Ikki Danab 6 - Nobonob Baibel

Gideon Israel dilag epeɗiak danab beum

¹ Israel danab ah ag anam daaeg ukke, ag baula Yawenu neekkakppa eheɗ heppig amunu, Yawe Nug ag diia, Midian eppelagppa maatte, ag maɗ eblaih aɗit ele anam daappig.

² Midian ag ɠagattag daan, ag Israel eheɗnab hattegeg, Israel ag oolna, qaukoppa goppig. Qaukoppa amu, ag daaglagnu aben teɗ bia bappaidna, wan, o men oɗe ele bappaidna, ag ele ban haknu aben ɠagattag ele bappaidna, aguppa daappig.

³ Israel ag ahilkad keh keeke maɗ maɗppa eppalatteg, eheɗ hak danab Midiannu, Amaleknu, amu danab kaɗag uɗitteppanu ele ag Israel danab ah banelag uɗippig.

⁴ Ag haen tutu dayaknu aab wan amuppa kaladna, ag keh keeke, heeg nauha ukka, Gasa waum. Ag heeg, Israel ag aɗitai laa lakkulagnu iitta daappig. Ag ahilkad sipsip, makau, amu donki keeke, ag amu oh diippig.

⁵ Aɗinu? Kekeɗ amu ag ahilkad doɗ ele uɗin, peh buualadppig, ag am huanaknab amunu, danab dilag neekkakppa amu, wan qaɗeppa tap-lokus kuɗumnab daatteb bia daappig. Danab amu, ahilkad kamel ele am ebqaknu elele iitta. Ag Israel dilagppan keeke oh aoglagnu uɗippig.

⁶ Midian ag anam heppig amunu, diig amunu Israel danab ah ag keeke iitta ele. Israel ag anam aakku daan, ag Yawe ehanadkkunu gaappig.

⁷ Midian danab ag anam heppig, diig amunu Israel ag Yawenu gaappig, haen amuppa,

⁸ Yawe Nug propet laa Israel dilagppa me ukka, nug aum. “Yawe, Israel dilag Kayak, Nug inam atte. ‘Da ag begbeg maɗi nid daaegeg, Isipnu diie, omalatti uuppig.

⁹ Da hei, ag Isip eppelagppa ii daan, ag danab oh ag eheɗ hadappig ele, ag ag eppelagppa ele ii daappig. Da hei, ag Israel, ag wan imuppan danab lamatteg, da ahilag wan ag mattami.

¹⁰ Da ag amelagppa ami. “Da am Yawe, ahilag Kayak. Ag Amo danab, gemu ag ahilag wanppa daatteb ele amu, ag amu dilag kayak noolagppa dup noa binag mak kobol ii hekkulagoitte,” ami, amge ag da ii dooiɗppig.’ ” Propet nug Kayak nai amu, danab ah amelagppa aum.

¹¹ Yawe Nug propet oɗeppa Israel danab ah anam amelagppa ana male, Kayaknu engel nug na, Opra aabppa ad ok waappa heɗep na dayom. Ad amuam Joasnu. Joas nug am Abieser buɗubppan danab laa. Midian danab ag nug anidmananu, Joas bekka Gideon nug grep meu tappa leppu awaknu abenppa wit mumuɗaɗa dayom.

¹² Nug anam heehe, Yawenu engel nug gumitta noa aum. “Yawe Nug na, na ban danab ɠagattag okkai ele, Nug na ele daattep!” awa aum.

¹³ Yawenu engel nug anam aum, amge Gideon nug oɗeppa awa aum. “O Naɗi, gadon, amge Yawe Nug ig ele daattem dayeb amu, aɗinu keeke imu oh ihinigppa inam beum? Amu aɗinu Yawe Nug uɗat okkai, danab haknu elele iitta, ig mamenkad aɗi dilagnu he, ig mamenkad ag ig amenigppa amunu appig amu, aɗinu Nug anam ii hette? Yawe Nug ig Isipnu aikka iite uɗiom? Amge gemu amu, Yawe Nug ig uuikka, Midian eppelagppa meikkom,” awa aum.

¹⁴ Anam a amu, Yawe Nug eɗua, nug neekkittatta, Nug amegppa aum, “Da na ele daagnih amunu, na ɠagattag amu ele daan gona, Israel ehanadna, ag Midian eppelagppan eɗun diie! Da na iite meitti gottem?” awa aum.

¹⁵ Yawe Nug anam aum, amge Gideon nob ma aum. “Amge O Naɗi, da attem hein, Israel Midian eppelagppan eɗue diikkul? Aab ikki dahil am, Israel dilag huu okkai Manase ooppanu ɠagattag iitta daatte, amu da am ɠagattag iittanab baeladppa oolagppa daattem,” awa aum.

¹⁶ Gideon nug anam a, Yawe nug amegppa aum. “Da na ele daagnih amunu, na geha Midian dilag daup oh hadappe nauhkkulag,” awa aum.

¹⁷ Yawe Nug anam aum, amu Gideon nug Yawe amegppa aum. “Na genab dahilnu ootppa ena doottem dayeb amu, na da genabnab genab, am na da ele madittem dookkulnu at laa meɗakkutnu oɗ medattem.

¹⁸ Na laih ii gomananu oɗ medattem. Na daappe, da ukken, keeke babaitten, eɗuen uɗien, ofa dahil nahipnu medappi, na gokkutnu oɗ medattem,” awa aum. Gideon anam a amu, Yawe Nug aum. “Da inam daappi, na eɗun uɗikkut,” awa aum.

¹⁹ Yawe anam a, Gideon aakku pahanab lakka ukkom. Nug meeme nag laa awa babaitta, nug plaua 25 kilogram awa, amu nug bret yis iitta manom. Amu nug teppu kaleg laappa ina, lewa waappa ina, bret awa, ele ukka, Kayaknu engel ad ok waappa dayom amu gumitta ukka, mettom.

²⁰ Gideon anam he, Kayaknu engel nug amegppa aum. “Na teppu amu, bret yis iitta ele men imu attan mena, lewa qaɗeppa gokkaɗppe noaɗ!” awa aum. Aakku Gideon nug aum bia heum.

²¹ He amu, Yawenu engel nug dudqak hokkat aɗom amu, nug amu noobppa teppu, bret yis iitta ele lauɗitte, aab dittiak menppanu ba, teppu, bret yis iitta amu ele ewe, iitta meum. Aakku Yawenu engel qettoɗom.

²² Haen Gideon nug aakku laa daya qettoɗom ele, amuam Yawenu engel doya amu, nug ewa aum. “O Naɗi Yawe, ⌊da nauhmi daattem. Aɗinu?⌋ da na, Yawe, da nahip engel amelppanab anidmi,” awa aum.

²³ Nug anam a, Yawe oɗeppa awa aum. “Na maɗoɗ daye! Na aib baɗame. Na ii mauhmana,” awa aum.

²⁴ Aakku Gideon nug Yawenu qaɗab laa appa buua, onig Yawe Nug Maɗoɗ Diig Daatte, aum. Qaɗab amu Opra appa, Abieser buɗub dilag wanppa heum, amu qaɗab amu gemu ⌊nai imu yaak haenppa⌋ ele, appa ana daatte.

²⁵ Amu tuqan amu Yawe Nug Gideon amegppa aum. “Na mamen nug makau dawai aɗit ele, amu makau dawai amu oolahppanu na laa nug maɗ eblaih aɗit ele awom amu, na makau dawai amu aon gona, na mamen nug Bal binag mekkunu qaɗab qeum, amuppa makau dawai amuppa qaɗab amu eeɗppe, na qeeb, kayak hambuppuak Aserah dabmekkulagnu biidod qaɗab heqo laih daatte amu, na amu ele okkulppe naɗ!

²⁶ Na anam hena, amu na qauko nakok imuppa Yawe, nahip Kayak, na nuhig qaɗab qe! Yawenu qaɗab attemnab haknu daatte amu, anamnab aakku atognona hekkutnu daatte. Anam hena, na kayak hambuppuak Aserah dabmekkulagnu biidod, na okulppe nekku amu, na ad amunu aab oppatppe neeb, na amu aon ilan, makau dawai amu aon, qaɗab amuppa manaknu ofa he!” awa aum.

²⁷ Amunu Gideon nug nuhig maɗi nid eblaih laih ele diia he, ag Yawe Nug anam hekkunu aum, ag amu heppig. Amge nug baekkudppan, am mudippan laikkud aab amuppanu ele dilag baɗom amunu, nug he, ag tuqan uɗat amu heppig. Nug amunppa ii heum.

²⁸ Ag anam heeg, wagɗeb buttua, haen danab aab amuppanu ag ahan amu, ag Balnu qaɗab am loppaɗe nak, amu kayak hambuppuak Aserah dabmekkulagnu biidod heqoppa dayom, am amu ele okkulak, ii dayeye anidppig. Amu abenppa amu, qaɗab bau qak, attan amu makau dawai maɗ eblaih aɗit ele, nuhigppa mana mettak heeg daye anidppig.

²⁹ Ag anidna amu, danab ah ag akka akka appig. “Aun heum?” Anana ag pehettan hettoɗieg ukke, ag doon appig. “Gideon, Joas bekka heum,” aon appig.

³⁰ Ag aakku Gideon, Joas bekka heum doona, ag Josanu ena appig. “Na bekkat lautppanu aon dimittim dona, ig mekke! Nug kayak hambuppuak Balnu qaɗab loppaɗe ne, kayak hambuppuak Aserah dabmekkulagnu biidod ele okkulom amunu, nug mauhkkuoitte,” aon eppig.

³¹ Ag anam eppig, amge Joas nug danab oh ag nug baneb uɗippig amu, nug ag amelagppa aum. “Bal nug kayak daatte dayeb amu, laa ag Bal eheɗ hettaglag dayeb, ag dahilnu eppig ele, ag Bal ehanidna, nuhig ban hekkulagte? Bal nug kayak daatte dayeb amu, aɗinu ag nug ehanidppeg, nug padal ii memanu hetteb? Dabmeig! Aun laa nug Bal ehanidkkunu nuhig ban hekku amu, nug pahanab mauhkku. Bal nug genab kayak laa daatte dayeb amu, uuppeg, nug nugakka atognoaɗ! Laa aib uɗat amu heum! Nug genab kayak laa daatte dayeb, laa nug nuhig qaɗab loppaɗeb nauhkku amu, ag uuppeg, dayaɗ! Aɗinu? Bal nug nukka laa nuhig qaɗab loppaɗom ele amu heeb nauhaɗ!” awa aum.

³² Joas nug anam a, haen amuppa laa ag, “Bal nug nugakka nug atognoaɗ!” anana, ag Gideonnu, Jerubal appig. Gideon nug Balnu qaɗab loppaɗe neum amunu, ag nuhignu anam appig.

³³ Anam daye, haen elab iitta, ban daup Midian, Amalek, amu danab kaɗag uɗitteppanu, appan ban danab ele ag baula aɗaeg ooho, ag gona, Jodan le mataɗna, oolnu noak onig Jesril, appa ag haen tutu dayaknu aab kalappig.

³⁴ Ag amu heeg amu, Yawenu Ouɗi Nug Gideon, nuhigppa uɗie, nug Abieser buɗub ag nug gumidna gona dim lamidna, banelag gona, ban hekkulagnu trampet ag onilagppa ekkunu iwalom.

³⁵ Am nug ele nai awa ukkak danab maatte gona aeg, Manase, Aser, Seblon amu Naptali dilag ban danab ele uɗippig.

³⁶ Anam daye amu, Gideon nug Kayak amegppa aum. “Na da amelppa, na da ehaniɗppe, Israel danab ah Midian danab eppelagppanu eɗue diikkulnu nai anan qakkame amu, na genabnabnab anam hekkutnu dabmettem dayeb amu,

³⁷ da na amu miagib ippuniɗkkutnu, inam hekkutnu oɗ medattem. Da geha tuqan sipsip uɗig laa ee aeg mumuɗaknu aben, da amuppa mekkul. Am sipsip uɗig amu baito qak buttua leppu ele daakku dayeb, amge wan am qaɗaiettak dayeb amu, da dookkul, na da ehaniɗppe, Israel danab ah Midian eppelagppanu eɗue diikkul; na nai mattime bia,” awa aum.

³⁸ Am anamnab aakku dayom. Gideon nug wagɗe buttuanab aha, nug sipsip uɗig titie, tappiɗ laippu le ambeum.

³⁹ Gideon nug anam hewowa, nug Kayak amegppa aum. “Da keeke laippu laanu oɗ medakkulnu ool daatte amunu, na dahilnu oo nauhak ii doomnanu oɗ medattem. Gemu da sipsip uɗigppa ma anttak laippu laa ele heppi, amu na heppe, sipsip uɗig qaɗaiettak dayebeb, wan amu baito qeeb, leppu qekkunu oɗ medattem,” awa aum.

⁴⁰ Gideon nug Kayak anam oɗ mettom amunu, tuqan amuppa Kayak nug Gideon oo dayom bia heum. Buttua amu, sipsip uɗig am qaɗaiettak dayeye, wan amu leppu qak dayom.