Ikki Danab 9 - Nobonob Baibel

Abimelek Sekem gumom

¹ Deɗ laa Sekem appa Jerubal, ⌊am Gideon⌋, nug bekka Abimelek nug awikkud anadkkunu ukkom. Nug ukka, awikkud amu, aria nug anig baekkudppa laa oh ele amelagppa aum.

² “Ag Sekem danab ah inam oɗ mattan doyeg! ‘Ag Jerubal, ⌊am Gideon,⌋ ag nug bekkod 70, amu oh ag gumadkkulagnu oolag daattete, o iitta, danab laippuib nug ag gumadkkute?’ Doyeg! Da ag tiilagnab!” awa aum.

³ Anam aum amunu, Abimelek awikkud ag Sekem danab ah oh amelagppa anana, ag Abimelek bitob daaglagnu oɗ madappig. Oɗ mattaeg, Sekem danab ah ag Abimelek awikkud mattieg doona, ag Abimelek nug ag gumadkkunu appig. “Nug ig awanig amanig laa,” aon appig amunu, ag anam dabmeppig.

⁴ Ag Abimelek ahilag gumak danab daakkunu maittona, ag 800 gram silwa Balberit laugppanu aon medappig. Mettaeg, nug silwa amu danab ag aɗi uug bekku am ii dabmeppig, keeke hakib heppig amu, nug ag nug ehanidkkulagnu matte, ag nug dim lamidppig.

⁵ Danab ag nug dim lamidppig amu, nug ag diie gona, Opra, nug mameg Jerubal, ⌊am Gideon,⌋ ag nug laugppa noppig. Ag gona tena, ag ⌊Abimelek awakkud amakkud oolagppan laa nug aha, Abimelek qeeb mauheb, nug king bemanu⌋ ag Abimelek amakkud, awakkud 70 oh, ag nug ele mamelag laippu, amge halab laippu iitta amu, ag ag ohnab diin gona, men naɗi laa daatteppa tena, appa aqappig. Nug amag nakok, Jotam aakkuib ii qeppig. Aɗinu? Nug am oola ukka lokkumom.

⁶ Ag anam heeg, Sekem, Betmilo danab ah ele ag Sekem appa, ad ok waappa, biidod laa heqoppa qagmena heeg, Abimelek ahilag gumak danab daakkunu king haɗ nug igippa mekkulagnu qagmeppig.

Jotam nug nai dottogppa ippunittak nai mattiom

⁷ Jotam nug ag amu heppig, nug amunu doyowa amu, nug qauko Gerisim igippa ta, ewa aum. “Sekem danab ah, Kayak Nug ahilag unuqittak dookkunu amu ag dahil nai doyeg!

⁸ Deɗ laa, ad ag laa, nug ahilag king daakkunu nug goɗen gokkaɗakppa tituankkulagnu dabmeppig. Ag anam dabmena, ag tatam olip ad amegppa appig. ‘Na ihinig king daye!’ aon appig.

⁹ Ag anam appig, amge nug uua aum. ‘Da eppelad ulah diieb, ad laa attan wana dona, wana dokkulagnu da meul, danab ah ag amuppa goɗen aonna, ag Kayak binag menana, danab ah ele ehanadtteb, da meu amu okkulnu uuen, hamu anam daakkul am enate? Iitta! Amunu da anam king daakkulnu ii hepa,’ awa aum.

¹⁰ Olip ad nug anam a amu, ag ad fig amegppa appig. ‘Na uɗin, ihinig king daye!’ aon appig.

¹¹ Appig amge, ad fig nug ele uua aum. ‘Da eppelad ulah diieb, ad laa attan wana dona, wana dokkulagnu da meul, am ena, ubuhi ele, da meu amu okkulnu uuen, hamu anam daakkul am enate? Iitta! Amunu da anam king daakkulnu ii hepa,’ awa aum.

¹² Ad fig nug anam a amu, ag muɗi grep amegppa appig. ‘Na uɗin, ihinig king daye!’ aon appig.

¹³ Appig amge, muɗi grep nug ele uua aum. ‘Da eppelad ulah diieb, ad laa attan wana ona, wana dokkulagnu da meul, danab ag amunu leppu, wain atteb amu, ag amu ahilkad kayak toppa gokkaɗadtteg, gamalag ahatte, danab ah ag ele lanana, gamalag ahatte amu, da meu amu okkulnu uuen, hamu anam daakkul am enate? Iitta! Amunu da anam king daakkulnu ii hepa,’ awa aum.

¹⁴ Ag anam aegeg ukke ukke, ad oh ag eɗun aon, ad nakok qaun ele amegppa appig. ‘Na uɗin, ihinig king daye!’ appig.

¹⁵ Ag aeg amu, ad nakok qaun ele laa amu, nug aum. ‘Ag oolag genab eleppa da ahilag king daakkulnu goɗen gokkaɗakppa tituaniɗkkulagnu hetteb dayeb amu, ag dona, da waalppa aben aon, ena dayeg! Amge ag hambuppuna, da waalppa daaglagnu hetteb dayeb amu, da aab dahilppanu aha ukka, ad sida okkai Lebanon daatteb oh ewadkkunu ool daatte,’ ” awa aum. Jotam nug nai dottogppa nai amu amelagppa mattiom.

^16-19 Jotam nug anam mattiowa, nug tuɗitta aum. “Da mamel Jerubal, ⌊am Gideon,⌋ nug ahilagnu ha, ag ehanatta, nug ban haaha, nauhak aokkunu dayom, amge diig amunu nug ban hak ii uua, nug ag Midian eppelagppanu eɗua diiom. Nug amu heum, amge gemu ag nug baekkudppa banelag gona, nug bekkod 70 amu oh men laippu laa qaɗeppa aqaeg mauhppig. Ag anam hewona, ag Abimelek nug ahilag king daakkunu aon qabappig. Nug am da mamel wau amge waunab iitta, nuhig begbeg maɗi ah, nug nug bekka aakkuib, amge nug am ag ele tiilag laippu amunu, ag nug aon, Sekemnu king meppig. Ag amu heppig amu, amuppa ag Jerubal, ⌊am Gideon,⌋ ag nug amu nug baekkudppa dilagnu ele elele elele heppigte? Ag nuhignu helob bia heppigte? Ag genab hak kobol dim lamidna heppigte? Ag danab kobol eleleib haknu tiigppa daye hette ele, ag kobol amu heppigte? Ag amu ohppa elele heppig dayeb amu, ag Abimelek ele oh, ag oolag gamag ahakkunu ool daatte.

²⁰ Amge ag Gideon, baekkudppa ele dilagppa eheɗ heppig dayeb amu, Abimelek, nuhigppanu, aab ewak ukkeb, ag Sekem, Bet Milo ele danab ewatteb, ahilagppanu ele, aab ewak nuhigppa ukkeb, anam bekkunu Kayak unuqidttem,” awa aum.

²¹ Jotam nug anam awowa, nug awag Abimeleknu baɗa, oola ukka, Ber appa dayom.

Sekem ag Abimeleknu ena ii dooppig

²² Abimelek nug Israel maɗ ewam gume amu,

²³ Kayak Nug ouɗi laa, hak eheɗ ele uuitte, nug he, Abimelek, Sekem danab ah ele gamalagppa oo aeg bak be, Sekem danab ah ag Abimelek waappa daaglagnu uun, nuhig nai tappaeg neum.

²⁴ Abimelek, Sekem danab ele ag eheɗ hena, ag Jerubal, ⌊am Gideon,⌋ ag nug bekkod 70 oh aqappig. Ag amu hena, ag genab nob aoglagnu daappig amunu, ag nob nau amu aoglagnu Kayak Nug uuatte, Sekem danab ag Abimelek waappa daaglagnu uun, nuhig nai tappaeg neum.

²⁵ Sekem danab ah ag meitta dayak aben Abimeleknu qauko nakok ikkilkadppa heppig. Ag amu hena daaegeg, ag danab ah ag ib amuppa goppig ele, ag ahilag keeke yab aɗualadppig, amge laa nug Abimelek amegppa amunu aum.

²⁶ Haen amuppa, Ebet bekka Gal, nug awakkud amakkud ele ag Sekem ukkaeg, Sekem danab ah ag ahilagnu oolagppa genab dooppig.

²⁷ Amu Sekem appa ag maɗ maɗppa ee meu awaknu hobul hedappig, amu gemu haen imuppa, danab ah ag oh grep meu dattanu aon, wain hena, ag kayak appanu laugppa qagmak gamag ahak ele hena, ag ee, le ele lanan daanna, ag digmena, Abimelek nug eheɗ laa awaknu anak waappa daakkunu appig.

²⁸ Ag anam heeg amu, Ebet bekka Gal nug aha aum. “Abimelek am aun? Amu ig Sekem danab ah ele, ig am aun ⌊buɗub? Abimelek nug am Sekem tiilagnab iitta!⌋ Ig aɗinu Abimeleknu maɗi nid daagnig? Nug am Jerubal, ⌊am Gideon,⌋ nug bekka, amu Sebul am nuhig ehanittak danab. Ig ⌊Sekem dilag okkai anukkanu⌋ Hamor, ⌊ig nug buɗubib⌋ waappa daagnig. Ig aɗinu Abimelek waappa daagnig?

²⁹ Da danab ah imu dilag mandoɗ danab daalomlob amu, da heppi, Abimelek ii daalo. Da nuhignu alom. ‘Na ban daup laa ele diin uɗin ban he!’ awe alom,” awa aum.

³⁰ Gal anam aum, amge haen Sebul, aab okkai amunu gawana, nug Ebet bekka Gal nai mattiom amu doya, nug oo huana nauhom.

³¹ Nug oo huana nauhe, nug lokkumakppa nai awa ukkak danab maatte, Aruma appa, Abimelek gumidna gona appig. “Gal, Ebet bekka, nug awakkud amakkud ele ag Sekem appa uɗippig daanna, gemu ag heegeg, aab okkai imuppan danab ah ag na waatppa daaglagnu uun, ag nahip nai tabappeg nokkunu hetteb.

³² Ag anam aakku hettebde amunu, na nahip daup ele ag tuqanppaib uɗin, aab dimittim, dad okkaippa lokkumna aben aon dayeg!

³³ Buttua, aam beebeb amu, na banelag ahan, aab okkai imuppan danab ah ele ban hekkulagnu uɗikkut. Amu haen Gal nug laikkud ele ag ban hekkulagnu dimittim doppeg amu, na ahilagppa attem hekkutnu anidkkut amu, na hekkut,” awa aum.

³⁴ Sebul nug nai anam me ukke, Abimelek nuhig danab ele ag tuqanib gona, oppatna, ameg waɗele bena gona, Sekem guguittak aben waɗeleppa lokkumna daappig.

³⁵ Daaeg, wakkaɗe amu, Ebet bekka Gal nug aab okkainu aɗ odppa ukka, hibaitta dayeye, Abimelek nug nuhig daup ele ag miagib tulan teppig.

³⁶ Haen Gal nug ag anatta amu, nug Sebul amegppa aum. “Neegppe ukkeb antte! Danab laa ag qauko igippan netteb,” awa aum. Nug anam a, Sebul nug oɗeppa awa aum. “Iitta. Umuam qauko itotolag danab itotolag bia anadttem,” awa aum.

³⁷ Sebul nug anam aum, amge Gal nug baula aum. “Iitta. Danab ag qaukoppan netteb. Ag anam neegeg, amu ameg laa ele ag ib man, ad ok onig Eman Hak Danab Dilag Ok, ag ad amu guguittakppanu netteb,” awa aum.

³⁸ Gal nug anam a amu, Sebul nug eɗua awa, amegppa aum. “Tumai na nai okkai okkai, hamu hamu mattime amu, gemu nai amunu am attemun? Am laa nug, ‘Abimelek am aun? Ig nug waappa daat, nuhig maɗi nid daagnignu am ena iitta amunu, ig anam aib daamut,’ aum, am na iittate? Danab na ag aon aon aqame ele amu, ag aab okkai dimittim aakku daatteb! Na dimittim goppe, ag ele nug qeig!” awa aum.

³⁹ Sebul nug Gal amegppa anam a, Gal nug Sekem danab diie, ag noeg, Abimelek ele nug qeppig,

⁴⁰ amge Abimelek nug ag eɗatte, Gal nug oola, Sekem aab ooppa noum. No amu, Abimelek, nuhikkud danab ele ag Sekem danab kuɗumnab aqaeg mauhna, wanppa niiegeg ukka, aabnu aɗ odppa waum.

⁴¹ Anam be amu, Abimelek nug eɗua, Aruma dayeye ukke, Sebul nug Gal, nug awakkud amakkud ele Sekemnu lamatte goppig.

⁴² Lamatte ukke, wagɗe deɗ amuppa danab ag aab dimittim, dad okkaippa goppig. ⌊Amge ag ii goppig haenppa, ag gokkulagnu daaegeg amu,⌋ Abimelek nug amu doya,

⁴³ nug danab nuhig ameg ewam obate daaeg, ban hekkulagnu gona, ag danab dadppa maadna, lokkumna daappig. Abimelek nug nuhikkud danab ele ag anam daanna, ag danab aab okkaippan doeg anadna, ag banelag ahan, laippun lokkumna daappigppanu tulan dona, aqaglagnu ban heppig.

⁴⁴ Abimelek obatak oh ag ban hena, Abimeleknu huu aɗit laa ag datta ban hena aqaegeg amu, Abimelek nug nuhig huu ele ag pahanab aab okkainu aɗ odppa gona, Sekem danab ag eɗun, aab ooppa nomananu ataɗguadppig.

⁴⁵ Ag ban heegeg ukke ukke, Abimelek nug aab amu akku awom. Nug danab ah aqa, aab okkai amu loppaɗe ne, yu kalu aben ohppa tauɗe ukke, wan tonom.

⁴⁶ Amu danab ag aab Sekem aɗ ɠagattagnab elenu ikki danab, ag Sekem aabppanab aɗi beum amu doona, ag kayak hambuppuak onig Balberitnu mettid lagppa, oo ɠagattag lag heɗkkud dayom amu, ag amuppa ena daaglagnu noppig.

⁴⁷ Ag appa nona daaegeg, laa nug ag lag oo ɠagattag amu ooppa nona daattebnu Abimelek amegppa aum

⁴⁸ amunu, nug danab nuhikkud oh diie, ag qauko Salmon teppig. Nug hebeb awa, ad eppekkud laa okkulatta, nug gukkappa maattowa, nuhikkud danab amelagppa aum. “Ag pahanab da hemi bia heig!” awa aum.

⁴⁹ Nug aum amunu, anen anen ag Abimelek heum bia, ag ad eppeg okkuladppig. Ag ad eppeg okkulattona, ag mawadna, kayak hambuppuak onig Balberitnu mettid lakka gona, ag ad eppeg amu oo ɠagattag lag heɗkkud dayom amu, ag oo amu attan mena, amoteg lag ewa, danab ah ooppa daappig amu oh ele ewattom. Amunu danab 1,000 anam oh, ag aab Sekem aɗ ɠagattagnab ele appa daappig amu, ag mauhppig.

⁵⁰ Nug amu ha malowa, Abimelek nug banelag ukka, ban ha, nug he, nug nuhikkud daup ele ag Tebes aab oo mattan aqaknu maadna daan, nug aab amu awom.

⁵¹ Amge appa amu, lag attan ta ukkak menppa hak laa dayom amunu, aab okkai amuppan danab ah oh ag amu ooppa noppig. Ag od oh amu ulah awaknu od ele oh manattona, ag lag amu koɗokkoppa attannab, aguppa tena daappig.

⁵² Abimelek nug ag dim lamatta ukka, nug lag attan ta ukkak menppa hak amu heeb nauhkkunu dabmak aɗa dayom. Amge nug od oɗeppa amoteb eokkunu ukka babaittette,

⁵³ ah laa koɗokkoppanu, nug ee aeg ganuɗaknu men okkai laa buɗie noa, Abimelek igippanab qe, ikki aoɗom.

⁵⁴ Nug ikki aoɗe, aakku nug danab nug nuhig bannu keeke mawom ele, nug danab amu amegppa aum. “Nahip qep elab eeɗna aon, da duul o! Na da duul ii okkut amu, danab ag, ‘Ah laa Abimelek qe mauhom,’ akkulag! Da ag anam akkulagnu, da ool iinab daatte!” awa aum. Nug anam aum amunu, danab bau amu nug nuhig qep elabppa ye mauhom.

⁵⁵ Abimelek mauhe amu, haen Israel danab ag nug mauhom anidna amu, ag qatin, laulkad piɗe piɗe gona daappig.

⁵⁶ Anam be, amu ib amuppa Kayak Nug Abimelek, Nug nau hak nuhignu bu mettom. Abimelek nug mamegnu eheɗ ha, nug awakkud amakkud 70 amu aqe mauhppig amunu, nug bu aokkunu daye, Kayak he, aakku bu nau awom.

⁵⁷ Kayak Nug Sekem danab ele, ahilag hak naunu bu mattom. Amunu eheɗ laa awaknu anak waappa dayaknu nai, Jotam, Jerubal, ⌊am Gideon⌋ bekka aum amu, ahilagppa, am genab meu oum.