Ikki Danab 11 - Nobonob Baibel

Jepta nug Israel dilag epeɗiak danab beum

¹ Aria, Jepta nug am Gileat ted, nug am ban danab naɗi laa, amge nug anig amu ib baag ah laa. Nug mameg am ⌊ele wan maha onig Gileat bia⌋ nug onig am Gileat.

² Ah amu nug Jepta menuom, amge Gileat wau nug ele Gileatnu nid danab laala ele menuattom, amu haen nid amu ag okkai mena, ag Jepta lamidna appig. “Na amu ib baag ah laa bekka amunu, na ig mamenig aug keeke laa ii aomna,” aon appig.

³ Ag Jepta lamidppig amunu, nug awakkud amakkud dilagppanu oola ukka, Tob wanppa dayom. Nug appa daye, haen elab ii ukke, danab ag aɗi uug bekku am ii dabmetteb, keeke hakib hetteb amu, danab amu kuɗum ag nug gumidna gona, nug dim lamidppig.

⁴ Aria, Jepta nug Tob dayeye, Amon danab ag baula Israel banelag uɗippig.

⁵ Amon danab ag anam heeg amu, Gileat ikki danab ag Jepta eɗua uɗikkunu oɗ mettaglagnu nug gumidna, Tob wanppa goppig.

⁶ Ag appig. “Na ig ehanigna, Amon ele ban hekkunignu na eɗun uɗin, ihinig ban daup ikki daye!” aon appig.

⁷ Ag anam appig, amge Jepta nug aum. “Ag iittate, ag dahilnu nau ninig ele doona, da mamel laugppan lamiɗppig? Gemu haen ag uug doona amu, aɗinu ag gemu da gumiɗna uɗippig?” awa oɗ mattom.

⁸ Nug anam a amu, Gileat ikki danab ag oɗeppa aon appig. “Nai nahip am genab, amge gemu ig bappaidkkunignu hetat, ig na ehanigkkutnu oonig daye, na gumidta uɗimut. Na uɗin omaigppe gota, ig Amon ele ban hekkunig dayeb, ig meidpput, na Gileat danab ah oh gumadkkut,” aon appig.

⁹ Ag anam aeg amu, Jepta nug aum. “Da ag ele gopput, Yawe heeb, da Amon eɗadkkul dayeb amu, ag genabnab heppeg, da Gileat danab ah oh dilag okkai daakkulte?” awa oɗ mattom.

¹⁰ Nug Gileat danab anam oɗ matte amu, ag noob mena appig. “Yawe Nug ig iikku nai mattiutut doyeye, ig iikku attem. Na aɗi hekkunignu appe amu, ig genabnab genab hekkunig,” aon appig.

¹¹ Ag anam appig amunu, Jepta nug Gileat ikki danab ele ukkaeg, amu Gileat danab ag heeg, nug ahilag okkai ba, ban daup ikki danab ele dayom. Mispa appa amu Jepta nug Yawe noobppa, ikki danab amelagppa nai nug aum amu, nug baeg aɗu mattiom.

¹² Jepta anam hewowa, nug nai awa ukkak danab maatte, Amon dilag king gumidna gona appig. “Ig aɗi laa eheɗ hemut amunu, ag ban hekkulagnu banenig uɗippig?” aon appig.

¹³ Jepta nug Amon dilag king anam oɗ mette, king nug nai awa ukkak danab Jeptanu amelagppa aum. “Haen Israel ag Isipnu uɗina amu, ag wan dahil laala aoppig. Wan ag aoppig ele amu, nuhig tom am le Arnonnu ukka, le Jabok batak daatte, amu tom amuppanu ukka ukka, Jodan leppa batom. Ag wan amu aoppig amunu, na wan amu maɗoɗ kobolppa eɗun meɗappe, ig ag ele ban ii hemata,” awa amelagppa aum

¹⁴ Amon dilag king nug nai amu me, Jepta toppa ukke, Jepta nai awa ukkak danab amu eppelagppa eɗua nob ma, nai imu me ukkom.

¹⁵ “Nai imuam Jeptanu. Israel ag Moap, o Amon wan laa ii aoppig.

¹⁶ Aɗinu? Haen Israel danab ag Isipnu ahan gona, ag atu taɗakppa gona, Le Kokoɗppa tena mataɗna, ag Kades wana,

¹⁷ ag nai awa ukkak danab maatteg, ag nai aon, Edom dilag king gumidna tena appig. ‘Na, “Yo,” appe, ig nahip wan oppatta gokkunignu oɗ medattem,’ aakkuib appig, amge nug ahilag nai dookkunu uuom. Aakku ag Moap dilag king anamib aakku oɗ medappig, amge nug ele ag uuatte, ib amu ii goppig. Amunu Israel danab ah ag Kades daappig.

¹⁸ Daaeg ukke ukke, ag aakku Edom, Moap ele wan aiɗna wana, atu taɗakppa goppig. Ag Moap tom kaɗag uɗitteppanu daatte amu gona gona, Arnon le laih appa, ag haen tutu dayaknu aab kalappig. Amge ag Aron le mataɗna wana, Moap iinab wappig. Aɗinu? Le Arnon, am Moapnu tom aakku.

¹⁹ Aakku Israel ag nai awa ukkak danab maatteg, nai aon, Amo ted, King Sihon, nug Hesbon appa dayaya, wan nuhig gumom, ag nug gumidna goppig. Ag gona, nug amegppa appig. ‘Ig ig abenanigppa gokkunignu amu, na, “Yo”, appe, ig nahip wan oppat-ta, laih gokkunig,’ aon appig.

²⁰ Ag anam appig, amge King Sihon nug Israel ag nuhig wan oppatna, laih gokkulag aakkuib hekkulagnu amu, nug ooppa genab ii doyom amunu, nug ban daup nuhikkud oh onilagppa e gona, Jahas appa qagmena, haen tutu dayaknu aab kalan, ag banelag gona, Israel danab ele ban heppig.

²¹ Amge Yawe, Israel dilag Kayak, nug he, nuhikkud danab ah ag King Sihon eɗidppig amunu, Israel ag, ag Amo danab wan amuppa daappig ele, ag amu dilag wan oh aon tonappig.

²² Wan amunu tom am le Arnon ukka le Jabok batak. Amu atu taɗak ukka, Jodan leppa batak.

²³ Anam amunu, na anidna, dabmekkut. Yawe, Israel dilag Kayak, Nug he, nuhikkud danab Israel ag Amo danab lamatteg, Nug wan Amo dilagppan awa, ig Israel ig mekkom amunu, diig aɗinu na aokkutnu wagai mettem?

²⁴ Na nahip kayak Kemos keeke mettom, na amu dabmette; ig am Yawe, ihinig Kayak, nug keeke mekkom, ig amu dabmettagnig.

²⁵ Na am Sipor bekka Balak, Moap dilag king eɗidttemte? Nug Israel ag Amo dilag wan amu aoeg, nug aha, ‘Wan amuam dahil, ag meɗeg!’ aumte? Nug ban ukkomte? Iitta! Nug anam ii heum.

²⁶ Amge na amu, maɗ 300 uue, gemu ig Israel nahip wan aomutnu anana, ban haknu attem. Israel ag haen elab ippa daappig. Israel danab ah ag Hesbon aab, aab laa amu guguittak daatteb, aab Aroer, aab laa amu guguittak daatteb, aria aab laala ag Arnon le daug aiɗak, amuppa ele daaeg gotte. Wan amu genab nahip daatte dayeb amu, aɗinu na maɗ 300 uue, eɗun aokkutnu iikku ban hettem?

²⁷ Da nahip-ppa hipunin laa ii qemi. Me, na dahilppa eheɗ hena, da niɗakkutnu banel uɗin hena hettem. Uuppe, Yawe, Nug epeɗiak danab okkai daatte amu, Nug gemu ig Israelte ena hettem, o ag Amonte ena hetteb, Nug amu epeɗitaɗ!” awa aum.

²⁸ Jepta nug nai amu me, Amon dilag king toppa ukkom, amge king nug Jeptanu nai doyak uuom.

Jepta genab hekkunu nai anan qakkom

²⁹ Haen amuppa Yawenu Ouɗi Nug Jepta, nuhigppa uɗia a, Jepta nug daup ag Amon danab ele ban hekkulagnu dim lamidkkulagnu nug Gileat wan ooppa, Manase wan ooppa ele oiya oiya ukka, nug Gileat wanppa Mispa teum. Appanu nug Amon banelag ukkom.

³⁰ Amu beebe amu, Jepta nug keeke laa genabnab hekkunu Yawe amegppa nai anan qakka inam aum. “Na da ehaniɗppe, da Amon eɗadkkul dayeb,

³¹ haen da Amon elelenab eɗittakppanu eɗue enaib uɗikkul amu, da na Yawe, tatam keeke laa da laulppanu uɗia, da uɗal tekkunu uɗikku ele amu, da na medakkul. Nug nahip daakku. Amu tuɗittak amu, da manaknu ofa medakkul,” awa aum.

³² Jepta nug anam awowa, nug nuhig ban danab diie nona, Amon ele ban heeg, Yawe ehanitte, nug ag eɗattom.

³³ Jepta nug nuhikkud ban danab ele Amon danab eɗadna, aab ebqak 20 Aroer, Minit ele gamalahppa daappig, ag amu oh heeg nauheg, ag aab laala ele heeg nauheg ukke, Abel Keramin batappig. Ib amuppa Israel ag Amon tappalatteg neppig.

³⁴ Jepta aɗi ag Amon anam eɗadna, Jepta nug appag diig Mispa eɗua ukke amu, antte! Nug aɗeg nug anidkkunu, tambarin qaaqa, gamag ahakppa goɗaɗa anuqa, nug uɗa teum. Nug aakkuib am nuhig nid. Nug nid danab, o nid ah laa iitta.

³⁵ Amu haen nug aɗeg antta amu, nug ooppa guittak nau doyaya, lamen nuhig pattiɗa aum. “O aɗel! Na da uɗal tekkutnu uɗime amu, da uug nau doottem! Aɗinu? Da Yawe amegppa, da keeke laa genabnab hekkulnu nai ain qakkami, amu da eɗue uhuqkkulnu elele iitta,” awa aum.

³⁶ Jepta anam a amu, nug aɗeg nug aum. “Mama, na Yawe amegppa keeke laa genabnab hekkutnu nai ana qakkae, Yawe Nug na nahip kekeɗ Amon eɗadkkutnu he eɗadme amunu, na dahilppa hekkutnu nai anan qakkame amu, na hekkutoitte,

³⁷ amge tatam amu, na da uuiɗppe, da qaukoppa teppi, appa, da lailad ele ig kalam aɗit anam oitta mahignig. Aɗinu? Da danab laa ii aopa,” awa aum.

³⁸ Nug anam ana oɗ mette, Jepta nug aum. “Ena, na gokkut,” anan uuitte, mameg aum bia nug ukka, kalam aɗit oiyom. Nug ah laikkud ele ag tena qaukoppa mahiak henan oippig. Amunu diig am, nug danab laa ii aoma.

^39-40 Kalam aɗit ukka male, nug eɗua mameg gumitta ukke amu, mameg nug genabnab hekkunu nai anan qakkom amu, nug anam heum. Amu nug ah makkun dayom. Jepta nug anam heum amunu, Israel ah bau, ag kobol laa digmena heppig. Ag Gileat ted Jepta aɗeg dabmekkulagnu, ag maɗ anen anen ohppa ag lakkanu ahan, dimittim gona, deɗ waɗele daappig.