Ikki Danab 5 - Nobonob Baibel

Ahi Deborah, Barak ele edapiɗ

¹ Deɗ amuppa, Deborah, Abinoam bekka Barak ele aa ahi imu edapiɗ.

² “Yawe binag meig! Israel dilag ikki danab ag danab ah ahilkad omaladna, ag ban hekkulagnu noolag aon goppig. Danab ag gamag ahak naɗi doonna, dim lamadna banppa goppig!

³ Ag king daatteb, ag imu doyeg! Yo, ag gumak danab, ag daulag human, doyeg! Da Yawe heumnu ahi edakkul! Yo, da ahi etten, Yawe binag medakkul, Nug Israel dilag Kayak.

⁴ O Yawe, na Seirnu ahan gome. Ao, na Edomnu ahan, laippuppa tappa ukkak heme. Na anam heehe, wan uɗalom. Ao, wan anam uɗalele, gu huanak ele lombig hab waappa daappigppanu neum.

⁵ Qauko ag Yawe, Nug Sinai qaukoppa dayom amu, ag Nug noobppa uɗalppig. Ge, qauko ag Yawe, Nug am Israel dilag Kayak, ag Nug noobppa uɗalppig.

⁶ Anat bekka Samgar haenppa, Ao, nug Jael ele, ahilah haenppa amu, danab ah ag ib man okkaippa ii oidppig. Ge, danab ag oiglagnu amu, ag ib naunauppa godappig.

⁷ Am ban danab laippu laippu aakkuib ag Israel appa daappig. Ao, ag laippu laippuib daaeg, Deborah ahom. Ge, Deborah aha, Israel anilag bia dayom.

⁸ Israel ag Yawe dim lamidkkulagnu uun, kayak hambuppuak laala dim lamadkkulagnu heeg, kekeɗ ag uɗin, ban hekkulagnu daappig. Ag uɗippig, amge ig ihinkad ban danab 40,000 oolagppa, guppiɗ, o ban laa anidkkunignu elele iitta!

⁹ Da Israel dilag ikki danab dilagnu amu, da ahilagnu enanag doottem. Ao, da aun aɗi ag ena hena, ikki danab amu dim lamadtteb amu, da ahilagnu enanag doottem. Hepput, Yawe binag attan dayaɗ!

^10-11 Ag laa, ag donki enanag gomelkadppa oitteb, ag laa ag lamen kobol ele duqan, amuppa daatteb, amu ag laa ag ib man baelagppaib oitteb ele amu, ag oh ag laa le moɗppa daan ahi edatteb ele, ag ahilag ahi nai doon dabmetteg! Ag Yawe Nug kobol genab tutukku ha, kekeɗ eɗattomnu edatteb. Ao, ag Israel dilag daup Yawenu daatteb amu, ag daup amu kobol genab tutukku ele dim lamidna, kekeɗ eɗadppignu edatteb. Gemu, Israel danab ah, ag Yawenu danab ah amu, ag eɗun, aab ahilkadppa maɗoɗ ele daatteb.

¹² ‘Deborah, na ahe, na ahe! Ao, na aib niime! Na ahe! Ahe! Na ahan, ahi laa ette! Barak, na hibaitte! Ao, Abinoam bekka, na ahan, kekeɗ na ag eɗadkkutnu daatteb amu, na ag aɗalatte!’

¹³ Haen amuppa amu, Yawe Nug he, Israel danab oɗo yaak daappig ele, ag kekeɗ ɠagattag eɗadppig. Ao, Yawenu danab ag da eppel bia daan, ag ban danab ɠagattag eɗadppig.

¹⁴ Israel danab laa ag Epraim, wan anukka Amalek dilag dayom, appanu neppig. Ao, Benyamin ag laa na dim lamatteg neppig amu, ag ag oolagppa daappig. Makirnu ban daup ikki ag laippuppa tappa ukkak hena noppig. Ao, Seblon ban daup ikki ag ele noppig.

¹⁵ Isakarnu ikki danab ag Deborah ele daappig. Ao, Isakar ag Barak ele daappig. Ag ban hekkulagnu Barak dim lamitteg, wan oolnu noakppa qaiettan wana goppig. Isakar ag anam heppig, amge Israel dilag huu okkai Rubennu danab oolagppa am dabmak laippu iinab dayom.

¹⁶ Anam amge diig aɗinu, ag Ruben danab, ag appalagppa sipsip maadppig daatteb, ag amu guguittak daappig? Ag sipsip gumak danab dilag hiwalak, ahilag sipsipnu heppeg, ag amu dooglagnute daappig? Amu genab, Israel dilag huu okkai Rubennu danab oolagppa am dabmak laippu iinab dayom.

¹⁷ Danab ag Gileat daatteb, ag nug ehanittak hekkulagnu Jodan ii mataɗna doppig. Dan danab ele, aɗinu ag aabppa, uub ahilkad guguittak daan ii uɗippig? Aser ag ele nug ehanittaknu ii ahan uɗippig. Ge, ag aben ag uub ahilag maatteg daattebppa, appa daappig.

¹⁸ Amu oh ag anam heppig, amge Seblon danab ag am ban hak abenppa nauhak aoglagnu daappig, amge ag diig amunu ban hak ii uuppig. Ao, Naptali danab ag ele ban hak abenppa anamib aakku heppig.

¹⁹ King ag uɗin, ag ban heppig. Ao, Kanan dilag king ag uɗin, ban heppig. Ag uɗin, aab Tanak, Megido lenag naunau guguittak, appa ag ban heppig. Ag uɗin ban heppig, amge ag ban ii eɗidna, ag silwa laa, o aɗitai keeke ena laa ele ii aon goppig.

²⁰ Hoɗoppai hab waappanu ag Sisera ele ban heppig. Ao, hoɗoppai ag ib ahilag mattan gonana, Sisera ele ban heppig.

²¹ Kison le nug kekeɗ ⌊ag mattadna wakkulagnu heegeg,⌋ diia ukkom. Ao, Kison le, le amu nug appa haen elabnab daatte, le amu ag diia ukkom. Ge, ⌊Yawe Nug he, keeke amu oh ehanigppig amunu,⌋ da aib bahil yom. Iitta! Da ɠagattag doyen, ahe, ban hei!

²² ⌊Yawe he, anam beum amu,⌋ dimppa Siseranu daup ag bittumttum oolna goppig. Ge, ahilag hos ag huanaknab qaiettan, oolna goppig.

²³ Yawenu engel nug aum. ‘Meros danab ah ag eheɗ laa awaknu anak waappa dayeg! Yo, ag eheɗ laa awaknu anak naunab waappa dayeg! Aɗinu? Ag Yawe ehanidkkulagnu ii uɗippig. Ao, ag Yawe ehanidna, ban danab ɠagattag ele ban hekkulagnu ii uɗippig.’

²⁴ Amge Jael, Ken ted Heber wau amu, danab ah ohnab ag nug binag okkainab, ah laa oh binalag eɗittak, ag nug anam metteg! Ao, nug ah laa oh peh lakka daatteb amu, nug ag binalag aoppig daatteb eɗitta, binag okkainab awaɗ!

²⁵ Sisera nug lenu oɗ me, Jael nug huh mettom. Ao, nug tappiɗ laa, king nug amuppa keeke lakkunu elele, nug amuppa huh enanag ma, awa doa mette, ⌊lawowa niiom⌋.

²⁶ Niieye, Jael nug eppeg naneh bahia, peh taiedakkunu pin elab laa awom. Ao, nug eppeg naɗiap bahia, uɗat nidnu hama awom. Nug amu eppegppa diiata aɗa, nug Sisera ikki atule noum. Nug peh taiettaknu tutuɗ heqotappa ma, qeute noum.

²⁷ Jael baegppa Sisera na qa, padal ma, aguppa niiom. Ge, Jael baegppa Sisera na qa, padal meum. Sisera nug na qa, padal meum, amuppaib nug aakku mauhak niiom.

²⁸ Sisera nug appa mauhom, amge anig laugppa gililppa ulah ibuppa amu, Sisera anig nug appa dayaya, neekke ukkom. Yo, gililppa ulah ibuppa nug eɗua uɗiebeb anidkkunu neekkom. Nug aum. ‘Nug aɗinu nuhig bannu karisppa eɗua aabppa uɗikkunu amu oiyeye, haen elabnab gotte? Aɗinu ig bannu karis nuhignu oqotti paha ii doottem?’ awa oɗmak heum.

²⁹ Nug anam oɗ me, nuhikkud maɗi ah laa, nug doyak dabmak ena okkainab ele, nug nob ma nai laa mattie, Sisera anig nug nai amu doyom. Ao, nug nai amu doya, nug nai amu eɗuawa dabmakppa mattiaya inam atte.

³⁰ ‘Sisera nug nuhikkud daup ele ag banppan en mattin otiadtteb. Ao, ag ah laipputai, iitta ah aɗittai danab oh anen anen madatteb. Ag lamen geɗaɗa ele Siseranu otitteb. Ge, dahilnu amu, ag lamen geɗaɗa ele, baagppa kobol kobol ele koitak otin meɗaglagnu hetteb. Amu oh am banppan awak, aakkuib.’ Sisera anig nug anam aakku nukka nuhignu aum.

³¹ Amu Yawe, kekeɗ nahipad oh ag Sisera mauhom bia mauhkkulagnu ool daatte. Anam amge, laa ag nahipnu oolag mauhtte, ag aam ɠagattag ba amahaltte bia amahalkkulagnu ool daatte.” Anam daye, maɗ 40 amu, wan amuppa maɗoɗ dayom.