Jems 1 - Nobonob Baibel

Uug digdig amu eheɗ haknu eeɗak ele eɗittaknu nai

¹ Da Jems, da Kayak, Naɗi Jesus Kristus ele dilah maɗi nid. Da Juda danab ag Juda wanppa ii daatteb, ag wan atu laappa daanna oitteb ele amu, da ahilagnu ehanattak nai iikku yaattem. Da ag humadttem.

² O lailad, haen ag ma anttak digdigppa daatteb amu, ag amunu oolag aib ottaiom. Iitta. Ag maɗoɗppan gamag ahak doyeg!

³ Aɗinu? Ag dootteb. Ahilag ooppa genab doyak uugppa ma anttak aotte haenppa, uug doyaya eɗittaknuib dabmak awak kobol, nug ena mekkunu ib oɗeppa daatte.

⁴ Ag Kayaknu danabnab kalulag ele daaglagnu, ag nuhig kobol ena amunu tutu iinab memananu, ag keeke ohnu elele daaglagnu amu, ag uug doyaya eɗittaknuib dabmak awak kobol ahilag nug gogppa tekkunu wagai meig!

⁵ Ag oolagppa danab laippu laa nug doyak dabmak ena ele elele iitta daatte dayeb amu, nug amunu Kayak unuqittaɗ! Nug unuqitteb, Kayak Nug doyak dabmak ena ele medakku. Kayak Nug keeke danab madatte amu, Nug elelenab madatta, Nug mettaknu nai ii hette.

⁶ Amge haen danab laa nug oɗmak amu hette amu, nug amu aokkunu ooppa genab doyaɗ! Nug, “Da aokkultai o iittatai?” anam aib dabmeum. Danab nug dabmak anam ele, nug am ɠagattag ii daatte; nug am yu ulah heehe, koɗkoɗ qette amubia daatte.

⁷ Danab anam amu, nug Naɗi Nug keeke laa nug medakkunu ii dabmema.

⁸ Iitta. Dabmak nuhig amu laippu iitta. Nug kobol oh hette ele amu, nug ib laippu ii dim lamidtte.

⁹ Ig Kristen lainig laa nug daɗek daatte amu, nug maɗoɗppan gamag ahak dookku am ena. Aɗinu? ⌊Nug Jesusnu ooppa genab dootte amunu,⌋ nug Kayak noobppa onig ele.

¹⁰ Amge ig Kristen lainig laa nug enub ele amu, nug anukka, “Da am enul okkai ele amunu da am danab okkai ɠagattag ele daattem,” anam dabmak awom, gemu ⌊nug Jesusnu ooppa genab dootte, nuhigppaib ehanittak hanhannu aotte amunu,⌋ dabmak alag, amuam iitta meum, diig amunu nug ele maɗoɗppan gamag ahak dookku am ena. Aɗinu? Bala haɗag paha qaɗaiedatteb, amubia enubnu keeke am anam aakku iitta mekku.

¹¹ Ig doottem, aam nug naɗi ma, na he, bala mauɗe, nug haɗag na qe, nuhig bala anttak aakku nauhtte. Amubia enub danab nug uɗat nuhig haaha dayaya mauhkku; ⌊nuhig keeke ii ehanitteb, nug tuɗid bau daakku⌋.

¹² Danab nug ma anttak awawa, uug doyaya eɗidkkunuib dabmak awak kobol dim lamidtte amu, nug itittak ena awom daatte. Aɗinu? Nug ma anttak amu eɗitteb amu, Kayak Nug nob ena, bauklel hanhannu medakku. Kayak Nug danab oh ag nuhignu oolag mauhtte ele amu, Nug ag bauklel amu madakkunu nai qakka aum amunu, geha madakku.

¹³ Am hipunin hekkunu eeɗak haenppa danab laa nug, “Kayak da eheɗ hekkulnu eeɗiltte,” aib aum. Aɗinu? Kayak Nug eheɗ hekkunu eeɗak ii dootte, amu Kayak Nug danab laa eheɗ hekkunu ele ii eeɗtte.

¹⁴ Amge danab nug hipunin hekkunu eeɗak dootte amu, aɗi keeke nug amunu oo okkai hette ele, keeke amu nug he, danab amu nug hipunin hekkunu eeɗak dootte. Nug doɗ, ee laanu oo huana hette ele amu, nug ee amu muttuɗig doya ukka, pelemppa notte, amubia danab nug aɗi keeke amunu oo huana hette ele amu, amuppa nug eheɗ hekkunu eeɗak aotte.

¹⁵ Amu danab nug aɗi keekenu oo huana hette ele amu, oo hak amu nug okkai me, danab nug hipunin hette. Hipunin nug okkai ma male amu, meu nuhig am mauhak.

¹⁶ O lailadnab, ag akka ag oolag buppuidna, “Kayak eheɗ hekkunignu eeɗak imu megatte,” amananu dabmeig!

¹⁷ Keeke hamu mekkak ena, elelenab ele, keeke amu oh hab aabppanu uɗitte. Aam, kalam, hoɗoppai keeke ag habppa daanna, amahlak megatteb ele amu, keeke amu oh Mamelag, Nug keeke enanag amu oh me, ihinigppa uɗitte. Mame Nug kobol nuhig eɗua eɗua ii mette. Nug keeke laa aamnu amahlakppa itotolag eɗun eɗun qetteb amubia ii hette.

¹⁸ Iitta! Nug nukka dabmak nuhig dim lamitta, Nug nai nuhig doyak diig genabibppanu, Nug amuppa ha, ig Nug danab ag attem daaglagnu dabmeum ele amu, ig amubia daagnignu Nug bauklel ig mekkom.

Oɗe doya dim lamittaknu nai

¹⁹ O lailadnab, ag oh kobol imu doon autna aweg! Ag nai paha dooglagnu daulag human dayeg! Ag anam hekkulag, amge ag nai paha aib madippig, oppoɗilag ele paha aib beum.

²⁰ Aɗinu? Danabnu oo nauhak am genab tutukku hak kobol, Kayak Nug ig amu dim lamidkkunignu oo hette amu, am kobol amu he ii bette.

²¹ Amunu kobol nau oh, kobol dubuttid oh ele, wan ohppa daatteb amu, ag amu oh maoppeg ukkeb, ag akka ag onilag qeppeg neeb, ag nai Kayak Nug ag oolagppa eppom daatte amu aweg! Nai amu nug ag eɗua diikkunu elele.

²² Ag akka ag oolag buppuidna, Kayak nai am keeke hamu bia aib dooppig. Ag nai amu doon, genab dim lamitteg!

²³ Am danab laa nug Kayak nai daugppa dootte amge nug ii dim lamidtte, nug am danab lettodppa nug nukka iɗu anidtte, amubia hette.

²⁴ Nug nukka iɗu anttowa, nug eɗua ukka, nug pahanab nug nukka iɗu attemnab anttom amu, nug ameg atitte.

²⁵ Amge ɗo elelenab, ɗo amuam ig hipuninppanu uhuqigtte amu, danab laa nug ɗo amu diig neekka aut autanab awa, tutukku dim lamitta, nug ɗo amu ele daug ii atitte, nug dim lamidtte amu, Kayak nug danab amu itittak ena medakku.

²⁶ Am danab laa nug, “Da amu Kayaknu danab ena, da hanhan genab Kayak binag mettem,” awa akkutai, amge nug oɗe ii atognotte dayeb amu, nug nukka oo buppuidtte amunu, Kayak binag mak nuhig am keeke hamu.

²⁷ Danab nug Kayak, ig Mamenig, Nug binag tutukku mekkunu amu, Kayak Nug kobol imunu elele anidtte. Danab amu nug nid naunau laa ag mamelkad anilkad mauhppig, o iitta danab nug mauhe, wau qab ma daatte ele amu, nug amu ehanatta, uug ahilag maokku. Keeke laa ele, nug nuhig oiyak, dayak elenu dabmak awa, nug wanppan kobol, nug oo dubuttid mettamanu, amu ele nug dabma auta aokku.