Hosea 5 - Nobonob Baibel

Israel dilag ikki danab dilag na qak

¹ Yawe Nug inam ele atte. “Mana mettak danab, ag nai imu doyeg! Ao, ag Israel dilag ikki danab oh, ag daulag human, doyeg! Ge, ag king baegppan oh, ag daulagppa doyeg! Aɗinu? Danab laa pelem ma, doɗ aotte, amubia ag Mispa appa, kayak hambuppuak dottolkad noolagppa dup nona binalag mena, ag danab ah laa ag ele amu hekkulagnu omalatteg, hipuninppa noppig. Ao, ag danab laa nug uhui ma, ai aotte, amubia ag Tabor appa ag kayak hambuppuak dottolkad noolagppa dup nona binalag mena, ag danab ah laa ag ele amu hekkulagnu omalatteg, hipuninppa noppig. Anam amunu, bu awaknu nai imuam ahilagnu.

² Ag am tappe nak danab, ag nau huanaknab heppig amunu, da ag toliatten, bu madakkul.

³ O Israel danab ah, ag attem daatteb amu, da doottem! Ge, ahilag hak am dahil neekkakppanu lokkumak ii daatte. Ag am ib baag ah laa nug gamu uuitte, danab laa ele oittep, ag amubia da uuiɗppig. Ge, ag am dubuttid naunab nau ele.” Yawe nug anam atte.

⁴ Israel buɗub ag kobol eheɗ henan daanna, ag eɗun, Kayak, ahilag Kayak, ag Nug waappa daaglagnu dabmak ii aotteb. Ao, ag am ah laa nug gamu uuitte, danab laa ele oittep, ag amubia duttunak doon hetteb, amunu ag Yawe dabmenan ii oitteb.

⁵ Israel danab ah ag am beɗuppa tak kobol hetteb, amu kobol amuam naippa yaaladtte. Israel danab ah, ahilag wan onig laa Epraim, ag hipunin henan, taataɗ qedatteb, Juda danab ah, ag ele oh laippu taataɗ qedatteb.

⁶ Ag geha Yawe anidna, Nug dim lamittaknu Nug mattinna, ag ahilkad sipsip, meeme, amu makau main, Nug mettaglagnu akkan uɗiglag, amge ag Nug ii anidmana; Nug nukka awaitta, piɗe ukkom daatte.

⁷ Danab ah Israelnu, Judanu ele ag Yawe ippuanattom bia Nug dim lamidkkulagnu uun hetteb. Aɗinu? Ag ah laa nug gamunab iitta ele nid menuattom, ag nug bia daatteb. Israel, Juda danab ah ele ag kayak hambuppuak dilagnu dup nona binalag meppig amunu, haen elab iitta, ag nauhna, ahilag en ele iitta mekkulag.

⁸ Kayak atte. “Gibea appa ag trampet iwaleg! Rama danab ag kekeɗ uɗitteb dooglagnu ag trampet appa iwaleg! Betawen appa ag ban haknu ewak heig! O Benyamin danab, ag ban hak amuppa anuqna ukkeg!

⁹ O Israel danab ah, da keeke laa ag oolagppa genabnab bekkunu ai dootteb; amuam ahilag bu awak deɗ uɗieb amu, ahilag wan am nauhakib daakku.

¹⁰ Am ikki danab Judanu, ag danab ag ⌊eheɗ hena, wan laa aoglagnu⌋ wan tom mauteg, laih gotte, ag amubia hetteb; da oppoɗi bak dahil le bai laappa ooltte bia ag qaɗelagppa gokkaɗkkul.

¹¹ Israel danab ah ag kayak hambuppuak dottolkad noolagppa dup nona binalag menan daan, uuglagnu uuppig oitteb, amunu geha kekeɗ ag eheɗ hattaglag. Ge, ag dahil bu mettak mattaglag.

¹² Geha da Israel dilagppa dittuɗ lamen otule nauhtte bia heppi nauhkkulag. Ao, da Juda dilagppa ad beɗa nauhtte bia heppi nauhkkulag.

¹³ Amu Israel danab ah ag ahilag oɗe anidna doon, ag Asiria dilag king ehanadkkunu dabmena oɗ medappig. Ge, Juda danab ah ag ag ihilkad anidna, ag Asiria dilag king okkai ehanadkkunu dabmena oɗ medappig. Ag anam heppig, amge Asiria dilag king nug heeb, ag ahilag oɗe iitta mekkunu elele iitta. Ao, Asiria dilag king nug heeb, ag ihilkad iitta mekkunu elele iitta.

¹⁴ Aɗinu? Da laion laa bia Israel danab oolagppa daakkul. Ao, da laion bau bia Juda danab oolagppa daakkul. Da laion nug doɗ awa kattiɗe, huppu naunau nette, amubia geha da Israel, Juda ele kattiɗatppi, naunau nepeɗ, da anam uuatppi daaglah. Ao, da laion ɠagattagnab nug doɗ laa qewowa, lakkunu mawa gotte, da amubia heppi, laa ehanatkkunu laa ii daama.

¹⁵ Da dahilad danab ah guittak mattoya, da eɗue ukken, da daattemppa daappi ukkeb, dahilad danab ah ag, ‘Ig eheɗ hemut, ig hipunin ele,’ dooglag. Haen amuppa ag da aniɗna dim lamiɗkkulagnu mattiɗkkulag. Ge, ag uug nau doon, ag oolag unuqagppanu da aniɗna dim lamiɗkkulagnu mattiɗkkulag,” awa aum.