Hosea 8 - Nobonob Baibel

Israel danab ah ag kobol nau heppig amunu, ag bu aoglag

¹ Yawe Nug atte. “Dahilad danab ah ag uug uɗitte dooglagnu na trampet na ottinppa me! Ai igel laa doɗ laa aokkunu notte bia, kekeɗ ag da, Yawe, ag dahilad danab ah aqaglagnu ban haknu uɗitteb. Danab ah dahilad ag nug tituana nai qakkak nai da ag mattami tippalna; dahil ɗo tappaeg neum. Diig amunu amu, kekeɗ ag uɗitteb.

² Gemu Israel danab ah ag da unuqiɗna atteb. ‘Na ihinig Kayak daattem, ig na dooidttem,’ atteb.

³ Anam amge, Israel danab ah ag kobol ena haknu uuppig; aakku gemu amu, ahilkad kekeɗ geha ag lamadkkulag.

⁴ Israel danab ah ag da oɗel ii aon, king tituantteb. Ao, ag da oɗel ii aon, ag anuqak danab ele otialadtteb. Ag ahilkad gol, silwa ele akkan, amuppa ag ahilkad kayak hambuppuak dottolkad hadatteb; ag amu heppigppa ag akka ahilag dayak loppaɗtteb.

⁵ O Samaria danab ah, ag makau gaiɗ dottog heppig, ag amu buɗippeg ukkaɗ! Israel dilagnu amu, da ahilagnu oo nauhak okkainab doottem. Ag beɗulagppa aab iitta ele daaglagnu elele iitta; amu haen gane laa ele ukkeb, ag anamib daaglag?

⁶ Israel danab ah oolagppan danab uɗat amu haknu doyak okkai ele nug eppegppa makau gaiɗ dottog amu heum. Amuam Kayak iitta! Diig amunu geha danab ag loppaɗppeg, Samaria dilag makau nag dottog amuam qatti qatti nekku.

⁷ Israel danab ah ag kobol nau huanak hetteb amunu, ag geha bu naunab aoglag. Amuam laa nug ulah eppalo, amge meu awak haenppa nug ulah kilibob aolo, amubia. Geha bu qak Israel danab ah dilag, amuam ee nug ena ii bema, meu ele ii oma. Meu laa ololob amu, wan laihnu danab ag akkan lalob.

⁸ Israel danab ah ag geha wanppan wan laala oolagppa ukkan daaglag. Ag waa ena iitta, laa amunu ena ii dootte, ag amubia daaglag.

⁹ Aɗinu? Ag Asiria gona, ag ehanadkkulagnu oɗ madappig; ag am donki dakkuɗ laa nug mauhnoak, laih ukka, eɗua uɗia, hamu hamu oitte bia daatteb. Israel danab ah ag am ah laa nug nukka beɗu awa, danab matte, nug ele niitteb, ag amubia hetteb.

¹⁰ Israel danab ah ag ehanittak aoglagnu wanppan wan laalappa goppig, diig amunu haen elab iitta da ag diie, king ɠagattag okkainab ele amu, da ag nug waappa maadkkul. Nug geha eheɗ hattebeb, ag digmena, kuɗum gemu daatteb bia ii daamna.

¹¹ Israel danab ah ag ib etta hipunin haknu ofa haknu qaɗab kuɗumnab hadappig, ⌊amge ag da ii dim lamiɗppig⌋ amunu, qaɗab amuam hipunin haknu aben bena daappig, gemu ele anam daatteb.

¹² Da dahil ɗo oh ag mattami me, ag ɗo amu ii tonadtte bia hetteb.

¹³ Israel danab ah ag doɗ main, da meɗatteb. Ag mana mettak hena, ag teppu latteb, amge da, Yawe, da ahilagnu ena ii doottem. Gemu da ahilag hak naunu dabmein; da hipunin ag heppignu bu madakkul. Ag geha eɗun, Isip gokkulag.

¹⁴ Da, Yawe, da Israel danab ah hattami, amge ag dahilnu daulag atie, ag king laulkad okkai okkai buualadppig daatteb. Juda danab ah ag ⌊kekeɗnu baɗan,⌋ ag aab kuɗumppa aɗ keeke heppig. Ag anam heppig, amge da heppi, aab dittia, ahilkad aab okkai, amu ahilkad aab okkai aɗ ɠagattagnab ele eokku.” Yawe Nug anam awa atte.