Jems 3 - Nobonob Baibel

Nai mattiaknu dabmettaknu nai

¹ O lailad, danab kuɗum laa ele ag oolagppanu ippunittak danab bekkulagnu aib dabmeppig. Aɗinu? Ag dootteb, dimppa Kayak Nug epeɗiak ɠagattag ippunittak danab ihinigppa haaha, Nug epeɗiak nakok bodoettak Nug baekkudppa laala dilagppa hekku.

² Am ig oh haen kuɗum taataɗ qettak hettem, amge danab laa nug nai mattiak nuhigppa eheɗ laa ii hette dayeb amu, nug danab elelenab; nug nuhig meu oh ena atognokkunu elele.

³ Ig hos, nug ihinig dabmak dim lamitta gokkunu, ig ulum aen mahappa hak laa nug oɗeppa mettem amunu ig hos beɗu eɗuta, ib mettautut gotte.

⁴ Amu ag uub okkainu ele antteg! Uub okkai nug am keeke okkai, amu ulah okkai uɗia duttune, yu qaɗeppa gotte. Amge uubnu ulum mettaknu ad am keeke nagnag, ulum danab nug laih gokkunu oo daatte dayeb, nug ulum eɗue, uub nug laih amuppa gotte.

⁵ Amubianab danab lemaɗu am nug beɗu laih laala oh oolagppa keeke nakok, amge nug keeke okkainabnu hamu naiib maditte. Aria ag dootteb, aab atokkak nakoknab nug atuppa ewa naɗinab ma, ad oh ewadkkunu elele.

⁶ Amu ig lemaɗunig nug am aab aɗu bia. Nug beɗunig laih laala oh gamagppa Satan eppeg bia daatte. Danab lemaɗu nug danab beɗu oh dubuttid medatte, amu nug danab beɗuppa kobol aab gakkaɗak bia hette amunu, oiyak oh nuhig am ena ii bette. Danab lemaɗu, ⌊nug anam hette ele amu,⌋ nuhig diig am Satan.

⁷ Danab ag doɗ digdig, ai iɗu iɗu, mat keeke iɗu iɗu, aria doɗ oh yuppa daatteb ele, ag amu oh diin heppeg, manan mekkulagnu elele. Ag matu heppig, gemu haen imu ele hetteb.

⁸ Amge danab laippu laa, ⌊nug nukka⌋ nug heeb, nug lemaɗu manan mekkunu elele iitta. Danab ⌊Jesusnu ooppa genab ii dootte ele⌋ nug lemaɗu am toetta dayaknu iitta, am keeke eheɗ. Danab anam nug lemaɗu am mua nau ele, danab qeeb mauhkkunu elele.

⁹ Ig oɗenigppa amu ihinig Naɗi, ig Mamenig, Nug binag meta, amu ig danab Kayak Nug Nug bia hattom amu, ig oɗenigppa amu, ig danab laa eheɗ laa awaknu anak waappa daaglagnu madittem.

¹⁰ Kayak binag mak nai, amu nai nau ele aa oh ig oɗenig laippuppa bettep. O lailad, ig kobol anam laa ii helom am ena.

¹¹ Wan oɗe laippuppa le aɗit, laa am le ena, laa am yu ele, aa oɗe laippuppa ii tulai dottep. Iitta!

¹² O lailad, ad figppa ad olipnu meu doɗo niikkunu elelete? Iitta! Muɗi grep nug ad fig meu okkunu elelete? Iitta. Amubia le qeppuɗia bak laa, le yu ele amuppa bette amu, danab nug le qeppuɗia bak amuppanu le hamu, yu iitta ele aokkunu elele iittanab.

Doyak ena amu Kayak toppanu uɗitte

¹³ Danab laa nug ag oolagppanu nug doyak dabmak ena ele, amu diignu doyak tutukku ele daattete? Anam dayeb amu, danab laa ag amu anidkkulagnu, nug nuhig oiyak enanag baɗ! Yo, laa ag amu anidkkulagnu amu, nug ele nukka nukka binag mak kobol iittappa, kobol doyak dabmak enappanu bette amu, nug kobol amuppa danab ehanattaɗ!

¹⁴ Amge laa dilagnu amelag qe oolag elele ii dayak kobol ninig ele ag oolkadppa daatte dayeb, amu akka akka ahilagnuib dabmak awak kobol ag oolkadppa ele daatte dayeb amu, nau amu tonattepnu ag dada mattiak, nai hambuppuak ele aib madippig.

¹⁵ Doyak dabmak ena ⌊iitta⌋ ele amuam hab aabppanu ii neum. Iitta. Doyak dabmak ena ⌊iitta⌋ ele amu nug wan imuppan, am Kayak Ouɗi, nuhigppanu iitta. Satan nug doyak dabmak ⌊iitta⌋ ele amu mameg daatte.

¹⁶ Am danab laa ag laa dilagnu amelag qe oolag elele ii daatte, amu laa ag akka akka ahilagnuib dabmak okkai aotteb, danab amu ag adeppa daatteb amu, appa danab ah ag daqaqa ii daatteb; ag kobol eheɗ digdig oh hetteb.

¹⁷ Amge Kayaknu doyak dabmak ena ele amu, doyak dabmak ena ele amuam Kristen danab ag inam oiglagnu ippunigtte. Anuqak amu, ag oppiak ele daan oiglag. Amu dim lamittak ag maɗoɗ ikki daan, ag lailkad dilagnu oo bodoettak doon, dagom danab daan, lailkad dilagnu oolag gai-iitta doon oolag mattan ehanadna autnanab aona, ag ena hak kobol ambak hena, ag danab oh dilagppa kobol laippuib dim lamidna, ag aɗi hetteb amu, ag kobol genabppaib hekkulagnu daatteb.

¹⁸ Danab ag maɗoɗ ikki daatteb amu, ag am danab ee eppowa meu aotte, amubia meu laa, amuam genab tutukku hak kobol, meu amu aotteb.