Ikki Danab 14 - Nobonob Baibel

Samson nug oɗmak laa, nuhig nob am unuqagnab daatte ele, amu laa mattiom

¹ Anam daye amu, deɗ laa Samson nug Pilistia ⌊ag am Israel dilag kekeɗ amu,⌋ nug ahilag wanppa, aab Timna appa ukka, nug Pilistia ah makkun laa anttom.

² Nug antta, haen nug eɗua aabppa ukka, amu nug mameg anig ele amelahppa aum. “Da Pilistia ah makkun laa Timna appa anidmi, amu nug dahil ah daakkunu hepeɗ, i ewau matulak aognihnu ool daatte,” awa aum.

³ Nug anam a amu, nug anig mameg ele aa oɗeppa aoya apiɗ. “Na Israel dilag huu okkai nahip-ppan ah laa, o Israel laala oolagppan ah laa aokkutnu elele iite daatte amunu, na gona, Pilistia danab, ag Yawe ii dootteb, ii dim lamidtteb ele, ag oolagppanu ah aokkutnu hettem?” aoya apiɗ. Aa anam apiɗ amge Samson nug mameg amegppa aum. “Da nuhignu oolppa enanagnab doottem amunu, na dahilnu awe!” awa aum.

⁴ Pilistia danab ag haen amuppa Israel gumappig amunu, Yawe he, Samson nug Pilistia danab eheɗ hadakkunu ib mattiom amu, Samson anig mameg ele aa amu ii doopiɗ.

⁵ Aakku, Samson nug anam aum amunu, nug, mameg anig ele ag Timna nonana, ⌊Samson nug aa ele oh ii goppig, nukka piɗe ugekke,⌋ laion bau laa Timna dilag grep dad guguittak appa, baneb doa, gayaya uɗiom.

⁶ Haen amuppanab, Yawenu Ouɗi Samson nuhigppa ɠagattag ele uɗie, nug eppegppaib laion aɗa, he nauhom. Nug amu meeme nagppa hak bia uug iitta heum. Amge nug heum, nug amunu mameg o anig amelahppa ii mattiom.

⁷ Samson nug Timna ukke, amu ah ele nai madipiɗ. Nug ah amunu enanagnab doyom.

⁸ Anam daye, haen ukke dimppa, nug eɗua, Timna ewau matulak awaknu ugakka, nug laion gaɗa anidkkunu ib man uua wana, nug neekka, amu uppuh ag ebehiudppa teɗ mena, uppuh leppu ubuhi ele meppig daaegeg anttom.

⁹ Nug antta, nug eppegppa uppuh leppu laa ekkaɗa awa, lanana ukkom. Ugakka, haen nug mameg anig ele eɗua gumata ta amu, nug laih laa aa mate, aa ele lapiɗ, amge nug laion ebehiudppan awomnu amelahppa ii aum.

¹⁰ Am Samson mameg nug, ewau matulak awak dabmekkunu ukka dayeye, Samson nug hobul heum. Aɗinu? Haen amuppan danab, ag ah aoglagnu henana, ag anam heppig.

¹¹ Samson anam heum, amge amu oh ii bak haenppa, haen Samson nug Timna no amu, aab amuppan danab ag danab bau 30 Samson ehanidkkulagnu otin medappig.

¹² Danab 30 ag anam daaegeg amu, Samson nug ag amelagppa aum “Ooe, da oɗmak laa, nuhig nob am unuqagnab daatte ele amu, da nai amu appi doyeg! Am ag nai, nuhig nob unuqagnab daatte ele, ag nai amu hobul imu deɗ eblaih aɗit ele daakku, ag haen amu ooppa diig doon mehuqna akkulag dayeb amu, da geha ag linen lamen 30 matten, amu da lamen ag hanhan metteb ele, da lamen amu 30 baula ele madakkul.

¹³ Amge ag nob mehuqna ii akkulag dayeb amu, ag da linen lamen 30 da meɗan, amu lamen da hanhan tagattem ele, ag lamen 30 amu ele da meɗaglag,” awa aum. Samson nug anam amelagppa a, ag appig. “Amu ena, na nahip oɗmak laa, nuhig nob am unuqagnab daatte ele amu appe doognig,” aon appig.

¹⁴ Ag anam aeg, nug nuhig nai laa, nuhig nob unuqagnab daatte ele amu anana, nug aum. “Laa ee latte, nuhignu ee beum. Yo, laa ɠagattagnab ele amu, nuhigppa keeke ubuhi ele beum. ⌊Da aɗi keekenu mattimi⌋,” awa oɗ mattom. Nug anam mattie, ag deɗ ewam nob mehuqna akkulagnu heppig, me elele iitta.

¹⁵ Ag elele iitta, ⌊uueg dayom,⌋ amge deɗ eblaih aɗitppa amu, ag Samson wau amegppa appig. “Na ib attenppatai gamutnu oɗmak laa, nuhig nob am unuqagnab daatte ele, na oɗmak amunu nob amu aon, appe dootu! Iitta dayeb amu, ig na, na mamen laugppa daappe, lag amu maipput ewa, na ele ewitteb mauhkkut. Na ig hobul imuppa daɗek meigkkutnu oninigppa e uɗit daattemte?” aon appig.

¹⁶ Ag anam aeg, Samson wau nug gayaya ukka, gamu amegppa aum. “Na dahilnu oot ii mauhtte; na dahilnu nau ninig ele doottem! Na dahilad danab ah ele amelagppa nahip oɗmak, nuhig nob unuqagnab daatte ele amu ae dooppig, amge na da amelppa oɗmak amunu nob mehuqna ii ae doomi,” awa aum. Nug anam a, Samson amegppa aum. “Da mamelte, o anilte amegppa nob amunu laa mehuqi ii doopiɗ. Aɗinu da na amenppa akkul?” awa aum.

¹⁷ Nug anam a, wau nug deɗ amuppa gayakppaib dayom. Anam dayaya, wau nug anamib gamunu oɗmak laa, nuhig nob unuqagnab daatte ele amu, nug nai amunu mehuqak dookkunu ge iitta haaha dayom amunu, Samson bahi ye, nob mehuqe doya, wau nug nai nob amu danab oɗmak heppig ele, nug ag amelagppa mattiom.

¹⁸ Nug nai nob danab amelagppa a doon, aab amunu danab ag deɗ eblaih aɗitppa aam ii no, ag gona Samson amegppa oɗmaknu nob inam meppig. “Aɗi amu uppuh leppunu ubuhi eɗittak? Aɗi amu laionnu ɠagattag eɗittak?” aon amegppa appig. Ag anam aeg, Samson nug ahilag nai nob ma aum. “Ag ah dahil oɗ ii mettalob, ag dahil oɗmak, nuhig nob unuqagnab daatte ele, ag amunu nob ii mehuqlob,” awa aum.

¹⁹ Aria, aakku Yawenu Ouɗi nuhigppa ɠagattag ele uɗie, nug aab Askelon noa, nug danab 30 aqe mauheg, ahilkad lamen keeke, aɗatta awa, nug ukka, lamen nug danab ag nuhig oɗmak, nuhig nob unuqagnab daatte ele, ag nai amunu nob meppig amu, nug ag mattom. Amge Samson nug kobol beum, nug amunu oo huana nauhe, nug appagppa anig mameg ele daaglagnu eɗua ukkom.

²⁰ Nug ukka daye, Samson tana nug aɗeg awa, danab nug Samsonnu ewau matulak awaknu haenppa, nug Samsonnu ehanittak okkainab dayom amu, nug danab amu, nuhig ah daakkunu nug aɗeg, Samson wau, nug nug mettom.