Ikki Danab 18 - Nobonob Baibel

Israel dilag huu okkai Dan, amun danab ag gatelag qaun ona, dup nona, kayak hambuppuak binalag meppig

¹ Haen amuppa Israel danab ah ag ahilag king laa iitta. Amu Israel dilag huu okkai Dan, amuppan laala ag Josua laikkud ele ag wan Dan buɗub daakkunu panin madappigppa daaglagnu, ag aulag dayeb, bekkalkad aɗi mattaglagnu aben ii anidppig amunu, ag wan adekku aon daaglagnu, ag amu mattin daappig.

² Ag anam heegeg, Dan danab aab Sora amu Estaol ele, appanu ag ban danab ɠagattag tanig ele, ahilag aab ikkippan otiadna, maatteg gona, ag lokkumakppa atu italna oinna, ag wan adekkuppa daaglagnu neegna oippig. Ban danab ɠagattag amu ag oinna gona, Epraim wanppa, qauko qauko daattebppa tena, ag ukkaeg, Maika laugppa, appa tuqan laippu nug ele daappig.

³ Am ag nid bau, nug Lewi buɗubppan mana mettak danab iitta oolagppan laa, ag nug nai mattieye, ag nug baag am laa doon, ag nug omalna laih wana oɗ medappig. “Aun na awitta, ippa uɗiom, am na ippa aɗi hettem? Na aɗinu ippa daattem?” anana oɗ medappig.

⁴ Ag anam oɗ mettaeg, Nug ag amelagppa Maika nug nuhignu aɗi aɗi ele heehe anana, nug aum. “Maika nug da awiɗa he, da mana mettak danab daattem,” awa aum.

⁵ Nug anam amelagppa mattie, ag nug amegppa appig. “Na Kayak oɗ medappe, ihinig oiyak imuam meu ena okkutai, o iittatai ab doon, na ig appe doognignu oɗ medattem,” aon appig.

⁶ Ag nug anam hekkunu oɗ mettaeg, nug anam ha, ag amelagppa aum. “Yawe Nug ahilag oiyak amuppa am, Nug anuqa ukkebeb gokkulagde! Ag maɗoɗ aon oiyeg!” awa aum.

⁷ Nug ag anam amelagppa aum amunu, danab tanig ele amu ag tuɗidna, aab Lais goppig. Aab Lais appa amu, danab ah appanu ag Saidon danab ah daappig bia, ag baɗak iittappa daaegeg anidppig. Ge, Lais danab ag uug laa bekkunu dab-ii-mena, ag baɗak iittappa daaegeg anidppig. Danab ah appanu ag keekenu elelenab daappig. Aɗinu? Ahilag wan amu ittag ena ele. Ag am Saidon guguittak iitta, piɗenab daappig, ⌊amunu Saidon danab ag ag ehanadkkulagnu elele iitta daappig⌋, amu ag ehanittak laa miag appanu aoglagnu amu, ag qakub mak daappig.

⁸ Ag anam anidna, ag eɗun appalagppa goppig. Danab ag eɗun Sora, Estaol ele ukkaeg amu, ag lailkad oɗ madappig. “Ag aɗi laa anidppigte?” aon oɗ meppig.

⁹ Ag anam oɗ mattaeg, amu danab amu ag nob mena appig. “Ig wan laa, wan amuam enanag anidmutde! Amunu ahappeg, ig banelag gota, ban hekkunig! Ag gona, wan amuppan danab ele ban henana, ahilag wan aon, ahilag daakkunu aib dabmak aɗit aoppig. Awaknuib dabmena heig!

¹⁰ Haen ag appa wana amu, ag danab appa daatteb ele ag uug laa ahilagppa bekkunu ii dabmetteb anadkkulag. Kayak Nug ig wan okkai ittag ele mekkom. Keeke laanu tutu iinab memata!” aon appig.

¹¹ Ag anam amelagppa aeg doon, ban danab 600, Israel dilag huu okkai Dan amuppan, ag ban haknu keeke ahilkad aɗan daappig amu, ag, ag baelkadppan, doɗ ahilkad oh ele aab Sora, Estaol ele appanu, ahan goppig.

¹² Ag gona, Juda wan ooppa, Kiriat Jearimnu qaban uɗitteppanu, aben amuppa ag haen tutu dayaknu aab kalappig. Amu diig amunu aben amunu onig am Mahane Dan ataɗppig; gemu ⌊nai imu yaak haenppa⌋ ele, ag anam atteb.

¹³ Appanu ag ahan, Epraim wanppa qauko qauko daattebppa tena, ag Maika laugppa wappig.

¹⁴ Ag appa gona tena, danab tanig ele ag tatam lokkumakppa Lais atuppa gona italppig ele ag, ag laa amelagppa appig. “Uppa uma lag laappa amu, lamen enanag-epod laa, kayak hambuppuak dottolkad danab ag laulkadppa maatteg daatteb, kayak hambuppuak dottog laa adppa hoiyak, aria kayak hambuppuak dottog laa, silwappaib hak laa ele daatte amu, ag doottebte? Am ag attem haknu amu, ag dabmena hekkulag,” aon appig. ⌊Ag anam aeg amu, Dan danab ag kayak hambuppuak amu ele akkan gokkulagnu dabmeppig.⌋

¹⁵ ⌊Ag amu heppig⌋ amunu, danab tanig ele amu, ag Maika laugppa nid bau, nug Lewi buɗubppan mana mettak danab iitta, nug ag oolagppan laa amu, ag nug gumidna tena, ag nug humidppig.

¹⁶ Ag anam heegeg, ban danab 600 ag Israel dilag huu okkai Dan, amuppan, ag bannu keeke ahilkad aɗan daappig amu, ag aɗnu odppa dimittim hippaidna daappig.

¹⁷ Aakku lokkumakppa atu italak danab tanig ele ag tena, nug humidna, ag kayak hambuppuak dottog adppa hoiyak, lamen enanag-epod, kayak hambuppuak dottolkad danab ag laulkadppa maatteg daatteb, amu kayak hambuppuak dottog silwappaib hak amu ele agappig. Ag amu heegeg amu, mana mettak danab amu, aria ban danab 600, ag bannu keeke ahilkad aɗan daappig amu, ag oh aɗnu odppa daappig.

¹⁸ Mana mettak danab nug danab amu ag Maika laug ooppanu, ag kayak hambuppuak dottog adppa hoiyak, lamen enanag-epod, kayak hambuppuak dottolkad danab ag laulkadppa maatteg daatteb, amu kayak hambuppuak dottog silwappaib hak amu ele akkaegeg anatta, nug oɗ mattom. “Ag aɗi hetteb?” awa oɗ mattom.

¹⁹ Nug anam a, ag appig “Na toettan daan, uɗippe, ig ele gotu! Na ig mamenig bia daan, na ig aɗi hekkunignu appe doopput, na ihinig mana mettak danab ele daakkut. Na Israel dilag huu okkai imu oh dilagnu mana mettak danab laa daakkut dayeb amu, amuam na danab laippu laugppan mana mettak danab dayaknu iite eɗidma?” aon oɗ medappig.

²⁰ Ag mana mettak danab nug ag ele oh gokkulagnu oɗ medappig, nug amunu oo heum amunu, nug lamen enanag-epod, kayak hambuppuak dottog adppa hoiyak, amu kayak hambuppuak dottolkad danab ag laulkadppa maatteg daatteb, amu ele amu nug ag eppelagppanu eɗua awe, oh goppig.

²¹ Dan danab amu ag ahilkad nid naunau, doɗ, keeke, amu keeke laala oh diin, ag noolagppa maatteg, ag ahan ukkaegeg, daup 600 ag dim lamadppig.

²² Am haen Israel dilag huu okkai Dan danab, ag Maika laug uuidna, nakok uma bia ukkaegeg amu, Maika nug nuhig mudippan laippu nug gukkuidna daatteb ele, nug ag onilagppa e doeg, ag Dan danab amu dim lamadna gukkuadna goppig.

²³ Ag gona gukkualadnana amu, ag gonana, enan wappig. Ag anam heegeg, Dan danab ag eɗun aon, Maika amegppa appig. “Na aɗinu oot daatte amunu, na danab imu oh onilagppa e ukkan qagmena, ahan ig dim lamigna banenig uɗippig?” aon appig.

²⁴ Ag anam aeg, Maika oɗelagppa awa aum. “Ag aɗinu, ‘Na aɗin oot daatte?’ anana oɗ meɗatteb? Ag kayak dahilad oh akkan, mana mettak danab dahil ele aon uɗieg, dahilnu keeke laa iittanab, hamunab daattem!” awa aum.

²⁵ Nug anam a, Dan danab ag appig. “Na madittem amu, ig oonigppa laala oppoɗilag paha paha bette ele amunu, ag oppoɗilag beeb, ag na, amu na baenadppa ele aqappeg mauhmanade dabme!” aon appig.

²⁶ Dan danab ag anam nug amegppa awona, ag nug uuidna goppig. Maika nug ag am kuɗumnab, nug banelag ha, eɗadkkunu elele iitta anttom amunu, nug eɗua, aabppa ukkom.

²⁷ Aakku Dan danab ag Maikanu hambuppuak kayak akkan, nuhig mana mettak danab ele aon, ag aab Lais goppig. Appa amu danab ah ag maɗoɗ ele daanna, ag uug laa ahilagppa bekkunu ii dabmeppig. Dan danab ag wana, banelag hena, ag appan danab ah oh aqan, ag aab okkai amu manaeg ewa, iitta meum.

²⁸ Lais danab ah ag am Saidon guguittak iitta, piɗenab daappig; ag ehanittak laa miag appanu aoglagnu am qakub mak daappig amunu, laa ag ehanadna, Dan danab eppelagppanu diiglagnu am iitta. Ahilag aab okkai amuam oolnu noak Betrehop, appa beum. Dan danab ag Lais danab ah aqadna, aab okkai manaeg ewe, dimppa Dan danab ag aab okkai amu baula kalan, aguppa daappig.

²⁹ Ag alalag Dan, Israel bekka, nug onig, amu aab okkai amu onig meppig, amge aab okkai amu onig tatam am Lais.

³⁰ Dan danab ag anam hena, ag kayak hambuppuak dottolkad amu qappattona, ag Gersom bekka Jonatan, nug am Moses buɗubppan, nug ahilag mana mettak danab daakkunu otippig. Gersom bekka Jonatan, nug buɗub ele ag Israel dilag huu okkai Dan dilag mana mettak danab haen amuppa digmena henan daaegeg uɗie uɗie, Asiria ag uɗin, diin ukkaeg, wan laappa diia ukka laih me dayak danab daappig batak.

³¹ Amunu Israel dilag huu okkai Dan, amuppan danab ah ag Maikanu kayak hambuppuak dottolkad noolagppa dup nona binalag meppig. Haen Israel laa ag Silo appa Kayaknu peh laugppa Kayak binag meppig, Dan ag haen amu oh kayak hambuppuak amu binalag meppig.