Ikki Danab 21 - Nobonob Baibel

Israel ag Benyamin danab ah madappig

¹ Amu Israel ag Mispa appa, ag matu ag aɗelkad Israel dilag huu okkai Benyamin danab, ahilkad ah daaglagnu ii mattamnanu ahilag nai ɠagattag qettan appig.

² Anam amu, Israel danab ag ahan, Betel tena, ag Kayak noobppa daaeg ukke, tueb meum. Ag daanna, ag baalag okkaippa eheɗ gaappig.

³ Ag gaanna appig. “O Yawe, Israel dilag Kayak, aɗinu inam dayom? Ig Israel, ihinig huu okkai laa aakku auhom!” anana gaappig.

⁴ Ag anam heeg ukke, wagɗe buttuanab danab ah ag qaɗab laa qena, ag manaknu ofa Yawe mettana, ag laippu dayaknu ofa ele qaɗab amuppa Nug medappig.

⁵ Ag amu hewona amu, ag appig. “Haen ig Mispa appa, ig Yawe noobppa qagmeta, ig Benyamin huunu attem haknu maidmut amu, aun laala ag Israel dilag huu okkai attenppanu ii daappig?” aon oɗ mettan appig. Ag oɗmak amu heppignu diig am, haen ag Mispa qagmeppig amu, haen amuppa ag imu bekkunu ahilag nai ɠagattag qettan appig. “Laa nug ippa, Yawe noobppa uɗiaknu uuom amu, nug mauhkku!” aon appig.

⁶ Aria, Benyamin, Israel ele ag tiilag laippu, amu gemu Israel ag oo doyak Benyaminnu okkainab aona appig. “Gemu ig Israel amu, ig oonigppanu ihinig huu okkai laa aakku auhom.

⁷ Am ig aɗenkad Benyamin danab, ahilkad ah daaglagnu ii mattamtanu ihinig nai Yawe onigppa ɠagattag qettat amut me, ig attem heta, Benyamin laala daatteb amu ah madapput, waalkad daaglag?” aon appig.

⁸ Am diig amunu ag oɗmak imu heppig. “Haen ig Mispa appa, ig Yawe noobppa qagmeta, ig Benyamin huunu attem haknu maidmut amu, aun laala ag Israel dilag huu okkai attenppanu ii daappig?” Ag oɗmak anam henana hettoɗippig amu, ag auntai laa Jabes Gileatnu laa qagmakppa ii dayom dooppig.

⁹ Ag amu dooppignu ib am, ag danab oh tatam Mispa gona daappig ebqeeg ukke, Jabes Gileatnu laa ii dayom anidppig.

¹⁰ Ag anam dooppig amunu, qagmeppig ele ag ban danab 12,000 ɠagattag ele otiadna, ag gona, Jabes Gileat appa aun aɗi daatteb, amuam danab, ah, nid naunau ele ag ag aqaglagnu mattanna, ag amelagppa appig.

¹¹ “Ag inam iikku hekkulag. Ag danab amu oh, ah oh ag makkun iitta ele, ag ag oh heppeg, ag Yawenuib nuhig pelemppa dayeg!” appig.

¹² Ag anam aeg gona hena, Jabes Gileat ooppa ag ah makkun 400 anadna, ag diin, Kanan wanppa, Silo appa haen tutu dayaknu aab kalakppa goppig.

¹³ Ag amu heeg, Israel dilag tamaniak ooppan danab laa ag maɗoɗ nai, Benyamin danab laib laib ag ban haen dimppa Rimonnu men okkaippa bau daappig amu mattaglagnu maatteg, aon goppig.

¹⁴ Am ag gona, maɗoɗ nai amu mattaeg, Benyamin danab ag doon, eɗun laulkadppa gona daaegeg, Israel ag ah makkun 400 Jabes Gileatnu, Israel dilag ban danab ag aqaeg ii mauhppig ele amu, ag ahilkad ah daaglagnu madappig. Amu ag madappig, amge danab dilag ebqak am, ah dilag ebqak eɗittom; ah ag danab, ag ahilag ohnu elele iitta.

¹⁵ Yawe ag paɗatte, Israel oolagppa huu okkai laippu ii daama bia dayom amunu, Israel danab ah ag Benyamin dilag oo bodoetta le mak dooppig.

¹⁶ Ag oo bodoetta le mak dooppig amunu, Israel dilag ikki danab ag oɗ meppig. “Benyamin danab laala waalkad iitta amu, ig attem heta, ah diit mattagnig? Aɗinu? Israel dilag huu okkai Benyaminnu ah oh amu, ig heut, iitta meppig.

¹⁷ Israel dilag huu okkai amu Israel ooppa auha auta aomanu, laa ii mauhppig ele ag buɗulkad daaglagoitte.

¹⁸ Amge ig Israel ig ihinig nai ɠagattag qettat, inam amut. ‘Aun laa nug aɗeg Benyamin ted, nug wau daakkunu nug medakku amu, danab amu nug eheɗ laa awaknu anak waappa dayaɗ!’ amut amunu, ig ag, ig aɗenkad ii mattamta,” aon appig.

¹⁹ Ag anam awona, ag tuɗidna appig. “Amge antteg! Yawe dabmaama, qagmak gamag ahak ele hak Silo appa maɗ maɗppa daatte, amu nuhig haen uɗiom daatte. Silo am Betelnu yawalti uɗitteppanu daatte. Aab amuam ib laa Betelnu ukka, Sekem gotte, am ib amunu kaɗag uɗitteppanu daya, Lebonanu yau uɗitteppanu daatte,” aon appig.

²⁰ Ag anam appig amunu, ag Benyamin danab aun aɗi ag ah ii diippig amelagppa appig. “Ag gona, grep dad ooppa, danab ag qagmen hobul hetteb, aben amu guguittak, appa lokkumna maadna daappeg,

²¹ haen Silo nid ahin bau ag goɗaglagnu dobeppeg amu, ag grep dad ooppan tulan wana, anen anen aɗualadna, waalkad daaglagnu laulkadppa diin ukkeg!

²² Anam heppeg, nid ahin amu mamelkad, awalkad, lailkad ele, ag uɗin ig amenigppa nai hekkulag dayeb amu, ig ag amelagppa akkunig. ‘Ag ihinignu oo bodoettak doon, ig ehanigna, ag Benyamin dilagnu oolag dookkunu oɗ madattem. Ag aɗelkad uuadppeg diiglagnu diig am, ig Jabes Gileatnu heut nauhom, amuppa ig ag ah elele ii diit mattamut. Am ag aɗelkad uuadppeg diiglag amu, amuppa ag keeke hekkulagnu ahilag nai ɠagattag qettan appig amu, ag ii loppaɗmana. Aɗinu? Ag ii madappig; Benyamin ag uɗin diippig amunu, ag Israel laa ag eheɗ ii hemana,’ ” aon appig.

²³ Anam amu, ag anam Benyamin danab amelagppa aeg doon, ag appig bia heppig. Ag ah aun aɗi ag hobul amuppa goɗak heppig amu, ag anen anen ag ah amu aɗualadna diin, ahilag wanppa, ag aulag dayom, ag appa goppig. Ag anam hena, ag ahilag aab baula buun, amuppa daappig.

²⁴ Amu oh dimppa Israel ag ahan, eɗun appalkadppa goppig. Ag Israel dilag huu okkai adeppanu, aab ikki adeppanu, ahilag wan, ag aulag daakkunu dayom amu, ag amuppa eɗun goppig.

²⁵ Haen amuppa Israel appa king laa iitta amunu, danab oh ag akka anen anen, ag kobol attem am ena dabmeppig amu, ag anamib heppig.