Ikki Danab 8 - Nobonob Baibel

Gideon nug Seba, Salmuna ele aqatom

¹ Aria, Epraim danab ag Gideon oɗ medappig. “Na aɗinu ig inam heigme? Na aɗinu, haen tatam na Midian ele ban hekkutnu gome amu, ig na ehanidkkunignu na ii ae doomut?” oɗ mettan appig. Ag anam oɗ mettan, ag Gideonnu nai hak okkai heppig.

² Ag anam appig, amge Gideon nug nob ma aum. “Dahil hak, am ag Epraim, ahilag hak bia iitta. Ahilag hak am ɠagattag, dahil am anambia iitta. Aɗi keeke ag heppig am, hak amuam ig Abieser buɗub, ig hak aɗi hemut eɗitta malom.

³ Kayak Nug ag Orep, Sep ele, aa Midian dilag ban daup ikki aɗit amu, Nug aa ag eppelagppa meum. Amu antteg! Ag keeke okkainab heppig. Da am keeke okkai laa iinab hemi,” awa aum. Gideon nug anam a amu, Epraim danab ag Gideonnu nob mak amu doona, ag baula oolag aeg ii beum.

⁴ ⌊Amge amu ii nak haenppa,⌋ Gideon nug nuhig danab 300 ele Jodan le mataɗppig; ag beɗulag maidadaɗa auta awom, me ag le amu mataɗna, tuɗidna ban danab amu lamadppig.

⁵ Ag lamadna gona, ag Sukot tena, Gideon nug aab amunu danab oɗ mattom. “Na oot da meɗan, dahil ban danab imu ee laa madakkut elelete? Aɗinu? Ag maidadaɗna autna autnanab aoppig, amge da Midian dilag king, Seba, Salmuna ele aɗualatkkulnu lamate uɗien, tuɗidib hekkul,” awa oɗ mattom.

⁶ Gideon anam aum, amge Sukot dilag anuqak danab ag nob mena appig. “Na Seba, Salmuna ele ii aɗualatme amunu, aɗinu ig nahip ban danab ee mattagnig?” aon appig.

⁷ Ag anam aeg amu, Gideon nug aum. “Ag anam ana malappig amunu, Yawe Nug heeb, Seba, Salmuna ele aa da eppelppa daaglah, amu dimppa da atu taɗakppanu uud keeke qaun ele awe uɗie, beɗulah mataɗkkul,” awa aum.

⁸ Gideon nug anam awowa, nug ukka, Peniel danab eenu oɗ mattom, amge Gideon nug nai nob anamib awom.

⁹ Awa amu, nug Peniel danab amelagppa aum. “Da laa eɗatoya, da eɗue uɗie, da lag attan ta ukkak menppa hak imu loppaɗppi nekku,” awa aum.

¹⁰ Haen amuppa amu Seba, Salmuna ele aa, ahilti ban danab 15,000 ele ag aab Karkor daappig. Ag, aria ban danab kaɗag uɗitteppanu, ag aakkuib appa bau daappig. Laa oh mauhadna malappig. Israel danab ag ban danab 120,000 am aqappig.

¹¹ Ag appa daappig, amge Gideon nug nuhikkud daup ele ag tutukku Karkor ii goppig. Iitta. Ag Noba gona, Jogbeha tena, amu Karkor teppig. Amuam ib laa danab ag keeke aon gona, wan laappa dadennu meeg, daden metteb ele, ag ippulag. Amu Gideon aɗi ele ag anamppa gona teeg, Midian dilag daup appa daappig, ag uug laa bekkunu dab-ii-mena daaegeg, Gideon aɗi ag appa banelag teppig amunu, ag eheɗ ottaippig.

¹² Gideon aɗi ag appa banelag tena, ban heegeg, Midian dilag king aɗit, Seba, Salmuna ele aa oolya gopiɗ, amge Gideon nug aa lamata aɗualata he, ban danab laa ag aakku oolppig.

¹³ Gideon, Joas bekka, nug Midian ele ban hewona, nug eɗua Israel gokkunu amu, nug ukka, qauko ikki oppoɗu noak onig Heres, appa wana ukkom.

¹⁴ Nug qauko oppoɗu noak amu wana ugakka, nug danab bau laa Sukot ted aɗa, nug danab amu nakok ii daye daye oɗmak haaha, nug he, amu nug aab amuppan anuqak danab 77, ag aab amuppan ikki danab, nug ag onilag ya mettom.

¹⁵ Gideon nug aakku Sukot ikki danab onilag awa, nug Sukot ukka, ikki danab amu amelagppa aum “Seba, Salmuna ele iikku. Haen tatam ig ippa uɗiut, ag da aon aon iun, imiɗnan appig. ‘Na Seba, Salmuna ele ii aɗualatme amunu, aɗinu ig na nahip ban danab maidadaɗna autna aoppig ele amu ee mattagnig?’ aon appig,” awa aum.

¹⁶ Nug anam awowa, nug Sukot ikki danab ag eheɗ heppignu, butti aɗi baula hemananu uud keeke qaun ele atu taɗakppanu awom amu, nug amuppa mataɗatta, bu mattom.

¹⁷ Nug anam hewowa, Peniel ukka, ahilag lag attan ta ukkak menppa hak amu loppaɗe ne, danab aab amuppan am aqom.

¹⁸ Gideon anam hewowa, nug Seba, Salmuna ele oɗ matom. “Danab aa Tabor appa aqapiɗ amu, ag am danab attemu bia?” oɗ matom. Anam oɗ mate, aa nob meya apiɗ. “Ag am na bia. Neekkakppa ag oh am king bekkod bia daappig,” aoya apiɗ.

¹⁹ Aa anam aeh, amu Gideon nug aum. “Ag am da awalad, amalad ele! Da anil ag menuattom! Am genab, Yawe bauklel daatte, genab amubia, ag dahilad amu ii aqadlop amu, da aa ii aqatlom,” awa aum.

²⁰ Nug anam awowa, nug eɗua awa, bekka tatamnu Jeter amegppa aum. “Imu aqate,” awa aum. Aum amge, Jeter nug nuhig qep elabppa aa duulti ii oum. Aɗinu? Nug am nid bau amunu, nug amu haknu baɗom.

²¹ Jeter anam he, akku Seba, Salmuna ele aa Gideon amegppa apiɗ. “Na nakka i duulti o! Na aib danab okkai dilag uɗat amu nid bau hekkunu ame,” aoya apiɗ. Anam apiɗ amunu, Gideon nug aa oh aqata, aa king daapiɗnu bala, ahilti kamel baagppa dayom amu, nug bala amu hiɗa awom.

Gideon lamen enanag-epod laa heum

²² Gideon nug keeke amu oh ha male, Israel danab ag amegppa appig. “Na ig ehanigna, Midian danab eppelagppan eɗun awigme amunu, na ihinig gumak danab daakkut! Na, na bekkat, na alan danab, ag oh geha ihinig gumitta danab daaglag,” aon appig.

²³ Ag anam aeg, Gideon nug nob ma aum. “Da ag ii gumadpa, da bekkal ele iitta. Yawe Nug ag gumadkku!

²⁴ Da ag ii gumadpa, amge da keeke laippunu laa ool daye, da amunu ag oɗ madattem. Ag anen anen oh ag, da daulagppan bid, ag ban henan, kekeɗ eɗadna, ahilagppanu diippig, ag amu meɗaglagnu oɗ madattem,” amelagppa aum. Aɗinu nug anam aum? Ahilag kekeɗ amu Ismael danab amunu, ag ahilag kobolppa ag daulagppan bid golppa hak daulagppa meppig.

²⁵ Amu Gideon nug anam ag amelagppa a, ag appig. “Ig anam hekkunignu oonig gamag ahatte!” aon appig. Ag awona, ag lamen laa wanppa duqona, danab anen anen ag Midian dilagppan daulagppan bid aoppig amu, ag anen anen amuppanu laippu akkaeg, lamen qaɗeppa noum.

²⁶ Ag daulagppan bid oh akkaeg, lamenppa no amu, ag gol bid amu oh, uug nuhig gane amu anidkkulagnu skelppa meppig. Ag meeg amu, keeke amunu uug am 19.5 kilogram dayom. Gideon nug amu awom, amge amuib iitta. Nug ele Midian dilag king aɗit dilahppan keeke awom; amuam king dilah bala laa keeke men perl, o golppa hak, kalele golppa hak, lamen perpel, aria ahilah kamel baalagppan kalele golppa hak ele.

²⁷ Amu Gideon nug amu oh awa, nug gol amuppa nug lamen enanag-epod laa ha, bala metta, nug amu nug appag Opra, appa meum. Amge haen elab iitta, Israel ag Kayak ag Nug noobppa dup nona binag mekkulagnu ib ippuanattom dimettanna, ag lamen enanag-epod amu noobppa dup nona binag meppig. Keeke amuam Gideon, amu nuhigppan ele, ahilagppa pelem nau laa dayom.

²⁸ Israel ag attemnab Midian danab eɗadppig, Midian danab ag baula eɗun ɠagattag ii daappignu kaya anam aakku. Gideon nug bau dayaya, haen amuppa Israel danab ah ag maɗ 40 wan ahilagppa maɗoɗ daappig.

Gideon nug Midian eɗattowa dayomnu kaya

²⁹ Aria, Gideon, onig laa Jerubal, Joas bekka, nug anam hewowa, nug eɗua, appagppa daakkunu ukkom.

³⁰ Nug am wauud kuɗumnab amunu, nug bekkod 70 ele.

³¹ Amu nug wau amge waunab iitta Sekem dayom amu, nug nuhig nid danab onig Abimelek menuom.

³² Anam daye ukke, Gideon nug kainonab ma mauhe, nug gaɗa amu Opra, Abieser buɗub dilag wanppa, mameg Joasnu men oɗeppa, appa boumppig.

³³ Gideon nug mauhe amu, Israel ag pahanab Kayak uuidna, ag kayak hambuppuak Bal iɗu iɗu noolagppa dup nona binalag meppig. Ag Balberitnu, ag nug am ahilag kayak appig.

³⁴ Ag Yawe, ahilag Kayak, ag Nug ag ehanatta, ahilkad kekeɗ ag taliliattak daappig ele eppelagppanu diiom amu, ag nuhignu daulag atiom.

³⁵ Ag Yawe daulag atie, ag danab nug onig laa am Jerubal, am Gideon, Nug keeke kuɗum Israel danab ah dilagnu heum, amge ag nug baekkudppa ele dilagnu oo bodoettak doon, ag ii ehanadppig.