Ikki Danab 10 - Nobonob Baibel

Tola nug Israel dilag epeɗiak danab beum

¹ Ah laa amu, nug Abimelek qe mauhe dimppa amu, Tola, nug am Pua bekka, nug am Dodo buɗub, nug Israel ehanatteb, ahilag kekeɗ eppelagppa ii daamnanu beum. Nug am Israel dilag huu okkai Isakar, amuppan, amge nug aab Samir, Epraim wanppa qauko qauko daatteppa, appa dayom.

² Nug Israel dilag epeɗiak danab maɗ 23 dayom. Nug mauhe amu, ag nug Samir appa boumppig.

Jaia nug Israel dilag epeɗiak danab beum

³ Tola nug mauhe amu, danab laa nug Gileat ted onig Jair, nug Israel dilag epeɗiak danab maɗ 22 dayom.

⁴ Nug bekkod 30 ele. Nug bekkod ag donki 30, amuppa godappig, amu ag aab 30 Gileat wanppa mameg meppig. Gemu ⌊nai imu yaak haenppa⌋ ele, aab amunu amu, danab ag, “Jairnu aab,” aon atteb.

⁵ Amu Jair nug mauhe, ag Kamon appa nug boumppig.

Jepta nug Israel dilag epeɗiak danab beum

⁶ Amu dimppa, Israel danab ah ag Yawenu neekkakppa baula eheɗ heppig. Ag kayak hambuppuak Bal, Astoret ele iɗu iɗu waalagppa daan, oɗelag dim lamidnana, ag Aram dilag kayak, Saidon dilag kayak, Moap dilag kayak, Amon amu Pilistia ele dilag kayak ele, ag kayak hambuppuak amu oh ele waalagppa daan, ag oɗelag dim lamidppig. Amuib iitta, ag Yawe uuidna, Nug waappa daya, oɗe dim lamittak uun autnanab aoppig.

⁷ Ag anam heppig amunu, Yawe Nug Israel dilag oo huana nauhe, Nug ag uuatte, Pilistia, Amon ele banppa eɗatteg, ag eppelagppa daaegeg,

⁸ ag maɗ amuppa ag ag eheɗ hattana, oɗoɗadppig. Ag maɗ 18 eheɗ hattappig. Amuam Israel danab Jodan leppanu, kaɗag uɗitteppan, ag amu dilagppa anam heppig. Wan amuam anukka Amo danab dilag dayom. Wan amu onig am Gileat.

⁹ Amon ag Jodan mataɗna, Jodan le laih qaban uɗitteppanu gona, Juda, Benyamin, am Epraim ele banelag gona, ag ele ban heppig. Ag anam heegeg, Israel ag uug naunab anidppig.

¹⁰ Israel ag amu anidna, ag dimppa Yawenu gaan appig. “Ig na, ihinig Kayak, ig na dimetata, ig kayak hambuppuak Bal iɗu iɗu waalagppa daat, ag oɗelag dim lamidmut. Ig amu hemut amunu, amuppa ig nahip-ppa hipunin hemut,” aon appig.

^11-12 Ag Yawe anam unuqitteg, Nug nob ma aum. “Da ag ehanatte, ag Isip, Amo, Amon, Pilistia, Saidon, Amalek amu Maon danab ele eppelagppanu eɗue diimi. Haen ag ag eheɗ hatteg, ag dahilnu gaaeg amu, da ag ehanatte, ag eppelagppanu eɗue diimi.

¹³ Da anam aakku hemi, amge ag da uuiɗna, kayak hambuppuak noolagppa dup nona binalag meppig amunu, da baula ag ehanatte, ag eppelagppanu eɗue ii diipa.

¹⁴ Ag gona, kayak ag ag ahilag kayak daaglagnu tituanadppig ele, ag amu dilagnu gayeg! Heppeg, kayak amu ag ehanadppeg, ag kekeɗ eppelagppa gemu daaegeg, eheɗ hattaegeg, uug nau dootteb amu, ag eppelagppa baula aib daappig!” awa aum.

¹⁵ Nug anam aum, amge Israel ag Yawe amegppa appig. “Ig hipunin hemut. Na nakka ig bu megakutnu oɗ medattem. Na bu attem megakkutnu dabmena megakkut am nahip-ppa daatte, amge na ehanigppe, ig kekeɗ eppelagppa ii daamtanu oɗ medattem,” aon appig.

¹⁶ Israel danab ah ag anam unuqittona, ag heeg, laa dilag kayak hambuppuak dottolkad ag oolagppa ii daaeg, ag Yawe waappa daan, Nug oɗe dim lamidppig. Ag anam heeg, Nug ag uug nau dooppignu, Nug ooppa guittak doyom.

¹⁷ Haen amuppa Amon danab ah dilag ikki danab ag Amon daup danab onilagppa eeg qagmena, ag Israel ele ban baula hekkulagnu, ag haen tutu dayaknu aab, Gileat appa kalappig. Ag anam heeg, Israel dilag daup ag qagmena, Mispa appa haen tutu dayaknu aab kalappig.

¹⁸ Ag Mispa appa daanna amu, Gileat ikki danab ag akka akka appig. “Aun nug tatam banelag ukka, Amon ele ban hekku amu, nug Gileat danab ah gumadkku,” aon appig.