Ikki Danab 15 - Nobonob Baibel

Samson Pilistia dilagppa nob meum

¹ Amu dimppa, wit aeg awak haenppa, Samson nug meeme nag laa nug wau, nuhig daakkunu hamu medakkunu awa ukkom. Nug ukka, wau mameg amegppa aum. “Da ah dahilnu lag oo amuppa nokkulnu ool daatte,” awa aum, amge ah mameg nug ii uuitte noum.

² Anam he amu, ah mameg nug aum. “Da genab na nuhignu nau ninig ele doome ainne, nug awe, danab na layapnab amu, da nug wau daakkunu mettami. Amge antte, nug makkeg amu neekkak nuhig enanag, nug eɗittak. Na nug awe!” awa aum.

³ Ah mameg nug anam a, Samson oɗeppa awa aum. “Haen imuppa da ag Pilistia danab, ag eheɗ okkai hadakkulnu daatte amunu, da heppi, da beɗulppa aab laa ii daama,” awa aum.

⁴ Samson nug anam awowa, nug ukka, foks 300 aɗualatta, nug aɗit aɗit boolkad oohota qakkalata, anamib qakkalattom. Anam hewowa, nug hul diia, boolag aɗit aɗit, qakkak amuppa maatta qakkalattom.

⁵ Nug anam ha malowa, nug hul amotatte ewegeg, foks amu ag Pilistia dilag dad okkai ooppa qaiedappig. Ib amuppa amu, nug wit bali keeke, datta daappig amu mane ewe, wit keeke, ag okkuladna, aon qagmen ehagppig, amu ele mane ewa malom. Nug ahilag grep dad, olip dad ele he nauhppig.

⁶ Samson nug anam he, Pilistia ag he nauhak amu anidna, ag akka akka nug oɗ mettan appig. “Imu aun heum?” aon anana, laala ag appig. “Samson heum. Nug tana, Timna ted, nug Samson wau awa, danab laa nug ewau matulak awak haenppa Samson ehanidppig ele dilag okkai amu, nug wau daakkunu mettom amunu, nug inam heum,” aon appig. Aon aeg, amu Pilistia ag gona, ah amu, mameg ele aɗalatna, manateg eoya mauhpiɗ.

⁷ Ag anam heeg, Samson amelagppa aum. “Ag imu heppig amunu, da nob naunab nau madakkul. Da anam madappippi ukkeb, ool elele meeb batakkul,” awa aum.

⁸ Samson nug anam anana, nug Pilistia banelag ukka, ahilagnu oo gai-iitta doya oo metta ehanittak kobol nakok laa ii ha, kuɗumnab aqowa, nug Etam men oɗeppa appa ukka dayom.

⁹ Amu dimppa amu, Pilistia ag gona, haen tutu dayaknu aab, Juda appa, Lehi aab guguittak, ag appa kalan daanna, ban hekkulagnu bappaidppig.

¹⁰ Pilistia ag uɗin, anam heeg amu, Juda danab ag Pilistia oɗ mattan appig. “Ag aɗinu ig banenig uɗippig?” aon appig. Aeg amu Pilistia ag appig. “Ig Samson aɗagnignu uɗimut. Ig nug ihinigppa heum amu, nob mekkunignu uɗimut,” aon appig.

¹¹ Ag anam appig amunu, 3,000 Juda danab ag Samson, Etam men oɗeppa dayeye aoglagnu nona appig. “Pilistia ag ig gumigtteb amu, na iite doottem? Na heme amu, Pilistia ag bu mekkaglag, na iite doottem?” aon appig. Ag appig, amge Samson nug oɗelagppa awa aum. “Da ag aɗi dahilppa heppig amuib nob memi,” awa aum.

¹² Nug anam aum, amge Juda danab ag appig. “Ig na hippalidta, Pilistia eppelagppa meidkkunignu uɗimut,” aon appig. Aon aeg amu, nug ag amelagppa aum. “Ag ii iuppeg, da bau daappi, ag ele oh gokkunignu nai ɠagattag qettan akkulag dayeb amu, da ag ele oh gokkunig,” awa aum.

¹³ Nug anam a, ag appig. “Am ena, ig anam hekkunig, ig na ii nitamta. Ig na hippalidta, Pilistia eppelagppa aakkuib meidkkunig,” aon appig. Ag anam appig amunu, ag nug muɗi hoh aɗitppa hippalna, men oɗeppanu aon goppig.

¹⁴ Ag anam aon ukkaegeg, Samson nug Lehi teete amu, Pilistia ag ⌊ahilag dabmakppa ag Samson eɗidna aoppig doon, gamalag huananab ahe⌋ enana, nug gumidna uɗippig. Amge Yawenu Ouɗi nuhigppa ɠagattag ele uɗia, Samson ehanitte, nug eppegppan muɗi hoh, am muɗi aab manaeg ewe gai-iitta meum bia mataɗa awa, muɗi hoh eppegppanu na qe,

¹⁵ nug donki hippeg ebehi laa wanppa niiom antta, nug amu awom. Donki amu nug anukkanab ii mauhom, amu amuppa Samson nug Pilistia danab 1,000 hippeg amuppa aqe mauhppig.

¹⁶ Samson nug anam ha, nug aum. “Donki hippeg ebehippa da hei, ag huanaknab mauhppig. Ao, da hei, ag gaɗalkad qagmak anen anenppa daatteb! Ge, donki hippeg ebehippa da tausen danab aqami!” Samson nug anam awa aum.

¹⁷ Nug anam mattia malowa, nug hippeg amu buɗie ukkom. Aben amuam Ramat Lehi adappig. Ramat Lehi eɗuak amu hippeg ebehi.

¹⁸ Aakku Samson nug le baag huananab diie, nug Yawe unuqitta aum. “Na da, nahip maɗi nid, na da ehaniɗe, da imu oh eɗadmi. Gemu da le baal eheɗnab diitte amunu, da mauhak bia daappi, gaɗa ii otaɗak danab imu ag aɗailkkulagte?” awa oɗ mettom.

¹⁹ Nug anam unuqitta male, amu Lehi appa Kayak Nug he, le huanak wanppa aben tappiɗ naɗinab bia, appa qeppuɗia be, Samson nug lawowa ɠagattag awowa, nug aben amu onig ataɗa, En Hakore aum. Aben amu gemu ⌊nai imu yaak haenppa⌋ ele Lehi appa daatte.

²⁰ Samson nug Israel dilag epeɗiak danab maɗ 20 oh dayom, amge haen amuppa Pilistia ag Israel wan guman daappig.