Ikki Danab 4 - Nobonob Baibel

Deborah nug Israel dilag gumak ah beum

¹ Ehud mauhom dimppa amu, Israel danab ah ag baula Yawenu neekkakppa eheɗ heppig.

² Ag eheɗ heppig amunu, Yawe nug ag diia, King Jabin eppegppa meum. Nug am Kanan dilag king; nug Hasor dayom. Nuhig ban daup ikki am Sisera. Sisera nug am Haroset Hagoim, appa daattom.

³ Am Jabin nug bannu karis 900 aenppa hak ele, amu nug maɗ 20 Israel danab ah eheɗ hadatta, guittak mattom amunu, Israel ag Yawe ehanadkkunu gaappig.

⁴ Aria, Deborah, Lapidot wau, nug propet ah laa daya, amu nug haen amuppa Israel dilagppa epeɗiak uɗat haaha dayom.

⁵ Nug ad pam laa onig Deborahnu Pam, nug ad pam amu waappa epeɗiak uɗat nuhig heum. Ad pam amuam Rama, Betel ele gamalahppa dayom. Rama, Betel ele amu Epraim wanppa, qauko qauko daattebppa daapiɗ. Am Israel danab ah ag appa uug ahilag babaitta, elele medakkunu gumidna godappig.

⁶ Anam daye amu, deɗ laa amu, nug Abinoam bekka Barak uɗikkunu nai me ukkom. Barak am Kedes aabppa dayom. Kedes am Israel dilag huu okkai Naptali dilag wanppa dayom. Nug nai me ukke, Barak uɗie amu, Deborah nug amegppa aum. “Yawe, Israel dilag Kayak, Nug na inam aakku haknunab atte. ‘Na qauko Tabor appa gona, na ban danab 10,000 Naptali, Seblon ele huuppanu diippe, na ag ele appa ukkeg!

⁷ Da geha Sisera, Jabinnu ban daup ikki, amu nuhig bannu karis, ban danab ele Kison leppa appa eeɗadppi uɗiglag. Uɗippeg amu, da na ehanidppi, appa nug, nuhikkud daup ele eɗadkkut,’ awa atte,” awa aum.

⁸ Deborah nug Barak amegppa, Yawe aɗi aum amu amegppa a, nug amegppa aum. “Na da ele oh gokkunih dayeb amu, da gokkul. Iitta am iitta,” awa aum.

⁹ Barak anam a amu, Deborah oɗeppa awa aum. “Ge, da na ele oh gokkunih. Amge na imu doye! Uɗat na gottemppa amu, na binan ii aomna. Aɗinu? Yawe Nug ah laa ehanitteb, nug heeb, Sisera na qekku,” awa aum. Anam amu, Deborah nug Barak ele Kedes gopiɗ.

¹⁰ Amu Barak nug Seblon, Naptali ele huuppan ban danab onilagppa e, 10,000 ag dona, ag nug dim lamitteg, ⌊qauko Taba⌋ goppig. Deborah nug ag ele oh goppig.

¹¹ Amge tatam amu, Ken danab onig Heber, nug Ken buɗub laa, ag Moses wau appinag Hobap buɗub, nug ag oolagppanu laa amu, nug aha, laih ukka, nug Sananimnu ad ok diigppa peh lag nuhig qappom. Amuam Kedes guguittak.

¹² Aria, Barak nug ugekke, Deborah, amu danab ag Barak dim lamitteg goppig ele, ag qauko Tabor appa teeg, laa ag Sisera amegppa, “Barak, Abinoam bekka, nug Tabor qaukoppa teum,” appig.

¹³ Ag aeg doya, Sisera nug nuhig bannu karis aenppa hak diia, ban danab ele onilagppa e, ag Haroset Hagoimnu ukka, Kison leppa batak uɗippig.

¹⁴ Aakku Deborah nug Barak amegppa aum. “Ahan babaitte! Aɗinu? Gemu amu, Yawe Nug heeb, na Sisera eɗidkkut. Yawe Nug na noom awa iite gotte!” awa aum. Nug anam aum amunu, Barak nug ban danab nuhig 10,000 omalatte, ag Tabor qaukoppanu nona, ban heppig.

¹⁵ Barak nug Sisera, nuhikkud daup ele banelag te amu, Yawe Nug he, Sisera, nuhikkud bannu karis lamittak danab, ban danab laa ele oh ag Barak aɗi qep elabppa ban ɠagattagnab heeg anadna, ag eheɗ baɗappig. Anam daye, Sisera nug bannu karis nuhig attannu oola, honap na, baegppaib oola ukkom.

¹⁶ Barak, nuhikkud daup ele ag kekeɗ ban daup amu, ahilkad bannu karis ele lamadna gona, Haroset Hagoim teppig. Nug, nuhikkud ban daup ele ag Siseranu ban danab oh aqappig. Laippu laa uueg, bau ii dayom.

¹⁷ Amu Barak nug nuhig daup ele ag Siseranu ban danab aqaegeg amu, Sisera nug oola ukka, Ken danab Heber wau Jaelnu pehppa noum. Aɗinu? Heber baekkudppa ag amu Hasornu King Jabin ele, ag oolagppa maɗoɗ dayom amunu, Sisera nug oola, appa ukkom.

¹⁸ Nug appa ukka, Jael nug ukka, Sisera uɗa ta amegppa aum. “Danab naɗi, na dahil peh ooppa no! Na ooppa no! Na aib baɗame,” awa aum. Nug anam aum amunu, nug nuhig peh ooppa no, nug keeke laa awa tona, lokkumittom.

¹⁹ Amu Sisera nug Jael amegppa aum. “Da le baal diitte amunu, na le laa meɗakkutnu oɗ medattem,” awa aum. Nug anam aum amunu, Jael nug huh laa lakkunu mettowa, nug eɗua lokkumittom.

²⁰ Anam ha male amu, Sisera nug Jael amegppa aum. “Na pehnu odppa hippaidna daappe, am aun laa nug uɗia oɗ metta, ‘Ippa aun laa daattete?’ ab amu, na ‘Iitta! Laa ii daatte,’ aon a!” awa aum.

²¹ Nug anam akkunu aum, amge Sisera nug beɗu maidadaɗa auta autanab awe niieye, Heber wau Jael nug hama laa, amu peh taiedakkunu pin elab laa ele awa, oqotti iitta ele Sisera niiomppa ukkom. Ukka, tutuɗ amu heqotappa qe atula noa, wanppa no, nug mauhom.

²² Am haen Barak nug Sisera lamitta ugekke, Jael nug ukka, uɗa teum. Nug ukka, uɗa ta, nug amegppa aum. “Doppe, da na danab aun na nug madittem amu, da nug ippunidkkul,” awa aum. Nug anam aum amunu, Barak nug dim lamitta, peh ooppa ukka, nug Sisera appa pehnu pin elabppa, heqota atulak ele mauha niieye anttom.

²³ Deɗ amuppa amu Kayak Nug he, Kanan danab, King Jabin nug nuhig ɠagattag okkainab iitta me, nug Israel danab noolagppa ɠagattag ii dayom.

²⁴ Haen amu digma ukkak amu, Israel ag Jabin ele ban hekkulagnu ɠagattag bena daanna, ag King Jabin eɗidna heeg, Kanan ted amu, nuhikkud ele, ag aakku nauhppig.