Jems 2 - Nobonob Baibel

Kristen tamaniakppa amu danab oh elele elele daatteb

¹ O lailad, ag Naɗi ihinig Jesus Kristus, Nug binag amahlak oppiaawak ele amu, ag nuhignu oolagppa genab dootteb amunu, ag danab onilag okkai ele amuib atognoadna, danab onilag iitta ele am keeke hamu bia anadkkulagnu aib heppig.

² Am enub danab laa nug lamen ena takka, eppeg doɗoppa gol ring ele ma, nug ahilag qagmak lakka notte dayeb, amu daɗek danab laa nug lamen nau ele nug ele qagmak lakka notte dayeb,

³ ag danab bala ena meum ele, nug atognonana, “Na dayak balal ena imuppa daye!” aon akkulag, amge ag daɗek danab amegppa, “Na unam hippaidna daakkut, o iitta na da baelppa honap inam heɗep nena daye!” aon akkulag dayeb amu,

⁴ kobol amuppa amu ag eheɗ iite hetteb? Yo, ag eheɗ hetteb. Ag lailkad dilag enubppa aun am danab ena, aun am danab ena iitta epeɗiadtteb amu, ag am epeɗiak danab, dabmak nau ele, danab epeɗiadtteb bianab aakku hetteb.

⁵ O lailad, ag doyeg! Danab ag wanppan danab oh noolagppa daɗek daatteb ele, danab amu Kayak Nug ag ooppa genab doyak ɠagattag aɗan oiglagnu, ag nuhig ɗo maɗoɗ ooppa, Kayak Nug danab ag nuhignu oolag mauhtte ele ag aguppa daaglagnu nai qakka aum amu, ag amu ooppa daaglagnu tituanattom daatteb.

⁶ Amge ag, da nai imu ahilagnu yaattem ele amu, ag daɗek danab heeg uɗalag nette. Ag dootteb, danab enulag ele ag heeg, ag Kristen ag aakku uug anidtteb. Danab enulag ele ag aakku eeɗatteg, hettoɗiak abenppa watteb.

⁷ Am Kayak Nug Kristus onig ag mattom amu, danab amu ag aakku onig amu dappidna maditteb.

⁸ Kayaknu ɗo maɗoɗ ooppa dayaknu ɗo anuqak laa Kayak naippa daatte am inam. “Na nakka nahipnu oot mauhtte, amubia na laipad dilagnu ele oot mauhaɗ!” Anam amunu ag ɗo amu genab dim lamidkkulag dayeb, ag aakku kobol ena hekkulag.

⁹ Amge ag ahilag neekkakppa, diig iittappa ag danab laa dilag, “Ena hetteb,” anana, laa dilag, “Eheɗ hetteb,” atteb dayeb amu, ag amuppa hipunin hetteb. Ag anam hetteb dayeb amu, ɗo nai ag am ɗo tappe nak danab daatteb ippunigtte.

¹⁰ Aɗinu? Danab laa nug ɗo laa oh dim lamidtte, amge ɗo laippu tippaltte amu, ⌊danab ɗo oh tappaladtte bia,⌋ nug ɗo tappe nak danab daatte.

¹¹ Ig doottem, Kayak Nug aum. “Na ewau aib pakkuna gappai heme,” amge Nug amuib ii aum. Iitta. Nug ele inam aum. “Na danab aib qeppe mauhom,” awa aum. Amunu na gappai kobol ii hekkut dayeb, amge na danab qeppe mauhkku dayeb amu, na aakku ɗo tippalak danab daattem.

¹² Oo mauhak kobol nug ag aɗi hekkulagnu ippunadtte ele amu, ag amu hettebte oo iittate. Kayak Nug amuppa epeɗiadkku amunu ag aɗi atteb, aɗi hetteb ele amu ag amu dabmenan oiyeg!

¹³ Aɗinu? Danab laa nug layagnu oo gai-iitta doya oo metta ehanittak kobol ii dim lamidtte, nug layag eheɗ heumnu nob nau medatte, nug nob nau amu medakkunu ii uutte amu, Kayak Nug danab amu hettoɗiakppa nob nau medakku. Amge danab laa nug layagnu oo gai-iitta doya oo metta ehanidtte, nug hipuninnu nob nau ii medatte amu, nug geha hettoɗiakppa nob nau ii aoma. Oo gai-iitta doya oo metta ehanittak kobol am nob mettak kobol eɗidtte!

Ooppa genab doyak, kobol ena ele ouqak daattep

¹⁴ O lailad, danab laa nug “Da Kristusnu oolppa genab doottem,” awa akkutai, amge nug kobol ena ii hette ele dayeb, danab amu nuhig ooppa genab doyak am keeke hamu. Ooppa genab doyak anam am eɗua diikkute? Iitta.

¹⁵ Aria ag lailag laa, nug beɗuppa lamen iitta, ee ele iitta daatte dayeb,

¹⁶ ag oolagppan laa nug aha, laa tutu meum daatte ele amu, nug amegppa, “Na maɗoɗ daanna, na gona beɗun ulah doomanu na lamen laa aon, ee ele lappe oot dittiaɗ!” awa akku dayeb, amge nug layag lamen laa ii medakku, eeppa ele ii ehanidkku dayeb amu, nai amu layag ehanidkkute? Iitta.

¹⁷ Ooppa genab doyak ele am anamib. Ooppa genab doyak nug hamu daatte, nug kobol ena laa ii hette amu, nug am danab laa mauhom daatte, anam bia hamu daatte.

¹⁸ Anam, amge danab laa nug, “Na amu ootppa genab doottem, da amu da kobol ena hettem,” awa akkutai. Amge anam iitta. Na ooppa genab doyakppanu uɗat ii hekkut dayeb, na attem hena, nahip ooppa genab doyak ippuniɗkkut? Da amu, da dahil ooppa genab doyakppanu uɗat, da amuppa dahil ooppa genab doyak na ippunidkkul.

¹⁹ Na am ootppa genab inam doottem, “Kayak laippuib daatte.” Amu ena, amge ouɗi nau ag ele anam oolagppa genab doon, ag eheɗ nau baɗan hahaɗtteb.

²⁰ Na danab dabmak tutukku iitta! Kobol ena hak ooppa genab doyakppa ii betteb dayeb, ooppa genab doyak amuam keeke hamu daatte. Da amu nai imuppa ippunidkkul.

²¹ Anukka ig alanig Abraham, nug bekka Aisak mana mettak qaɗab attan mewowa, mana Kayak medakkunu heum amunu, haen amuppa Kayak Nug kobol nuhig antta, nuhignu, “Genab tutukku hak danab,” awa aum.

²² Aria, O na danab dabmak tutukku iitta ele, Abraham heum, amuam inam ippunidtte. Nuhig ooppa genab doyak am nuhig kobol ena ele aa nug ehanittak heyaya, aa oh uɗat laippu heeheh, kobol amuppa nuhig ooppa genab doyak elelenab meum.

²³ Amu nug heum amuppa nai laa Kayak naippa daatte am elele mettom. Nai am inam. “Abraham nug Kayaknu ooppa genab doyom amunu, Kayak Nug ooppa genab doyak amu antta, ‘Nug am genab tutukku hak danab daatte,’ ” awa aum. Ele amu Kayak Nug Abrahamnu, “Da layalnab,” aum.

²⁴ Amunu gemu ag dootteb, nuhig ooppa genab doyakppaib Kayak Nug danabnu, “Genab tutukku hak danab,” ii atte. Iitta. Nug danab ooppa genab doyaya, kobol ena hette ele amu, danab amunu Kayak Nug “Genab tutukku hak danab,” awa atte.

²⁵ Amubianab amu ib imuag ah onig Rahap, nug danab Josua he gopiɗ ele amu, nug aa diiata, laugppa atognoata, aab amuppan danab anatmananu ib laih maate goya, aben laappa dayoya, eɗuya, aa abenlahppa gopiɗ, diig amunu Kayak Nug Rahapnu, “Genab tutukku hak ah,” awa aum.

²⁶ Danab beɗu ouɗi iitta ele am mauhom. Anamnab aakku, danab nug kobol ena ii hette amu, ooppa genab doyak danab amunu am danab laa mauhom daatte, anam bia hamu daatte.