Ikki Danab 7 - Nobonob Baibel

Kayaknu ehanittakppa, nuhig ɠagattagppa ele Gideon Midian eɗattom

¹ Kayak Nug Gideon anam ehanittom amunu, Gideon, onig laa am Jerubal amu, nug, nuhikkud ban daup ele ag buttua ahan, le qeppuɗia bak onig Harot appa gona, ag haen tutu dayaknu aab appa kalappig. Midian dilag daup ag ahilag haen tutu dayaknu aab amu, Harot leppanu laih yawalti uɗitteppanu kalappig. Ag am oolnu noakppa, qauko nakok onig More guguittak, appa ahilag haen tutu dayaknu aab kalappig.

² Israel dilag ban daup, Gideon ele ag Harot leppa haen tutu dayaknu aab kalaeg amu, Yawe Nug Gideon amegppa aum. “Na am ban danab kuɗumnab ele. Da ag oh daaglagnu paɗatten ehanadppi, ag oh Midian ele ban hekkulag dayeb amu, Israel ag dada hena, ag akka ahilag ɠagattagppa eɗadmut akkulag.

³ Anam amunu, ag anam amananu, na nahip ban danab inam appe doyeg! ‘Aun laa nug baɗe, beɗu hahaɗtte, nug eɗua aha, aabppa ukkaɗ!’ Na anam appe doyeg!” awa aum. Yawe Nug anam Gideon amegppa a, Gideon nug ban danab amelagppa a, 22,000 danab ag eɗun aabppa goppig. Ukkaegeg, ban hekkulagnu amu, danab 10,000 aakkuib daappig.

⁴ Am 10,000 aakkuib daappig, amge Yawe Nug Gideon amegppa aum. “Amu ele am kuɗumnab daatteb. Na diin, leppa noppe, da ana heppi, aun aɗi ag na ele gona, ban hekkulag, aun aɗi ag eɗun aabppa gokkulag amu, na dookkut. Da laanu, ‘Danab imu nug na ele gokkulah,’ appi amu, nug gokku. Amge da laanu, ‘Umuam na ele ii gomaya,’ appi amu, nug ii goma,” awa aum.

⁵ Yawe Nug Gideon anam hekkunu a, nug nuhig ban danab diia, leppa no, Yawe Nug amegppa aum. “Heppe, danab ag oh le lappeg, amu na heppe ameg aɗit dayeg! Ameg laa amu oh eppelag oo gottu yaappeg, le noob, qai bia lemaɗulagppa itan lakkulag ele amu, na ag ameg laappa maatte! Ameg laa amu, ag gatelag qaun ona, le lakkulag ele amu, na amuppa piɗe maatte!” awa aum.

⁶ Gideon nug anam he, danab 300 aakkuib ag eppelagppan le lappig; laa oh amu, ag gatelag qaun ona daanna, le oɗelagppa lappig.

⁷ Anam daye amu, Yawe Nug Gideon amegppa aum. “Laa oh maadppe, ag eɗun aabppa ukkeg! Da geha ehanidppi, danab 300 imu, na ele ag Midian danab eɗadna, Israel danab ah ag eppelagppan diiglag,” awa aum.

⁸ Yawe Nug anam hekkunu amegppa aum amunu, Gideon nug danab eɗun gokkulag ele, amu ee, keeke laala, amu ahilag trampet ahilagppanu akkowa, nug danab amu maatte, ag eɗun aabppa goppig. Amge danab 300 amu nug aɗualatte daappig. Midian ag ahilag haen tutu dayaknu aab kalak amuam Gideon dayomppanu oolnu noak ooppa dayom.

⁹ Aria, tuqan amuppa, Yawe Nug Gideon amegppa aum. “Da geha Midian danab ag eppelagppa mekkul amunu, ag ahan, Midian ban danab aqaknu banelag noig!

¹⁰ Amge na banelag nona aqaknu baɗattem dayeb amu, na nahip maɗi nid Pura ele lokkumakppa haen tutu dayaknu aab kalakppa noya,

¹¹ Midian danab ag aɗi atteb amu Gideon, na doon, ag aɗi atteb amu, na amuppa ag banelag gona, ban hekkulagnu ɠagattag aokkut,” awa aum. Yawe Nug anam aum amunu, Gideon nug Pura awe, aa noya, haen tutu dayaknu aab kalaknu aab beeppa daapiɗ.

¹² Am ban daup Midiannu, Amaleknu, amu kaɗag uɗitteppanu danab ele, ag tap-lokus bia happutna, oolnu noakppa aben aon daappig. Ahilkad kamel ebaqaknu am kuɗumnab, yu ihippa ihi bia daappig; laa ebaqadkkunu elele iitta.

¹³ Gideon nug Pura ele noya, aa danab laa nug tul laa niiomnu layag amegppa mattieye, haen amuppanab aa noya, Gideon nug oqotti iitta, lokkumakppaib, danab aɗit daapiɗ, amu gukkuata waum. Danab amu nug aum. “Da tul laa niimi, tul niiak dahilppa amu, bali bret kunum laa noobppa ya ukka, bitobppa ya, anamib uɗia, Midiannu haen tutu dayaknu aab kalakppa neene anidmi. Amu na, peh lag laa wa, hababaɗitta, loppaɗe na, aakku niiom,” awa aum.

¹⁴ Danab amu nug anam a, layag nug aum. “Tul niimenu meu am, Kayak heeb, Joas bekka Gideon, Israel ted, nug Midian eɗatteb, ban danab ippanu oh, ag Midian ehanadtteb ele amu, nug ag oh eɗadkku!” awa aum.

¹⁵ Haen Gideon nug tul niiak nai amu, mehuqak nuhig ele doya amu, nug Kayak noobppa dup noa binag meum. Aakku nug eɗua, Israel dilag haen tutu dayaknu aab kalakppa ukka, ewa aum. “Aheg! Yawe Nug heeb, ag Midian danab eɗadkkulag!” awa eum

¹⁶ Nug amu ha malowa, nug 300 danab amu obate, ameg ewam daaeg, nug danab anen anen trampet matta, wan hinai, ooppa aɗitai laa iitta, amahlaknu hul amotak ele aakkuib dayeye, nug amu ele ag mattom.

¹⁷ Mattowa, nug ag amelagppa aum. “Ag dahilnuib neekkeg! Haen da haen tutu dayaknu aab kalak beeppa noppi aniɗna amu, ag da aɗi hettem, ag amuib anamnab heig!

¹⁸ Amu haen da, dahil huu ele, ig trampet iwaladpput amu, laa ag haen tutu dayaknu aab kalak heqo laih laih daaglag, ag ele trampet ahilag iwaladnan, muttub qena, ag inam eig! ‘Ig Yawe, Gideon ele dilah ban hetu!’ aon eig!” awa aum.

¹⁹ Am tu ma male, haen nakoknabib laa ukke, danab tatam neegna daappig amu, ahilag haen iitta me, laa hekkulagnu uɗin digmen daappig, haen amuppa Gideon, amu 100 danab nug ele goppig, ag Midian dilag haen tutu dayaknu aab kalak beeppa teppig. Tena, ag trampet iwaladnan, wan hinai aoɗadppig.

²⁰ Aakku huu ewam amu oh ag trampet ahilkad amu iwaladnan, ag wan hinai aoɗadna malappig. Ag hul amahlaknab ele am eppelag nanehppa aɗualadnan, trampet ahilkad iwalkkulagnu amu eppelag naɗiap-ppa aɗualadnan, muttub qenan eppig. “Ahappeg! Ig qep elab aɗat, Yawe, Gideon ele dilah ban hetu!” aon eppig.

²¹ Danab anen anen ag haen tutu dayaknu aab kalak talilidna, aben aon hippaidna daaegeg, Midian danab ag baɗan enana, oolna goppig.

²² Haen 300 Israel danab ag ahilkad trampet iwaleg amu, Yawe he, ban danab haen tutu dayaknu aab kalak ooppan, ag akka akka qep elabppa nug qeppig. Laa ag ii aqappig ele amu, ag oolna goppig. Ag oolna, Betsita, Serera guguittak appa goppig. Appanu amu, ag Abel Mehola tomppa goppig. Abel Mehola amu Tabat guguittak daatte.

²³ Aakku Gideon nug Naptali, Aser, Manase ele ban danab dilag nai me ukke uɗin, ouaqaeg ele, ag Midian danab lamadppig.

²⁴ Amu Gideon nug nai me, Epraim wanppa, qauko qauko daattebppa ele ukkom. Nug aum. “Ag banelag nena, Midian danab aqaglagnu ban ukkeg! Nena gona, Jodan le baag qakppa, danab ag mataɗna Betbara gotteb, appa daanna heppeg, Midian ag aibnab mataɗna goppig!” Nug nai anam me ukke, Epraim danab ag nug aum bia heppig.

²⁵ Epraim danab ag anam hena, ag Midian dilag ban daup ikki aɗit, Orep, Sep ele aɗulatppig. Ag Orep amu men onig Orep, appa qeppig, Sep amu, ag grep meu tappa leppu awaknu aben onig Sep, appa qeppig. Ag amu hena, ag tuɗidna, Midian danab lamadna goppig. Dimppa amu, Israel danab ag Orep, Sep ele ikkilti diiatna, Gideon, nug Jodan appa dayeye, ag nug gumidna gona medappig.