Ikki Danab 17 - Nobonob Baibel

Maikanu kayak hambuppuak dottolti

¹ Danab onig Maika, nug Epraim wanppa, qauko qauko daatteppa daattom.

² Deɗ laa nug anig amegppa aum. “Na yabhoi danab laa 13 kilogram silwa nahip yab awe, na nug eheɗ laa awaknu anak waappa daakkunu amenu amu, na mattieye da doomi. Silwa amuam iikku daatteb. Da aakkuib keeke amu akkami,” awa aum. Nug anam anig amegppa a, ⌊eheɗ laa awaknu anak waappa daakkunu meu bemanu⌋, anig nug aum. “O nid dahil, Yawe Nug na itittaɗ!” awa aum.

³ Nug silwa amu eɗua, anig mette, nug aum. “Gemu amu, genabnab genab da silwa dahil imu da bekkal awa, kayak dottog laa adppa hoiyaknu, kayak dottog laa silwappaib hak ele hekkunu, da silwa imu Kayaknu daakkunu tituanen, Yawe medattem. O da bekkal, da na amu hekkutnu eɗuen, silwa imu na eppenppa mettem,” awa aum.

⁴ Anig nug anam he, Maika nug eɗua, anig silwa amu mette, anig nug 2.3 kilogram silwa awa, keeke silwappa hak danab toppa ukka mette, danab amu nug awa, dottog aɗit he nepiɗ. Laa nug aab aɗuppa me, silwa le me, dottog daakkunu keekeppa gokkaɗom. Laa nug dottog adppa hoiyom. Nug amu he, dottog aɗit amu Maika laugppa maatak daapiɗ.

⁵ Amu danab amu, Maika, nug mettid lag nakok ele, amu nug lamen enanag-epod laa ha, kayak hambuppuak dottolkad danab ag laulkadppa maatteg daatteb, nug amu ele hattom. Anam hewowa, nug bekka laa nug nuhig mana mettak danab daakkunu uɗat mettom.

⁶ Haen amuppa Israel appa king laa iitta amunu, danab oh ag akka anen anen, ag kobol attem am ena dabmeppig amu, ag anamib heppig.

⁷ Deɗ laa amu, Lewi buɗubppan mana mettak danab iitta, ag oolagppan nid bau laa nug Israel dilag huu okkai Juda, appa, Betlehem aabppa, appa Juda oolagppa daya,

⁸ nug aab amuppanu aha, Epraim wanppa, qauko qauko daattebppan uɗiom. Nug aben ena laa antta, amuppa daakkunu mattia oiyom. Nug wan amu obata ugakka, nug ukka, Maika laugppa teum.

⁹ Nug te, Maika oɗ mettom. “Na am adeppanu?” awa oɗ mettom. Oɗ mette amu, nug aum. “Da am Lewi buɗubppan mana mettak danab iitta, da ag oolagppan laa; da Juda uppa, Betlehem appa daattem. Da daakkulnu aben madittem,” awa aum.

¹⁰ Nug anam a, Maika amegppa aum. “Na ippa da mamel, mana mettak danab dahil ele daappe, da geha na maɗ laib laib ohppa 110 gram silwa medakkul; amu lamen keeke, amu ee lanaknu ele medakkul,” awa aum.

¹¹ Nug anam a, aakku nid bau amu, nug Lewi buɗubppan mana mettak danab iitta, ag oolagppan laa amu, nug Maika ele daaglahnu oo elele daye, nug Maikanu nid bia dayom.

¹² Nug anam daakkunu oo daye, Maika nug nuhignab mana mettak danab daakkunu uɗat mette, amu Lewi danab nug aakku Maika ele daapiɗ.

¹³ Lewi buɗubppan mana mettak danab iitta, amu oolagppan nid bau amu nug Maika laugppa dayom amunu, Maika nug aum. “Mana mettak danab imu nug da aɗi keeke Yawe medakkulnu daatte, amu medatta, mana mettak danab ag aɗitai keeke laa dahilnu helob, nug hette amunu, gemu da doottem, Yawe Nug geha da itiɗkku,” awa aum.