Ikki Danab 2 - Nobonob Baibel

Yawenu engel nug Bokim uɗiom

¹ Amu Yawenu engel nug Gilgalnu aha, Bokim ta, nug Israel danab ah amelagppa aum. “Da ag Isipnu diie, wan imu, da ag mamelkad aɗi madakkulnu dahil nai ɠagattag qetten ami amu, da amuppa uɗimi. Da ami. ‘Da geha ag ele nug tituana nai qakkak hemi amu, da iinab tippalpa.

² Am ahilagnu amu, ag danab ah wan imuppa daatteb ele, ag ag ele nug tituana nai qakkak ii hemana. Iitta. Ag amu dilag qaɗab loppaɗadkkulag,’ awe ami. Amge ag da oɗel ii dim lamidppig. Aɗinu ag anam heppig?

³ Haen amuppa ele da nai imu ami. ‘Ag da oɗel ii dim lamidkkulag dayeb, da danab wan imuppa daatteb, da heppi, ag Israel ag ii lamadmana. Da amu ii hepa amunu, danab ah amu ag daanna, ag am danab nug qaun qettippa guittak medatte bia, ag eheɗ hadappeppeg, ahilkad kayak am pelem bia, ag aguppa tena, eheɗ aoglagnu daaglag,’ awe ami. ⌊Am gemu anamib daakku⌋,” awa aum.

⁴ Yawenu engel nug nai amu Israel danab ah oh amelagppa mattia male amu, Israel danab ah ag huana gaappig.

⁵ Ag gaan, ag aben amu onig, “Bokim,” ataɗppig. Amu appa ag doɗ manadna, Yawe medappig.

Josua mauhomnu nai

⁶ Josua nug danab ah maatte gona, Israel dilag huu okkai anen anen ag wan Josua nug laikkud ele ag madappig amu, ag aon, ag aulag daakkunu goppig.

⁷ Ag anam hena, Israel ag Josua bau dayom haenppa, amu nug mauhom dimppa ele ikki danab ag Josua nug bau dayeye, oh daana, ag Yawe Nug Israel dilagnu keeke okkai okkai he anidppig, ag ele bau daappig, ag ii mauhppig, haen amuppa amu, Israel ag Yawe waappa daan, Nug oɗe dim lamidppig, ⌊amge amu dimppa Israel ag ib apiɗidna oippig⌋.

⁸ Aakku Nan bekka Josua, Yawenu maɗi nid, nug maɗ 110 ele daya, nug mauhom.

⁹ Ag nug Israel danab ah wan nug aug daakkunu medappig, amuppa boumppig. Wan amuam Timnat Sera, appa dayom. Timnat Sera am qauko Gasnu yawalti uɗitteppanu, Epraim wanppa, qauko qauko daatteppa dayom.

Israel danab ag Yawe oɗe ii dim lamidppig

¹⁰ Aria, danab menuattak huu laippu bia amu, ag oh mauheg, menuattak baula bena, ag Yawe Nug keeke okkai okkai Israel dilagnu heum ii anidnana, ag nuhignu ele dab-ii-meppig.

¹¹ Israel ag anam hena, ag Yawe noobppa nuhig neekkakppa eheɗ henana, kayak hambuppuak Bal iɗu iɗu waalagppa daan, oɗelag dim lamidppig.

¹² Ag Yawe, Nug ag mamelkad aɗi dilag Kayak, Nug Israel Isipnu diia, omalatte uɗippig amu, ag Nug uuidppig. Ag kayak laala, danab ag taliliattak daappig, ag amu dilag kayak dim lamadnana, ag amu noolagppa dup nona binalag meppig. Amuppa ag heeg, Yawe Nug oppoɗi beum.

¹³ Ag Yawe uuidna, ag kayak hambuppuak Bal, amu kayak hambuppuak Astoret iɗu iɗu ele waalagppa daan, ag oɗelag dim lamidppig.

¹⁴ Ag anam heeg, Yawe Nug Israel dilag oo nauhak okkai doyom amunu, Nug ag diia, danab ag ban hena, danab aqadna, ahilkad keeke aotteb amu, Nug ag eppelagppa me, ag ahilag keeke aoppig. Nug ag diia, kekeɗ taliliadna daappig ele ag eppelagppa meum amunu, ag ban hena, baula kekeɗ eɗadkkulagnu elele iitta daappig.

¹⁵ Israel ag ban hekkulagnu ahan godappig, amu Yawe Nug anam hekkunu nai ɠagattag qetta aum bia, ag ippulag oo neene, kekeɗ ag eɗadttappig. Anam heehe, danab ah ag oolagppa uug naunab dooppig.

Yawe nuhig danab ah qagaiettakppanu eɗua diiom

¹⁶ Amu dimppa Yawe Nug epeɗiak danab laa ag Israel danab ah ehanatteg, ag kekeɗ eppelagppa ii daamnanu tituanatta, ɠagattag matte, ag ehanatteg, Israel danab ah ag danab ag ban hena, danab aqadna, ahilkad keeke aotteb amu, ag ag eppelagppa ii daappig.

¹⁷ Yawe anam heum, me Israel ag daulag human, ahilkad epeɗiak danab dilag nai ii dooppig. Iitta. Ag kayak laala noolagppa dup nona binalag meppig. Ag pahanab ag mamelkad aɗi dilag ib apiɗidna, laih goppig. Ag mamelkad aɗi amu, ag Yawenu haknunab anak dim lamidttappig, amge ag dimulkadppan, ag anam ii heppig.

¹⁸ Am haen Yawe Nug epeɗiak danab laa Israel dilag qappom amu, nug epeɗiak danab amu ele daayya, epeɗiak danab amu nug bau dayaya oiyom, haen amu ohppa Yawe Nug danab ah ehanatte, ag kekeɗ eppelagppa ii daappig. Aɗinu Yawe Nug epeɗiak danab anam he beppig? Haen nuhikkud danab ah ag kekeɗ eppelagppa daaeg, kekeɗ ag eheɗ hattana, guittak mattegeg, ag gaaegeg, Yawe Nug nuhikkud danab ah dilagnu oo bodoetta le meum.

¹⁹ Amge epeɗiak danab anen anen ag mauheg amu, danab ah ag eɗun, hak naunu ibppa wana, ag kobol diig ena iitta uɗig wak ele mamelkad aɗi hedappig, amu eɗittak henana oippig. Ag kayak laala dim lamadna, ag waalagppa daan, ag oɗelag dim lamidna, ag noolagppa dup nona binalag ele meppig. Ag ahilag eheɗ hak ii uueg, ag Yawe oɗe dim lamidmananu, ahilag dabmak ɠagattag eppom.

²⁰ Ag anam heppig amunu, Yawe Nug Israel dilagnu oo huana nauhom. Nug oo nauhe, Nug aum. “Danab ah imu ag nug tituana nai qakkak, da hei, da ag mamelkad aɗi ele hemut amu, ag amu tippalna, ag dahil nai ele ii doon oiyegeg uɗie, gemu ele anam hetteb amunu,

²¹ diig amunu da Kanan wanppa, Kanan danab ag ahilag wanppa daaegeg, ag Israel ag Josua bau dayeye, ii lamadppig ele amu, gemu ⌊ag Israel ag oolag ii eɗun oitteb ele, haen oh ag anam hekkulag amu,⌋ da heppi, ag kekeɗ amu ii lamadmana,” awa aum.

²² Yawe anam ha, amu Kanan danab, amu dilagppa, Nug he, Israel ag, ag mamelkad aɗi ag Yawe oɗe dim lamidna, nuhig ib genab dim lamidppig, ag amubia hekkulagte, o iittate ma anttak mattom.

²³ Anam amu, Yawe Nug Kanan wanppa danab huu anen anen, ahilag wan obatak laala eleppa daappig ele, Nug paɗatte daappig. Nug he, Israel ag paha danab amu ii lamadppig. Ge, Josua dayeye, Nug nug eppegppa ii meum.