Ikki Danab 13 - Nobonob Baibel

Samsonnu menuak

¹ Amu dimppa, Israel ag baula Yawenu neekkakppa eheɗ heppig amunu, Yawe Nug ag Pilistia eppelagppa maatte, ag maɗ 40 anam daappig.

² Haen amuppa danab laa onig Manoa, nug am Israel dilag huu okkai Dan, Sora aabppan danab amu, nug dayom. Nug wau am ah mattoi amunu, aa nid iitta daadpiɗ.

³ Aa anam daaeheh amu, Yawenu engel nug Manoa wau gumitta noa, nug aum. “Na ah mattoi, nid iitta ele daattem, amge na geha oot ele daan, nid danab laa aokkut

⁴ amunu, na wain, o le ɠagattag laa, o na doɗ ii lanaknu epeɗiak daatte amu iinab lakkutoitte.

⁵ Aɗinu? Na oot ele daan, nid danab menukkut. Na menuppe, auntai laa nug ikki uɗug iinab otaɗma. Aɗinu? Nug dokku, haen amuppa nug digma, Kayaknu danab, Nasarait atteb, nug anam daakku. Nug geha Israel ag Pilistia eppelagppa daamnanu digma, ag ehanadkku,” awa aum.

⁶ Engel nug anam a amu, ah nug ukka, gamu amegppa aum. “Kayaknu danab laa da gumiɗa neum! Nug am Kayaknu engel laa bia. Da nug anitti, ebehil oh bodoetta le meum. Nug am adeppanu amu, da oɗ ii mettami, nug onig ele da amelppa ii aum,

⁷ amge nug aum. ‘Na geha oot ele daan, nid danab laa menukkut. Amunu na wain, o na le ɠagattag laa, o na doɗ ii lanaknu epeɗiak daatte amu iinab lakkutoitte. Aɗinu? Na bekkat nug nuhig doakppanu ukkeb, nuhig mauhak batak nug Kayaknu danab, Nasarait atteb, nug anamib daakku aum,’ ” awa aum. Manoa wau anam Manoa amegppa aum.

⁸ Ah nug anam Manoa amegppa mattie doya, nug Yawe unuqitta aum. “O Naɗi, Kayaknu danab laa uɗia, ah dahil amegppa nid laa menugnihnu aum amu, nug eɗua uɗia, i nid menugnih amu, i nid amunu ɗo attem attem laa ele dim lamidkkunihnu ab doognihnu na heppe, nug eɗua uɗia, ab doognihnu ool ohppa oɗ medattem,” awa unuqittom.

⁹ Manoa anam aakku unuqitte amu, Kayak Nug Manoa oo daye oɗ meum, Nug anamnab aakku he, Kayaknu engel baula, wau nug dad okkaippa dayeye gumitta noum. Amge Manoa nug dad okkaippa, appa ii dayom.

¹⁰ Nug ii dayom amunu, wau nug pahanab qaietta ukka, gamu amegppa aum. “Danab nug da gumiɗa neum ele amu, nug eɗua gumiɗa neum!” awa aum.

¹¹ Awa a, aakku Manoa nug wau ele aa oh eɗuya, paha goya, Manoa nug engel oɗ metta aum. “Na aakkute deɗ laa ah dahil amegppa nai mattime?” awa oɗ mettom. Oɗ mette amu, engel nug oɗeppa awa aum. “Yo, da aakkuib,” awa aum.

¹² Nug anam a, Manoa oɗ mettom. “Nai na ame ba maleb, nid doa amu, haen amuppa nug aɗi ɗo dim lamitta oyaya, nuhig uɗat hekku?” awa oɗ mettom.

¹³ Nug anam a, Yawenu engel nug nob ma aum. “Na waat nug nai oh dim lamitta hekkunu da amegppa ami ele amu, tutukku hekkuoitte.

¹⁴ Nug grep meu, o grep meu qaɗaiettak, o aɗi keeke laa grep-ppa hak, o wain, o le ɠagattag laa, o nug doɗ ii lanaknu epeɗiak daatte amu, nug amu oh iinab lakkuoitte. Na waat nug haknunab nai oh da mettami dim lamitta, tutukku hekkuoitte,” awa aum.

¹⁵ Engel anam mattie amu, Manoa nug Yawenu engel amegppa aum. “Na inam daappe, i meeme nag laa, na lakkutnu bappaidpuɗ, lakkutnu oɗ medattem,” awa aum.

¹⁶ Manoa nug anam Yawenu engel oɗ mette amu, nug aum. “Na aɗailna, ee bappaidkkut dayeb amu, da lawoya, ehanittak ii aopa, amge na manaknu ofa hena, Yawe medakkut, am ena,” awa aum. Engel nug Manoa amegppa anam aumnu diig am, Manoa nug laa nug ele nai madipiɗ am Yawenu engel amu, nug ii doyom.

¹⁷ Engel nug anam a amu, Manoa nug Yawenu engel oɗ metta aum. “Na onin aun? Da oɗ medattemnu diig am, keeke imu oh bekku, haen amuppa i na binan mekkunihnu dabmekkunih amunu, da na oɗ medattem,” awa aum.

¹⁸ Manoa nug anam a, Yawenu engel nug nob ma aum. “Na aɗinu da onilnu oɗ mettem? Da appi doolom amu, na oot ii maidlo,” awa aum.

¹⁹ Engel nug anam a, aakku Manoa meeme nag laa awa, ee aegnu ofa babaitta, doɗ, ee aeg ele amu mana, Yawe medakkunu men laa qaɗeppa ma, mana, Yawe medakkunu mettom. Mette, Manoa nug wau ele aa neegya daaeheh amu, Yawe Nug kobolnab laa heum.

²⁰ Amuam aab dittiak qaɗabppanu attannab teete amu, Yawenu engel nug aab amu ooppa ta ukkom. Ukke, Manoa nug wau ele aa amu anidya, aa laippun gatelah qaun o gomelya iɗulah wanppa mepiɗ.

²¹ Amu engel nug ukka, Manoa wau ele noolahppa baula ii uɗia daye anidya, Manoa aakku doyom, amuam Yawenu engel aakku.

²² Nug anam doya, wau amegppa aum. “I Kayak anidmuɗ amunu, geha mauhkkunih!” awa aum.

²³ Nug anam aum, amge wau nug amegppa aum. “Yawe Nug niteb mauhkkunihnu helo amu, Nug manaknu ofa, ee aegnu ofa ihinih ele ii aolo. Nug i noonihppa tula doa, i amenihppa keeke enanab bekkun daatte aab ii doolop; keeke danab laa hekkunu elele iitta amu ele ii helo,” awa aum.

²⁴ Manoa wau anam aum, haen ugekke, aa bekkalah do, aa nug onig Samson ataɗeh, Yawe nid amu itittette okkai meum.

²⁵ Anam amu, Samson nug Mahane Dan appa, aab Sora, aab Estaol ele gamalahppa dayeye, appa Yawenu Ouɗi digma, Samson nug Yawenu uɗat hekkunu dabmak maɗettom.