Hosea 6 - Nobonob Baibel

Oo eɗuaknu onigppa ewak

¹ ⌊Amu Israel ag oolag unuqagppanu da aniɗna dim lamiɗkkulagnu mattiɗna, ag akka akka akkulag.⌋ “Ahappeg, ig eɗut, Yawe waappa daatu! Aɗinu? Nug ig doɗ layag beɗu pattiɗe, huppu naunau nette bia guittak okkai naɗi mekkom, amge Nug heeb, ig ena daagnig. Genab, Nug ig bu iqe, beɗunkad ihi mettom, amge Nug ig ihinkad nau bappaidkku.

² Deɗ aɗit uueb, Yawe Nug heeb, ig bau ena daagnig. Yo, deɗ ewamppa ig Nug noobppa daagnignu Nug heeb, ig bau, ena daagnig.

³ Ig Yawenu doyaknu wagai metu! Ao, ig Yawe doognignu wagai metu! Ig anam hekkunig amu, aam nug genab buttua hanhan bette, genab amubia, Yawe Nug uɗia, ig ehanigkku. Ge, gu oug haen iitta metteppa hanhan nette, amubia Nug genab uɗia, ig ehanigkku.” Israel ag anam akkulag.

⁴ ⌊Am Yawe Nug atte.⌋ “Ag Israel danab ah, da aɗi heppi, ag kobol ena hekkulag? Ao, ag Juda danab ah, da aɗi heppi, ag kobol ena hekkulag? Oo mauhaknab kobol ahilag dahilnu am buttua buttuɗai paha oppia gotte bia iitta mette. Yo, oo mauhak kobol ahilag dahilnu am buttua baito paha qaɗaiedatte bia iitta mette.

⁵ Diig amunu da hei, dahilad propet ag ahilag naippa hatteg nauhppig; danab nug layag beɗu qep-ppa he nauhtte bia. Yo, da dahil naippa ag eheɗ hatten, mauhkkulagnu ippunadmi. Tuqan nug amun genab dim lamidtte, amubia dahil bu mattak ag genab aqadkku.

⁶ Amunu diig am, da ag laanu oolag gai-iitta doon, oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem. Ao, ag da, Kayak, ag da genab dooiɗkkulagnu da anuqak doottem. Da ag manaknu ofa, da meɗaglagnu anuqak ii doottem,” awa atte.

⁷ Yawe Nug anam ana, Nug Israelnu tuɗitta aum. “Adam nug dahil nug tituana nai qakkak tippalom, amu Israel danab ah, ag ele anam aakku heppig. Ag da ippunadmi bia, da dim lamiɗkkulagnu uun heppig.

⁸ Gileat, ⌊mana mettak danab kuɗum daattebppa,⌋ aab amuam nau hak danab aɗi dilag aab okkai; ag danab ah aqattegeg, tiilag ne, qaɗeppa oinna, uuadna ukkaegeg, ag baelag dottog tiig ele miag aakku daatte.

⁹ Danab ag ban hena, danab ah aqan, ahilag keeke aɗadkkulagnu atu daugppa lokkumna daatteb bia, mana mettak danab ag oohona, Sekemnu ib ukkakppa danab makkuɗatteg mauhtteb amunu, ag eheɗ naunab nau hetteb.

¹⁰ ⌊Ag anam hetteb amunu,⌋ da kobol naunab nau Israel appa anidmi. Israel danab ah ag kayak hambuppuak noolagppa dup nona binalag menan daatteb. Ge, Kayaknu neekkakppa ag oolagppa dubuttid teum daatte.

¹¹ Anam, amge O Juda danab ah, ag ele geha bu aoglag.” Yawe Nug anam aakku atte. Amu Yawe Nug tuɗitta atte. “Da danab ah dahilad ehanadppi, ag eɗun ena daaglagnu ool daatte.