Ikki Danab 16 - Nobonob Baibel

Samson Gasa aɗnu od mautatom

¹ Deɗ laa Samson nug Pilistia dilag aab Gasa appa ukka, tuqanppa am ib baag ah laa ele daapiɗ.

² Nug appa ukka dayeye amu, Gasa danab ag Samson appa daatte aeg doon, ag tuqan amuppa aab okkainu aɗnu od guguittak, laih laih ohppa daan, appa ag nug meidna daappig. Ag tuqan amu toettan daanna, ag akka akka nug amegppa mattin appig. “Haɗaetta uɗiebeb amu, ig nug qepput mauhkku,” aon appig. ⌊Amge aabnu aɗ od lok qakkan malappig doon, “Buttua od matulppeg dimittim dokku,” anana, aakku meidna elele ii daappig.⌋

³ Appan danab ag dabmak amu aoppig, amge Samson nug ah amu ele tuqan oh ii daapiɗ. Iitta. Nug daye ukke, tugmag me, nug aha, aab okkainu aɗnu od aɗit, amu aen maha laa ɠagattag, od lok qaknu amu ele aɗalata, biidod aɗit wanppanu hiɗalata diiom. Nug hiɗa awa, keeke amu oh gugappa ma, nug danab Hebron gokkunu gotte bia ha ugakka, qauko nakok laa, amu igippa ta appa meum.

Samson Delaila ele

⁴ Nug anam hewowa amu, dimppa Samson nug ah laa onig Delaila anttom. Antte ukke, nug nuhignu oo mauhom. Ah amu nug oolnu noak onig Sorek, appa dayom.

⁵ Anam be, Pilistia dilag ikki danab ag dimppa, Samson nug nuhignu oo mauhtte doona amu, ag ah amu gumidna gona appig. “Na Samson nug aɗi ha, nug ɠagattagnab ele daatte, amu nug attem heta eɗidta, ɠagattag qakkata auttanab aognig, na amu anidna appe dootu! Na anam heppe amu, ig anen anen geha na 13 kilogram silwa mettagnig,” aon appig.

⁶ Ag anam Delaila amegppa aeg, nug Samson amegppa aum. “Na aɗinab hena, ɠagattagnab daattem, amu attemnab na ɠagattag hippalittak daakkut amu, na amu appe dookkulnu oɗ medattem,” awa aum.

⁷ Nug anam oɗ mette amu, Samson nug aum. “Am laa ag da lat oɗ eblaih aɗit ele, heeg ii qaɗaiettom, ag amuppa hippaliɗna autna aoglag amu, da laa oh eɗattak, ɠagattag ele iittanab daakkul,” awa aum.

⁸ Nug anam a doya he, Pilistia ikki danab ag lat oɗ bau eblaih aɗit aon uɗin, Delaila mettaeg, nug Samson amuppa hippalom.

⁹ Pilistia danab laala ag nug laug oo laa amuppa lokkumna daappig amunu, nug ewa aum. “Samson! Pilistia ag na aɗaidkkulagnu uɗippig!” awa eum. Nug anam eum, amge Samson nug lat oɗ amu string muɗi aabppa amoteg ewe, danab uug iitta pagutte bia, nug uug iitta pakkuom amunu, Pilistia danab ag diig aɗinu Samson nug danab ɠagattagnab dayom amu, ag diig amu lokkumak dayeye, ii dooppig.

¹⁰ Samson nug anam he, dimppa Delaila amegppa aum. “Na he, da danab noolagppa duan doomi; na da buppuiɗme! Gemu amu na attemnab ɠagattag hippalittaknu amu appe dookkulnu oɗ medattem,” awa aum.

¹¹ Nug anam a, Samson nob ma aum. “Am laa nug da hoh baunabppa ɠagattag qakkiɗeb amu, da laa oh eɗattak, ɠagattag ele iittanab daakkul,” awa aum.

¹² Nug anam amegppa aum, amu Delaila nug hoh baunab diia hippalom. Am danab ag haen tatam laa lag ooppa lokkumna daappig bia, ag lokkumna daaegeg, Delaila nug baula ewa aum. “Samson! Pilistia danab ag na aɗaidkkulagnu uɗippig!” awa eum. Nug eum, amge Samson nug hoh eppegppan tret muɗi bia hamu pakkua diiom.

¹³ Samson anam he, aakku Delaila nug aum. “Na heehe, da danab noolagppa duan dooiyi, na da hambuppuiɗnan daame! Gemu amu na attemnab ɠagattag hippalittaknu amu appe dookkulnu oɗ medattem?” awa aum. Nug anam a amu, Samson nug aum. “Da ikkil uɗug am akkak eblaih aɗitppa daatte. Amu na ikkil uɗug amu akkak aon, na lamen otala ele keeke haɗittod okkai bia, na amuppa hettem ele amu, na da ikkil uɗug, lamen nahip amu ele oh oohona akkan, tutuippa atulna, ɠagattag qagakkut amu, da laa oh eɗattak, ɠagattag iittanab ele daakkul,” awa aum. Nug anam aum amunu, nug niieye, Delaila nug ikki uɗug akkak eblaih aɗit ele lamen otalakppa ele akkom.

¹⁴ Nug akka malowa amu, lamen akkak amu tutuippa atule, ɠagattag eppom. Nug anam ha malowa amu, nug baula ewa aum. “Samson! Pilistia ag na aɗaidkkulagnu uɗippig!” awa eum. Nug eum, amge Samson nug aakku aha, nug ikki uɗug lamenppa ma, amu ele akkak keeke haɗittod okkai biappa dayom amu, nug amuppanu ikki uɗug eeɗa awom.

¹⁵ Anam daye, Delaila aum. “Na dahilnu oot mauhttenu attem, amge iitta. Na dahilnu anam doolomlob, na da amelppa keeke ohnu madippe doolom. Na haen ewam iikku, danab noolagppa duan meɗame. Na da amelppa aɗinab hena, ɠagattag ele daattem amu ii ame,” awa aum.

¹⁶ Deɗ oh nug ge iitta anam mattieye, Samson oo bahi ya autanab awom.

¹⁷ Anam amunu, Samson nug nuhig lokkumak keeke oh aakku amegppa aum. Nug aum. “Da ikkil uɗug am ii otaɗak daye uɗiom. Amunu diig am, da anai ooppanu doi, haen amuppa uɗie, gemu ele anamib Kayaknu danab, Nasarait atteb, daattem. Laa nug da ikkil uɗug otaɗlo amu, dahil ɠagattag uuiɗa ukkeb, da laa oh eɗattak, ɠagattag iittanab ele daakkul,” awa aum.

¹⁸ Samson nug anam a, Delaila nug aakku doyom, nug nai genabnu mattiom amunu, nug Pilistia ikki danab dilag nai me ukkom. Nug aum. “Ag haen laippu laa ele uɗieg! Nug aakku nai oh amelppa mattiom,” awa aum. Nug anam aum amunu, Pilistia ikki danab ag eɗun uɗin, ag men doɗo ele aon uɗippig.

¹⁹ Uɗieg, Delaila nug Samson tuɗippa nii medette, niieye amu nug danab laa a doa, ikki uɗug otaɗom. Danab nug ikki uɗug otaɗom, amuppa Delaila nug nuhig ɠagattag he uuittom.

²⁰ Am danab nug ikki uɗug otaɗa male amu, Delaila nug ewa aum. “Samson! Pilistia ag na aɗaidkkulagnu uɗippig!” awa eum. Nug anam e amu, Samson nug aha amu, nug dabmeum. “Da hettem, anam hein uhuqak aokkul,” dabmeum. Nug anam dabmeum, amge nug Yawe uuitta ukkom amu, nug ii doyom.

²¹ Samson anam daye, Pilistia ag nug aɗan, nug ameg doɗo kehatppig. Ag ameg doɗo kehatna, ag nug aon, Gasa gona, bras senppa qakkan, maniguittakppa mena heeg, nug ee aeg ganuɗaknu men okkai itoɗiaya dayom.

²² Amge nug amu haaha dayeye, ikki uɗug digma beum.

Samson nug Pilistia eɗattom

²³ Samson nug anam daye, Pilistia dilag ikki danab ag deɗ laa gamag ahak okkai hena, ag doɗ kuɗum manadna, ahilag kayak Dagon mettanna, ag nug humidnana appig. “Ihinig kayak nug he, ig kekeɗ ihinig Samson eɗidmut!” aon appig.

²⁴ Ikki danab ag anam heegeg amu, danab ah ag ⌊ahilag kayak Dagon dottog⌋ anidnana, ag appig. “Ihinig kayak nug ihinig kekeɗ awa, eppenigppa meum! Laa wan ihinig he, nauhaknab daye, ihinkad danab kuɗum laa ele aqom amu, gemu ig eppenigppa daatte!” aon appig. Ag ahilag dabmakppa ahilag kayak nug anam heum doon, ag diig amunu binag meppig.

²⁵ Am danab ah appa daappig amu, ag oolag huananab gamag ahe, appig. “Ag Samson omalna uɗippeg, ig nug neekkidppupput, nug heebeb, ig gamag ahak okkai dootu!” aon appig. Ag anam enan appig amunu, ag Samson maniguittakppan aon waeg, nug heehe anidna, ag heeg, nug ahilag kayak hambuppuak laug gamagppa, lagnu biidod okkai menppa hak aɗit lag koɗokko maopiɗ ele amu, nug amu gamalahppa appa hibaitta dayom.

²⁶ Samson appa dayaya, aakku nug maɗi nid laa nug eppegppa aɗa omalele oipiɗ amu, nug nug amegppa aum. “Biidod menppa hak aɗit lag imu oh maottep ele amu, da aa adeppa daattep dookkulnu, na da eppel laih laappa mena, eppel laa laappa mekkutnu ool daatte. Da amu ehaniɗpepeɗ, da daakkul,” awa aum.

²⁷ Amu kayak hambuppuak laug amuppa danab happutak daappig. Am Pilistia dilag ikki danab oh ag appa daappig, amu 3,000 keeke anam ag lag koɗokko uɗem ukkakppa daanna, ag Samson heehe, anidnana daappig.

²⁸ Amu ⌊laa nug eppeg aɗeɗe oipiɗ ele amu eppekuɗ diiata, biidod aɗalatkkunu maate, amu⌋ Samson nug Yawe unuqittom. Nug unuqitta aum. “O Naɗi Yawe, na dahilnu dabmekkutnu oɗ medattem. O Kayak, na da haen laippu laa ele ɠagattag meɗappe, Pilistia ag da amel doɗo kehalatppig imunu nob mekkulnu unuqidttem,” awa aum. Samson nug anam anana unuqittom.

²⁹ Samson nug anam unuqittowa, nug eppekuɗ bahia, kayak hambuppuak amu laugnu biidod aɗit amu, laa am eppeg naɗiap-ppa, laa am eppeg nanehppa aɗalata, ɠagattag anam dayaya,

³⁰ nug aum. “Da Pilistia ele ig oh mauhkkunignu ool hette,” awa aum. Nug anana amu, nug nuhig ɠagattag ohppa duttunatom. Nug anam heehe, kayak hambuppuak laug amu oh aakku na qa auta autanab awa, Pilistia dilag ikki danab, danab ah oh ele aqe, ag mauhppig. Samson nug anam he, Pilistia danab ah amu oh mauhppig. Am Samson nug bau dayaya, Pilistia danab aqe mauhppignu ebqak am nakok bia. Nug mauhom haenppa nug Pilistia danab aqe mauhppig, ahilag ebqak amu okkainab.

³¹ Dimppa nug amakkud, amu mameg baekkudppan oh ele ag nug gaɗa aoglagnu nona, ag aon, eɗun aabppa gona, ag nug Sora, Estaol ele, aab aɗit amu gamalahppa, nug mameg Manoa boumppigppa, nug ele appa boumppig. Am Samson nug Israel dilag epeɗiak danab maɗ 20 dayom.