Hosea 7 - Nobonob Baibel

¹ Da heppi, Israel bau mekkunu hettem. Da anam hettem, amge da ehanidkkulnu heiyi, Israel dilag hipunin am miagib daatteb. Ao, da ehanidkkulnu heiyi, Samaria danab ah dilag ɗo tippalak miag atiak daatteb. Aɗinu? Israel danab ah ag hambuppuak henan daatteb. Ao, ag laa laulkad loppaɗadna nona, keeke yab aotteb. Ge, ag oohona, ibppa danab ah dilagppa keeke yab agatteb.

² Anam, amge Israel danab ah ag da neekkatte dayeye, ahilag eheɗ haknu oh dabmein daattem amu, ag amu ii dootteb. Ag haen oh hipunin heegeg tonadtteb; haen oh hipunin amu da noolppa dayeye, da anadttem.

³ Am danab ah ag ahilag kobol nau heegeg, king nug amunu enanagnab dootte; anuqak danab ag ele danab ah dilag hambuppuaknu enanagnab dootteb.

⁴ Danab ag oh gappai hetteb. Ag beɗulkad am ah ele niiglagnu duttunadtte; ag duttunak amu doyakib dootteb.

⁵ King binag maknu qagmak gamag ahak elenu deɗppa, king bekkod ag wain laegeg, kaaka aqatte, king nug awa awa qettak danab ele oitteb.

⁶ King laikkud amu, ag king nuhigppa kobol nau, aab ewak naɗi bia oolagppa dabmetteb amunu, ag king doomanu henan, nug gumidna gotteb. Ge, tuqan ag dabmeegeg ukke, buttua laippun hetteb; aab tuqan nakok nakokib ewe ukke, wagɗe aab baula mak dimppa huana eotte, amubia.

⁷ Ag oh nau hekkulagnu duttunak okkai doon, aab huana ewawa, keeke he iitta mette bia, ag heeg, ahilkad danab okkai ag iitta metteb. Ao, ahilkad king oh ag nena qeegeg, laa nug da ii unuqiɗtte.

⁸ Israel danab ah ag danab ah wanppan wan laih laihnu Kayak ii dim lamidtteb, ahilag huu oolagppa daatteb amu, ag ag ele laippu daatteb. Danab ah amu ag kobol nau heeg anadna, ag ele anamib hetteb. Israel danab ah ag am ee laa ewa auta ii awe, ena ii daatte, ag amubia, ena ii daatteb.

⁹ Ag wan laihnu danab ah kobol nau hetteb, ag amubia heegeg, ahilag ɠagattag bodoettaladtte, amge ag amu ii dootteb. Ao, Israel am danab kaino laa nug ikki uɗug nakok umimi qak ele, amge nug amu ii dootte, Israel danab ag amubia daatteb, amge ag amu ii dootteb.

¹⁰ Israel danab ah ag am beɗuppa tak danab ah. Ahilag beɗuppa tak kobol am he, ag eheɗ hetteb am miag atiak daatte, amge ag Yawe, ahilag Kayak, ag eɗun, Nug waappa daaglagnu, o Nug mattin anidna dim lamidkkulagnu ii hetteb.

¹¹ Israel danab ah ag am ai kaaka ag aɗi keekenu oolag hette aolobnu, ag watteb, dotteb henana oitteb, amubia Israel ag hetteb. Tatam amu ag Isip dilagppa ehanittak aoglagnu oɗ meppig; appanu amu, ag Asiria dilagppa, ehanittak aoglagnu goppig.

¹² Amge da geha ag gobeppeg, da uhui dahil ein diiadkkul. Ge, da ag ai hagagaɗna gonana, pelemppa waeg, uhui mameg diitte, da ahilagppa anambia hekkul. Yo, ag aɗi kobol nau heppig amu, da amunu bu aqadkkul.

¹³ Israel dilagnu am gadonnab gadon. Aɗinu? Ag da uuiɗna oitteb! Israel ag nauhkkulag. Aɗinu? Ag tappe nak hena, da dim ii lamiɗtteb. Da ag qagaiettakppanu eɗua uhuqak hekkulnu hettem, amge ag hambuppun, dahilppa ehanittak aoglagnu ii hetteb.

¹⁴ Ag oolag unuqagnabppanu da ii unuqiɗtteb. Iitta. Ag niiak balal attan daanna gaatteb. Ao, ag ee aeg bau, wain ele da madakkulnu unuqittak hekkulagnu qagmetteb, amge ag da dimeɗatteb.

¹⁵ Da ag attem hekkulagnu ippuanatte, ɠagattag aqami me, ag gemu dahilnu eheɗ hena dimeɗatteb.

¹⁶ Da am Kayak Attannab Laa Oh Eɗattak daattem, amge da ag ehanadkkulnu gumiɗna ii uɗitteb. Ag am lat tanig laa lat doɗo pehetta ii ette, ag amubia daatteb. Israel dilag ikki danab ag dahilnu eheɗ doon dahil nai tappaeg ne oippig amunu, kekeɗ ahilkad geha ag qep elabppa aqaglag. Diig amunu Isip danab ah geha ag imadkkulag.” Yawe Nug anam aakku atte.