Ikki Danab 12 - Nobonob Baibel

Epraim ag Jepta ele nug qeppig

¹ Amu oh beum amu, dimppa Israel dilag huu okkai Epraim ⌊danab ag, “Ehe, ig ban amuppa oninig okkai aolom,” doon,⌋ ahilkad ban danab ag aɗa mena, ag Jodan le mataɗna, Sapon wappig. Ag amu hewona, ag nai inam Jeptanu meeg ukkom. “Na aɗinu ig na ehanidta, Amon ele ban haknu am nai me ii uɗiom? Ig na, na laut ele aabppa manatkkunig!”

² Ag nai amu meeg ukke amu, Jepta doya, nug oɗelagppa awa aum. “Ig Amon ele ban okkai hetata amu, da ag amelagppa ami, amge da, dahilad ele ig Amon eppelagppa daamtanu, ag Epraim, ag uɗin ig ii ehanigppig!

³ Ag anam daaeg anttoya, da Amon ele ban hekkunignu, da beɗul maoi ukke, da ahe, banppa gomi. Da ahai, Yawe Nug da ehaniɗe, da Amon eɗadmi amunu, aɗinu ag da ele nug qekkunignu uɗippig?” Nug nai amu me ukkom.

⁴ Nug nai anam me ukkom, amge Epraim danab ag noob mena appig. “Ag Gileat danab, ag amu dilag danabnab iitta. Ag ig ele oh laippu daalom, amge iitta, ag piɗe gona, ag akka yab danab bia daaglagnu hetteb,” aon appig. Ag Jepta amegppa anam appig amunu, Jepta nug e, danab nuhikkud ag Epraim banelag gona, ban hena, Epraim danab eɗadna aqappig.

⁵ Ag amu hena, Jepta nug Jodan leppa, le baag qak daatteb, nug laikkud ele ag aben amu diippig amunu, Epraimnu oola ukkak danab ag eɗun mataɗna, Epraim wanppa gokkulagnu heegeg, Gileat danab ag anen anen amelagppa “Na am Israel dilag huu okkai Epraim danab laate?” oɗ madappig. Ag anam oɗ mettaeg, danab nug, “Iitta! Da iitta,” ab,

⁶ amu ag nug amegppa, “Na Shibolet aon a,” appig. Am nug Epraimnu danab laa dayeb amu, nug, “Sibolet,” akku. Aɗinu? Danab ah Epraimnu ag “sh,” ag amunu oqotti akkulagnu elele iitta. Nug anam aawo doona amu, ag danab amu aɗan aon, Jodan leppa, le baag qak daatteb, amuppa qeppig. Amu ban amuppa Gileat danab ag Epraim danab 42,000 aqappig.

⁷ Jepta, Gileat ted, nug Israel dilag epeɗiak danab maɗ eblaih laippu ele dayom. Nug anam daye mauhe amu, ag nug aab laa, Gileat ooppa, appa boumppig.

Ibsan nug Israel dilag epeɗiak danab beum

⁸ Jepta mauhe, Ibsan nug Israel dilag epeɗiak danab beum. Nug am Betlehem ted.

⁹ Nug am bekkod 30, aɗekkud 30 ele. Nug aɗekkud diia, danab laihnu, nuhig aab ikki amuppan iitta, amu waalkad daaglanu mattom, amu nug ah aab ikki nuhig iitta, laihppan diia, bekkod waalkad daaglagnu mattom. Ibsan nug Israel dilag epeɗiak danab maɗ eblaih aɗit ele dayom.

¹⁰ Nug mauhe amu, danab ag nug Betlehem appa boumppig.

Ilon nug Israel dilag epeɗiak danab beum

¹¹ Ibsan nug mauhe amu Elon nug Israel dilag epeɗiak danab dayom. Nug am Israel dilag huu okkai Seblon, amuppan danab. Nug Israel dilag epeɗiak danab maɗ eblaih laih ele dayom.

¹² Elon nug mauhe amu, danab ag nug Seblon wanppa, Aiyalon appa boumppig.

Abdon nug Israel dilag epeɗiak danab beum

¹³ Ilon mauhe, Abdon, Hilel bekka, Piraton ted, nug Israel dilag epeɗiak danab beum.

¹⁴ Nug am bekkod 40 ele, alakkud danab 30 ele. Bekkod amu, alakkud amu ele ag donki 70ppa oippig. Nug Israel dilag epeɗiak danab maɗ eblaih ewam ele dayom.

¹⁵ Amu dimppa, Hilel bekka Abdon, nug mauhe amu, danab ag nug Epraim wanppa, Piraton appa boumppig. Ag boumppig, aben amuam qauko qauko ele; anukka Amalek danab ag aguppa daappig.