Ikki Danab 1 - Nobonob Baibel

Juda, Simeon danab ele, ag danab ahilag wanppa daappig am eɗadppig

¹ Josua mauhe dimppa amu, Israel danab ah ag Yawe oɗ mettan appig. “Israel dilag huu okkai atten am tatam banelag ukkeb, Kanan danab ele ban hekkulag?” aon oɗ meppig.

² Ag anam oɗ meeg amu, Yawe nob ma aum. “Juda danab ag tatam Kanan banelag gokkulag. Antteg! Da heppi, ag geha danab wan amuppa daatteb ele eɗadkkulag,” awa aum.

³ Yawe anam a amu, Juda ag lailkad, Israel dilag huu okkai Simeon dilag appig. “Ag ig ou iqappeg, ig oh Kanan danab, ag wan Josua, am laala ele om ena yaakppa ig megappig, ag amuppa daatteb amu, ig ag ele ban hetu! Ag ig ehanigppeg, ig Kanan ag wan, Josua laala ele ag megappigppa daatteb eɗattota, qinob ig ag ehanadpput, ag ig ele oh, ig Kanan ag wan Josua laala ele ag madappigppa daatteb eɗadkkunig,” aon appig. Juda danab ag anam appig amunu, Simeon danab ag ahaeg, Juda danab ele oh goppig.

⁴ Haen Juda danab ag banelag goppig amu, Yawe Nug he, Kanan danab, amu Peres danab ele Juda eppelagppa daaegeg, Juda ag aab Besek guguittak appa kekeɗnu ban danab 10,000 aqappig.

⁵ Juda ag ban amu henana, ag Besek appa Adoni Besek, nuhikkud daup ele, amuam Kanan danab, Peres danab ele amu, ag nug, ag ele anadna, ag ag ele ban hena, ag eɗadna heeg, Adoni Besek, Kanan danab, Peres danab ele ag oolppig.

⁶ Am Adoni Besek nug oola ukkom, amge Israel ag nug lamidna aɗan aon, ag nug eppekuɗ tanig, am baekuɗ tanig ele otaɗadppig.

⁷ Ag amu heeg, dimppa Adoni Besek nug aum. “Da king 70 ele ban heta eɗatte, ag eppelkad tanig, amu baelkad tanig ele otaɗadmi. Da amu hein malai amu, ag ee huppu dahil balal waappanu amu lappig. Gemu Kayak Nug da ahilagppa heminu noob meɗom,” awa aum. Am Juda, Simeon danab ele ag nug aon Jerusalem ukkaeg, nug appa mauhom.

⁸ ⌊Amge amu ii nak,⌋ Juda danab, ag Jerusalem banelag gona, ban hena aoppig. Ag danab ah oh appa daappig ele amu aqan, aab okkai amu manaeg ewom.

⁹ Manaeg ewe, appanu amu, Juda ag laih yau uɗitteppanu gona, appa Kanan danab ag atu qauko qauko ele appa daanna, amu wan maha onig Negeb appa daanna, aria qauko Juda wan ooppa qaban uɗitteppanu daatteb, qauko amu diigppa qauko nakok daattebppa ele daappig amu, Juda ag gona, ag ele ban hekkulagnu goppig.

¹⁰ Amu Juda ag banelag gona, Hebron, anukkan onig am Kiriat Arba amu, ag appa noeg, Kanan danab ag appa daappig, ag ag ele ban heppig. Hebron appa amu ag Sesai, Ahiman amu Talmai ele, ag ag, ahilkad ban daup ele eɗadppig.

¹¹ Ag eɗattona, appanu ag danab Debir appa daappig, ag banelag goppig. Anukka danab ag Debirnu, Kiriat Seper adappig.

¹² Haen amuppa amu, Kalep nug aum. “Danab aun nug banelag ha, Kiriat Seper eɗadkku amu, da nug geha da aɗel Aksa medappi, nug wau daakku,” awa aum.

¹³ Kalep nug anam aum amu, nug amag Kenas bekka Otniel nug aab amu eɗittom amunu, Kalep nug, nug aɗeg Aksa, Otniel wau daakkunu aakku nug mettom.

¹⁴ Aksa nug Otniel awowa, nug wan laa elenu mameg oɗ medakkunu oo heum amunu, nug mameg gumitta ukka, ahilag kobolppa mameg ena dookkunu nug nuhig donki attannu oola no, Kalep nug nug oɗ mettom, “Da nahipnu aɗi hekkul?” awa aum.

¹⁵ Kalep nug anam oɗ metta a amu, nug aum. “Na keeke enanag laa ele meɗakkutnu ool daatte. Na Negeb appa wan meɗame amunu, na gemu dahilnu ii helom bia me, na ehaniɗna autna aona, na lenag ena ele meɗakutnu unuqidttem,” awa oɗ metta unuqittom. Nug anam hedakkunu unuqittom amunu, Kalep nug le qeppuɗia bak attan, honap ele oh mettom.

¹⁶ Am Ken danab ah ag am Moses tana, nug buɗub. Amu haen Israel dilag huu okkai Juda ag Jeriko uun ahaeg amu, Ken danab ag ele ahaeg gona, Judanu atu taɗakppa wappig. Ag Negeb appa, Arat aab guguittak, Juda danab appa wan aon daappig amu, ag ag oolagppa nona daappig.

¹⁷ Juda danab ag kekeɗ amu eɗattona, ag Kanan danab Sepat daappig ele, ag lailkad Simeon danab ehanadna, banelag goppig. Ag oh gona hena, ag aab okkai amu heeg, aab amu Yawenuib nuhig pelemppa daye, ag aab amu onig Horma ataɗppig.

¹⁸ Amu tuɗittak, Juda ag aab Gasa, Askelon, Ekron, amu wan aab amu taliliattak ele aoppig.

¹⁹ Yawe Nug Juda danab ele daappig amunu, ag Kanan danab ah ag laih qauko qauko ele daappig eɗadna, ahilag wan ele aoppig, amge Kanannu danab ah uɗem okkaippa daappig, ag bannu karis aenppa hak ele amunu, Juda aɗi ⌊ag ag lamadkkulagnu elele oolagppa genab ii doon,⌋ ag danab amu ii lamadppig.

²⁰ Am Moses nug Hebron aab Kalep aokkunu amegppa nai anan qakkom amunu, Juda danab ag nug medappig. Mettaeg amu, Kalep nug danab ah appa daappig lamatta eɗattom. Danab ag appa daappig am Anak bekkod ewam, ag buɗulkadppan danab.

²¹ Kalep nug ag lamattom, amge Israel dilag huu okkai Benyamin, ag Jebus danab ⌊ag eɗun gona Jerusalem daappig ele⌋ ag amu, ag ii eɗadppig. Benyamin danab ag Jebus danab ii eɗadppig amunu, Jebus danab ag Jerusalem appa, Benyamin danab oolagppa aakku daappig. Ag haen amuppa anam hena daaegeg uɗie, gemu ⌊nai imu yaak haenppa⌋ ele, ag aakku daatteb.

Keeke Israel dilag huu okkai laala ag heppig

²² Juda, Simeon ele aa anam hepiɗ, amu Josep buɗub ag Betel aab banelag ukkaeg, Yawe Nug ag ele daappig.

²³ Amu Josep buɗub ag amu henana, ag lokkumakppa atu italak danab matteg, Betel, anukka danab ah ag aab amunu Lus adappig amu, ag Betel italkkulagnu appa oinna,

²⁴ lokkumakppa atu italak danab ag danab laa aab okkaippanu dimittim uɗiyeye anidna, ag nug amegppa appig. “Na aab okkai imu ooppa noaknu ib ippunigppe amu, ig nahipnu oo bodoettak doot, na ehanidpput, nahip-ppa eheɗ laa ii bema,” aon appig.

²⁵ Ag anam appig amunu, nug ag ib ippuanatte, Josep buɗub ag uɗin, danab ah aab okkaippa daappig amu, ag ag oh aqappig; danab ib ippuanattom ele nug baekkudppa oh ele ag aakkuib ii aqappig.

²⁶ Amu beum dimppa amu, danab amu nug Hit dilag wanppa ukka, nug appa aab okkai laa kalom. Nug aab amu onig Lus ataɗom; onig amuam daye uɗie, gemu ⌊nai imu yaak haenppa⌋ ele anamib daatte.

²⁷ Amu Israel dilag huu okkai Manase ag danab ah Betsan, Tanak, Dor, Ibleam, Megido, amu aab naunau aab amu taliliattak daappig ii lamatteg, Kanan danab amu ag ahilag wan ii uun oolna goppig. Kanan danab ag aguppa daaglagnu dabmak aoeg ɠagattag eppe heppig amunu, Manase danab ah ag ii lamadppig.

²⁸ Ag anam heeg ukke, haen Israel ag ɠagattag ele bena daanna amu, ag Kanan danab ah duttunadna heeg, Kanan ag maɗi nid maɗi ah ele daan, uɗat heppig, amge Israel ag lamadppeg, Kanan danab ah ag wan amuppa iinab daamnanu ii heppig.

²⁹ Amu Israel dilag huu okkai Epraim ele, ag Kanan danab Geser daappig ii lamatteg, Kanan danab ah amu ag wan ahilag ii uun oolna goppig. Ag tuɗidna, aguppa Israel oolagppa daappig.

³⁰ Laa ele amu, Israel dilag huu okkai Seblon, ag Kanan danab Kitron, Nahalal ele appa daappig amu, ag ag ii lamatteg, Kanan danab ah amu ag ahilag wan ii uun oolna goppig. Ag ii lamatteg, Kanan danab amu ag Seblon oolagppa daappig, amge Seblon ag ag duttunatteg, ag ahilag uɗat heppig.

³¹ Amu Israel dilag huu okkai Aser ele, ag Kanan danab Ako, Saidon, Alap, Aksip, Helba, Apik amu Rehop daappig ii lamatteg, Kanan danab amu ag ahilag wan ii uun oolna goppig.

³² Danab ah Asernu ag Kanan danab ii lamatteg, Kanan danab ah amu ag wan ahilag ii uun goppig amunu, Aser ag Kanan oolagppa aakku daappig.

³³ Israel dilag huu okkai Naptali ele ag Kanan danab Betsemes, Betanat ele appa daappig amu ii lamatteg, Kanan danab amu ag ahilag wan ii uun oolna goppig. Naptali danab ah ag Kanan danab ah amu oolagppa daappig, amge danab ah Naptalinu ag Betsemes, Betanat danab ah ele duttunadna heeg, ag ahilag uɗat heppig.

³⁴ Am Israel dilag huu okkai Dan amu, Amo danab ah ag Dan danab ah ag uɗem naɗippa nena daaglagnu uun, nemananu wagai mena heppig amunu, Dan danab ah ag wan qauko qauko eleppa daappig.

³⁵ Anam amu, Amo danab ag ele qauko Heres, aab Aiyalon, amu Salbim daaglagnu dabmak aoeg ɠagattag eppe heppig, amge haen Josep buɗub ag ɠagattag bena, ag Amo danab ah amu ele duttunadna heeg, ag ahilag uɗat heppig.

³⁶ Aria, Amo dilag wan tom, amuam qauko ikki oppoɗu noak onig Apiap, appanu wana, Sela wana ukkom.