Ikki Danab 20 - Nobonob Baibel

Israel, Benyamin ele dilag ban hak

¹ Am anam beum, aakku Israel ohnab, aab onig Dan, appanu ukka ukka Berseba batak, Gileat wanppanu ele, ag oh aɗa mak laippu, Mispa appa Yawe noobppa qagmeppig.

² Amu Israel dilag huu okkainu danab ah oh dilag ikki danab ag uɗin, ag appa Kayaknu danab ah qagmeppig ele oolagppa, ag abenlagppa bena daappig. Amu ban danab 400,000, ag oh qep elab ele aɗan daappig amu, ag ele uɗin, Kayaknu danab ah dilag qagmakppa daappig.

³ Israel dilag huu laala ag Mispa appa anam teppig amu, laa ag teppignu, paha nai meeg ukka, Benyamin wanppa ukkom. Amu Israel ag anam gona daanna, ag Lewi buɗubppan mana mettak danab iitta, ag amu oolagppan laa, nug ah mauhomnu gamu amu, ag nug oɗ mettan appig. “Kobol naunab nau beum amu, ib attemppa beumnu appe dootu!” aon oɗ mettan appig.

⁴ Ag anam oɗ mettaeg amu, ah mauhom gamu, Lewi ted, nug aum. “Da waal amge waalnab iitta ele, i aab Gibea, Benyamin wanppa daatte, i tuqan amuppa appa daagnihnu daamuɗ.

⁵ Tuqan amuppa Gibea danab laa ag lag i daamuɗ ele, ag lag amu eidna talilidna, ag da iuppeg mauhkkulnu maidppig. Ag da waal amge waalnab iitta aon, wagai mena, nug ele beɗuppa ukkak heeg ukke ukke, nug mauhom.

⁶ Amunu da nug gaɗa otaɗe, maha qei, 12 neeg akke, Israel dilag huu okkai anen anen, ag wan ag aulag daakkunu aoppig amu, da anen anen appa pani ukkom. Da anam heminu diig am, danab amu ag Israel oolagppa, gappai heeb baknu kobol, kobol uɗa nak nau guittak ele heppig.

⁷ Anam aakku amunu, Israel dilag tamaniak oh, ag amunu attem hekkulagnu dabmekkulagoitte!” awa aum.

⁸ Nug anam a, danab ah oh ag oolag laippu daye, ag appig. “Ihinigppan laippu laa eɗua aabppa ii goma. Ihinigppan laippu laa eɗua laugppa ii goma.

⁹ Iitta! Ig ippa daatta, aun aɗi ag banelag gona, Gibea ele ban hekkulagnu om ena yaat anidkkunig.

¹⁰ Ig Israel dilag huu okkai anen anen dilagppan danab otiadpput, ag daanna, ban danab dilag ee aon gona mattaglag. Anam haknu amu, ig danab 100 oolagppanu 10 diignig, o danab 1,000 oolagppanu, ig 100 diignig, o danab 10,000 oolagppanu ig 1,000 diignig. Anamppa otiadpput, ag ban danab ee mattaglag. Aria, ban danab ag gona, Gibea, Benyamin wanppanu, ag kobol uɗa nak nau guittak ele Israel oolagppa heppig amu, ag ag amunu nob mattaglagnu daaglag,” aon appig.

¹¹ Anam amunu, Israel danab oh ag qagmena, ag banelag gona, Gibea ele ban hekkulagnu laippu aɗaeg oum.

¹² Am Israel ag anam daanna, ag nai meeg, Israel dilag huu okkai Benyamin dilagppa ukke appig. “Ag oolagppan danab laa eheɗ hak naunab laa heppig!

¹³ Anam amu, gemu ag nau hak danab Gibeanu amu ig eppenigppa meppeg, ig ag geɗadta aqapput mauhppeg, ig Israel, ihinigppa kobol nau amu ii daama,” aon appig. Ag anam appig, amge Benyamin danab ag ahilag nai dooglagnu uuppig.

¹⁴ Iitta. Ag Israel ele ban hekkulagnu, aab ahilkadppan ahan gona, Gibea appa qagmeppig. Gibea am aab laa, Benyamin wanppa daatte.

¹⁵ Ge, Benyamin dilag okkai ag heeg, pahanab ban danab 26,000 ag qep elab aɗappig amu, ag ahan, Gibea ban danab enanag 700, amu tuɗidkkulagnu goppig. Gibea danab 700, ag am ban hak doon autna aoppig.

¹⁶ Am ban danab amu oh oolagppanu, daup 700 amu ag am naneh danab. Ban danab amu ag ban hak doon autna aotteb ele. Anen anen ag ketapolppa men eeg ugekke, aɗi keeke nakoknab, danab ikki uɗug laippu bia, ag keeke amu qekkulagnu elele. Haen laippu amu ii eɗidmana; iitta.

¹⁷ Israel dilag okkai ag heeg, ban danab 400,000, ag qep elab aɗappig, ag oh ban hak dooppig ele amu, ag qagmeppig. Benyamin ban danab amu, ebqak amuppa ii ebaqappig.

¹⁸ Amge ag ban ii heppig daanna amu, Israel ag Betel gona, Kayak oɗ mettan appig. “Israel dilag huu okkai atten nug banelag ukka, anuqa Benyamin danab ele ban hekkulag?” anan oɗ medappig. Ag anam Yawe oɗ mettaeg amu, Nug ag oɗelagppa awa aum. “Juda ag tatam anuqkkulag,” awa aum.

¹⁹ Israel ag anam doona, ag buttuanab ahan gona, Gibea guguittak haen tutu dayaknu aab kalappig.

²⁰ Ag appa daanna amu, ag banelag gona, Gibea tena, Benyamin danab ele ban haknu bappaidna, huu yaappig.

²¹ Ag banelag heppig, amge Benyamin ban danab ag aab Gibeanu dimittim uɗin gona, Israel ban danab 22,000 deɗ amuppa aqappig.

^22-23 Ag aqaegeg, dimppa Israel ag Betel tena, ag appa Yawe noobppa gaanna daaegeg ukke, tueb meum. Ag appa anam daanna, ag Yawe oɗ medappig. Ag appig. “Ig lainkad Benyamin ele ban baula hekkunigte?” aon oɗ meppig. Anam oɗ meeg, Yawe Nug aum. “Goppeg, ag ele ban heig!” awa aum. Yawe anam a, amu Israel ag akka akka nug ɠagattag qedappig. Ag anam daaeg ukke, wagɗe, deɗ amuppa ag aben ag deɗ tatam ban heppigppa, ag appa baula qagmeppig.

²⁴ Yawe Nug anam aum amunu, deɗ amu uue, butti, deɗ amuppa Israel dilag ban danab ag Benyamin ban danab ele baula ban hekkulagnu goppig,

²⁵ amge Benyamin danab ag ahan, Gibea aab dimittim banelag uɗin, ban hena, ag Israel danab 18,000 baula aqappig; danab amu oh ag qep elab aɗappig.

²⁶ Anam heeg, Israel oh ag eɗun, Betel tena, ag Yawe noobppa gaanna, ag ee ohnu kud mena daaeg ukke, uudoum. Ag manaknu ofa Yawe mettana, amu ag laippu dayaknu ofa ele Nug mettana,

²⁷ ag Yawe, ib ippunadkkunu oɗ medappig. Haen amuppa Kayaknu Tituanak Nainu Kunup kontrak inak ele amu, kunup amu Betel appa daye,

²⁸ Eleasar bekka Pinias, Aron alag, nug appa, Tituanak Nainu Kunup guguittak, Yawe noobppa mana mettak danab dayom. Amu Israel ag Yawe oɗ medappig. “Ig lainkad Benyamin ele baula ban hekkunigte, o iitta, ig uugnigtai,” aon od mettan appig. Ag anam oɗ meeg, Yawe aum. “Ag goppeg, ag ele ban heig! Butti amu, da ag eppelagppa maadkkul,” awa aum.

²⁹ Yawe anam aum amunu, Israel dilag ban danab laala ag ban haknu lokkuma dayak aben Gibea talilidna aon daappig.

³⁰ Anam daye deɗ ewamppa, buttua amu, Israel dilag ban danab laa ag Benyamin banelag gona, haen tatam ban heppigppa, appa qagmeppig.

³¹ Haen ban danab Benyaminnu ag banelag uɗieg amu, Israel ban danab, ⌊ag matu dabmeppig bia,⌋ ag oolna ukkaegeg, Benyamin danab ag lamadnana, aab okkai uun, nakok uma goppig. Israel ag anam heeg, Benyamin ag tatam aqappig bia eɗun aqappig. Ag dad okkaippa, amu ib man aɗit, laa Betel ukkom, laa Gibea teum amu, aben amu ohppa ag Israel danab 30 anam aqappig.

³² Benyamin ban danab ag anam hewona, ag dabmeppig. “Ig ag digmakppa eɗadmut bia eɗadttem!” dabmeppig. Ag anam dabmeppig, amge Israel ag anam oolna gobeppeg, Benyamin danab ag lamadna henana, ag aab okkai uuglagnu nai qagappig amunu, Israel ag dabmeppig. “Ig oolta gobupput, ag aab okkai uun, ibppa ig lamigna gokkulag,” dabmeppig.

³³ Anam amu, Israel ban danab ag oolna gona, Baltamar appa wana amu, ag eɗun ban hekkulagnu bappaidppig. Ag anam heeg, Israel dilag ban danab laa ag Gibeanu qaban uɗitteppanu, appa aben aon, lokkumna daappigppanu ahan uɗippig.

³⁴ Ag anam heeg, Israel dilag ban danab laa, ahilag ebqak 10,000, ag am Israel ban danab ɠagattagnab ele, ag aab Gibea guguittakppanu ahan, banelag gona, Gibea ele ban heppig. Ban amu ɠagattagnab dayom, amge ban daup Benyaminnu amu, ag Israel ag ag eɗadna aqaglag ii dooppig.

³⁵ Amu deɗ amuppa Yawe Nug Israel ehanatte, ag Benyamin eɗadna, Benyamin danab 25,100, ag oh qep elab aɗappig amu, ag amu oh aqappig.

³⁶ Aakku Benyamin danab ag dooppig; Israel ag ag eɗadppig. Amge amu ii nak haenppa Israel ban danab ag Israel daup lokkuma dayak abenppanu ahan, Gibea aab aoglagnu oolagppa genab dooppig amunu, Benyamin ban danab ag Israel lamattegeg, ag oolna goppig.

³⁷ Amu Israel ban danab ag oolna Baltamar ukkaeg, laa ag lokkumna daappig ele ag qaiettan, Gibea aab okkai ooppa nona, aben aben wana, ag danab ah appanu ohnab aqona, ag aab amu manaeg ewom.

³⁸ Amu keeke amu oh ii hak haenppa amu, Israel dilag daup ag ban haknu lokkuma dayak abenppa ii daamnanu daappig amu, ag danab aguppa daaglag ele ag aab okkai aon, ag aab amotppeg eweb, kahug teppu ele attan teebeb,

³⁹ amuam at laa aakku daakkunu nai qeppig. At amuam Israel ag oolppig ele, ag aab kah amu anidna, ag eɗun aon, banelag gona, Benyamin danab ele ban hekkulagnu, am amunu at aakku daakkunu ag nai qeppig. Ag amu matu bappaidppig, amu haen amuppa Benyamin danab ag Israel ban danab 30 keeke aqona, ag dabmeppig. “Ig ag haen tatam eɗadmut bia eɗadttem,” dabmeppig.

⁴⁰ Ag anam dabmeppig, amge ag amu henana, haen ag dimulagppa neegna amu, ag aab kah aab okkai amuppan teppu ele teete anidppig.

⁴¹ Israel ban danab ag ele amu anidna, ag eɗun aon, banelag gona, Benyamin danab lamattegeg, Benyamin danab ag baɗak eheɗ nau dooppig. Aɗinu? Haen amuppa Benyamin dilag daup ag nauhkkulagnu daappig aakku dooppig.

⁴² Ag baɗak eheɗ nau dooppig amunu, ag oolna, atu taɗakppa gokkulagnu goppig, amge Israel dilag ban danab lamatteg, ag ban qe-eɗidkkulagnu elele iitta, amu aabaabppanu danab ag ele aab dimittim uɗin, Benyamin ban danab ele ban hena, kuɗumnab aqappig.

⁴³ Israel ag Benyamin danab, Gibeanu kaɗag uɗitteppanu, appa oo mattan, lamadppig.

⁴⁴ Israel ag deɗ amuppa, Benyamin ban danab ɠagattag ele amu 18,000 aqappig.

⁴⁵ Ban danab amu ag ooladna, atu taɗakppa, Rimon appa gokkulagnu ukkaegeg, Israel ag 5,000 ibppa aqaeg mauhppig. Ag tuɗidna lamadna gonana, ag Gidom guguittak appa tena batappig. Ag ib amuppa 2,000 baula aqappig.

⁴⁶ Deɗ amuppa amu, Benyamin huuppanu ban danab 25,000, ag qep aɗan ban heppig, ag ban danab ɠagattag ele, amu deɗ amuppa ag iitta meppig.

⁴⁷ Amu Benyaminnu ban danab 600 aakkuib ag bau daappig. Ag bau daan, ag oolna gona, Rimon menppa, appa kalam waɗele daappig.

⁴⁸ Daaegeg amu, Israel ban danab ag eɗun gona, keeke bau dayak Benyamin dilag wanppa ohnab heeg nauhppig. Ag danab ah oh aqan, ahilkad doɗ oh ele aqappig. Ag keeke ohnab aqappig. Ag aab ohppa gonana, ag amu ele manatteg eoppig.