Ikki Danab 19 - Nobonob Baibel

Danab laa nug Lewi buɗubppan mana mettak danab iitta, nug ag oolagppan laa amu, nai imuam nug, nug wau amge waunab iitta ele dilah nai

¹ Amu haen amuppa Israel ag ahilag king laa iitta. Amu haen amuppa ele, danab laa nug Lewi buɗubppan mana mettak danab iitta, nug amu oolagppanu, nug Epraim wanppa, qauko qauko daattebppa, aben laih umanab appa dayom. Anam daya amu, deɗ laa nug uɗia, ah laa, Juda ted, Betlehem appanu, nug ah laa, nug wau amge waunab iitta daakkunu awa, omala aabppa ukkom.

² Omala ukkom, amge ah amu nug gamunu oo aeg be, nug eɗua Betlehem, mameg laugppa ukkom. Betlehem amu Juda wanppa daatte. Nug anam he, kalam waɗele ukke amu,

³ gamu nug maɗi nid laa awa, donki aɗit laa ele diia, Betlehem ukka, ah amu eɗua uɗikkunu oɗ medakkunu ukkom. Haen nug ah mameg laugppa te, ah nug omala, lag ooppa no, mameg nug gamag ahak ele danab amu nug ele laippu dayaknu ooppa eleleib doyom.

⁴ Ah mameg, nid amu tana amu, nug anam ha, nug danab amu appa nakok laa ele daakkunu wagai meum amunu, nug ee, le ele lanana, deɗ ewam appa niiom.

⁵ Deɗ waɗeleppa amu, ag oh buttuanab ahan, danab amu nug gokkunu babaittom, amge ah mameg nug nug tana amegppa aum. “Na ɠagattag aokkutnu ee laa aon lawona ukke!” awa aum.

⁶ Nug anam aum amunu, aa oh heɗep neya daayya, aa ee, le ele layaya, ah mameg nug aum. “Na tuqan imu ele daan, gamag ahak awe!,” awa aum.

⁷ Am danab ⌊nug dayak uua,⌋ nug gokkunu ahom, amge nug tana, nug daakkunu wagai maamaib dayom amunu, nug aakku oo me, tuqan amu dayom.

⁸ Aria, deɗ tanig eleppa buttua amu, nug gokkunu ahe, ah mameg nug baula aum. “Na ɠagattag aokkutnu ee lawona, tueb amu na gokkut,” awa aum. Awa a amu, aa oh daayya, ee lapiɗ.

⁹ Aa anam heeh ukke, tueb mekkun heehe, danab nug, nug wau amge waunab iitta, amu maɗi nid ele ag gokkulagnu babaittegeg, danab amu tana, ah mameg amu, nug aum. “Antte, imu uudotte. Na tuqan imu ele daan, gamag ahak awe! Butti buttuanab ahan gokkut,” awa aum.

¹⁰ Ah mameg nug anam aum, amge haen imu amu, danab nug gokkununab ahom amunu, nug donki attan dayaknu keeke diia, nuhig donki aɗit attan maatte, aakku nug, nug wau amge waunab iitta, ⌊amu maɗi nid ele,⌋ ag goppig. Ag danab ag aab Jebus, amuppa gotteb ele, ag ib amu aon goppig. Aab amunu amu, gemu ag Jerusalem atteb.

¹¹ Ag anam gona, ag tueb aab Jebus gukkuidna tena, Lewi danabnu maɗi nid, nug nug amegppa aum. “Ukkaknu amu ukka, tueb ma, uudokkun hette. Ig tuqan imu aab okkai imuppa, Jebus danab ah daattebppa daatu!” awa aum.

¹² Nug anam a amu, nuhig okkai, Lewi ted, nug aum. “Anam iitta. Ig aab okkai imuppa, wan laihnu danab ele ii daamta. Am Israel danab ah ag ippa ii daatteb. Ig tuɗidta, Gibea gokkunig,” awa aum.

¹³ Nug anam awowa, nug nai tuɗitta aum. “Ahappe gota, ig geha Gibeate, iitta Ramate appa, ig tuqan imu appa daagnignu aben laa anidkkunig,” awa aum.

¹⁴ Nug anam a, ag tuɗidna goppig. Ag ukkaegeg, aam noono, ag Gibea gukkuidna wappig. Gibea am Benyamin dilag wanppan aab laa.

¹⁵ Ag appa tena amu, ag tuqan amu appa daaglagnu tena, appa daaglagnu dabmenan daappig. Ag appa tena, anam hekkulagnu dabmenan daan, ag gona, aab okkai haɗap-ppa heɗep nena daappig, amge auntai laa nug ag tuqan amuppa nug ele daaglagnu oɗ ii mattom.

¹⁶ Anam dayom, amge haen nakokib ukke, dimppa danab kaino laa nug nuhig dad okkai uɗatppanu laugppa uɗiom. Nug Epraim wanppa, qauko qauko daattebppan danab, amge nug ukka, Gibea, Benyamin danab ag appa daappig amu, nug appa dayom.

¹⁷ Nug uɗia, oiyak danab ag aab okkai haɗap-ppa daaegeg anatta, nug ag adeppanu, amu ag adeppa gokkulagnu daatteb anan oɗ mattom.

¹⁸ Nug ag oɗ matte amu, danab nug Lewi buɗubppan mana mettak danab iitta, nug ag oolagppan laa amu, danab amu nug nob ma aum. “Ig am Betlehem, Juda wanppanu uɗimut. Ig appanig am uma Epraim wanppa, qauko qauko daattebppa daatte, amu ig gemu Yawenu mettid haknu peh lag, amuppa ⌊gowota, Epraim wanppa appa⌋ gokkunig hettem. Amge auntai laa ig tuqan imuppa nug ele daagnignu laa ii aum.

¹⁹ Ig am keeke oh ihinignu elele. Ig, nahipad maɗi nid, amuam da, maɗi ah nahip, am nid danab bau ele, ig ihinig ee, bret, wain ele, amu donki dilahnu keeke ele elele, amge laa nug ig nug ele daagnignu ii aum,” awa aum.

²⁰ Nug anam a amu, danab kaino nug nob ma aum. “Ag da ele daagnignu amu, da oolppa eleleib doottem. Ahilag ee keeke, donki dilag ee keeke ele, da ag madakkul. Amge ag aɗi keeke hekkulagnu dabmekkulag amu, ag tuqan imu haɗap imuppa daaglagnu aib dabmena heppig,” awa aum.

²¹ Nug anam anana, nug diia laugppa ukka, nug donki ahilag ele mattom. Nug anam hewowa, nug oippig ele le matte, ag baelag ihaeg, ag oh daanna, ee lappig.

²² Ag daanna, gamag ahak doon, nug gamag aon heegeg amu, nau hak danab laa aab okkai amuppanu, ag lag eidna talilidna daanna, ag digmena od huanaknab qeqalnana, danab kaino, lag amu mameg, ag nug onigppa eppig. “Na danab uɗie, na ele daattep aon doppe, ig nug ele gappai aotu!” anana eppig.

²³ Ag anam heegeg, aakku lag mameg danab kaino nug ag ele nai mattiglagnu dimittim doa, nug aum. “O lailad, iitta; ag kobol nau uɗig wak ele imu aib heppig. Danab imu nug dahil ɗo uɗiom; ag atteb ele amu, amuam kobol uɗa nak nau guittak ele amunu, ag aib heppig.

²⁴ Antteg! Da, da aɗel makkun imu, amu danab imu wau amge waunab iitta ele geha iikku diiaten, dimittim doppi, ag ahilahppa aɗi hekkulagnu amu, ag hekkulag, amge ag kobol uɗa nak nau guittak ele danab imuppa aib heppig!” awa aum.

²⁵ Nug anam aum, amge ag nug oɗe ii dooppig. Aakku Lewi ted nug nug wau amge waunab iitta awa, od matula he, dimittim wa, aab amuppan danab ag tuqan amuppa, nuhig ahppa eheɗ nau heppig. Ag kuɗum ag wagai mena, nug beɗuppa ukkak nug ele hena, ag anamib tuɗid ele henana, kobol nau laala nuhigppa ele heegeg wagɗom. Ag anam heegeg ukke, haɗaedette, ag nug aakku uuitteg ukkom.

²⁶ Wagɗe buttuanab ag nug uuitteg ukkom amu, ah nug eɗua, lag gamu dayomppa appa ukkom. Ukka, nug lag odppa ukka, na qa niieye, aam ba amahalom.

²⁷ Nug anam niieye, aam be, haen gamu nug gokkunu aha, od matula amu, nug wau amge waunab iitta appa niieye anttom. Nug oo eɗi noa, eppekuɗ od ukku attan maatom ele niieye anttom.

²⁸ Nug anam antta, nug amegppa aum. “Ahe! Ahappe gotu!” awa aum. Nug anam aum, amge ah nug oɗeppa ii awom. ⌊Gamu nug wau amge waunab iitta nug anam he antta, nug ah amu mauhom doya,⌋ nug aakku gaɗa awa, donki attan ma awa, appagppa ukkom.

²⁹ Nug appagppa ukkowa, nug qep laa awa, nug wau amge waunab iitta, nug ah amu gaɗa otaɗe, maha 12 neppig. Nug anam hewowa, nug gaɗa maha amu pania, Israel dilag huu okkai anen anen Israel ooppan amu, ahilagppa me ukkom.

³⁰ Nug anam he, laa oh ag anidppig ele ag appig. “Israel ag Isipnu ahan uɗippig uɗie, gemu batak kobol uug ele anam laa iinab beum. Ig amunu nai mattit, kobol laa iite hemata?” aon appig.