Hosea 4 - Nobonob Baibel

Yawe Israel naippa yaalattom

¹ O Israel danab ah, ag ahilag wanppa daatteb amu, Yawe Nug ag aakku diia, hettoɗiakppa waum amunu, ag Yawenu nai doyeg! Nug ahilagnu atte. “Ahilag wanppa amu, oo metta ii uuak kobol, oo mauhaknab kobol ele ii daaeheh, ag ele Kayak nakok laa ii dootteb.

² Ag ahilag wanppa nai ɠagattag qetta mattiowa, nai amu ii dim lamittak kobol, hambuppuak kobol, laa qe mauhak kobol, yabhok kobol amu ewau pakkua gappai hak kobol ele ambak daatteb. Ag ɗo waappa iinab daatteb. Ag laa makkuɗona, haen elab iitta, laa ele makkuɗtteb.

³ Diig amunu ahilag wan atu taɗatte. Danab ah appa daatteb amu, ag mauhegeg, doɗ dakkuɗ, ai, kakai keeke, ag ele mauhadtteb.

⁴ Amge laa nug layagnu, ‘Uug beumnu aab am, nug beɗuppa daatte,’ aib aum! Ge, laa nug laa dilagnu, ‘Ag beɗulagppa aab daatte anidttem,’ aib aum. Ag mana mettak danab, da ag naippa yaaladttem.

⁵ Ag amunppa, tuqanppa ele taataɗ qedatteb, amu propet ag ele anamib hetteb amunu, da geha ag Israel, da ahilag wan heppi nauhkku.

⁶ Dahilad danab ah ag da ii dooiɗtteb amunu, laa ag heeg nauhtteb. Mana mettak danab ag, ag da dooiɗaknu uuppig amunu, gemu da ag, ag dahilad mana mettak danab daaglagnu geɗadttem. Ge, ag da, Kayak, ahilag Kayak, ag dahil ɗo nai ii dabmeppig amunu, da geha nid naunau ahilkad ii dabmadapa.

⁷ Mana mettak danab kuɗumnab bekkulagnu benana, ag hipunin huanaknab ebqak amubia dahilppa ele tuɗidna heegeg uɗie, gemu ele hetteb. Anam amunu, da heppi, ag binalag am eɗua, uɗa nak nau guittak ele daakku.

⁸ Haen danab ah ag hipunin hetteb amu, ag hipunin heppignu mana mettak hetteb. Ag anam heegeg amu, mana mettak danab ag ahilag ee amuppanu aɗadna diitteb. Ag ee aɗadkkulagnu daatteb amunu, danab ag nau heeg, ag gamalag ahatte!

⁹ Anam amu, da danab ah laa oh bu madakkul, amubia da mana mettak danab bu madakkul. Ao, da geha mana mettak danab, amu danab ah ele, da ag oh ahilag hak nau amunu bu madakkul. Ge, da geha ag aɗi heppignu nob madakkul.

¹⁰ Ag oh ag ee lakkulag me, ag enug aqakppaib daaglag. Ag gappai hekkulag, amge ag nid iitta daaglag. Aɗinu? Ag da, Yawe, ag da uuiɗna, kayak hambuppuak noolagppa dup nona binalag metteb. Kobol amuam ewau oolahppan laa nug ahe, laa ele gappai hettep, am amubia; amu ag Israel, ag dahilppa anam hetteb.

Kayak hambuppuak noolkadppa dup noa binag mak am kobol nau

¹¹ Israel danab ah, ag wain bau, alag ele laegeg, wain amu he, ag dahilad danab ah, ag diignu doyak tutukku iitta ele oitteb.

¹² Am dahilad danab ah ag dabmak aoglagnu keeke adppa hoyak oɗ madatteb. Ao, ad maha ag ulum nai madatte! Aɗinu? Ag ahilag kayak hambuppuak noolagppa dup nona binalag mekkulagnu oo hak nau doon hetteb amu, ahilag oo hak nau amuam he, ag ib apiɗidna gotteb; ag da, ahilag Kayak, ag da ippunadmi bia da dim lamiɗkkulagnu uun hena, ag kayak hambuppuak dim lamidna oitteb.

¹³ Danab dahilad ag qauko attan kayak hambuppuak dottolkad noolagppa, ag amu dilagnu mana mettak hetteb. Ao, ag qauko nakokppa tena, ad ok, ad popla, ad terebint ele waalkadppa lokko ena daatte, diig amunu ag aguppa daanna, ag kalu danab ile muttuɗig enanag bette ele, ag kayak hambuppuak dilagnu ilatteb. O dahilad danab ah, diig amunu ag aɗelkad ag ib baag ah betteb. Ao, ag ahipalkad, nid danab waalkad amu, ag laa ele ewau pakkua gappai hak kobol hetteb.

¹⁴ Amge ahilkad danab ag ele nau anamib aakku hetteb. Ag ib baag ah ele niitteb. Ao, ag ib baag ah, ag kayak hambuppuak dilag mettid lag nakokppa ag ahilag uɗat amu hettebppa appa, ag ag mana mettak hena, ag ele niitteb. Anam amunu da geha ag dahilad danab ah, da ag aɗelkad, ag eɗun, ib baag ah bena oitteb amu, diig amunu da ag aɗelkad bu ii madapa. Ao, da geha ag dahilad danab ah, ag ahipalkad ele, ag eɗun, ewau pakkua gappai hak kobol hetteb amu, diig amunu da ag ahipalkad bu ii madapa. ⌊Dabmeig!⌋ Ag danab ah ag diignu doyak tutukku iitta ele daatteb amu, ag nauhkkulag.

¹⁵ Ag Israel, danab ah ag ewau pakkuna gappai hetteb, amubia ag da uuiɗna, kayak hambuppuak laala dilagppa dup nona binalag metteb, amge Juda danab ah, ag anam aib heppig. O Juda danab ah, ag kayak hambuppuak noolagppa dup nona binalag mekkulagnu Gilgal aib goppig. Ao, ag amu hekkulagnu Bet Awen aib goppig. Ge, ag kayak hambuppuak noolagppa dup nona binalag menana, ag ahilag nai ɠagattag qettan, ‘Yawe genab bau daatte, genab amubia da inam inam hekkul,’ aib anan heppig.

¹⁶ Israel danab ah ag oɗe dim lamidmananu dabmak ahilag ɠagattag eppom daatte. Ag makau balat laa oɗe dim lamittaknu uua, nuhig dabmak ɠagattag eppe daatte bia daatteb amunu, Yawe Nug ag aɗi keeke ag bau ena daaglagnu madakkunu elele iitta. O gadon, danab nug sipsip gaiɗ hibguitta ii hette ee medette, ena daakkunu elele, amge Yawe Nug amubia Israel dilag anambia hekkunu elele iitta.

¹⁷ Israel danab ah, ag kayak hambuppuak dottolkad noolagppa dup nona binalag mekkulagnu oolag okkai daatte; ag gumadna, aib goppig!

¹⁸ Israel danab ag wain ahilag laeg iitta mette me, ag tuɗidna, kayak hambuppuak laulagppa kayak hambuppuak noolagppa dup nona binalag menana, ag ib baag ah appa uɗat hetteb ele niitteb. Ge, Israel dilag ikki danab ag uɗa nak kobolnu enaib dootteb.

¹⁹ Am ag anam hetteb amunu, ag geha kilibob ɠagattag keeke diia, laih gotte, amubia ag nauhkkulag. Ao, ag kayak hambuppuak dottolkad dilagnu mana mettak hetteb amunu, ag uɗa nak aoglag.” Yawe Nug anam atte.