahilag oiyak am dubuttid iitta ele dayaɗ! Ag danab ag dabmak laippu iitta, ag heppeg, ag oolag oppiak dayaɗ!

⁹ Ag eheɗ hak ahilag amu, ag amunu dabmenan, ag oolagppa guittak doon, huana gayeg! Ag danab ag imatteb ele, ag imak am uuna gayeg! Ag danab ag oolag gamag ahatte ele, ag oo gamag ahak amu uuna, ag oolagppa uug ele doyeg!

¹⁰ Ag akka ag Naɗi noobppa ag onilag qeppeg neeb oiyeg! Ag anam daanna oiglag amu, Naɗi Nug ag humatta attan maadkku.

¹¹ O lailad, ag lailkad dilagnu nai eheɗ aib appig. Danab laa nug layag laanu nai nau atte, o iitta nug layag epeɗitte ele amu, nug ɗonu ele nai nau ana, ɗo ele epeɗitte. Aria, na ɗo epeɗittem dayeb amu, na ɗo dim lamittak danab iitta; na ɗo epeɗittak danab daattem.

¹² Kayak Nug nukka aakkuib ɗo meum, Nug nukka aakkuib epeɗiak danab daatte. Nug nukka aakkuib danab eɗua diikkunu elele. Aria, Nug nukka aakkuib am heeb nauhkkunu elele. Na nakka nahipnu attem doottem amunu, na danab layap epeɗidkkutnu hettem?

Dimppa aɗi bekkunu daatte amu, danab laa ii dootte

¹³ Aria, ag oolagppa danab laala ag, “Gemute o iitta buttite ig aab okkai laappa gota, maɗ laippu daatta, men doɗo mattiak uɗat hetat, men doɗo aognig,” aon atteb ele amu, ag doyeg! Amuam hambuppuak bia.

¹⁴ Ag aɗi keeke butti bekku amu ag ii dootteb. Ahilag bau dayak haen imu attemnab daatte am ag doottebte? Ag am buttuɗai aha, nakoknab dayowa iitta mette bia. Ahilag bau dayak haen anam biaib daatte.

¹⁵ Amunu ag inam akkulag am ena. “Naɗi Nug anam dabmette dayeb, ig bau daatta, ig imu hekkunig, o iitta ig uɗat laa hekkunig.”

¹⁶ Amge, gemu ag hetteb amu, ag akka akka beɗulag humatteb. Beɗu humak kobol amubia oh am kobol eheɗ.

¹⁷ Amunu danab laa nug kobol ena hekkunu dootte, amge nug ii hette, nug aakku hipunin hette.